Wat Nao Forgiveness?

Ansa from Bible

Forgiveness hem samting wea man duim for showim hem no kros nao lo samwan wea mekem hem feel nogud. Lo Bible, datfala Greek word wea olketa transleitim for “forgiveness” hem minim “for let go,” hem olsem iu cancelim kaon wea samwan kaonem lo iu and no demandim hem for peim bak. Lo parabol blo Jesus abaotem datfala wakaman wea no laek forgive, hem comparem forgiveness witim wei for cancelim wanfala kaon.​—Matthew 18:23-​35.

Iumi forgivim others taem iumi let go lo wei for kros and no askem compensation lo man wea mekem iumi feel nogud or safa. Bible teachim dat love wea no selfish hem basis for tru forgiveness, bikos love “hem no kaontem nogud samting wea narawan duim lo hem.”​—1 Corinthians 13:​4, 5.

Wat forgiveness hem no minim

• Acceptim rong wea man duim. Bible againstim olketa wea acceptim nogud samting and ting dat hem olraet nomoa.​—Isaiah 5:​20.

• Pretend dat no eni samting happen. God forgivim King David for olketa serious sin hem duim, bat hem no protectim David from consequences lo akson blo hem. God even recordim olketa sin blo David lo Bible mekem iumi savve lane from distaem.​—2 Samuel 12:​9-​13.

• Letem olketa narawan tek advantage lo iu. For example, samwan kaonem iu, bat hem weistim nomoa datfala selen and then hem no savve changem bak olsem hem promisim. Hem barava sorre and apologize lo iu. Iu savve chus for forgivim hem taem iu no keepim kros, no gohed talem hem for changem bak kaon blo hem, and maet iu even cancelim datfala kaon. Bat, iu maet chus tu for no letem hem kaonem moa eni selen lo iu.​—Psalm 37:21; Proverbs 14:15; 22:3; Galatians 6:7.

• No garem eni reason for forgive. God no forgivim pipol wea min for duim nogud samting, wea min for duim nogud samting lo narawan bikos hem no laekem olketa, and no acknowledgim mistek blo olketa, no changem wei blo olketa, and no apologize lo pipol wea olketa duim nogud samting lo olketa. (Proverbs 28:13; Acts 26:20; Hebrews 10:26) Kaen pipol olsem wea no repent, olketa enemy blo God, and God no laekem iumi for forgivim olketa wea hem no forgivim.​—Psalm 139:21, 22.

  Wat if iu nao samwan treatim iu nogud then hem no laek for apologize or even admitim dat wat hem duim hem rong? Bible givim disfala advaes: “Mas no kros and mas lusim wei for kros tumas.” (Psalm 37:8) Nomata iu feel nogud, iu savve duim samting for no letem kros kontrolem iu. Trustim dat God nao bae changem bak nogud samting wea datfala person duim lo iu. (Hebrews 10:30, 31) And tu, hem comfortim iumi for savve dat wanday God bae finisim olketa samting wea spoelem iumi or mekem iumi feel nogud distaem.​—Isaiah 65:17; Revelation 21:4.

• For “Forgivim” man lo evri sismol mistek. Samtaems, instead for forgivim samwan, iumi maet talem hem dat wat hem duim hem smol samting nomoa wea hem no fit for man kros or feel nogud lo hem. Bible sei: “No kwiktaem for feel nogud lo narawan bikos wei for feel nogud hem stap lo chest blo olketa karangge man.”​—Ecclesiastes 7:9, footnote.

Hao for forgivim samwan

1. Remember wat forgiveness minim. Iu no acceptim rong samting wea man duim or act olsem no eni samting happen. Iu let go lo datwan bikos iu no laek for keepim kros.

2. Luksavve lo benefit blo wei for forgive. For no keepim kros and wei for feel nogud savve helpem iu for garem peace, impruvim health blo iu, and increasim hapi blo iu. (Proverbs 14:30; Matthew 5:9) Moa important, for forgivim others hem key for kasem forgiveness blo God for olketa sin blo iu.​—Matthew 6:​14, 15.

3. Tingim narawan. Iumi evriwan imperfect. (James 3:2) Iumi appreciatim taem others forgivim iumi, lo sem wei, iumi tu shud forgivim mistek blo olketa narawan.​—Matthew 7:​12.

4. Mas reasonable. Taem samwan mekem iumi feel nogud and hem smol samting nomoa, iumi savve applyim disfala Bible kaonsel: “Gohed for patient witim narawan.”​—Colossians 3:​13.

5. Duim samting kwiktaem. Hem gud for kwiktaem forgive, instead for letem kros leadim iu.​—Ephesians 4:​26, 27.