Wat Nao Heven Minim?
Ansa from Bible
Bible storyim thrifala basic mining for disfala word “heven”: (1) skae; (2) ples wea olketa spirit stap; and (3) hem symbolizim bignem or hae position. Taem iumi storyim each point, context bae helpem iumi for garem stret understanding abaotem heven.a
Skae. “Heven” savve minim atmosphere lo earth wea wind savve blow, olketa bird flae, olketa cloud producem rain and snow, and laetning hem laet. (Psalm 78:26; Proverbs 30:19; Isaiah 55:10; Luke 17:24) Hem savve minim tu spes raonem earth wea “sun, moon [and] olketa star” stap.—Deuteronomy 4:19; Genesis 1:1.
Ples wea olketa spirit stap. “Heven” savve minim tu ples wea olketa spirit stap, wanfala level wea hae go moa winim aotsaed universe. (1 Kings 8:27; John 6:38) Jehovah God wea hem “wanfala Spirit,” and olketa spirit angel wea hem creatim nao stap lo heven. (John 4:24; Matthew 24:36) Samtaems “heven” hem representim olketa faithful angel, “kongregeson blo olketa holy wan.”—Psalm 89:5-7.
And tu Bible iusim “heven” taem hem story abaotem ples wea Jehovah actually stay lo hem, “ples blo [hem] lo heven.” (1 Kings 8:43, 49; Hebrews 9:24; Revelation 13:6) For example, Bible sei olketa torowem kam daon Satan and olketa demon from heven, and olketa no allowed for go bak lo ples wea Jehovah stay lo hem. Nomata olsem, olketa bae still stap lo ples blo olketa spirit.—Revelation 12:7-9, 12.
Hem symbol for bignem or hae position. Olketa Scripture lo Bible iusim “heven” for representim wanfala hae position, wea usually hem join witim authority for rul. Olketa wea garem kaen position olsem hem:
Jehovah God, wea hem Olmaeti King.—2 Chronicles 32:20; Luke 15:21.
Kingdom blo God, wea hem wanfala gavman wea bae replacem evri human gavman. Bible story abaotem datfala Kingdom olsem “niu skae.”—Isaiah 65:17; 66:22; 2 Peter 3:13.b
Olketa Christian wea stay lo earth and garem hope for go ap lo heven.—Ephesians 2:6.
Olketa human gavman wea haem olketa seleva winim pipol wea olketa rul ovarem.—Isaiah 14:12-14; Daniel 4:20-22; 2 Peter 3:7.
Olketa wicked spirit wea rul ovarem world distaem.—Ephesians 6:12; 1 John 5:19.
Heven hem luk hao?
Ples wea olketa spirit stap hem wanfala busy ples. Staka handred million angel nao stap lo there wea “followim toktok blo [Jehovah].”—Psalm 103:20, 21; Daniel 7:10.
Bible sei heven hem ples wea laet shaen braet and luk naes tumas. (1 Timothy 6:15, 16) Profet Ezekiel lukim wanfala “braet laet” lo vision wea hem lukim abaotem heven, and lo vision wea Daniel lukim hem wanfala “fire wea ran olsem stream.” (Ezekiel 1:26-28; Daniel 7:9, 10) Heven hem holy or klin and beautiful.—Psalm 96:6; Isaiah 63:15; Revelation 4:2, 3.
Overall impression wea Bible talem abaotem heven hem wanfala spesol ples wea luk naes tumas and hem fit for mekem man sapraes and fraet. (Ezekiel 43:2, 3) Hem no possible for iumi olketa man fully understandim heven, bikos ples wea olketa spirit stap hem winim nao wat iumi olketa man savve minim.
a Hebrew word wea olketa transleitim for “heven” hem kam from wanfala word wea minim “hae,” or “hae tumas.” (Proverbs 25:3) Lukim The New Brown, Driver, and Briggs Hebrew and English Lexicon of the Old Testament, page 1029.
b McClintock and Strong’s Cyclopedia hem sei datfala niu heven wea Isaiah 65:17 story abaotem hem minim “wanfala niu gavman, or niu kingdom.”—Volume IV, page 122.