Nem blo Hu Nao Stap lo “Buk blo Laef”?

Ansa from Bible

“Buk blo laef,” wea Bible kolem tu lo “scroll blo laef” or ‘buk wea garem nem blo olketa wea Jehovah rememberim,’ hem garem nem blo pipol wea bae receivim datfala gift wea hem laef olowe. (Revelation 3:5; 20:12; Malachi 3:16) God raetem daon nem blo olketa hia base wei wea olketa faithful for obeyim hem.​—John 3:16; 1 John 5:3.

God keepim each wan lo olketa loyal servant blo hem lo memory blo hem, olsem hem raetem daon nem blo olketa insaed wanfala buk, “start kam lo taem wea olketa man start for born lo earth.” (Revelation 17:8) Luk olsem faithful man Abel hem first wan wea God recordim nem blo hem lo buk blo laef. (Hebrews 11:4) Buk hia no garem list blo olketa nem nomoa, bat hem showim dat Jehovah hem loving God wea “savve hu nao man blo hem.”​—2 Timothy 2:19; 1 John 4:8.

Hao, God savve aotem olketa nem from “buk blo laef”?

Yes. God sei olsem abaotem pipol lo Israel wea disobey: “Eniwan wea sin againstim mi, bae mi aotem nem blo hem from buk blo mi.” (Exodus 32:33) Bat if iumi showim iumi faithful, nem blo iumi bae gohed stap “lo scroll blo laef.”​—Revelation 20:12.