Help for Olketa Victim blo Domestic Abuse

“Violence againstim olketa woman hem wanfala big problem wea happen evriwea lo world, and hem barava important for duim samting for stopem diswan,” hem nao wat World Health Organization talem. Organization hia estimatem dat klosap 30 percent “blo evri woman wea marit or frenim samwan olketa experiencem physical and/or sexual violence” from partner blo olketa. And wanfala UN report estimatem dat lo wanfala year wea just go pas, raonem world 137 woman dae each day from partner or nara famili member killim olketa dae.a

Olketa statistic maet showim hao big nao disfala problem blo domestic abuse, bat olketa no savve showim emotional and physical pain wea each victim kasem.

Hao, iu wanfala victim blo domestic abuse? Or iu savve lo samwan wea hem victim blo datwan? Sapos olsem, tingim olketa point hia from Bible wea savve help.

Domestic abuse hem no fault blo iu

Help hem stap

Samwan lo there for iu

Domestic abuse bae finis

Hao for helpem wanfala victim

Domestic abuse hem no fault blo iu

Wat Bible talem: “Iumi evriwan bae ansa long God for samting wea iumi duim and talem.”—Rome 14:12.

Tingim diswan: Person wea abusim iu hem responsible for wat hem duim.

If partner blo iu blamem iu for why hem abusim iu, hem rong. Hasband shud lovem waef, no abusim hem.—Colossae 3:19.

Samfala taem, man wea abusim partner blo hem, hem bikos hem garem sik lo tingting blo hem, famili baekgraon, or ova tumas lo alcohol. Nomata olsem, hem mas ansa lo God for hao hem treatim iu. And hem responsibility blo hem for duim samting for changem wei blo hem.

Help hem stap

Wat Bible talem: “Evriting bae gohed gud thru lo staka advaesa.”—Proverbs 15:22.

Tingim diswan: If iu no feel sef or iu no savve wat for duim, olketa narawan savve helpem iu.

Why nao iu needim help blo olketa narawan? Domestic abuse hem situation wea no isi for solvem. Maet hem no isi for iu disaedem wat nao best samting for duim bikos iu no savve which wan lo olketa samting hia nao moa important:

• Safety blo iu

• Wat nao best for olketa pikinini blo iu

• Saed lo selen

• Love blo iu for partner

• Iu laek for sevem relationship blo iu if partner blo iu changem wei blo hem

Hem normal nomoa for iu konfius and feel olsem iu no wei nao. Hu nao iu savve luk lo hem for help?

Wanfala fren wea iu trustim or famili member maet fit for provaedem practical and emotional sapot. Wei for story lo samwan wea lovem iu savve barava helpem iu.

Phone namba wea victim blo domestic violence savve ringim for kasem help. Olketa organization olsem savve helpem iu for savve wat for duim for protectim iuseleva. If partner blo iu talem dat hem garem problem lo diswan and hem laek for change, olketa organization olsem maet savve helpem hem for savve wat for duim.

Olketa nara emergency namba savve helpem iu if iu stap lo danger. Maet diswan hem olketa doctor, nurse, or olketa narawan wea kasem training lo diswan.

Samwan lo there for iu

Wat Bible talem: “Jehovahb stap klosap lo olketa wea heart blo olketa brek. Hem sevem olketa wea discourage.”—Psalm 34:18.

Tingim diswan: God promis for helpem iu.

Jehovah barava lovem iu. (1 Peter 5:7) Hem understandim gud evri tingting and deep feeling blo iu. Hem savve comfortim iu thru lo Word blo Hem, Bible. And hem invaetem iu for prea lo hem. Taem iu prea, iu savve askem hem for givim wisdom and strong wea iu needim for deal witim situation blo iu.—Isaiah 41:10.

Domestic abuse bae finis

Wat Bible talem: “Olketa bae stap, each wan andanit lo vine blo grape blo hem and andanit lo fig tree blo hem, and no eniwan bae mekem olketa fraet.”—Micah 4:4, footnote.

Tingim diswan: Bible promisim dat klosap nao lo future bae haos hem wanfala peaceful ples for evriwan lo famili.

Jehovah God nomoa only wan wea savve solvem evri problem blo iumi. Bible promis olsem: “Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu.” (Revelation 21:4) Lo datfala taem, olketa nogud memory bae lus and bae man garem olketa gud memory nomoa. (Isaiah 65:17) Diswan nao peaceful future wea Bible promis dat iu savve kasem.