Keepim Fire blo Jehovah Gohed Laet Big

1. Wat nao naesfala toktok wea Bible talem abaotem tru love?

LOVE hem olsem “faea blong [Jehovah] wea hemi laet bikfala tumas. Nomata wata long bik riva, hemi no save kilim dae disfala bikfala faea, o flad tu hemi no save draonem.”b (Nambawan Singsing 8:6, 7, ftn. SIPB) Datwan hem naes toktok abaotem tru love. Olketa toktok hia teachim olketa marit couple disfala important truth: Iu savve garem trufala love for each other.

2. Wat nao wanfala couple need for duim for mek sure love blo tufala no cold daon?

² For wanfala couple garem tru love for full laef blo tufala, hem bae depend lo tufala. For example, for fire gohed bone olowe, iumi mas gohed putim firewood lo hem. If iumi no duim datwan, gogo bae fire hem dae. Olsem tu, love wea hasband and waef garem for each other savve gohed strong for olowe, only if tufala strongim frenship blo tufala. Samfala taem love blo wanfala couple savve cold daon, especially taem olketa deal witim hard taem saed lo selen, health problem, or stress for lukaftarem olketa pikinini. So if iu marit finis, hao nao iu savve gohed keepim “faea blong [Jehovah]” gohed laet big? Lo disfala article, iumi bae storyim thrifala samting wea iutufala savve duim for strongim frenship blo iutufala and for enjoyim hapi marit.c

GOHED STRONGIM FRENSHIP BLO IU WITIM JEHOVAH

3. Hao nao wei for fren gud witim Jehovah savve helpem wanfala couple for gohed strongim love blo tufala? (Eklesiastes 4:12, SIPB) (Lukim tu piksa.)

³ For wanfala marit couple gohed keepim “faea blong [Jehovah]” gohed laet big, tufala need for strongim wei wea tufala fren witim Jehovah. Hao nao datwan savve helpem marit blo tufala? Taem tufala tinghae lo frenship blo tufala witim Jehovah, tufala bae willing for followim advaes blo hem, and datwan bae helpem tufala for avoidim and winim olketa problem wea savve mekem love blo tufala for each other for cold daon. (Readim Eklesiastes 4:12, SIPB.) Olketa wea fren gud witim Jehovah duim best tu for followim olketa wei blo hem, olsem for kaen, patient, and forgivim each other. (Eph. 4:32–5:1) Taem couple garem olketa wei olsem, bae hem isi for tufala barava lovem each other. Sista Lena, wea marit for winim 25 year finis sei: “Hem isi for lovem and respectim man wea lovem God.”

4. Why nao Jehovah chusim Joseph and Mary for kamap parents blo datfala Messiah?

⁴ Tingim disfala Bible example. Taem Jehovah mas chusim wanfala couple for kamap parents blo datfala Messiah, Hem chusim Joseph and Mary nomata staka kam from laen from David. Why nao olsem? Bikos tufala evriwan fren gud witim Jehovah, and Jehovah savve love blo tufala for Hem bae strongim marit blo tufala. Olketa hasband and waef, wat nao iufala savve lanem from Joseph and Mary?

5. Wat nao olketa hasband savve lanem from Joseph?

⁵ Joseph willing for followim direction blo Jehovah dastawe hem gud hasband. Thrifala taem hem kasem direction from God for famili blo hem. Each taem, hem stretawe obey, nomata hem mas mekem samfala big change. (Matt. 1:20, 24; 2:13-15, 19-21) From hem followim direction blo God, Joseph protectim, sapotim, and provaed for Mary. Masbi olketa samting wea Joseph duim mekem Mary barava lovem and respectim hem! Iufala hasband savve followim example blo Joseph taem iufala lukaotem advaes lo Bible lo hao for lukaftarem famili.d Taem iufala followim disfala advaes, nomata iufala mas mekem samfala big change, iufala showim iufala lovem waef and datwan bae strongim marit blo iufala. Wanfala sista lo Vanuatu wea marit for winim 20 year finis sei: “Taem hasband blo mi lukaotem and followim direction blo Jehovah, mi barava respectim hem. Mi feel sef and trustim olketa disison blo hem.”

6. Wat nao olketa waef savve lanem from example blo Mary?

⁶ Faith blo Mary no depend lo wanem Joseph duim, bikos hemseleva fren gud witim Jehovah. Hem savve gud lo olketa scripture. (Lukim study note blo Luke 1:46 lo English.) Hem savve spendem taem tu for ting raonem samting. (Luke 2:19, 51) For sure Mary hem wanfala gud waef bikos hem fren gud witim Jehovah. Distaem staka waef traem best for duim sem samting olsem Mary. For example, Sista Emiko sei: “Taem mi singol, mi garem own spiritual schedule blo mi. Bat bihaen mi marit, hasband nao prea for mitufala and lead lo famili worship, so faith blo mi start for depend lo wanem hem duim. Gogo, mi luksavve miseleva need for strongim frenship blo mi witim Jehovah. So distaem, mi markem taem for miseleva spendem witim God blo mi for prea, readim Bible, and ting raonem wanem hem laekem.” (Gal. 6:5) Olketa waef, taem iufala strongim frenship blo iufala witim Jehovah, olketa hasband blo iufala bae garem staka moa reason for praisem and lovem iufala.​—Prov. 31:30.

7. Wat nao olketa couple savve lanem from Joseph and Mary abaotem wei for worshipim Jehovah tugeta?

⁷ Joseph and Mary waka tugeta for strongim frenship blo tufala witim Jehovah. Tufala luksavve hao hem important for famili worshipim Jehovah tugeta. (Luke 2:22-24, 41; 4:16) Maet datwan no isi especially taem tufala start for garem staka pikinini, nomata olsem, tufala duim. Datwan nambawan example for olketa marit couple distaem! If iu garem olketa pikinini, olsem Joseph and Mary, maet hem no isi for attendim olketa meeting or markem taem for duim famili worship. And maet hem hard go moa for faendem taem for tufala study or prea tugeta. Bat tingim, taem iutufala worshipim Jehovah tugeta, datwan bae mekem iutufala fren gud witim hem and witim each other. So mekem worship main samting lo laef blo iutufala.

8. Wat nao wanfala couple wea garem samfala problem lo marit savve duim for enjoyim famili worship?

⁸ Waswe sapos iutufala garem samfala problem lo marit blo iutufala? Maet bae iutufala no hapi for duim famili worship tugeta. Sapos olsem, start witim wanfala topic wea iutufala enjoyim bat no need for story longtaem. Taem iutufala duim datwan, hem bae strongim frenship blo iutufala and feeling for laek for duim spiritual samting tugeta.

SPENDIM TAEM TUGETA

9. Why nao hasband and waef mas spendem taem witim each other?

⁹ Nara samting wea iufala marit couple savve duim for strongim love blo iufala, hem for spendem taem tugeta. Taem iutufala duim datwan, bae iutufala no lus interest lo each other, bat bae iutufala tingim feeling blo each other. (Gen. 2:24) Tingim wanem Lilia and Ruslan faendaot no longtaem bihaen tufala marit, datwan hem winim 15 year go finis. Lilia sei: “Mitufala faendaot hao mitufala no savve spendem staka taem tugeta. Mitufala busy lo waka for selen, duim olketa waka lo haos, and busy for lukaftarem olketa pikinini. Mitufala faendaot if mitufala no spendem taem tugeta, bae isisi mitufala no klos lo each other.”

10. Hao nao olketa marit couple savve followim principle wea stap lo Ephesus 5:15, 16?

¹⁰ Wat nao iufala olketa couple savve duim for mek sure iufala spendem taem tugeta? Maet iufala need for markem taem for spendem witim each other. (Readim Ephesus 5:15, 16.) Wanfala brata lo Nigeria wea nem blo hem Uzondu sei: “Taem mi mekem schedule for olketa waka blo mi, mi markem taem tu for spendem witim waef blo mi and mi no letem eni samting for disturbim datwan.” (Phil. 1:10) Tingim hao Anastasia, waef blo wanfala circuit overseer lo Moldova wea iusim gud taem blo hem. Hem sei: “Mi trae for finisim olketa samting wea mi need for duim taem hasband blo mi busy lo olketa responsibility blo hem. Datwan mekem mitufala garem taem for spendem tugeta.” Bat hao if hem no isi for iutufala faendem taem for spendem tugeta bikos lo situation blo iutufala?

11. Wat nao samfala waka wea Aquila and Priscilla duim tugeta?

¹¹ Olketa marit couple savve lane from example blo Aquila and Priscilla. Staka Christian lo bifor barava tinghae lo tufala. (Rome 16:3, 4) Bible no storyim staka samting abaotem marit laef blo tufala, bat hem storyim hao tufala savve waka tugeta, preach tugeta, and helpem olketa narawan tugeta. (Acts 18:2, 3, 24-26) And taem Bible storyim Aquila and Priscilla, hem mas evritaem talem nem blo tufala tugeta.

12. Wat nao hasband and waef savve duim for spendem moa taem tugeta? (Lukim tu piksa.)

¹² Hao nao olketa couple savve followim example blo Aquila and Priscilla? Ting abaotem olketa samting wea iu and partner blo iu need for duim. Waswe, iutufala savve duim samfala waka tugeta winim wei for duim seleva? For example, Aquila and Priscilla preach tugeta. Waswe sapos iutufala markem taem for duim sem samting? Aquila and Priscilla waka tugeta tu. Maet iutufala no waka lo sem ples, bat hao sapos iutufala waka tugeta lo haos? (Eccl. 4:9) Taem iutufala duim tugeta wanfala waka, bae iutufala feel olsem iutufala lo wan team and bae iutufala garem chance for story tugeta. Robert and Linda bin marit for winim 50 years. Robert sei: “Really mitufala no garem staka taem for spendem tugeta for relax. Bat taem mi wasim olketa pleit and waef blo mi hem draem, or sapos mi weeding aotsaed and hem kam waka witim mi, mi hapi tumas. Taem mitufala waka tugeta mitufala klos lo each other, and love blo mitufala gohed grow.”

13. For hasband and waef wan mind, wat nao tufala shud duim?

¹³ Bat, nomata hasband and waef spendem taem tugeta datwan no minim bae tufala wan mind nao. Wanfala waef lo Brazil sei: “From mitufala busy lo staka samting, hem isi for mitufala tingse mitufala spendem taem tugeta, just bikos mitufala stap lo wanfala haos. Mi faendaot dat mitufala need for duim moa samting winim wei for just stap tugeta. Mi luksavve mi need for givim attention wea hasband blo mi hem needim.” Tingim hao Bruno and waef blo hem Tays, mek sure tufala givim attention lo each other. Bruno sei: “Taem mitufala garem free taem tugeta, mitufala no holem eni moblie phone and mitufala enjoy for spendem taem tugeta.”

14. If wanfala couple no hapi for spendem taem tugeta, wat nao tufala savve duim?

¹⁴ Bat, hao sapos iu and partner no hapi for spendem taem tugeta? Maet bikos iutufala garem difren interest or maet iutufala savve feel nogud lo wei blo each other. Sapos olsem, wat nao iutufala savve duim? Tingim example wea iumi storyim finis. Taem iu startim fire, hem no bone big lo semtaem. Iu bae need for isisi putim olketa big pis fire wood insaed. Lo sem wei tu, hao sapos iutufala start for spendem moa taem tugeta each day? Duim samting tugeta wea iutufala evriwan enjoyim, no samting wea bae kosim raoa. (Jas. 3:18) Taem iutufala isisi duim samting tugeta, bae love blo iutufala start for strong bak moa.

TREATIM EACH OTHER WITIM RESPECT

15. For wanfala couple keepim love blo tufala strong, why nao hem important for showimaot respect?

¹⁵ Respect hem barava important insaed marit. Hem olsem air wea fire needim for gohed bone big. Sapos no eni air, bae kwiktaem nomoa fire dae nao. Lo sem wei tu, if wanfala couple no showimaot respect lo each other, bae love blo tufala kwiktaem cold daon. Bat couple wea duim best for showimaot respect lo each other, tufala waka hard for gohed strongim love blo tufala. Tingim diswan, maet iuseleva tingse iu showimaot respect lo partner blo iu, bat samting wea important hem for partner blo iu savve dat iu respectim hem. Penny and Aret bin marit for 25 year finis. Penny sei: “From mitufala respectim each other datwan mekem mifala stap gud tugeta lo haos. Mitufala feel free for talem tingting blo mitufala bikos mitufala respectim tingting blo each other.” So wat nao iu savve duim for helpem partner blo iu for savve dat iu really respectim hem? Tingim example blo Abraham and Sarah.

16. Wat nao olketa hasband savve lanem from example blo Abraham? (1 Peter 3:7) (Lukim tu piksa.)

¹⁶ Abraham treatim Sarah witim respect. Hem lisin and tingim feeling blo hem. Wantaem, Sarah feel nogud and talem feeling blo hem lo Abraham, and hem blamem Abraham tu. Waswe, Abraham kros and tok raf lo hem? Nomoa. Hem savve hao Sarah evritaem respectim and sapotim hem. Abraham lisin lo hem and trae for stretem datfala problem. (Gen. 16:5, 6) Wat nao iumi savve lanem? Olketa hasband, iufala garem authority for mekem disison for famili blo iu. (1 Cor. 11:3) Nomata olsem, iu showimaot love taem iu askem tingting blo waef bifor iu mekem wanfala disison, especially if datfala disison bae affectim waef. (1 Cor. 13:4, 5) Samfala taem, maet waef feel stress and maet need for storyim feeling blo hem. Waswe, iu respectim feeling blo hem and barava lisin lo hem? (Readim 1 Peter 3:7.) Angela and Dmitry bin marit for samting olsem 30 year finis. Angela storyim hao hem luksavve dat hasband blo hem respectim hem. Hem sei: “Dmitry evritaem willing for lisin taem mi feel nogud or taem mi laek story. Hem patient witim mi nomata taem feeling blo mi mekem hem hard for mi story gud.”

17. Wat nao olketa waef savve lanem from example blo Sarah? (1 Peter 3:5, 6)

¹⁷ Sarah showimaot hem respectim Abraham taem hem sapotim olketa disison blo hem. (Gen. 12:5) Wantaem, Abraham disaed for welkamim olketa visitor wea tufala no expectim. Hem askem Sarah for lusim waka wea hem duim and talem hem for wakem staka bred. (Gen. 18:6) Sarah kwiktaem sapotim disison blo Abraham. Olketa waef, iufala savve followim example blo Sarah taem iufala sapotim disison blo hasband. Taem iu duim datwan, iu strongim marit blo iu. (Readim 1 Peter 3:5, 6.) Dmitry wea iumi storyim finis, storyim hao hem luksavve waef blo hem respectim hem. Hem sei: “Mi tinghae lo wei wea Angela duim best for sapotim olketa disison blo mi, nomata mitufala no agree lo samfala samting. Nomata samfala idea blo mi no waka gud, hem no tok daonem mi.” Tru nao, hem isi for lovem samwan wea respectim iu!

18. Wanem gud samting nao wanfala couple savve kasem, taem tufala waka tugeta for strongim love blo tufala?

¹⁸ Distaem, Satan laek for killim dae love blo olketa Christian couple wea olsem fire wea laet big. Hem savve if wanfala couple stop for lovem each other, maet tufala bae lusim Jehovah. Bat, fire blo tru love no savve dae! So letem love insaed marit blo iutufala hem olsem love wea Song of Solomon storyim. Disaed strong for Jehovah nao main samting insaed marit blo iutufala, markem taem for spendem witim each other, and respectim tingting and feeling blo each other. Taem olsem, marit blo iutufala bae mekhae lo Jehovah wea tru love kam from hem, and olsem fire wea man keepim hem laet big, love blo iutufala bae bone for olowe.