Wat Jehovah Duim for Helpem Iumi No Givap

1. Why nao iumi mas no givap, and wat nao savve helpem iumi for duim datwan? (1 Peter 5:10)

LO OLKETA last day distaem wea hem barava hard, pipol blo Jehovah need for gohed strong and no givap. Samfala gohed for deal witim sik wea no savve finis. Samfala sorre bikos loved wan blo olketa hem dae. Olketa narawan kasem persecution, maet from olketa famili member or from olketa lo gavman. (Matt. 10:​18, 36, 37) Nomata wat kaen hard taem iu gohed for deal witim, trustim dat Jehovah savve helpem iu for no givap.—Readim 1 Peter 5:10.

2. Hu nao savve helpem iumi for no givap?

² For no givap hem minim for gohed strong and garem hope nomata man feisim olketa hard taem, persecution, test, or temptation. Iumi savve gohed strong and no givap only if iumi depend lo strong wea kam from Jehovah, man wea givim paoa wea “winim normal paoa” blo iumi. (2 Cor. 4:7) Lo disfala article, bae iumi storyim fofala samting wea Jehovah provaedem wea savve helpem iumi for no givap. Iumi bae storyim tu wat iumi savve duim for kasem gud samting from each wan lo olketa hia.

PREA

3. Why nao iumi fit for sei prea hem wanfala mirakol?

³ Jehovah provaedem wanfala mirakol wea savve helpem iumi for no givap. Hem provaedem wanfala wei for iumi story witim hem nomata iumi sin. (Heb. 4:16) Tingim, iumi savve prea lo Jehovah enitaem and abaotem eni samting. Hem herem iumi nomata iumi prea lo eni languis, wea nao iumi stap, and even if iumi stap seleva or iumi lo prison. (Jonah 2:​1, 2; Acts 16:​25, 26) If iumi wari tumas gogo iumi no savve wat for talem, Jehovah hem minim wat iumi laek for talem. (Rom. 8:​26, 27) Tru nao, prea hem wanfala spesol mirakol!

4. Why nao iumi savve hem stret for askem Jehovah for helpem iumi for no givap?

⁴ Lo Bible, Jehovah promis dat “eni samting wea iumi askem wea followim tingting blo God, hem [bae] herem iumi.” (1 John 5:14) Hao, hem stret for iumi askem Jehovah for helpem iumi gohed strong and for no givap? Yes! Datwan hem barava followim tingting blo Jehovah. Why nao iumi sei olsem? Taem iumi no givap lo olketa hard taem, iumi givim chance lo Jehovah for givim ansa lo man wea tok spoelem hem, Satan. (Prov. 27:11) And tu, Bible sei Jehovah barava laek for “showimaot paoa blo hem for helpem olketa wea faithful lo hem lo full heart.” (2 Chron. 16:9) So iumi barava sure dat Jehovah garem paoa and hem laek for helpem iumi for no givap.—Isa. 30:18; 41:10; Luke 11:13.

5. Hao nao prea savve givim iumi peace lo mind? (Isaiah 26:3)

⁵ Bible sei taem iumi prea from heart abaotem olketa wari blo iumi, ‘peace blo God wea winim nao wanem man savve minim bae gaedem heart blo iumi and mind blo iumi.’ (Phil. 4:​7, ftn.) Tingim hao datwan helpem iumi. Taem pipol wea no worshipim Jehovah feisim olketa hard taem, olketa savve traem staka difren wei for kasem peace lo mind. For example, samfala savve duim kaen meditation for aotem evri tingting from mind blo olketa, includim evri wari, diswan mekem mind blo olketa for barava emti. Wei for mekem mind hem emti hem dangerous samting bikos olketa demon savve iusim diswan for kam insaed lo mind. (Comparem Matthew 12:​43-45.) Bat peace wea Jehovah givim taem iumi prea, hem barava winim eni peace wea maet pipol kasem taem olketa duim meditation olsem. Taem iumi prea lo Jehovah, iumi showimaot iumi barava depend lo hem and hem bae givim “peace wea . . . no savve finis.” (Readim Isaiah 26:3.) Wanfala wei wea Jehovah duim diswan, hem taem hem helpem iumi for rememberim olketa scripture wea savve comfortim iumi. Olketa scripture olsem savve helpem iumi for garem peace lo mind and heart bikos iumi savve Jehovah kea for iumi and laekem iumi for gohed strong.—Ps. 62:​1, 2.

6. Wat nao iu savve duim for prea hem barava helpem iu? (Lukim tu piksa.)

⁶ Wat iu savve duim. Taem faith blo iu kasem test, “torowem go hevi blo iu lo Jehovah” and askem hem for givim iu peace blo hem. (Ps. 55:22) Prea tu for wisdom wea iu needim for helpem iu deal witim datfala challenge wea iu feisim. (Prov. 2:​10, 11) Taem iu barava prea strong for no givap, no forget tu for talem thankiu lo Hem. (Phil. 4:6) Ting raonem tu hao Jehovah hem gohed for helpem iu lo datfala hard taem, and talem thankiu for sapot blo hem. No letem datfala hard taem for mekem iu no lukim olketa blessing wea iu kasem finis.—Ps. 16:​5, 6.

WORD BLO GOD

7. Hao nao wei for gohed studyim Bible savve helpem iumi for no givap?

⁷ Jehovah givim Word blo hem for helpem iumi no givap. Bible garem staka scripture wea mekem iumi for barava sure Jehovah sapotim iumi. Tingim disfala example. Matthew 6:8 sei: “Dadi blo iufala hem savve finis lo samting iufala needim bifor iufala askem hem.” Jesus nao talem olketa toktok hia, and hem savve gud lo Jehovah winim eniwan. Dastawe, iumi no garem eni reason for daotem dat Jehovah savve lo wat iumi needim and bae helpem iumi lo olketa hard taem. Bible garem staka verse olsem wea savve strongim iumi for no givap.—Ps. 94:19.

8. (a) Storyim example blo wanfala Bible principle wea savve helpem iumi for no givap. (b) Wat nao savve helpem iumi for rememberim olketa Bible principle lo taem wea iumi needim?

⁸ Olketa Bible principle savve helpem iumi for no givap. Datwan bikos olketa Bible principle garem olketa wise advaes wea savve helpem iumi for mekem olketa gud disison. (Prov. 2:​6, 7) For example, Bible encouragem iumi for deal witim wari blo each day nomoa, winim for wari abaotem wat nao maet bae happen tumoro. (Matt. 6:34) If iumi evritaem duim Bible reading and ting raonem, bae hem moa isi for iumi rememberim olketa principle wea iumi needim lo taem wea iumi needim.

9. Hao nao olketa story lo Bible strongim wei wea iumi trustim dat Jehovah bae helpem iumi?

⁹ Bible garem tu olketa laef story blo pipol wea olsem iumi, wea trustim Jehovah and kasem help from hem. (Heb. 11:​32-34; Jas. 5:17) Taem iumi ting raonem olketa story olsem, datwan strongim trust blo iumi lo Jehovah wea hem nao “sef ples and strong blo iumi, hem redi evritaem for helpem iumi lo taem blo trabol.” (Ps. 46:1) And taem iumi ting abaotem wat olketa faithful servant blo Jehovah duim lo bifor, datwan encouragem iumi for garem sem faith and wei for no givap olsem olketa.—Jas. 5:​10, 11.

10. Wat nao iu savve duim for Word blo God barava helpem iu?

¹⁰ Wat iu savve duim. Readim Bible evriday, and raetem daon olketa verse wea helpem iu. Staka faendem tu hao wei for duim text evriday hem helpem olketa for startim day witim olketa encouraging toktok from Bible. Datwan barava helpem wanfala sista wea nem blo hem Marie,a wea lukaftarem mami and dadi blo hem wea tufala evriwan garem cancer. Wat nao helpem Marie for gohed strong and no givap taem hem lukaftarem tufala lo olketa month bifor tufala dae? Hem sei: “Evri morning mi savve readim text from Lukluk lo Olketa Scripture Evriday and ting raonem datwan. Wei for duim diswan evriday hem helpem mi for fulimap mind blo mi witim olketa spiritual samting wea moa important winim mi and hard situation wea mi mas deal witim.”—Ps. 61:2.

OLKETA BRATA AND SISTA

11. Taem iumi savve olketa brata and sista blo iumi tu feisim semkaen hard taem olsem iumi, hao nao datwan comfortim iumi?

¹¹ Jehovah provaedem wanfala spiritual famili raonem world for helpem iumi for no givap. Taem ‘iumi savve olketa brata blo iumi evriwea lo world tu safa lo olketa sem samting wea iumi safa lo hem’ datwan comfortim iumi. (1 Pet. 5:9) Tru nao, iumi sure nomata wat nao situation wea iumi feisim, olketa narawan tu feisim olketa semkaen situation, and olketa no givap. So datwan minim iumi tu savve gohed strong and no givap!—Acts 14:22.

12. Hao nao olketa brata and sista savve helpem iumi, and wat nao iumi savve duim for olketa? (2 Corinthians 1:​3, 4)

¹² Taem iumi gohed deal witim hard taem, olketa brata and sista savve encouragem iumi for no givap. Datwan nao barava helpem aposol Paul. Taem hem stap olsem prisoner lo wanfala haos, staka taem hem mentionim nem blo olketa wea helpem hem, and hem thankiu lo olketa. Olketa comfortim and encouragem Paul, and givim olketa samting wea hem needim. (Phil. 2:​25, 29, 30; Col. 4:​10, 11) Distaem tu, iumi maet experiencem sem samting. Taem iumi needim help for gohed strong, olketa brata and sista stanbae for helpem iumi, and taem olketa needim sapot, iumi tu stanbae for helpem olketa.—Readim 2 Corinthians 1:​3, 4.

13. Wat nao helpem sista wea nem blo hem Maya for no givap?

¹³ Olketa brata and sista barava encouragem wanfala sista lo Russia wea nem blo hem Maya. Lo 2020 olketa police reidim haos blo hem, and bihaen, Maya mas go lo kot bikos hem storyim faith blo hem witim olketa narawan. Maya sei: “During lo datfala taem wea mi barava taed, wari, and sorre, olketa brata and sista savve ringim mi and raet kam lo mi for talem hao olketa lovem mi. Mi savve finis dat mi garem wanfala big famili wea lovem mi. Bat since 2020, mi really feelim hao diswan hem barava tru.”

14. Wat nao iumi need for duim for kasem gud samting from sapot blo olketa brata and sista? (Lukim tu piksa.)

¹⁴ Wat iu savve duim. Taem iumi gohed deal witim hard taem, hem important for iumi fren klos witim olketa brata and sista. No hol bak for askem help from olketa elder. Olketa olsem “wanfala ples for haed from wind, [and] wanfala ples for haed from bigfala rain.” (Isa. 32:2) Tingim tu, dat olketa brata and sista blo iu tu gohed for deal witim olketa hard taem. Taem iu duim gud samting for helpem samwan, datwan bae helpem iu for gohed balance and garem positive tingting taem iu deal witim own hard taem blo iu.—Acts 20:35

HOPE BLO IUMI

15. Hao nao wei for garem hope hem helpem olketa wea faithful and Jesus? (Hebrews 12:2)

¹⁵ Jehovah givim iumi wanfala strong hope for helpem iumi for no givap. (Rom. 15:13) Tingim hao hope helpem Jesus for no givap taem hem deal witim wanfala day wea barava hard winim eni nara day lo laef blo hem lo earth. (Readim Hebrews 12:2.) Jesus savve wei wea hem faithful bae kliarem eni blame from nem blo Jehovah. Jesus luk forward tu for stap moa witim Dadi blo hem and for waka tugeta witim olketa anointed brata blo hem lo Kingdom lo heven. Lo sem wei tu, hope blo iumi for laef olowe lo niu world blo God hem helpem iumi for no givap nomata iumi deal witim eni hard taem wea iumi kasem from world blo Satan.

16. Hao nao wei for garem hope helpem wanfala sista for no givap, and wat nao iu lanem from samting hem talem?

¹⁶ Tingim hao hope blo iumi for Kingdom hem helpem wanfala sista lo Russia wea nem blo hem Alla. Olketa arrestim hasband blo hem and putim lo prison for weitim kot case blo hem. Taem datwan happen, Alla sei: “Mi savve prea abaotem hope blo iumi for future and mi ting raonem datfala hope, datwan helpem mi for no discourage tumas. Mi luksavve bihaen olketa trabol hia, gud samting bae kamap. Jehovah bae win, and iumi tu.”

17. Wat nao iumi savve duim for showimaot iumi appreciatim hope blo iumi wea kam from Bible? (Lukim tu piksa.)

¹⁷ Wat iu savve duim. Hem gud for spendem taem for ting abaotem nambawan future wea Jehovah promisim for iumi. Imaginim dat iu lo niu world blo God and tingim olketa blessing wea iumi bae kasem. And eni hard taem wea iumi kasem distaem, hem olsem samting wea hem for “lelebet taem and hem smol nomoa.” (2 Cor. 4:17) And tu, traem best for storyim faith blo iu witim olketa narawan wea no savve lo Jehovah. Tingim, from olketa no savve lo purpose blo God for future, masbi laef lo disfala world blo Satan hem hard tumas for olketa. Even if iu just talem tu-thri samting nomoa abaotem hope blo iumi for Kingdom, maet datwan mekem olketa interest for lanem moa samting abaotem datwan.

18. Why nao iumi fit for trustim olketa promis blo Jehovah?

¹⁸ Afta Job hem no givap lo staka hard taem wea hem kasem, hem talem Jehovah: “Distaem mi savve nao dat iu fit for duim eni samting and no eniting wea iu ting for duim hem hard lo iu.” (Job 42:2) Job hem luksavve, no eni samting savve stopem Jehovah for fulfillim purpose blo hem. So taem iumi savve lo datwan, hem helpem iumi for no givap lo eni hard taem. For example, tingim wanfala woman wea sik and barava discourage bikos no eni doctor fit for treatim sik blo hem. Bat gogo wanfala doctor wea garem experience, hem faendaot wat nao sik blo hem, and explainim dat hem savve treatim datfala sik. Taem woman hia herem datwan, hem hapi nao, nomata hem savve bae hem tek taem for sik blo hem kamap gud. Datwan mekem hem for no givap, bikos hem garem hope dat bae hem kamap gud. Lo sem wei tu, from iumi trustim hao hope blo iumi for Paradaes bae fulfill, datwan helpem iumi for gohed strong and no givap.

19. For helpem iumi no givap, wat nao iumi need for duim?

¹⁹ Olsem iumi lanem, for helpem iumi for no givap lo olketa hard taem, Jehovah provaedem wei for prea, Word blo hem, olketa brata and sista, and hope blo iumi. If iumi gohed for duim olketa samting hia, Jehovah bae gohed for helpem iumi for no givap lo eni hard taem wea iumi feisim go kasem taem world blo Satan hem finis.—Phil. 4:13.