Mi Laek for Dae—Hao, Bible Savve Helpem Mi Taem Mi Garem Tingting for Suisaed?
Ansa from Bible
Yes! Bible hem kam from “God, wea hem comfortim olketa wea sorre.” (2 Corinthians 7:6) Nomata Bible hem no wanfala mental-health textbuk, hem bin helpem staka pipol for ovakamim tingting for suisaed. Olketa practical advaes blo hem savve helpem iu tu.
Wat practical advaes nao Bible givim?
● Expressim feeling blo iu.
Wat Bible talem: “Wanfala tru fren hem showim love evritaem. And hem kamap wanfala brata blo iu lo taem blo trabol.”—Proverbs 17:17.
Mining: Iumi needim help from frens taem iumi garem tingting wea no stret.
If iu keepim nomoa olketa nogud feeling blo iu, iu karem burden wea iu hard for winim. Bat if iu sharem feeling blo iu witim narawan, isisi iu bae start for feel beta and garem difren tingting abaotem datfala situation.
Traem diswan: Story witim samwan tuday, maet wanfala famili member or fren wea iu trustim.a Iu maet expressim feeling blo iu tu lo wei for raetem daon.
● Kasem medical help.
Wat Bible talem: “Pipol wea sik nao need for go lukim doctor, no olketa wea healthy.”—Matthew 9:12.
Mining: Iumi shud lukaotem medical help taem iumi sik.
Maet tingting for suisaed hem wanfala symptom blo mentol or emotional illness. Olsem olketa nara sik, hem no samting for shame lo hem. Doctor savve treatim mentol and emotional illness.
Traem diswan: Kwiktaem kasem help from wanfala qualified doctor.
● Remember dat God hem kea.
Wat Bible talem: “Man savve salem faevfala sparrow bird for tufala coin wea value blo hem smol nomoa, iaman? Nomata olsem, God no forgetim eniwan lo olketa. . . . So iufala no fraet, bikos iufala barava important winim staka sparrow bird.”—Luke 12:6, 7.
Mining: Iu spesol lo eye blo God.
Iu maet feel no eniwan stap wea kea for iu, bat God lukim wat iu go thru lo hem. Hem kea abaotem iu even if iu no laek for laef moa. Psalm 51:17 sei: “Heart wea brek and pisis, O God, bae iu no rejectim.” God laekem iu for gohed laef bikos hem lovem iu.
Traem diswan: Lukim olketa evidence from Bible wea showim God lovem iu. For example, lukim chapter 24 blo Bible study buk Kam Klos Long Jehovah.
● Prea lo God.
Wat Bible talem: “Torowem evri wari blo iufala go lo [God] bikos hem kea for iufala.”—1 Peter 5:7.
Mining: God laekem iu for talem hem hao iu really feel and wat iu wari abaotem.
God savve givim iu peace lo mind and strong for gohed. (Philippians 4:6, 7, 13) Lo disfala wei, hem sapotim olketa wea kol lo hem for help.—Psalm 55:22.
Traem diswan: Prea lo God tuday. Iusim nem blo hem, Jehovah, and talemaot olketa feeling blo iu lo hem. (Psalm 83:18) Askem hem for helpem iu gohed stap laef.
● Meditate lo hope lo Bible for future.
Wat Bible talem: “Iumi garem disfala hope wea hem olsem wanfala anka for laef blo iumi wea hem strong and stedy.”—Hebrews 6:19.
Mining: Samtaems olketa emotion savve go ap and daon olsem ship insaed wanfala storm, bat hope wea Bible storyim savve stabilizem iu.
Datfala hope hem no wanfala dream nomoa, bat hem base lo promis blo God for removim samting wea kosim pain wea kasem iumi.—Revelation 21:4.
Traem diswan: Iu savve lanem moa samting abaotem hope lo Bible if iu readim article “Wanfala Real Hope for Gudfala Future.”
● Duim samting wea iu enjoyim.
Wat Bible talem: “Heart wea hapi hem gudfala medicine.”—Proverbs 17:22.
Mining: Taem iumi duim olketa tings wea mekem iumi hapi, datwan savve impruvim mentol and emotion blo iumi.
Traem diswan: Duim samting wea iu normally enjoyim. For example, lisin lo music mekem iu feel gud, readim samting wea encouragem iu, or duim nara activity wea iu enjoyim. And tu, iu savve increasim hapi blo iu if iu duim samting for olketa narawan, even if hem smol samting.—Acts 20:35.
● Tek kea lo physical health blo iu.
Wat Bible talem: “Physical training hem helpem man.”—1 Timothy 4:8.
Mining: Iumi kasem gud samting taem iumi exercise, rest gud, and kaikaim healthy kaikai.
Traem diswan: Go wakabaot lelebet, even for just 15 minutes.
● Remember dat feeling and olketa nara samting lo laef savve change.
Wat Bible talem: “Iufala no savve wat nao bae happen lo laef blo iufala tumoro.”—James 4:14.
Mining: Wanfala distressing problem, wea iu ting hem no garem eni solution, maet hem temporary nomoa.
Nomata luk olsem hem hard for iu winim problem hia tuday, bat hem savve change tumoro. So lukaotem wei for deal witim datwan. (2 Corinthians 4:8) Distressing situation blo iu savve change enitaem, bat if iu suisaed iu hard for changem datwan moa.
Traem diswan: Readim Bible account abaotem pipol wea barava discourage gogo olketa laek for dae, and lukim hao isisi laef blo olketa change for beta lo wei wea olketa no tingim. Lukim samfala example.
Hao, Bible talem iumi abaotem pipol wea laek for dae?
Yes. Bible hem story abaotem samfala wea talem dat “olketa laek for dae.” God no kros lo olketa, bat givim help wea olketa needim. Hem savve duim sem samting for iu tu.
Elijah
● Hem wat kaen man? Elijah hem wanfala brave profet. Bat samtaems hem discourage tu. James 5:17 sei: “Elijah hem man wea garem sem feeling olsem iumi nomoa.”
● Why nao hem laek for dae? Wantaem, Elijah feel alone, hem fraet, and feel iusles. So hem begim Jehovah: “Jehovah, iu tekem laef blo mi nao.”—1 Kings 19:4.
● Wat nao helpem hem? Elijah talemaot exact feeling blo hem lo God. Hao nao God encouragem hem? God showim hem kea for hem and mekem hem lukim paoa blo God. Jehovah assurem Elijah tu dat hem needim Elijah and givim wanfala man for helpem hem.
▸ Read abaotem Elijah lo: 1 Kings 19:2-18.
Job
● Hem wat kaen man? Job hem wanfala wealthy famili man wea faithful for worshipim tru God.
● Why nao hem laek for dae? Laef blo Job hem barava change kwiktaem nomoa. Hem lusim evriting wea hem onam. Evri pikinini blo hem dae lo wanfala disaster. Hem kasem sik wea mekem hem safa tumas. And, samfala fren blo hem tok spoelem and accusim hem sei hem nomoa mekem olketa problem hia kasem hem. Job sei: “Mi barava heitim laef blo mi. Mi no laek gohed laef nao.”—Job 7:16.
● Wat nao helpem hem? Job prea lo God and story witim olketa narawan. (Job 10:1-3) Fren blo hem Elihu wea kaen lo hem encouragem hem and helpem hem for garem stret tingting abaotem situation blo hem. And important samting, Job acceptim kaonsel and help from God.
▸ Read abaotem Job lo: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moses
● Hem wat kaen man? Moses hem leader lo nation blo Israel bifor and hem wanfala faithful profet.
● Why nao hem laek for dae? Moses garem bigfala waka for duim, olketa narawan gohed criticizem hem, and hem taed. So hem krae go lo God olsem: “Plis iu killim mi dae distaem.”—Numbers 11:11, 15.
● Wat nao helpem hem? Moses talem feeling blo hem lo God. God helpem Moses witim waka blo hem mekem hem no stress tumas.
▸ Read abaotem Moses lo: Numbers 11:4-6, 10-17.
a If tingting for suisaed hem kamap big and olketa loved wans no available, iu savve kolem emergency namba.