STUDY ARTICLE 23
SONG 2 Nem Bilong Iu Hem Jehovah
Hao Important Nao Nem blo Jehovah lo Iumi?
“Jehovah hem sei, ‘Iufala nao olketa witness blo mi.’”—ISA. 43:10.
MAIN FOCUS
Lo disfala article bae iumi storyim wat iumi savve duim for mekem nem blo Jehovah kamap holy and free from blame.
1-2. Hao nao iumi savve nem blo Jehovah hem important lo Jesus?
NEM blo Jehovah hem barava important lo Jesus. Hem nao main wan wea mekhae lo nem blo Dadi blo hem. Olsem iumi lanem lo last article, Jesus hem willing for dae for nem blo Jehovah and for pruvim wat kaen God nao Hem. (Mark 14:36; Heb. 10:7-9) And bihaen lo datfala Wan Thousand Year Rul blo Jesus, hem bae willing for givim bak lo Jehovah evri paoa wea hem kasem for rul, mekem nem blo Jehovah kamap holy. (1 Cor. 15:26-28) And tu, love wea Jesus garem for nem blo God showim hao hem barava fren klos witim Dadi blo hem. Datwan barava pruvim dat Jesus lovem Dadi blo hem.
2 Jesus kam lo earth lo nem blo Dadi blo hem. (John 5:43; 12:13) Hem talemaot nem blo Dadi blo hem lo olketa follower blo hem. (John 17:6, 26) Hem teach lo nem blo Jehovah and hem iusim datfala nem for duim olketa mirakol. (John 10:25) Jesus askem Jehovah tu for lukaftarem olketa disaepol blo hem “bikos lo nem blo [Hem].” (John 17:11) So if Jesus ting olsem abaotem nem blo Jehovah, hao nao samwan fit for sei hem tru follower blo Christ, bat hem nating savve lo nem blo Dadi blo Christ or iusim datfala nem?
3. Wat nao bae iumi storyim lo disfala article?
3 From iumi olketa Christian wea traem best for followim footstep blo Jesus, iumi barava tinghae lo nem blo Dadi blo hem. (1 Pet. 2:21) Lo disfala article, bae iumi lane abaotem hao Jehovah givim nem blo hem lo olketa wea talemaot “gud nius abaotem Kingdom.” (Matt. 24:14) Bae iumi storyim tu wat each wan lo iumi savve duim for showimaot datfala nem hem important lo iumi.
“PIPOL WEA STAND FOR NEM BLO HEM”
4. (a) Wat nao komand wea Jesus givim olketa disaepol blo hem bifor hem go bak lo heven? (b) Bikos lo datfala komand, wat nao wanfala kwestin wea bae iumi storyim?
4 Just bifor Jesus go bak lo heven, hem talem olketa disaepol blo hem: “Iufala bae kasem paoa taem holy spirit kam lo iufala, and iufala bae witness abaotem mi lo Jerusalem, lo evri ples lo Judea and Samaria and lo evri farawe ples lo earth.” (Acts 1:8) So olketa bae preachim datfala gud nius, no just lo Israel nomoa bat lo evri ples. Gogo, pipol lo evri nation bae garem chance for kamap olketa follower blo Jesus. (Matt. 28:19, 20) Bat Jesus sei: “Iufala bae witness abaotem mi.” So hao, bae olketa niu disaepol hia need for savve tu lo nem blo Jehovah, or bae olketa witness for Jesus nomoa? Story lo Acts chapter 15 bae helpem iumi for savve lo ansa blo datwan.
5. Hao nao olketa aposol and olketa elder lo Jerusalem showimaot dat evri pipol need for savve lo nem blo Jehovah? (Lukim tu piksa.)
5 Lo 49 C.E., olketa aposol and olketa elder lo Jerusalem meet tugeta for discussim wat olketa Gentile wea no circumcise need for duim for mekem olketa kamap Christian. Lo end blo datfala discussion, James, haf brata blo Jesus sei olsem: “[Peter] storyim gud finis dat diswan hem firstaem for God acceptim pipol blo olketa nation mekem hem savve chusim samfala for kamap pipol wea stand for nem blo hem.” Nem blo hu nao James minim lo hia? Hem quotem toktok blo profet Amos, and sei: “Olketa wea stap yet, and pipol blo evri nation and pipol wea stand for nem blo mi, savve lukaotem Jehovah, hem nao wanem Jehovah . . . hem talem.” (Acts 15:14-18) So olketa niu disaepol hia bae lane abaotem Jehovah, and tu, olketa bae ‘stand for nem blo hem.’ Datwan minim olketa bae garem nem blo Jehovah and pipol bae savve olketa representim datfala nem.
Lo wanfala meeting blo governing body lo first century, olketa faithful man hia luksavve dat olketa Christian mas pipol wea stand for nem blo God (Lukim paragraf 5)
6-7. (a) Why nao Jesus kam lo earth? (b) Wat nao nara reason wea moa important wea join witim diswan?
6 Nem blo Jesus minim “Jehovah Hem Man for Sevem Olketa Man,” and hem nao wat Jehovah iusim Jesus for duim for olketa wea showimaot faith lo hem. Jesus kam lo earth for givim laef blo hem for sevem evri man. (Matt. 20:28) Taem hem peim datfala ransom, hem mekem chance kamap for olketa man savve sev and kasem laef olowe.—John 3:16.
7 Bat why nao olketa man needim datfala ransom for olketa sev? Hem bikos lo wat hem happen lo garden blo Eden. Olsem iumi storyim lo article bifor diswan, first parents blo iumi, Adam and Eve, bighed againstim Jehovah and lusim chance for laef olowe. (Gen. 3:6, 24) Bat, wanfala samting wea moa important winim wei for sevem olketa man hem insaed diswan. Satan laea abaotem nem blo Jehovah. (Gen. 3:4, 5) So wei for sevem olketa pikinini blo Adam and Eve hem join witim wanfala issue wea hem moa important, wea hem nao for mekem nem blo Jehovah kamap holy. Bikos Jesus representim Jehovah and garem nem blo Hem, hem duim big waka for mekem nem blo Jehovah kamap holy.
Hao nao samwan fit for sei hem tru follower blo Christ, bat hem nating savve lo nem blo Dadi blo Christ or iusim datfala nem?
8. Wat nao evriwan wea biliv lo Jesus need for luksavve lo hem?
8 Evriwan wea showimaot faith lo Jesus, nomata olketa Jew and Gentile, bae need for luksavve lo Man wea sevem olketa, wea hem nao, Jehovah God, Dadi blo Jesus. (John 17:3) And olsem Jesus, olketa tu bae garem nem blo Jehovah. And olketa bae need for luksavve tu dat hem barava important for mekem datfala nem kamap holy. Laef blo olketa hem depend lo datwan. (Acts 2:21, 22) So evri faithful follower blo Jesus need for lane abaotem Jehovah and lane tu abaotem Jesus. Dastawe, lo end lo prea blo Jesus wea stap lo John 17, hem sei: “Mi talemaot nem blo iu lo olketa and bae mi gohed for duim datwan, mekem love wea iu showim lo mi hem stap lo olketa and mi wan mind witim olketa.”—John 17:26.
“IUFALA NAO OLKETA WITNESS BLO MI”
9. Hao nao iumi savve showim dat nem blo Jehovah hem important lo iumi?
9 Dastawe, evri tru follower blo Jesus shud interest lo wei for mekem nem blo Jehovah kamap holy. (Matt. 6:9, 10) Olketa mas tingim datfala nem hem important winim eni nara nem. And olketa mas showim datwan lo wat olketa duim. Bat hao nao iumi savve mekem nem blo Jehovah kamap holy, or kliarem datwan from olketa laea wea Satan talem abaotem datfala nem?
10. Wat nao datfala tokpiksa kot case wea Isaiah chapter 42 go kasem 44 hem storyim? (Isaiah 43:9; 44:7-9) (Lukim tu piksa.)
10 Lo buk blo Isaiah, lo chapter 42 go kasem 44 hem storyim important responsibility wea iumi garem for mekem nem blo Jehovah kamap holy. Olketa chapter hia describem wanfala tokpiksa kot case for pruvim hu nao trufala god. Jehovah challengem evri god wea claimim dat olketa wanfala god, for pruvim if olketa really exist. And tu, hem kolem kam olketa witness blo olketa for pruvim if wat olketa god hia talem hem tru. Bat no eniwan fit for duim datwan!—Readim Isaiah 43:9; 44:7-9.
Lo staka difren wei, hem olsem iumi insaed lo wanfala tokpiksa kot case (Lukim paragraf 10-11)
11. Olsem Isaiah 43:10-12 storyim, wat nao Jehovah talem lo pipol blo hem?
11 Readim Isaiah 43:10-12. Jehovah sei olsem lo pipol blo hem: “Iufala nao olketa witness blo mi, . . . and mi nao God.” Jehovah askem olketa for ansarem disfala kwestin: “Waswe, eni God moa hem stap?” (Isa. 44:8) So, iumi garem privilege for ansarem datfala kwestin. Lo toktok blo iumi and wat iumi duim, iumi savve pruvim dat Jehovah nomoa hem tru God. Nem blo hem hae winim eni nara nem. Wat iumi duim lo full laef blo iumi hem pruvim dat iumi really lovem Jehovah and iumi loyal lo hem nomata wat nao Satan trae for duim for stopem iumi. Taem iumi duim datwan, iumi garem chance for help for mekem nem blo Jehovah kamap holy.
12. Hao nao datfala profesi wea stap lo Isaiah 40:3, 5 hem fulfill?
12 Taem iumi sapotim nem blo Jehovah, or reputation blo hem, iumi followim example blo Jesus Christ. Isaiah storyim tu wanfala man wea bae go firstaem for “kliarem [or, “redyim,” ftn.] road blo Jehovah.” (Isa. 40:3) Hao nao datfala profesi fulfill? John Baptaesa nao hem redyim road for Jesus, wea kam lo nem blo Jehovah and story on behalf lo nem blo Jehovah. (Matt. 3:3; Mark 1:2-4; Luke 3:3-6) Datfala profesi sei tu: “Glory blo Jehovah bae showaot klia.” (Isa. 40:5) Hao nao glory hia showaot? Taem Jesus kam lo earth, hem barava showimaot wei blo Jehovah lo perfect wei, and from datwan, hem olsem Jehovah nao hem kam lo earth.—John 12:45.
13. Hao nao iumi savve followim example blo Jesus?
13 Olsem Jesus, iumi olketa witness blo Jehovah. Iumi garem nem blo Jehovah and iumi talem evriwan abaotem olketa nambawan samting hem duim. Bat for iumi duim gud diswan, iumi mas talemaot tu important waka wea Jesus duim for mekem nem blo Jehovah kamap holy. (Acts 1:8) Jesus nao main Witness blo Jehovah, and iumi followim example blo hem. (Rev. 1:5) Bat wat nao each wan lo iumi savve duim for showim dat nem blo Jehovah hem important lo iumi?
HAO FOR SHOWIMAOT NEM BLO JEHOVAH HEM IMPORTANT LO IUMI
14. Olsem Psalm 105:3 storyim, hao nao tingting blo iumi abaotem nem blo Jehovah?
14 Iumi praod abaotem nem blo Jehovah. (Readim Psalm 105:3.) Jehovah hapi tumas taem hem lukim iumi mekhae lo nem blo hem. (Jer. 9:23, 24; 1 Cor. 1:31; 2 Cor. 10:17) For “tok praod abaotem Jehovah” hem minim iumi praod dat Jehovah hem God blo iumi. Hem wanfala privilege for honorim nem blo Jehovah and sapotim reputation blo hem. Iumi mas no shame for talem lo olketa workmate, classmate, neiba blo iumi, and olketa narawan dat iumi Olketa Jehovah’s Witness! Devil no laekem iumi for story abaotem nem blo Jehovah lo olketa narawan. (Jer. 11:21; Rev. 12:17) Satan and olketa false profet blo hem laekem pipol for forgetim nem blo Jehovah. (Jer. 23:26, 27) Bat from iumi lovem nem blo Jehovah, iumi hapi lo datfala nem “lo full day.”—Ps. 5:11; 89:16.
15. Wat nao hem minim for kol go lo nem blo Jehovah?
15 Iumi gohed for kol lo nem blo Jehovah. (Joel 2:32; Rom. 10:13, 14) For kol lo nem blo Jehovah hem no minim for savve and iusim datfala nem nomoa. Iumi bae savve gud lo Jehovah olsem fren blo iumi, iumi trustim hem, and depend lo hem for help and direction. (Ps. 20:7; 99:6; 116:4; 145:18) And tu, iumi talemaot nem blo hem and olketa quality blo hem lo olketa narawan, and iumi encouragem olketa for repent and duim samting mekem Jehovah hapi lo olketa.—Isa. 12:4; Acts 2:21, 38.
16. Hao nao iumi savve pruvim dat Satan hem laea?
16 Iumi willing for safa for nem blo Jehovah. (Jas. 5:10, 11) Taem iumi gohed loyal lo Jehovah nomata iumi safa, iumi pruvim Satan hem laea. Lo taem blo Job, Satan accusim olketa wea servem Jehovah and sei: “Man bae givim evriting wea hem garem for sevem laef blo hem.” (Job 2:4) Satan sei pipol bae servem Jehovah nomoa taem evriting hem gud, and if olketa kasem hard taem, bae olketa lusim Jehovah. Faithful man Job pruvim hao datfala accusation hem no tru. Iumi tu garem privilege for pruvim dat nomata wat Satan duim lo iumi, bae iumi no lusim Jehovah. Iumi barava sure dat Jehovah bae gohed for lukaftarem iumi bikos lo nem blo hem.—John 17:11.
17. Olsem 1 Peter 2:12 storyim, wat nao iumi savve duim for nem blo Jehovah kasem glory?
17 Iumi respectim nem blo Jehovah. (Prov. 30:9; Jer. 7:8-11) Bikos iumi representim nem blo Jehovah and garem nem blo hem, wat iumi duim savve praisem nem blo hem or mek shame lo datfala nem. (Readim 1 Peter 2:12.) Dastawe, lo toktok blo iumi and wat iumi duim, iumi laek duim best blo iumi for praisem nem blo Jehovah. Taem iumi duim datwan, iumi bae mekem nem blo Jehovah kasem praise nomata iumi no perfect.
18. Wat nao nara samting wea iumi savve duim for showim dat nem blo Jehovah hem important lo iumi? (Lukim tu footnote.)
18 Iumi tingim nem blo Jehovah hem important winim reputation blo iumiseleva. (Ps. 138:2) Why nao datwan barava important? Bikos love blo iumi for nem blo Jehovah maet mekem olketa narawan tok spoelem reputation blo iumi.a From Jesus laek for honorim nem blo Jehovah, hem willing for dae olsem wanfala criminal nomata datwan mek shame lo nem blo hem. Jesus “no shame” lo datwan bikos hem no wari abaotem hao olketa narawan ting lo hem. (Heb. 12:2-4) Jesus focus for duim wat God hem laekem.—Matt. 26:39.
19. Hao nao tingting blo iu abaotem nem blo Jehovah, and why olsem?
19 Iumi praod lo nem blo Jehovah and iumi feel dat hem wanfala big privilege for garem datfala nem Olketa Jehovah’s Witness. Bikos lo datwan, iumi willing for deal witim wei wea olketa narawan ting daonem iumi. Nem blo Jehovah hem important lo iumi winim reputation blo iumiseleva. So iumi laek gohed strong for praisem nem blo Jehovah nomata wat nao Satan duim lo iumi. Taem olsem, iumi pruvim nem blo Jehovah hem barava important lo iumi, olsem hao hem important lo Jesus Christ.
SONG 10 Praisem God Bilong Iumi, Jehovah!
a Even datfala faithful man Job tu start for tingim hemseleva tumas taem thrifala fren blo hem tok spoelem reputation blo hem. Firstaem, nomata olketa pikinini blo Job dae and hem lusim evriting wea hem garem, “Job, hem no duim eni sin or hem no blamem God and sei hem duim rong samting.” (Job 1:22; 2:10) Bat taem olketa accusim Job and sei hem duim wanfala rong samting, hem start for “talem olketa karangge toktok.” Hem ting tumas abaotem wei for defendim own reputation blo hem winim for mekem reputation, or nem blo God for kamap holy.—Job 6:3; 13:4, 5; 32:2; 34:5.