OLKETA KWESTIN WEA YOUNG PIPOL GAREM
Hao Nao Mi Savve Misstim Wei for Taed Tumas and Spoelem Health blo Mi?
Waswe, iu man wea savve kamap taed tumas? Sapos olsem, disfala article savve helpem iu!
Wanem nao mekem?
Bigfala hevi. Wanfala young gele wea nem blo hem Julie hem sei, “Pipol evritaem talem mifala for trae kasem or duim samting wea winim samting wea mifala kasem or duim finis, and for markem olketa niu goal wea winim olketa goal wea mifala kasem finis tu. Diswan hem putim bigfala hevi lo mifala!”
Technology. Distaem, pipol savve olowe sendem message and nara samting kam lo mobile phone, 24 hour lo evriday, wea mekem iumi busy tumas for readim and givim ansa. Diswan putim hevi lo man wea gogo savve mekem hem taed tumas.
No kasem inaf sleep. Nara young gele wea nem blo hem Miranda, hem sei: “Staka young pipol no kasem inaf sleep bikos olketa waka for selen lo naet, and evritaem busy for duim homwak.” Kaen wei olsem savve mekem man taed fogud.
Why iumi shud keakea lo diswan
Bible hem mekhae lo wei for waka hard. (Provebs 6:6-8; Rome 12:11) Bat hem no sei for man waka hard tumas gogo hem spoelem health blo hemseleva.
Ashley hem sei: “Gogo, mi just luksavve, full day nao mi no kaikai bikos mi busy tumas for duim staka samting wea mi agree for duim. Samting mi lanem nao, hem no wise for acceptim evri assignment, especially sapos wei for duim olsem hem spoelem health blo mi.”
Bible hem sei: “Dog wea hemi laef yet hemi gud moa wnim laeon wea hemi dae finis.” (Eklesiastes 9:4) Maet wei for trae duim staka samting bae mekem iu tingse iu strong olsem lion for lelebet taem. Bat gogo, iu savve barava spoelem health blo iu.
Wanem iu savve duim
Lane for sei nomoa. Bible hem sei: “Man hemi hambol nao hemi waes.” (Provebs 11:2) Man wea hambol bae savve lo wanem hem no fit for duim and bae no agree for duim datwan.
Jordan hem sei: “Man wea hem trae for duim evri samting wea narawan askem hem for duim bae kasem nogud samting. Man olsem no luksavve lo wanem hem no fit for duim, gogo, bae hem spoelem health blo hem.”
Kasem inaf rest. Bible hem sei: “Hemi moabeta fo yumi waka lelebet an garem lelebet samting nomoa, winim yumi garem staka samting from yumi barava wakahad tumas olsem yumi aftarem nomoa win.” (Eklesiastes 4:6) Olketa sei sleep hem “olsem kaikai for brain,” bat staka teenager no kasem inaf sleep. Olketa shud trae sleep for 8 or maet 10 hour evri naet.
Brooklyn hem sei: “Wantaem, schedule blo mi ova tumas and mi no kasem inaf sleep. Bat samfala taem, for mi gohed sleep for nara hour moa bae helpem mi for duim moa samting and for hapi.”
Organize gud. Bible hem sei: “Man wea plan gud bae win.” (Proverbs 21:5, NW) Wei for organize gud and for balance lo hao iumi iusim taem blo iumi and lo samting iumi duim bae helpem iumi lo full laef blo iumi.
Vanessa hem sei: “Wei for raetem wanfala schedule savve helpem iumi for misstim hevi. Wei for savve lukluk lo schedule olsem, bae helpem iu for lukim samting wea maet iu need for changem mekem iu no kamap taed tumas.”