Wea Nao Mi Savve Faendem Hope?
Ansa from Bible
Bible sei God laek for iumi garem “gudfala future and hope.”a (Jeremiah 29:11) Yes, wanfala reason why God givim kam Bible hem for iumi “kasem comfort from olketa Holy Raeting, and from diswan iumi savve garem hope.” (Romans 15:4) Lo disfala article, bae iumi lukim dat wise advaes lo Bible savve mekem iumi for garem positive tingting wea savve helpem iumi evriday, and olketa promis lo Bible mekem iumi for garem wonderful hope for future.
Lo article hia
Hao nao hope wea Bible story abaotem savve helpem iumi for positive?
Bible garem olketa practical advaes wea taem iumi followim hem savve impruvim laef blo iumi and helpem iumi for garem positive tingting. Bae iumi storyim samfala example lo diswan.
Studyim Bible for kasem olketa practical advaes. Psalm 119:105 sei: “Toktok blo iu hem olsem lamp for foot blo mi, and hem olsem laet for road blo mi.” Wanfala paoaful laet savve duim tufala samting. First samting, laet blo hem savve mekem iumi for kwiktaem lukim wat stap front lo iumi, and second, hem savve helpem iumi for lukim samting wea stap farawe. Lo sem wei, olketa Bible principle savve helpem iumi for kwiktaem deal witim olketa problem wea iumi kasem each day, and hem givim iumi hope for garem positive tingting abaotem future. Olketa Bible teaching savve strongim iumi bak and mekem “heart for hapi.” (Psalm 19:7, 8) And lo semtaem, olketa toktok lo Bible hem olsem laet wea showim wonderful purpose blo God for future blo olketa man and disfala earth. Datfala hope savve givim iumi trufala hapi and for satisfae.
Acceptim help from others. Taem situation blo iumi luk hopeles, maet datwan mekem iumi laek for avoidim famili and frens blo iumi. Bible sei hem no wise for duim datwan, bikos hem savve leadim iumi for mekem karangge disison and duim samting wea no stret. (Proverbs 18:1) Olketa loved wans blo iumi savve helpem iumi for garem stret tingting. Maet olketa garem helpful advaes tu lo hao for deal witim wanfala difficult situation. (Proverbs 11:14) And nara samting tu, maet olketa able for comfortim and talem toktok wea mekem iumi hapi, and datwan savve strongim iumi for no givap go kasem taem tings hem impruv.—Proverbs 12:25.
Prea lo God. Bible sei: “Torowem go hevi blo iu lo Jehovah, and hem bae kea for iu. Hem bae no letem raeteous wan for foldaon.”b (Psalm 55:22) Bible talem stret dat Jehovah hem “God wea givim hope.” (Romans 15:13) Iu savve prea abaotem “evri wari” blo iu lo Jehovah, and trustim dat hem kea for iu. (1 Peter 5:7) Bible sei tu: ‘Hem bae mekem iu strong, hem bae helpem iu for gohed faithful, hem bae barava sapotim iu.’—1 Peter 5:10.
Olketa hard taem wea iu kasem savve strongim hope blo iu. Bible promis olsem: “Man wea lisin lo [God] bae stap gud, and hem bae no warim eni trabol.” (Proverbs 1:33) Wanfala woman lo Australia wea nem blo hem Margaret, lusim staka tings wea hem garem taem cyclone distroem haos blo hem. Bat instead for hem sorre tumas and stress followim evriting, hem lanem wanfala important leson. Hem luksavve olketa material samting wea iumi garem savve lus enitaem nomoa. So winim enitaem bifor, Margaret disaed strong for focus lo olketa important samting, olsem famili and frens, relationship blo hem witim God, and hope wea Bible story abaotem.—Psalm 37:34; James 4:8.
Wat nao hope wea Bible givim for iumi evriwan?
Bible promisim gudfala future for olketa man and for disfala earth. And datfala future hem barava klosap. Tru tumas, olketa problem wea iumi evriwan kasem distaem, hem showim dat iumi stap deep insaed “olketa last day” blo disfala world. (2 Timothy 3:1-5) Klosap nao, God bae kontrolem evriting lo earth and bae hem finisim injustice and wei for safa. Hem bae duim datwan taem hem iusim wanfala gavman nomoa lo disfala full world, wea hem nao Kingdom blo God. (Daniel 2:44; Revelation 11:15) Datfala gavman lo heven nao Jesus tingim taem hem teachim datfala model prea: “Mifala laekem Kingdom blo iu for kam. Duim will blo iu lo earth.”—Matthew 6:9, 10.
Bible talem klia plan blo God for iumi olketa man. Lukim samfala problem wea Kingdom blo God bae finisim:
No eniwan bae hangere. “Earth bae producem staka kaikai.”—Psalm 67:6.
No eni disease. “No eniwan wea stap lo datfala land bae sei: ‘Mi sik.’”—Isaiah 33:24.
No eniwan bae dae. God “bae draem evri tias from eye blo [iumi evriwan], and dae bae nomoa nao, krae and sorre and pain tu bae nomoa. Olketa samting wea happen bifor hem finis nao.”—Revelation 21:3, 4.
a Iumi hope for wanfala samting taem iumi laekem tumas datwan and iumi biliv dat bae iumi kasem datwan. And tu, hope hem nao datfala samting wea iumi luk forward for hem.
b Bible sei nem blo God hem Jehovah.—Psalm 83:18.