“Mi Lovem Olketa Remind Bilong Iu”

“Evri samting olketa raetem bifor hem for teachim iumi.”—Romans 15:4.

1. Hao nao iumi kasem olketa reminder from Jehovah, and why nao iumi needim olketa?

JEHOVAH talem olketa reminder long pipol bilong hem for helpem olketa deal witim olketa hevi wea kamap long olketa hard taem distaem. Iumi kasem samfala reminder hia taem iumi seleva readim Bible, and from information wea iumi herem long olketa Christian meeting and koment bilong olketa narawan tu. Staka samting wea iumi readim or herem hem no niu samting long iumi. Maet iumi herem finis kaen information olsem. Nomata olsem, from iumi savve forget, iumi evritaem needim olketa reminder saed long olketa plan, law, and instruction bilong Jehovah. Iumi shud tinghae long olketa reminder bilong God. Olketa encouragem iumi taem olketa helpem iumi for evritaem tingim olketa reason wea muvim iumi for garem living wea followim will bilong God. Dastawe man wea raetem psalm hem sing olsem long Jehovah: “Mi lovem olketa reminder bilong iu.”—Psalm 119:24.

2, 3. (a) Why nao Jehovah keepim olketa story bilong pipol insaed Bible kam kasem distaem? (b) Olketa wanem story from Bible nao bae iumi storyim insaed disfala article?

² Nomata olketa raetem Word bilong God long staka handred year go finis, hem garem bigfala paoa. (Hebrews 4:12) Hem talem olketa tru story abaotem laef bilong pipol wea stap taem olketa raetem Bible. Nomata olketa kastom and tingting bilong pipol barava difren from taem olketa raetem Bible, staka taem olketa problem wea iumi feisim hem semsem olsem pipol long datfala taem. Staka story wea Jehovah keepim insaed long Bible hem givim iumi olketa nambawan example bilong pipol wea lovem Jehovah and servem hem long faithful wei nomata olketa garem barava hard living. Olketa nara story showim iumi olketa fasin wea God heitim. Jehovah mek sure evri story hia—olketa gud and nogud wan—stap insaed Bible for olsem important reminder for iumi. Aposol Paul story abaotem diswan taem hem raetem disfala toktok: “Evri samting olketa raetem bifor hem for teachim iumi, mekem wei wea iumi stand strong, and comfort wea iumi kasem from olketa Scripture hem savve givim iumi hope.”—Romans 15:4.

³ Bae iumi lukluk long thrifala story from Bible: story bilong hao David deal witim Saul, Ananias and Sapphira, and wei wea Joseph deal witim waef bilong Potiphar. Each wan teachim iumi olketa barava important leson.

Loyal for Followim Olketa Arrangement Bilong God

4, 5. (a) Wanem samting nao happen witim King Saul and David? (b) Wanem nao David duim nomata Saul garem nogud feeling long hem?

⁴ King Saul hem no faithful long Jehovah and no fit for rul ovarem pipol bilong Hem. So God rejectim hem and talem profet Samuel for anointim David for kamap future king bilong Israel. Taem pipol praisem David bikos hem soldia wea savve tumas for faet, Saul start for ting long David olsem enemy. Staka taem, Saul trae for killim hem dae. Each taem hia David no dae bikos Jehovah saed witim hem.—1 Samuel 18:6-12, 25; 19:10, 11.

⁵ David mas ranawe and haed for staka year. Taem David garem olketa chance for killim dae Saul, olketa wea gogo witim hem encouragem hem for duim datwan from olketa sei Jehovah nao openem wei for David killim dae disfala enemy bilong hem. Nomata olsem, David hem barava no laek for duim datwan. From hem loyal long Jehovah and garem respect for position bilong Saul olsem king wea God anointim ovarem pipol bilong hem, diswan muvim hem for no killim dae Saul. David savve Jehovah nao appointim Saul olsem king bilong Israel. So Jehovah tu bae aotem hem long taem wea hem markem. David luksavve hem no garem right for duim samting againstim Saul. Bihaen hem duim evri samting wea hem fit for duim for daonem wei wea Saul feel nogud long hem, David hem sei: “Jehovah nao bae deal witim hem, or taem bilong hem for dae hem stap, or hem bae faet and bae hem mas finis long there. Long tingting bilong Jehovah, hem barava no fitim for mi duim samting againstim man wea hem anointim!”—1 Samuel 24:3-15; 26:7-20.

6. Why nao hem important for iumi ting raonem story bilong David and Saul?

⁶ Disfala story hem teachim wanfala important leson. Waswe, enitaem iu ting abaotem why nao samfala kaen problem kamap insaed long Christian kongregeson? Maet wanfala hem duim samting wea no mas stret. Hem no duim bigfala rong, bat samting hem duim mekem iu no mas feel gud. Wanem nao iu shud duim? From iu tingim Christian brata bilong iu and from iu loyal long Jehovah, maet iu disaed for story witim hem long kaenfala wei, and goal bilong iu hem for stretem samting witim brata bilong iu. Bat waswe sapos datfala problem hem gohed? Bihaen iu duim best bilong iu for stretem, iu savve leavim evri samting long hand bilong Jehovah. Datwan nao samting wea David hem duim.

7. Hao nao iumi shud followim example bilong David sapos nara pipol no deal witim iumi long wei wea followim justice?

⁷ Or maet iu feisim olketa problem wea kamaot from samting wea no followim justice or from wei wea samfala from difren religion againstim iu. Maet iu hard for duim eni samting for stretem kaen samting olsem long disfala taem. Hem no isi sapos diswan kasem iumi, bat wanem David duim taem hem kasem samting wea no followim justice hem teachim iumi wanfala important leson. Olketa psalm wea David raetem hem olsem wanfala record bilong olketa prea wea hem talem from heart for God protectim hem from Saul. And tu, olketa hia record bilong loyal fasin wea hem garem for Jehovah and wei wea hem ting strong for nem bilong God mas kasem glory. (Psalm 18:1-6, 25-27, 30-32, 48-50; 57:1-11) David gohed for loyal long Jehovah nomata Saul duim nogud samting long hem for staka year. Iumi tu shud gohed faithful long Jehovah and organization bilong hem nomata iumi kasem nogud samting and nomata wanem samting olketa narawan duim. Iumi sure Jehovah hem savve gud long evri samting wea happen.—Psalm 86:2.

8. Wanem nao Olketa Jehovah’s Witness long Mozambique duim taem olketa kasem test saed long loyal fasin bilong olketa for Jehovah?

⁸ Wanfala example bilong distaem hem olketa Christian long Mozambique wea barava loyal long Jehovah taem olketa insaed long olketa hardfala taem. Long 1984, olketa militant attakim olketa vilij bilong olketa Christian brata bilong iumi staka taem. Olketa sekson hia steal from olketa, bonem olketa haos bilong olketa, and killim olketa dae tu. Hem luk olsem hem hard for olketa tru Christian hia for duim eni samting for defendim olketa seleva. Nogud sekson hia forcem pipol wea stap long datfala area for joinim olketa or sapotim olketa long samfala nara wei. Olketa Jehovah’s Witness ting sapos olketa duim datwan, hem minim olketa teksaed, wea hem samting wea olketa tru Christian mas no duim. Wei wea olketa Witness no joinim or sapotim olketa militant hia barava mekem olketa militant kros fogud. Long datfala nogud hardfala taem, sekson hia killim dae samting olsem 30-fala Witness. Nomata laef bilong olketa stap long danger, datwan no brekem loyal fasin bilong pipol bilong God.a Olsem David, nomata olketa feisim olketa hardfala taem, olketa win for gohed loyal.

Reminder wea Hem Wanfala Warning

9, 10. (a) Hao nao iumi savve kasem gudfala samting from samfala Bible example? (b) Wanem nao rong long samting wea Ananias and Sapphira duim?

⁹ Samfala man wea Bible storyim kamap olsem warning for remindim iumi long wanem kaen fasin iumi mas stap klia long hem. Tru nao, Bible garem staka story abaotem pipol wea duim rong samting and kasem nogud samting wea kamaot from datwan. Insaed disfala sekson hem samfala servant bilong God tu. (1 Corinthians 10:11) Wanfala example nao hem abaotem Ananias and Sapphira, wanfala hasband and waef wea insaed long Christian kongregeson bilong Jerusalem long firstfala century.

¹⁰ Bihaen Pentecost 33 C.E., wanfala need hem kamap for givim material help for olketa niu wan wea biliv wea stap yet long Jerusalem for kaban witim olketa aposol. Samfala insaed kongregeson salem property bilong olketa for kasem selen and then givim datwan long olketa wea garem need. (Acts 2:41-45) Ananias and Sapphira salem wanfala pis land and no givim full selen hia long olketa aposol. Then tufala sei hem nao evri selen wea tufala kasem taem tufala salem datfala pis land. Hem tru, Ananias and Sapphira garem right for disaedem haomas selen tufala laek for givim, bat nogud samting nao muvim olketa and olketa no honest. Olketa laekem kongregeson for tinghae long olketa, and laekem pipol for tingse olketa duim moa samting winim wanem olketa really duim. Holy spirit muvim aposol Peter for talemaot stret hao olketa no honest and showimaot hypocrite fasin, and Jehovah killim dae olketa.—Acts 5:1-10.

11, 12. (a) Wanem nao samfala Bible example abaotem honest fasin? (b) Wanem nao olketa gudfala samting wea kamaot from wei for honest?

¹¹ Sapos enitaem iumi garem feeling for no honest for mekem nara pipol tinghae long iumi, story bilong Ananias and Sapphira hem wanfala reminder wea olsem wanfala strongfala warning. Iumi savve laea long olketa nara man, bat hard tumas for iumi laea long Jehovah. (Hebrews 4:13) Bible hem staka taem encouragem iumi for honest long each other, bikos man for laea bae no laef insaed earth wea fulap witim pipol wea raeteous. (Proverbs 14:2; Revelation 21:8; 22:15) Reason for datwan hem klia. Man wea startim wei for laea hem datfala Devil, Satan.—John 8:44.

¹² Sapos iumi honest long living bilong iumi, datwan bae mekem iumi kasem staka gud samting. Samfala gud samting nao hem klinfala conscience and wei wea iumi savve hao nara pipol trustim iumi. Staka taem olketa Christian kasem waka for selen, or no lusim waka bilong olketa bikos olketa honest. Best samting wea kamaot from wei wea iumi honest hem nao wei wea iumi fren witim Olmaeti God.—Psalm 15:1, 2.

Gohed for Garem Klin Fasin

13. Wanem nao happen long Joseph, and wanem nao hem duim?

¹³ Olketa salem Joseph, wanfala son bilong Jacob olsem slave taem hem 17 year. Gogo hem waka insaed long haos bilong Potiphar, wanfala bigman bilong Egypt, and waef bilong Potiphar start for laekem hem. Hem laek for durong witim Joseph, wea hem man wea luk naes tumas, and evriday hem gohed askem hem: “Leidaon witim mi.” Joseph hem stap farawe from famili bilong hem insaed wanfala kantri wea no eniwan savve long hem. Nomata sapos hem durong witim disfala woman, bae no eniwan savve. Bat, taem waef bilong Potiphar hem trae for holem hem, Joseph ranawe.—Genesis 37:2, 18-28; 39:1-12.

14, 15. (a) Why nao iumi interest tumas long story bilong Joseph? (b) Why nao wanfala Christian woman hem hapi tumas from hem followim olketa reminder bilong God?

¹⁴ Joseph hem growap insaed wanfala famili wea worshipim God, and hem luksavve hem rong for man and woman wea no hasband and waef for duim sex. Hem sei: “Hao nao mi savve duim disfala barava nogud samting and sin againstim God?” Olketa standard bilong God saed long wei wea man mas maritim wanfala waef nomoa wea hem talem long Eden, hem samting wea leadim tingting bilong Joseph. (Genesis 2:24) Pipol bilong God distaem savve kasem gudfala samting taem olketa ting raonem samting wea Joseph duim long datfala taem. Long samfala ples, pipol ting long wei for duim sex olsem samting nating nomoa and bikos samfala young wan no want for duim diswan, olketa nara young wan tok spoelem olketa. Hem normal samting long world distaem for man or woman for go witim narawan wea no marit partner bilong hem. Dastawe, story bilong Joseph hem wanfala reminder wea important for iumi tingim long taem bilong iumi. Nomata kam kasem distaem God hem still tingim fornication and adultery hem wanfala sin. (Hebrews 13:4) Plande long olketa wea foldaon for duim dirty fasin agree hao strongfala reason stap for no duim datwan. Nogud samting wea kamaot from datwan hem wei for feel shame, guilty conscience, jealous fasin, babule, and sik wea kamaot from dirty fasin. Olsem Bible hem remindim iumi, man wea duim fornication hem “sin againstim body bilong hemseleva.”—1 Corinthians 5:9-12; 6:18; Proverbs 6:23-29, 32.

¹⁵ Samting wea kasem Jenny,b wanfala singol Witness bilong Jehovah hem mekem hem tinghae tumas long olketa reminder bilong God. Wanfala naesbola man wea waka witim hem laek switim hem. Taem Jenny rejectim hem, hem trae hard go moa. Jenny hem sei: “From hem wei bilong iumi for feel gud taem nara man or woman laekem iumi, mi barava stragol for gohed garem klin fasin.” Bat, Jenny luksavve man hia hem no really laekem hem bat laek for duim sex nomoa witim hem olsem hem duim long staka nara woman finis. Taem hem luksavve hao hem start for wikdaon for rejectim man hia, hem prea strong long Jehovah for helpem hem stap faithful long Hem. Jenny talem hao olketa samting wea hem lanem taem hem duim research insaed long Bible and olketa Bible pablikeson kamap olsem reminder wea strongim hem for gohed keakea. Wanfala reminder hia nao hem story abaotem Joseph and waef bilong Potiphar. Jenny hem sei: “Taem mi gohed for tingim hao mi barava lovem Jehovah, mi savve bae mi no duim disfala barava nogud samting and sin againstim hem.”

Obeyim Olketa Reminder Bilong God!

16. Hao nao iumi savve kasem gudfala samting from wei for reviewim and ting raonem laef bilong olketa man wea Bible story abaotem?

¹⁶ Iumi evriwan savve mekem wei wea iumi tinghae long olketa standard bilong Jehovah kamap moa big taem iumi traem best for luksavve why hem keepim samfala story insaed Bible for iumi. Wanem nao iumi lanem from olketa story hia? Wanem nao olketa fasin and feeling bilong olketa man wea Bible story abaotem wea iumi need for followim or stap klia from olketa? Bible story abaotem staka handred man and woman. Evriwan wea lovem instruction bilong God bae kasem gud samting sapos olketa mekem grow feeling for barava laekem wisdom wea mekem man kasem laef, insaed diswan hem olketa leson wea iumi savve lanem from example bilong pipol wea Bible storyim. Plande taem iumi lanem samting from olketa laef story wea olketa printim insaed Wastaoa magasin. Hem gud tumas sapos iumi readim moa olketa story hia.

17. Wanem nao feeling bilong iu long olketa reminder bilong Jehovah, and why nao olsem?

¹⁷ Iumi tinghae tumas long loving kea wea Jehovah showimaot for olketa wea traem best for duim will bilong hem! Iumi no perfect, olsem olketa man and woman wea Bible storyim olketa no perfect tu. Nomata olsem, story abaotem olketa samting wea olketa duim hem savve barava helpem iumi tu. Taem iumi obeyim olketa reminder bilong Jehovah, iumi savve stap klia from wei for duim olketa bigfala rong, and iumi savve followim olketa nambawan example bilong pipol bifor wea showimaot raeteous fasin. Sapos iumi duim datwan, bae iumi fit for singsing olsem datfala man wea raetem psalm: “Hapi nao olketa wea obeyim olketa reminder bilong [Jehovah], witim full heart olketa gohed for lukaotem hem. Soul bilong mi obeyim olketa reminder bilong iu, and mi barava lovem olketa.”—Psalm 119:2, 167.

[Footnotes]

Hao Nao Bae Iu Ansa?

• Wanem nao iumi savve lanem from tingting bilong David abaotem Saul?

• Story abaotem Ananias and Sapphira hem teachim iumi wanem samting?

• Why nao example bilong Joseph hem important for iumi distaem?

[Piksa long page 15]

Why nao David no letem eniwan for killim dae Saul?

[Piksa long page 16]

Wanem nao iumi lanem from story bilong Ananias and Sapphira?

[Piksa long page 17]

Wanem nao mekem Joseph rejectim dirty fasin?