Wat Nao Lake blo Fire? Hao, Hem Semsem Olsem Hell or Gehenna?
Ansa from Bible
Lake blo fire hem wanfala symbol blo eternal destruction. Hem semsem olsem Gehenna, bat hem difren from hell wea hem common grev for olketa human.
No wanfala literal lake
Faevfala verse lo Bible wea mentionim “lake blo fire” showim klia hem no wanfala literal lake, bat hem wanfala symbol nomoa. (Revelation 19:20; 20:10, 14, 15; 21:8) Olketa hia nao go lo lake blo fire:
Devil. (Revelation 20:10) From hem wanfala spirit creature, Devil no savve bone lo fire.—Exodus 3:2; Judges 13:20.
Dae. (Revelation 20:14) Dae hem no wanfala object bat hem minim taem man no savve duim eni activity, hem no laef. (Ecclesiastes 9:10) Dae no savve bone lo fire.
“Datfala wild animal” and “datfala false profet.” (Revelation 19:20) Since tufala hia olketa symbol nomoa, hem stret for sei lake wea olketa torowem tufala insaed hem symbol tu.—Revelation 13:11, 12; 16:13.
Wanfala symbol blo dae for olowe
Bible sei lake blo fire hem “piksarem mek-tu dae.” (Revelation 20:14; 21:8) First dae wea Bible mentionim hem dae wea result from sin blo Adam. Evriwan wea dae from sin blo Adam savve laef bak moa and God bae finisim dae for olowe.—1 Corinthians 15:21, 22, 26.
No eniwan release from symbolic lake blo fire
Lake blo fire hem representim mek-tu dae. Nomata hem representim tu man wea no savve duim eni activity taem hem dae, Bible no talem dat man wea dae lo mek-tu dae bae laef bak moa. For example, Bible sei Jesus garem “olketa key blo dae and blo Grev,” wea showim dat hem garem authority for mekem pipol free from dae wea olketa inheritim from sin blo Adam. (Revelation 1:18; 20:13, King James Version) Nomata olsem, no eniwan or even Jesus hem garem key blo lake blo fire. Datfala symbolic lake hem representim eternal panisment wea hem permanent destruction.—2 Thessalonians 1:9.
Gehenna hem semsem olsem Hinnom Valley
Lo Bible hem mentionim Gehenna (Greek languis hem geʹen·na) 12 taems. Olsem datfala lake blo fire, hem symbol for eternal destruction. Nomata samfala transleison transleitim disfala word olsem “hell,” Gehenna hem difren from hell (Hebrew languis hem sheʼohlʹ, Greek languis hem haiʹdes).
Valley blo Hinnom
Disfala word “Gehenna” hem literally minim “Hinnom Valley,” wea refer lo datfala valley wea stap aotsaed lo Jerusalem. Lo Bible taems, pipol wea stap lo datfala city iusim valley hia olsem ples for torowem rabis. Olketa mekem fire for gohed laet lo ples hia for bonem gud evriting, bat olketa samting wea fire no savve bonem, olketa maggot or worm nao kaikaim.
Jesus iusim disfala toktok Gehenna for minim everlasting destruction. (Matthew 23:33) Hem sei lo Gehenna “olketa maggot no savve dae and fire hem laet olowe.” (Mark 9:47, 48) Taem Jesus storyim datwan hem tingim Hinnom Valley and profesi lo Isaiah 66:24 tu wea sei: “Olketa bae go aot and lukluk lo olketa dead body blo olketa man wea bighed againstim mi. Bikos olketa worm lo olketa dead body bae no dae, and fire wea bonem olketa bae no savve finis.” Illustration hia wea Jesus storyim hem no minim literal safaring, bat hem minim finis for olowe. Olketa worm and fire finisim gud olketa dead body, no pipol wea laef.
Bible no talem dat eniwan wea go lo Gehenna bae laef bak. “Datfala lake blo fire” and “fire lo Gehenna” tufala minim dae for olowe, or everlasting destruction.—Revelation 20:14, 15; 21:8; Matthew 18:9.
Hao, olketa bae “safa lo there day and naet for olowe”?
If datfala lake blo fire hem symbol for destruction, why nao Bible sei Devil, wild animal, and false profet “bae safa lo there day and naet for olowe”? (Revelation 20:10) Lukim fofala reason why diswan hem no minim literal safaring:
If Devil bae safa for olowe, datwan minim hem mas gohed laef for olowe. Bat Bible sei, olketa bae finisim hem, or hem no stap nao.—Hebrew 2:14.
Everlasting laef hem wanfala gift from God, ino panisment.—Romans 6:23.
Datfala wild animal and false profet olketa symbol nomoa, dastawe olketa no savve experiencem literal safaring.
Taem Bible sei Devil hem safa, datwan minim olketa bae lokim hem for olowe or everlasting destruction.
Disfala word wea Bible iusim for “panisim” savve minim tu “for stap lo prison.” For example, Greek word wea olketa transleitim for “olketa wea panisim pipol,” lo Matthew 18:34, staka transleison olketa transleitim for “olketa man wea lukaftarem prison,” wea showim connection between tufala word hia “panisim” and “lokim.” And tu, lo Matthew 8:29 and Luke 8:30, 31 wea olketa transleitim “panisim” witim “datfala abyss,” hem minim sem samting, hem wanfala figurative ples wea no eni waka hem gohed or dae. (Romans 10:7; Revelation 20:1, 3) Really, staka taem buk blo Revelation iusim disfala word “panisim” olsem wanfala symbol nomoa.—Revelation 9:5; 11:10; 18:7, 10.