Hao, Devil Savve Kontrolem Olketa Man?

Ansa from Bible

Devil and olketa demon influencim tumas olketa man dastawe Bible sei: “Datfala Evil Wan kontrolem full world.” (1 John 5:​19, New Century Version) Bible storyim olketa samting wea Devil iusim for influencim pipol.

• Trikim man. Bible encouragem olketa Christian for “faet againstim olketa evil trik blo devil.” (Ephesians 6:​11, NCV ) Wanfala lo olketa trik blo hem nao for mekem pipol bilivim dat olketa wea hem iusim olketa tu servant blo God.​—2 Corinthians 11:13-​15.

• Spiritism. Devil misleadim pipol thru lo spiritism, olketa wea talem wat bae happen lo future, and olketa wea practicem divination or astrology. (Deuteronomy 18:10-​12) And tu, hem iusim drug, hypnotism, and olketa meditation teknik wea mekem tingting blo man for emti mekem demon savve kontrolem hem.​—Luke 11:24-​26.

• False religion. Olketa religion wea teachim olketa false doctrine misleadim pipol for disobeyim God. (1 Corinthians 10:20) Bible kolem olketa false biliv hia “teaching blo olketa demon.”​—1 Timothy 4:1.

• Demon-posses. Bible garem record lo story abaotem olketa evil spirit wea kontrolem man. Samtaems pipol wea demon stap lo olketa, olketa blind or no savve toktok or even mekem olketa seleva garekil.​—Matthew 12:22; Mark 5:​2-5.

Hao for avoidim influence blo Devil

Iu no need for wari or fraet lo demon, Bible showim hao iu savve win for againstim Devil:

• Lane for luksavve lo olketa trik blo Devil mekem iu savve dat “olketa trik blo hem ino niu samting.”​—2 Corinthians 2:​11.

• Studyim gud Bible, and then applyim wat iu lanem. For applyim olketa Bible principle bae protectim iu from influence blo Devil.​—Ephesians 6:​11-​18.

• Torowem eni samting wea join witim olketa activity blo demon. (Acts 19:19) Datwan includim music, olketa buk, magasin, poster, and olketa video wea encouragem spiritism.