Gohed Followim Datfala “Road wea Holy”

1-2. Wanem important disison nao olketa Jew wea stap lo Babylon need for mekem? (Ezra 1:2-4)

KING blo Persia mekem wanfala announcement! Hem sei olketa Jew wea prisoner lo Babylon for winim 70 year, olketa free for go bak lo land blo olketa lo Israel. (Readim Ezra 1:2-4.) Only Jehovah nomoa fit for duim diswan. Why nao iumi sei olsem? Bikos hem no wei blo olketa lo Babylon for letem prisoner blo olketa for kamap free. (Isa. 14:4, 17) Bat wanfala niu ruler hem tek ovarem Babylon, and hem letem olketa Jew for go bak lo kantri blo olketa. From datwan, evri Jew, especially olketa famili hed mas mekem wanfala important disison, wea hem nao for stap lo Babylon or for go bak. Maet hem no isi for mekem datfala disison. Why nao olsem?

² From datfala gogo hem farawe tumas, hem hard for staka wea olo for go bak. And from staka Jew born lo Babylon, olketa ting lo Babylon olsem hom blo olketa, and Israel olsem land blo grani blo olketa. Luk olsem samfala Jew kamap rich lo Babylon, so maet hem no isi tu for olketa lusim naes haos or bisnis blo olketa, for go stap lo land wea olketa no savve.

3. Wanem blessing nao olketa Jew wea faithful bae kasem taem olketa go bak moa lo Israel?

³ Olketa Jew wea faithful savve if olketa go bak lo Israel, gud samting wea olketa bae kasem hem winim eni sakrifaes wea olketa mekem. Main blessing wea olketa bae kasem, hem saed lo worship. Babylon garem winim 50-fala temple blo olketa false god, bat no eni temple blo Jehovah lo there. No eni altar stap lo there for olketa Israelite offerim olketa sakrifaes followim Law blo Moses, and hard for olketa priest duim waka blo olketa for offerim olketa sakrifaes hia. And pipol lo there wea no tinghae lo Jehovah or olketa standard blo hem, olketa staka winim pipol blo Jehovah. Dastawe staka thousand faithful Jew luk forward for go bak lo hom for mekem tru worship kamap moa.

4. Wanem help nao Jehovah promisim lo olketa Jew wea bae go bak lo Israel?

⁴ Datfala real road for travel followim from Babylon kasem Israel, hem no isi and savve tekem samting olsem fofala month. Bat Jehovah promis for kliarem eni hard samting wea maet stopem olketa Jew for go bak. Isaiah hem sei: “Kliarem road blo Jehovah! Mekem wanfala main road wea stret, wea go thru lo desert for God blo iumi. . . . Levelem graon wea hem raf, and graon wea no level for hem kamap wanfala flat ples.” (Isa. 40:3, 4) Imaginim diswan: Wanfala main road hem go thru lo desert and go followim olketa valley between olketa maunten. Man bae hapi for followim road olsem! Hem bae isi for followim flat road olsem, winim for klae ap and daon lo olketa maunten and hill, or valley. And hem bae fast tu for followim.

5. Wat nao nem blo datfala tokpiksa road wea start lo Babylon go kasem Israel?

⁵ Distaem staka highway or road garem nem or namba. Tokpiksa main road wea Isaiah storyim hem garem nem tu. Bible sei: “Wanfala main road bae lo there, tru tumas, wanfala road wea olketa kolem lo Road wea Holy. Man wea no klin bae no wakabaot followim.” (Isa. 35:8) Wat nao mining blo datfala promis for olketa Israelite lo datfala taem? And wat nao hem minim for iumi distaem?

“ROAD WEA HOLY”​—BIFOR AND DISTAEM

6. Why nao olketa kolem datfala road holy?

⁶ “Road wea Holy” hem naes nem for wanfala highway! Why nao olketa kolem datfala road holy? Bikos eni “man wea no klin,” olsem eni Jew wea gohed for duim olketa nogud samting, worshipim idol, or duim olketa nara serious sin bae no stap lo Israel. Olketa Jew wea go bak mas kamap “holy pipol” blo God. (Deut. 7:6) Nomata olsem, olketa wea lusim Babylon still need for changem samfala wei blo olketa for mekem Jehovah hapi.

7. Wat nao samfala change wea olketa Jew need for mekem lo laef blo olketa? Storyim example.

⁷ Olsem iumi storyim finis, staka Jew born lo Babylon, and luk olsem staka lo olketa getius lo tingting and wei blo olketa lo Babylon. Sixti-naen year bihaen olketa first Jew go bak lo Israel, Ezra faendaot samfala Jew maritim olketa woman wea worshipim false god. (Ex. 34:15, 16; Ezra 9:1, 2) Then bihaen, Governor Nehemiah sapraes for faendaot hao olketa pikinini wea born lo Israel no even lanem languis blo olketa Jew. (Deut. 6:6, 7; Neh. 13:23, 24) So hao nao olketa young wan hia savve lane for lovem and worshipim Jehovah, if olketa no minim Hebrew languis, wea hem nao main languis wea olketa raetem lo Law blo God? (Ezra 10:3, 44) Olketa Jew hia need for mekem samfala big change lo laef blo olketa, bat bae hem moa isi for olketa duim datwan lo Israel, ples wea klin worship isisi for kamap moa.​—Neh. 8:8, 9.

8. Why nao iumi shud interest distaem lo olketa samting wea happen longtaem go finis? (Lukim piksa lo front page.)

⁸ Samfala maet sei: ‘Datwan barava interesting! Bat waswe, samting wea happen lo olketa Jew longtaem bifor hem garem eni mining for iumi distaem tu?’ Yes, bikos iumi tu wakabaot followim datfala “Road wea Holy.” Nomata iumi wanfala anointed wan or “nara sheepsheep,” iumi evriwan mas gohed followim datfala “Road wea Holy,” wea leadim iumi insaed spiritual paradaes and for kasem olketa blessing anda lo Kingdom lo future.b (John 10:16) Start from 1919, staka million man, woman, and pikinini lusim Bigfala Babylon, wea hem nao evri false religion lo world, and followim datfala tokpiksa road. Maet iu wanfala lo olketa tu. Nomata datfala road hem open samting olsem 100 year go nomoa, waka for preparem datfala road hem start finis staka handred year bifor datwan.

WAKA FOR PREPAREM DATFALA ROAD

9. For fitim wat Isaiah 57:14 storyim, hao nao olketa preparem datfala “Road wea Holy”?

⁹ Jehovah mek sure no eni samting blokem gogo blo olketa Jew wea lusim Babylon bifor. (Readim Isaiah 57:14.) Waswe lo datfala “Road wea Holy” wea iumi followim distaem? For staka handred year bifor 1919, Jehovah iusim samfala man wea tinghae lo hem for kliarem datfala road for mekem pipol lusim Bigfala Babylon. (Comparem Isaiah 40:3.) Olketa duim important waka for redyim road hia mekem pipol wea garem gud heart savve lusim Bigfala Babylon and go insaed spiritual paradaes, ples wea klin worship blo Jehovah gohed distaem. Wat nao olketa duim for redyim datfala road? Bae iumi storyim samfala samting.

10-11. Hao nao wei for printim and transleitim Bible helpem pipol for savve lo wanem Bible teachim? (Lukim tu piksa.)

¹⁰ Printing. Kam kasem samting olsem year 1450, olketa iusim hand nomoa for copyim Bible. From datwan tek longtaem tumas, hem hard for man garem wanfala copy blo Bible and hem barava expensive. Bat taem olketa wakem printing machine, datwan mekem hem moa isi for printim olketa copy blo Bible and for distributim.

¹¹ Transleison. For staka handred year main languis wea Bible stap lo hem, hem Latin languis, and olketa wea skul gud nomoa savve minim. Bat taem wei for print hem kamap moa isi, samfala wea tinghae lo God waka hard for transleitim Bible lo olketa languis wea ordinary pipol iusim. From datwan, olketa wea readim Bible savve comparem wanem Bible teachim witim wanem olketa bigman lo religion teachim.

12-13. Storyim example blo hao samfala man wea studyim gud Bible olketa showimaot klia laea teaching blo olketa false religion.

¹² Olketa tul for studyim Bible. Samfala man wea studyim gud Bible lanem staka samting from wanem olketa readim. From olketa man hia no hol bak for talemaot wanem olketa lanem, olketa bigman lo religion barava kros lo olketa. For example, lo samting olsem 1835, samfala faithful man pablisim olketa tract wea showimaot klia false teaching blo olketa religion.

¹³ Lo samting olsem 1835, Henry Grew wea hem wanfala man wea tinghae lo God pablisim wanfala tract wea storyim wanem hem happen lo olketa wea dae. Lo datfala tract, hem pruvim from Bible hao samwan hem only kasem immortal laef or no savve dae if God givim lo hem. Diswan difren from wanem olketa religion teachim wea sei evriwan born witim soul wea no savve dae. Lo 1837, wanfala minister, wea nem blo hem George Storrs, faendem datfala tract taem hem travel lo train. Hem readim and luksavve hem faendem wanfala important truth. Hem storyim lo olketa narawan wanem hem lanem. Lo 1842, hem givim olketa tok wea garem disfala interesting title “Wanfala Kwestin​—Waswe, Olketa wea Wicked Kanduit Dae?” Olketa information wea George Storrs raetem barava affectim wanfala young man wea nem blo hem Charles Taze Russell.

14. Hao nao waka wea samfala bin duim for preparem datfala road hem helpem Brata Russell and olketa fren blo hem? (Lukim tu piksa.)

¹⁴ Hao nao waka wea samfala bin duim for preparem datfala road helpem Brata Russell and olketa fren blo hem? Brata Russell and olketa fren blo hem iusim olketa lexicon, concordance, and olketa difren Bible transleison wea samfala bin raetem bifor for helpem olketa lo study blo olketa. Olketa iusim tu samfala Bible research blo Henry Grew, George Storrs, and olketa narawan. Brata Russell and olketa fren blo hem duim big waka tu for preparem datfala road taem olketa producem staka buk and olketa tract wea storyim olketa topic lo Bible.

15. Wat nao samfala samting wea start for happen lo 1919?

¹⁵ Lo 1919, Bigfala Babylon no garem paoa nao ovarem pipol blo God. Lo datfala sem year, “datfala wakaman wea faithful and wise” start for duim waka for helpem pipol wea garem gud heart for followim datfala “Road wea Holy” wea just open. (Matt. 24:45-47) From olketa narawan bifor help for preparem datfala road, olketa wea just start for followim datfala road savve lanem moa samting abaotem Jehovah and plan blo hem. (Prov. 4:18) From datwan, olketa savve changem tu laef blo olketa for followim standard blo Jehovah. Jehovah no expectim pipol blo hem for kwiktaem nomoa change. Bat hem isisi mekem olketa for kamap klin. (Lukim box “Jehovah Isisi Mekem Pipol blo Hem for Kamap Klin.”) Iumi bae hapi tumas taem iumi fit for duim evri samting wea mekem Jehovah hapi!​—Col. 1:10.

“ROAD WEA HOLY” HEM STILL OPEN

16. Start lo 1919, wat kaen maintenance waka nao gohed lo datfala “Road wea Holy”? (Isaiah 48:17; 60:17)

¹⁶ Olketa road needim maintenance evritaem. So start lo 1919, maintenance waka gohed lo datfala “Road wea Holy” for mekem hem isi for staka pipol lusim Bigfala Babylon. Datfala wakaman wea faithful and wise gohed for waka, and lo 1921, olketa pablisim wanfala buk for helpem pipol studyim Bible and for lanem truth. Nem blo datfala buk hem, The Harp of God, and olketa printim samting olsem six million copy lo 36 languis. Datfala buk helpem staka pipol for lanem truth. And no longtaem go nomoa, iumi kasem wanfala nambawan niu buk Enjoyim Laef for Olowe! for helpem iumi conductim Bible study. Lo olketa last day distaem, Jehovah gohed iusim organization blo hem for provaedem spiritual kaikai for helpem iumi for gohed followim datfala “Road wea Holy.”​—Readim Isaiah 48:17; 60:17.

17-18. Wea nao end blo datfala “Road wea Holy”?

¹⁷ Taem samwan acceptim for studyim Bible, hem garem chance for wakabaot followim datfala “Road wea Holy.” Samfala wakabaot short distance nomoa then olketa lusim datfala road. Olketa narawan gohed for followim go kasem taem olketa kasem end blo datfala road. Wea nao end blo datfala road?

¹⁸ For olketa wea garem hope for go lo heven, datfala “Road wea Holy” hem leadim olketa for kasem “paradaes bilong God” lo heven. (Rev. 2:7) For olketa wea garem hope for stap lo earth, datfala road leadim olketa for kasem perfect laef lo end blo datfala 1,000 year. If iu travel followim datfala road distaem, no luk bak. And no lusim datfala road go kasem taem iu kasem end blo datfala road lo niu world! Mifala wishim iufala “sef trip.”