Word Bilong Jehovah Hem Laef
Olketa Main Point From Buk Bilong Genesis—I
“GENESIS” minim “start,” or “born.” Nem hia barava fitim buk wea storyim hao disfala universe hem kamap and hao God redyim earth for man stap long hem. Moses raetem disfala buk long wilderness bilong Sinai, and maet hem finis raetem long 1513 B.C.E.
Buk bilong Genesis story abaotem world bifor datfala Flood, wanem happen bihaen Flood, and hao Jehovah God deal witim Abraham, Isaac, Jacob, and Joseph. Disfala article bae storyim olketa main point long Genesis 1:1–11:9 go kasem taem wea Jehovah start deal witim laen dadi Abraham.
WORLD BIFOR FLOOD
Firstfala toktok bilong Genesis sei, “long firstaem,” wea point go long staka billion year bifor. Hem explainim olketa samting wea happen insaed sixfala “day” for create or taem bilong spesol waka for create, long wei wea olsem wanfala man stap long earth and hem lukluk. Long end bilong mek-six day, God creatim man. Nomata no longtaem bihaen diswan Paradaes hem lus from man no obey, Jehovah givim hope. Barava first Bible profesi story abaotem wanfala “seed” wea bae finisim olketa nogud samting bilong sin and bae killim Satan long hed.
Insaed long next 1,600 year, Satan win for mekem evri man no servem God, bat samfala wea stap faithful nao Abel, Enoch, and Noah. Olsem example, Cain killim dae raeteous brata bilong hem Abel. Pipol “start [for] singaot long nem bilong Jehovah,” long wei wea no showimaot respect. Long wei wea showimaot raf fasin wea go ahed long datfala taem, Lamech raetem wanfala poem abaotem hao hem killim dae wanfala young man for protectim hemseleva. Living kamap moa worse taem olketa angel son bilong God wea no obey, maritim olketa woman and garem olketa pikinini wea big tumas and raf wea garem nem Nephilim. Nomata olsem, faithful Noah buildim ark, no fraet for warnim pipol abaotem Flood wea bae kam, and from datwan hem and famili missim nogud samting wea datfala Flood kosim.
Ansa for Olketa Bible Kwestin:
1:16—Hao nao God mekem laet kamap long first day sapos long mek-foa day nao hem just mekem olketa samting for givim laet? Datfala Hebrew word wea olketa transleitim “mekem” long verse 16 hem no semsem witim word “creatim” wea stap long Genesis chapter 1, verse 1, 21, and 27. “Heven,” wea insaed diswan hem olketa samting for givim laet, God creatim firstaem long planti year bifor “first day” hem start. Bat laet bilong olketa samting for givim laet no shaen kasem earth. Long first day, “laet hem kamap” bikos samfala laet shaen thru long thik cloud and showaot lelebet long earth. Earth wea go raon start for garem day and naet. (Genesis 1:1-3, 5) Olketa samting wea givim datfala laet still stap haed from earth. Wanfala bigfala change kamap insaed mek-foa day bilong God for create. God mekem sun, moon, and olketa star for “shaen kam long earth.” (Genesis 1:17) “God start for mekem” olketa long wei wea pipol long earth savve lukim.
3:8—Waswe, Jehovah God story stret go long Adam? Bible showimaot hao taem God story witim man, hem planti taem duim diswan thru long wanfala angel. (Genesis 16:7-11; 18:1-3, 22-26; 19:1; Judges 2:1-4; 6:11-16, 22; 13:15-22) Main wan wea tok for God hem only-born Son bilong hem, wea garem nem “Word.” (John 1:1) Hem luk olsem God story witim Adam and Eve thru long datfala “Word.”—Genesis 1:26-28; 2:16; 3:8-13.
3:17—Long wanem wei nao God cursim graon, and curse hia hem stap for hao long? Datfala curse wea God talem long graon minim hao hem bae kamap barava hard for plantim kaikai. Olketa nogud samting wea kamaot from graon kasem curse, olsem rabis grass and nila grass, hem mekem laen pikinini bilong Adam, Lamech, wea hem dadi bilong Noah, for story abaotem taem hem sei “pain bilong hand bilong iumi wea kam from graon wea Jehovah cursim.” (Genesis 5:29) Bihaen long Flood, Jehovah blessim Noah and olketa son bilong hem, talem purpose bilong Hem for olketa fulimap earth. (Genesis 9:1) Luk olsem God aotem nao datfala curse bilong graon.—Genesis 13:10.
4:15—Hao nao Jehovah “putim wanfala saen for Cain”? Bible no sei God putim wanfala saen or mark long body bilong Cain. Datfala saen hem maet wanfala promis bilong law wea pipol savve abaotem and followim and purpose bilong diswan hem for stopem eniwan for killim dae Cain for pei bak.
4:17—Wea nao Cain tekem waef bilong hem? Adam “kamap dadi long olketa son and olketa dota.” (Genesis 5:4) So Cain tekem wanfala young sista bilong hem or wanfala girl bilong brata or sista bilong hem for waef bilong hem. Bihaen diswan, Law bilong God for olketa Israelite no letem wei for maritim real brata or sista.—Leviticus 18:9.
5:24—Long wanem wei nao God ‘tekem Enoch’? Luk olsem Enoch stap long danger for samwan killim hem dae, bat God no letem olketa enemy bilong hem mekem hem safa. Paul raet olsem: “God tekem Enoch mekem hem no lukim dae.” (Hebrews 11:5) Diswan no minim God tekem hem go long heven for stap laef long there. Jesus nao first wan for go ap long heven. (John 3:13; Hebrews 6:19, 20) Wei wea God “tekem Enoch mekem hem no lukim dae” maet minim God mekem hem lukim wanfala profesi vision then taem hem still lukim datfala vision God endim laef bilong hem. Long wei olsem, Enoch no safa, or “lukim dae,” from olketa enemy bilong hem.
6:6—Long wanem wei nao Jehovah “feel sorre” from hem creatim man? Disfala Hebrew toktok wea olketa transleitim “feel sorre” join witim wei for changem fasin or tingting. Jehovah hem perfect, so hem no mekem mistek for creatim man. Bat, hem changem tingting bilong hem abaotem wicked genereson bifor datfala Flood. God changem fasin bilong hem olsem Creator bilong olketa man for kamap wan wea distroem olketa from hem no hapi long barava nogud fasin bilong olketa. From hem keepim samfala man stap laef, diswan showimaot hao hem sorre nomoa long pipol wea kamap wicked.—2 Peter 2:5, 9.
7:2—Wanem nao pipol iusim olsem faondeson for markem animal wea klin and no klin? Hem luk olsem faondeson for markem animal wea klin and no klin hem point go long wei for iusim sakrifaes long worship and no long wanem for kaikaim or nomoa. Olketa man no kaikaim meat bilong animal bifor datfala Flood. Olketa toktok “klin” and “no klin” saed long kaikai hem start nomoa long Law Bilong Moses, and hem stop taem Jesus finisim Law Bilong Moses. (Acts 10:9-16; Ephesians 2:15) Luk olsem Noah savve long wanem nao hem fit for sakrifaesim long worship bilong Jehovah. Kwiktaem bihaen hem go aot from ark, hem “start for buildim wanfala altar long Jehovah and tekem samfala klin animal and klin bird and for offerim olketa bone offering antap long datfala altar.”—Genesis 8:20.
7:11—Wata wea mekem Flood kamap evriwea long world kam from wea? Insaed long mek-tu sekson bilong taem, or “day,” bilong God for create, datfala “spes” midolwan long earth and heven wea God wakem, hem garem wata wea stap “andanit long spes” and wata wea stap “antap long spes.” (Genesis 1:6, 7) Wata wea stap “andanit” hem wata wea stap finis long earth. Wata wea stap “antap” hem bigfala hip bilong wata wea hange hae antap long earth, wea mekem “bigfala deep wata.” Wata hia nao foldaon kam long earth long taem bilong Noah.
Olketa Leson for Iumi:
1:26. From God creatim man long image bilong hem, man fit for showimaot olketa fasin bilong God. Iumi shud trae for mekem grow olketa fasin olsem love, mercy, kaenfala fasin, gudfala fasin, and patient fasin, wea showimaot Datwan wea creatim iumi.
2:22-24. Marit hem arrangement bilong God. Wei for fren insaed marit hem for olowe and hem holy, and hasband nao hed bilong famili.
3:1-5, 16-23. For garem hapi living hem depend long wei wea iumi luksavve long sovereign rul bilong Jehovah insaed laef bilong iumi seleva.
3:18, 19; 5:5; 6:7; 7:23. Toktok bilong Jehovah evritaem kamap tru.
4:3-7. Jehovah hapi long offering bilong Abel bikos hem wanfala raeteous man bilong faith. (Hebrews 11:4) Bat, wanem Cain duim showimaot hem no garem faith. Hem duim olketa wicked samting, wea showaot thru long wei for jealous, heit, and killim dae brata bilong hem. (1 John 3:12) And tu, hem maet nating tinghae long offering bilong hem bat mekem offering olsem samting wea hem havtu duim nao. Olketa sakrifaes bilong iumi for givim praise long Jehovah shud kam from full heart and join witim stretfala tingting and gudfala fasin.
6:22. Nomata Noah mas buildim ark for planti year, hem duim evri samting wea God komandim hem. Dastawe, Noah and famili bilong hem stap laef long taem bilong Flood. Jehovah tok long iumi thru long Word bilong hem and directim iumi thru long organization bilong hem. Iumi savve kasem gud samting sapos iumi lisin and obeyim Jehovah.
7:21-24. Jehovah no savve distroem raeteous pipol witim wicked pipol.
OLKETA MAN GO INSAED WANFALA NIU TAEM
From world bifor Flood hem go pas finis, olketa man go insaed wanfala niu taem. God letem olketa man for kaikaim meat bat witim komand for stap klia long blood. Jehovah letem wei for killim dae man wea killim dae nara man, putim rainbow covenant and promis for no bringim moa eni Flood. Thrifala son bilong Noah kamap laen dadi for full famili bilong man, bat great-granson bilong hem Nimrod kamap “wanfala maeti man for hunting wea againstim Jehovah.” Winim wei for pipol muv long olketa difren ples for fulimap earth, olketa disaed for buildim wanfala taon wea garem nem Babel and wanfala taoa for mekem bigfala nem for olketa seleva. Jehovah stopem plan bilong olketa taem hem changem languis bilong olketa and separatem olketa evriwea long earth.
Ansa for Olketa Bible Kwestin:
8:11—Sapos Flood spoelem olketa tree, wea nao datfala kurukuru tekem leaf bilong olive tree? Tufala reason maet stap for diswan. From olive hem wanfala strong tree, maet hem stap laef andanit wata for samfala month long taem bilong Flood. Taem flood wata gogo daon, olive tree wea bin stap andanit wata bae stap moa long drae graon and growim leaf. Or, maet datfala olive leaf wea kurukuru karem go long Noah hem from wanfala young shoot wea grow bihaen flood wata hem go daon.
9:20-25—Why nao Noah cursim Canaan? Hem luk olsem Canaan guilty for duim dirty samting againstim grandadi bilong hem Noah. Nomata dadi bilong Canaan, Ham, lukim diswan, hem no duim eniting for trae stopem diswan bat gossip abaotem samting hia wea no stret. Bat, nara tufala son bilong Noah, Shem and Japheth, duim samting for kavarem dadi bilong olketa. From diswan tufala kasem blessing, bat Canaan kasem curse, and Ham safa from shame wea kasem pikinini bilong hem.
10:25—Hao nao earth “divaed” long taem bilong Peleg? Peleg stap laef from 2269 go kasem 2030 B.C.E. Long “taem bilong hem” nao Jehovah kosim bigfala wei for divaed taem hem changem languis bilong pipol wea buildim Babel and separatem olketa evriwea long earth. (Genesis 11:9) Dastawe, “earth [or, population bilong earth] divaed” long taem bilong Peleg.
Olketa Leson for Iumi:
9:1; 11:9. No eni plan or hard waka bilong man savve stopem purpose bilong Jehovah.
10:1-32. Tufala record bilong famili laen wea stap long Bible bifor and bihaen Flood—chapter 5 and 10—joinim famili bilong man witim firstfala man, Adam, thru long thrifala son bilong Noah. Pipol from Assyria, Chaldea, Hebrew, Syria, and samfala tribe bilong Arabia, olketa kam from laen bilong Shem. Pipol from Ethiopia, Egypt, Canaan, and samfala tribe from Africa and Arabia olketa kam from laen bilong Ham. Pipol from Asia and Europe olketa kam from laen bilong Japheth. Evri man laen long each other, and evriwan born long wei wea semsem front long God. (Acts 17:26) Disfala truth mas affectim wei wea iumi ting and deal witim nara pipol.
Word Bilong God Garem Paoa
Firstfala part long buk bilong Genesis nao garem only tru story abaotem start bilong olketa man. Long Genesis, iumi kasem savve abaotem purpose bilong God for putim man long earth. Hem barava encouragem iumi for lukim hao no eni man olsem Nimrod, savve stopem purpose bilong God for fulfill!
Taem iu readim Bible reading bilong datfala week for Theocratic Ministry Skul, ting raonem toktok wea stap anda long heding “Ansa for Olketa Bible Kwestin” wea bae helpem iu for minim samfala Bible verse wea no isi tumas. Olketa koment long “Olketa Leson for Iumi” bae showim iu hao iu savve kasem gud samting from Bible reading bilong datfala week. Long taem wea hem fitim, diswan savve kamap faondeson for need bilong kongregeson long part bilong Service Meeting. Tru nao, Word bilong Jehovah hem laef and garem paoa insaed laef bilong iumi.—Hebrews 4:12.