Wat Nao Bible Chronology Showim Abaotem Year 1914?

Ansa from Bible

Bible chronology showim dat Kingdom blo God hem start for rul lo heven lo 1914. Profesi wea stap lo buk blo Daniel chapter 4 hem storyim diswan.

Overview blo datfala profesi. God mekem King Nebuchadnezzar blo Babylon for lukim wanfala dream abaotem wanfala big maeti tree wea olketa katem daon. Olketa putim samting raonem stump hia for hem no grow for period of “sevenfala taem,” afta datwan tree hia bae grow bak moa.​—Daniel 4:​1, 10-​16.

Profesi hia fulfill. Datfala big maeti tree representim King Nebuchadnezzar. (Daniel 4:​20-​22) God figuratively ‘katem daon’ tree hia taem hem tekem paoa for rul from King Nebuchadnezzar and hem lusim tingting blo hem for period of seven years. (Daniel 4:​25) Taem God restorem tingting blo Nebuchadnezzar hem kamap king moa and hem luksavve lo rul blo God.​—Daniel 4:​34-​36.

Evidence wea showim datfala profesi bae fulfill lo bigfala wei. Purpose blo disfala profesi hem for taem hem fulfill, “pipol wea laef mas savve dat Most Hae nao hem Ruler lo kingdom blo olketa man and hem bae givim rul lo eniwan wea hem laekem nomata lo olketa man nating tu.” (Daniel 4:​17) Hao, God laek for givim paoa for rul lo kaen praod man olsem Nebuchadnezzar? Nomoa, bikos lo nara dream God showim lo Nebuchadnezzar dat God no chusim hem or nara politikol ruler for hem rul. Instead, God seleva bae “startim wanfala kingdom wea no enitaem bae hem distroe.”​—Daniel 2:​31-​44.

Lo bifor, God setim ap wanfala kingdom for representim rulership blo hem lo earth: hem nao ancient nation blo Israel. God allowim olketa man for “distroem” kingdom hia bikos olketa wea rul no faithful, bat hem talemaot dat hem bae givim paoa for rul lo “man wea garem legal raet for rul.” (Ezekiel 21:25-​27) Bible sei Jesus Christ nao hem man wea garem legal raet for rul lo Kingdom blo God wea savve stap for olowe. (Luke 1:​30-​33) Jesus hem no olsem Nebuchadnezzar, Jesus hem “hambol,” olsem profesi talem abaotem hem.​—Matthew 11:29.

Wat nao tree lo Daniel chapter 4 representim? Lo Bible, samtaems tree savve representim rulership. (Ezekiel 17:22-​24; 31:​2-5) Profesi lo Daniel chapter 4 wea bae fulfill lo bigfala wei, datfala big tree symbolizim rul blo God.

Wat nao tree wea olketa katem daon hem minim? Lo sem wei wea rul blo Nebuchadnezzar hem stop for lelebet taem olsem tree wea olketa katem daon, rul blo God lo earth tu hem stop for lelebet taem. Diswan hem happen taem Nebuchadnezzar distroem Jerusalem, ples wea olketa king blo Israel rul lo “throne blo Jehovah” for representim God.​—1 Chronicles 29:23.

Wat nao “sevenfala taem” representim? “Sevenfala taem” hem representim taem wea God allowim olketa nation for rul ovarem earth go kasem taem hem setim ap kingdom blo hem. Datfala “sevenfala taem” start lo October 607 B.C.E., wea according lo Bible chronology, hem taem wea olketa blo Babylon distroem Jerusalem.a​—2 Kings 25:​1, 8-​10.

Hao long nao datfala “sevenfala taem”? Hem no literal seven years olsem lo taem blo Nebuchadnezzar. Jesus showim ansa taem hem sei dat “olketa kantri bae stepim Jerusalem [representim rulership blo God] go kasem taem wea God markem for olketa nation hem finis.” (Luke 21:24) “Taem wea God markem for olketa nation,” and during taem wea God letem olketa nation for “stepim” rulership blo hem, hem semsem nomoa witim “sevenfala taem” wea Daniel chapter 4 story abaotem. Diswan minim dat “sevenfala taem” hem still gohed taem Jesus lo earth.

Bible helpem iumi for savve hao long nao datfala “sevenfala taem.” Hem sei dat thri and haf “taem” equals 1,260 days, so “sevenfala taem” equals tu taems lo datfala namba, or 2,520 days. (Revelation 12:​6, 14) If iumi applyim wat Bible talem hao “wan day equals wan year,” datfala 2,520 days hem representim 2,520 years. Dastawe, datfala “sevenfala taem,” or 2,520 years, bae finis lo October 1914.​—Numbers 14:34; Ezekiel 4:6.