Why Nao Olketa Jehovah’s Witness Go Bak for Story Witim Pipol wea Sei Olketa “No Interest” Bifor?
From Olketa Jehovah’s Witness lovem God and olketa narawan, olketa laek for sharem message long Bible witim evri pipol, nomata olketa wea sei olketa “no interest” bifor tu. (Matthew 22:37-39) Love for God nao muvim mifala for obeyim komand bilong Jesus for “preach long evri pipol.” (Acts 10:42; 1 John 5:3) Mifala no preach wantaem nomoa, bat staka taem olsem olketa profet bifor. (Jeremiah 25:4) Bikos mifala lovem olketa narawan and laekem olketa for kasem laef, mifala sharem “gud nius abaotem Kingdom” long olketa, nomata olketa wea no interest bifor tu.—Matthew 24:14.
Staka taem mifala faendem pipol wea interest long olketa haos wea pipol no interest bifor. Tingim thrifala reason for datwan:
Pipol savve muv.
Olketa difren wan long haos nao interest.
Pipol savve change. Olketa samting long world savve change or happen long laef bilong pipol wea mekem olketa for “luksavve olketa needim God” and for interest long Bible message. (Matthew 5:3) Nomata olketa wea strong for againstim mifala savve change tu, olsem apostle Paul.—1 Timothy 1:13.
Message bilong mifala, mifala no forcem long eniwan. (1 Peter 3:15) Man seleva nao bae chusim worship bilong hem.—Deuteronomy 30:19, 20.