Hu Nao Olketa Nephilim?
Ansa from Bible
Olketa Nephilim olketa giant, wea barava raf. Olketa pikinini blo olketa wicked angel wea born afta olketa angel hia duim sex witim olketa woman lo taem blo Noah.a
Bible sei dat “olketa son blo datfala tru God lukim olketa gele blo olketa man hia barava naesbola.” (Genesis 6:2) Olketa hia wea ‘olketa son blo God’ actually olketa spirit creature wea rebel againstim God taem olketa “lusim ples wea olketa shud stap” lo heven, change for garem body olsem man, and “start for tekem eni gele wea olketa laekem for kamap waef blo olketa.”—Jude 6; Genesis 6:2.
Olketa hybrid pikinini hia olketa no ordinary pikinini. (Genesis 6:4) Olketa Nephilim olketa giant wea savve bully, from olketa garem paoa olketa fulimap earth witim violence. (Genesis 6:13) Bible describem olketa olsem “olketa maeti man blo bifor, olketa man wea famous.” (Genesis 6:4) Olketa lusim bihaen legacy blo violence and fraet.—Genesis 6:5; Numbers 13:33.b
Tingting wea no stret abaotem olketa Nephilim
Tingting wea no stret: Olketa Nephilim laef yet lo earth distaem.
Tru samting: Jehovah mekem wanfala global flood for distroem pipol wea raf lo datfala taem. Olketa Nephilim tu dae witim evri wicked pipol. Bat, Jehovah hapi lo Noah and famili blo hem and olketa nomoa stap laef lo datfala taem.—Genesis 6:9; 7:12, 13, 23; 2 Peter 2:5.
Tingting wea no stret: Dadi blo olketa Nephilim olketa human nomoa.
Tru samting: Bible kolem dadi blo olketa, “olketa son blo datfala tru God.” (Genesis 6:2) Bible iusim disfala sem expression for describem olketa angel. (Job 1:6; 2:1; 38:7) Olketa angel garem paoa for changem body blo olketa for kamap man. (Genesis 19:1-5; Joshua 5:13-15) Aposol Peter story abaotem “olketa spirit lo prison wea no obeyim God lo taem blo Noah.” (1 Peter 3:19, 20) Jude wanfala Bible raeta tu storyim sem samting. Hem explainim dat samfala angel “no tinghae lo waka wea olketa garem firstaem bat wea lusim ples wea olketa shud stap.”—Jude 6.
Tingting wea no stret: Olketa Nephilim olketa nogud angel.
Tru samting: Context blo Genesis 6:4 showim dat olketa Nephilim, olketa no olketa angel, bat olketa hybrid pikinini wea born afta olketa angel changem body blo olketa olsem man, and duim sex witim olketa woman. Afta olketa angel hia “start for tekem eni gele wea olketa laekem for kamap waef blo olketa,” Jehovah talem dat olketa bae laef for 120 years nomoa then hem bae tek akson againstim rabis pipol lo datfala taem. (Genesis 6:1-3) Bible sei moa “lo datfala taem,” olketa angel wea changem body for kamap man “gohed for sleep witim olketa gele blo olketa man” and olketa bornem “olketa maeti man blo bifor,” wea hem nao olketa Nephilim.—Genesis 6:4.
a Hebrew word wea olketa transleitim for “Nephilim” maet minim “Olketa wea mekem olketa narawan for foldaon.” Wilson’s Old Testament Word Studies hem sei datfala word hem savve minim “olketa wea mekem olketa narawan foldaon lo violence and steal from olketa, and mekem olketa foldaon.”
b Luk olsem olketa Israelite spae wea Numbers 13:33 storyim, olketa lukim pipol wea big fogud and datwan remindim olketa lo story blo olketa Nephilim, wea dae centuries ago.—Genesis 7:21-23.