Wat Nao Golden Rul?

Ansa from Bible

Disfala term “Golden Rul” hem no stap lo Bible. Bat, staka pipol iusim disfala term for refer lo rul lo olketa conduct wea Jesus teachim. Lo famous Sermon blo Jesus lo Maunten, Jesus sei: “Samting wea iufala laekem pipol for duim lo iufala, sem samting tu iufala mas duim lo olketa.” (Matthew 7:12; Luke 6:31) Nara wei for talem datfala Golden Rul, hem olsem: “Duim gud samting lo others olsem iu bae laekem olketa for duim gud samting for iu.”—Encyclopedia of Philosophy.

• Wat nao Golden Rul hem minim?

• Why nao wei for applyim Golden Rul hem benefitim iumi?

• Hao, Golden Rul hem abaotem wat iumi savve kasem from others nomoa?

• Hao nao iu savve applyim datfala Golden Rul lo laef blo iu?

Wat nao Golden Rul hem minim?

Datfala Golden Rul wea Jesus teachim encouragem iumi for treatim others lo sem wei wea iumi bae laekem nara pipol for treatim iumi. For example, staka pipol appreciatim taem others treatim olketa witim respect, kaen, and lovem olketa. So hem mek sense for iumi tu shud duim “sem samting” for others.—Luke 6:31.

Why nao wei for applyim Golden Rul hem benefitim iumi?

Golden Rul hem apply lo evri situation lo laef. For example, hem savve . . .

• Strongim marit.—Ephesians 5:28, 33.

• Helpem parents taem olketa teachim pikinini blo olketa.—Ephesians 6:4.

• Helpem iumi for garem gud relationship witim olketa frens, olketa neiba, and olketa workmate.—Proverbs 3:27, 28; Colossians 3:13.

Golden Rul hem sem principle wea iumi faendem lo big part blo Old Testament. Disfala rul lo olketa conduct wea Jesus teachim hem “nao mining blo samting wea datfala Law [first faevfala buk lo Bible, Genesis tu Deuteronomy] and Olketa Profet [olketa buk lo Hebrew Scripture wea storyim olketa profesi.] talem.” (Matthew 7:12) Nara wei for talem, datfala Golden Rul hem garem olketa important truth wea stap lo Old Testament, hem nao for iumi lovem neiba blo iumi.—Romans 13:8-10.

Hao, Golden Rul hem abaotem wat iumi savve kasem from others nomoa?

Nomoa. Main samting wea Jesus teachim abaotem Golden Rul hem for garem wei for give. Taem Jesus storyim datfala Golden Rul, hem storyim hao for treatim gud evriwan, includim olketa enemy blo iumi. (Luke 6:27-31, 35) So Golden Rul hem encouragem pipol for duim gud samting for evriwan.

Hao nao iu savve applyim datfala Golden Rul lo laef blo iu?

1. 1. Garem wei for luksavve. Lukluk for wat iu savve duim for helpem olketa narawan. For example, maet iu lukim samwan stragol for karem shopping blo hem, herem dat wanfala neiba admit lo hospital, or iu luksavve dat wanfala workmate blo iu hem discourage. Taem iu traem best for “evritaem tingim olketa narawan,” iu bae faendem opportunity for talem or duim samting for helpem others.—Philippians 2:4.

2. 2. Tingim feeling blo others. Imaginim situation wea datfala person kasem olsem hem kasem iuseleva. Hao nao bae iu feel if iu kasem datfala sem situation? (Romans 12:15) Taem iu trae for understandim feeling blo others, maet datwan mekem iu for laek helpem olketa.

3. 3. Mas flexible. Hem gud for tingim dat evriwan olketa difren. Samting wea others bae laekem iu for duim for olketa, maet hem no semsem witim wat iu laekem olketa for duim for iu. So, nomata iu savve duim staka samting for olketa, trae for chusim nomoa wanfala samting wea bae olketa appreciatim tumas.—1 Corinthians 10:24.