Olketa No Changem Bak Samting wea Tufala Priest Duim lo Olketa
Wanfala circuit overseer lo Armenia, wea nem blo hem Artur, hem visitim wanfala kongregeson blo Olketa Jehovah’s Witness. Hem faendemaot olketa brata and sista lo there no duim yet pablik witnessing. So for encouragem olketa for duim datwan, hem and waef blo hem Anna, witim narafala Witness wea nem blo hem Jirayr, startim wanfala witnessing trolley lo wanfala smol taon. Olketa chusim road wea staka pipol wakabaot followim.
Stretawe, pipol interest and savve tekem literature. Bihaen lelebet taem, pipol wea againstim olketa Witness lukim diswan. Tufala priest kam lo datfala trolley and wanfala hem kikim datwan, mekem hem foldaon. Then hem hitim Artur lo feis. Artur, Anna, and Jirayr story witim tufala priest hia for trae katem daon kros blo tufala bat tufala no laek herem. Olketa gohed purubutim datfala trolley and literature lo hem. Tufala tok swear lo olketa Witness, warnim olketa for no kam moa lo there, and then tufala go.
Artur, Anna, and Jirayr go lo police station for reportim datwan. Olketa storyim samting wea happen and storyim tu Bible lo olketa police and narawan wea waka lo station. Olketa tekem thrifala hia go lo bigman blo olketa police lo there. Lo firstaem, hem laek savve nomoa lo wanem hem happen. Bat taem hem herem Artur, wea hem strong man tumas, hem no changem bak samting wea priest duim lo hem, hem no askem eni kwestin moa abaotem samting wea happen bat hem laek for savve moa abaotem biliv blo olketa Witness. Olketa gohed story for fofala hour! Bigman hia barava tinghae lo samting wea hem herem and hem sei: “Nambawan religion nao datwan! Mi laek joinim tu!”
Artur and Anna
Lo next day, taem Artur duim pablik witnessing moa, wanfala man wea lukim samting wea happen lo day bifor hem kam lo hem. Hem praisem Artur for wei wea hem no changem bak samting wea priest duim lo hem. Hem sei samting wea hem lukim mekem hem for no garem eni respect nao for olketa priest.
Lo datfala evening, bigman blo police ask for Artur kam lo hem moa. Hem no askem eni kwestin moa abaotem samting wea happen bat hem askem samfala kwestin abaotem Bible. Nara tufala policeman kam for herem story tu.
Lo next day, Artur go bak moa lo bigman hia for showim samfala Bible video blo iumi. Bigman hia singaot go lo olketa nara police for kam lukim olketa video tu.
So from nogud samting wea tufala priest hia duim, staka policeman herem message lo Bible for firstaem. Diswan mekem olketa for tinghae lo Olketa Jehovah’s Witness.