God Iusim Holy Spirit for Wakem Evri Samting!
“Thru long toktok bilong Jehovah evri samting long skae hem kamap, and thru long spirit bilong hem evri star hem kamap.”—PS. 33:6.
1, 2. (a) Hao nao savve wea man garem abaotem universe and earth kamap big distaem? (b) Wanem kwestin nao iumi need for savve long ansa bilong hem?
WINIM wan handred year go finis, staka scientist tingse universe garem wanfala galaxy nomoa, wea hem nao Milky Way galaxy wea earth stap insaed. Bat olketa no savve universe hem garem staka galaxy! Distaem olketa faendem winim 100 billion galaxy nao stap and samfala galaxy garem staka billion star. Olketa big telescope wea olketa iusim distaem mekem olketa scientist for lukim staka moa galaxy.
2 Long 1905, olketa scientist no savve long staka samting abaotem universe and abaotem earth tu. Hem tru, pipol wea stap laef samting olsem 100 year go finis savve long staka samting winim wanem olketa laen dadi bilong olketa savve long hem. Bat distaem, savve wea pipol garem abaotem earth and evri samting insaed wea mekem laef gohed hem winim savve wea pipol garem bifor. And long future tu, bae iumi gohed for lanem staka samting moa abaotem earth and universe. Datwan mekem iumi for tingim wanfala important kwestin, Hao nao evri samting hia kamap? Iumi savve long ansa bilong datfala kwestin bikos God wea wakem evri samting showimaot datwan long Bible.
Hao God Wakem Evri Samting
3, 4. Hao nao God wakem universe, and long wanem wei nao samting wea hem wakem praisem hem?
3 Bible explainim hao universe hem kamap. Hem sei: “Long start, God wakem skae and earth.” (Gen. 1:1) Bifor Jehovah wakem universe, no eni samting hem stap. Hem iusim holy spirit, wea hem nao strongfala paoa bilong hem for wakem skae, earth, and evri nara samting long universe. Man savve iusim olketa tul and hand bilong hem for karvem samting, bat God iusim holy spirit for duim olketa nambawan waka bilong hem.
4 From God iusim holy spirit for wakem evri samting, datwan mekem hem for kasem praise. David sei: “Skae hem gohed for showimaot bigfala paoa bilong God. And evri samting wea stap long skae gohed for showim olketa waka wea hem duim long hand bilong hem.” (Ps. 19:1) Long wanem wei nao olketa samting wea God wakem pruvim datwan?
Bigfala Paoa Bilong God
5. Storyim paoa wea holy spirit bilong Jehovah garem.
5 Staka samting long universe showimaot Jehovah garem bigfala paoa wea no savve finis. (Readim Isaiah 40:26.) Tingim sun. Hem wanfala star wea stap 150 billion kilometer from earth, and hem samting olsem 15 million degrees Celsius. Nomata sun hem hot tumas, hem stap long stret ples long universe mekem evri samting long earth gohed laef. Tru tumas, for wakem sun and staka billion star, hem needim bigfala paoa. Jehovah nao garem bigfala paoa for wakem olketa samting hia.
6, 7. (a) Wanem nao showimaot olketa samting wea God wakem hem no olobaot? (b) Wanem nao showimaot universe no kamap seleva nomoa?
6 Staka samting wea iumi lukim showimaot God iusim holy spirit for wakem samting long wei wea hem stret and no olobaot. Tingim diswan: Iu garem wanfala box wea staka ball wea garem difren kala stap insaed. Iu sekem datfala box and kapsaetem long graon. Waswe, iu tingse olketa ball wea garem sem kala bae foldaon long sem ples, olsem olketa blue ball bae stap long wansaed and olketa yellow ball bae stap long narasaed? Nomoa! Samting wea man no savve kontrolem bae olobaot nomoa. Pipol savve diswan hem tru.
7 Taem iumi lukluk long skae or iusim telescope, wanem nao iumi lukim? Iumi lukim olketa galaxy, star, and planet wea evriwan followim stretfala gogo bilong olketa and no olobaot. Hard for olketa samting hia kamap seleva nomoa. So iumi mas tingim, Wanem nao God iusim for mekem evri samting long universe no olobaot? Science and technology no savve helpem iumi for luksavve long paoa wea God iusim for wakem universe. Bat Bible nomoa showimaot datwan. Hem holy spirit bilong God wea strong winim eni nara samting long universe. Man wea raetem psalm sei: “Thru long toktok bilong Jehovah evri samting long skae hem kamap, and thru long spirit bilong hem evri star hem kamap.” (Ps. 33:6) Taem iumi lukluk long skae long naet, smol part long olketa “star” nomoa iumi lukim!
God Iusim Holy Spirit for Wakem Earth
8. Wanem nao iumi savve abaotem olketa samting wea Jehovah wakem?
8 Savve wea iumi garem abaotem olketa samting wea God wakem hem smol nomoa taem iumi comparem witim staka samting wea stap yet for iumi lanem. Olsem Job talem, iumi nating savve yet long evri samting wea God wakem. Hem sei: “Olketa samting hia hem smol haf long samting wea hem savve duim, and hem olsem God hem tok smol nomoa!” (Job 26:14) Staka handred year bihaen, King Solomon wea laek for lukluk long wanem Jehovah wakem sei: “Evri samting [God] mekem luk naes long taem bilong hem. Hem putim feeling for laekem laef olowe insaed long heart bilong olketa man, bat olketa bae nating savve long waka wea tru God duim from start go kasem finis.”—Eccl. 3:11; 8:17.
9, 10. Wanem paoa nao God iusim taem hem wakem earth? Long first thrifala day, wanem nao samfala samting wea God wakem?
9 Bat Jehovah showimaot samfala important samting abaotem waka wea hem duim. Tingim diswan, Bible sei bifor kam yet God iusim holy spirit for duim waka long earth. (Readim Genesis 1:2.) Long datfala taem no eni land hem stap, no eni laet, and no eni air tu stap long earth.
10 Bible storyim wanem God duim long sixfala day wea hem wakem evri samting. Olketa day hia hem no 24-hour day bat hem staka year. Long first day, Jehovah mekem laet for kamap long earth. Datwan happen taem hem mekem laet from sun and moon for kasem earth. (Gen. 1:3, 14) Long mek-tu day, Jehovah mekem skae. (Gen. 1:6) Long datfala taem, earth hem garem wata, laet, and air bat no eni land. Long start bilong mek-thri day, Jehovah iusim holy spirit for mekem land kamap from sea. (Gen. 1:9) Olketa nara big samting tu God wakem long mek-thri day and olketa nara day bihaen.
God Iusim Holy Spirit for Wakem Evri Samting wea Laef
11. Wei wea evri samting wea laef garem olketa difren part wea no olobaot and luk naes, showimaot wanem?
11 God iusim holy spirit tu for wakem olketa nara samting wea laef long wei wea barava organize. Start long mek-thri day go kasem mek-six day, God wakem staka difren kaen plant and animal. (Gen. 1:11, 20-25) Wei wea olketa samting wea laef garem olketa difren part wea no olobaot and wea luk naes showimaot samwan wea garem bigfala savve nao designim.
12. (a) Wanem nao DNA duim? (b) Wanem nao iumi lanem from datwan?
12 Tingim DNA (deoxyribonucleic acid) wea stap insaed olketa plant and animal. DNA nao mekem lukluk or wei bilong olketa samting hia for no change. Evri samting long earth wea laef garem DNA, olsem microbe, grass, elephant, blue whale, and iumi olketa man. Nomata God wakem staka difren kaen samting long earth, DNA wea stap long evri samting hia no savve change and datwan mekem iumi for luksavve long olketa difren kaen animal and plant wea stap kam kasem distaem. Evri samting wea Jehovah God wakem hem followim plan bilong hem and depend long each other for mekem laef gohed. (Ps. 139:16) Wei wea evri samting no olobaot showimaot God iusim holy spirit for wakem evri samting.
Important Samting wea God Wakem Long Earth
13. Wanem nao God iusim for wakem man?
13 For plande thousand year, God wakem staka samting. Datwan mekem earth for no “emti” and no “stap nating.” Nomata olsem, Jehovah gohed for iusim holy spirit for wakem nara samting moa. Hem wakem wanfala important samting winim olketa nara samting long earth. Klosap long end bilong mek-six day, God wakem man. Hao nao Jehovah duim datwan? Hem iusim holy spirit and dust from graon.—Gen. 2:7.
14. Long wanem wei nao iumi difren from olketa animal?
14 Genesis 1:27 sei: “God wakem man for garem olketa wei olsem hem. Hem wakem man and woman.” From God wakem iumi for garem olketa wei olsem hem, iumi savve showimaot love, chusim wanem iumiseleva laekem, and savve fren gud witim hem tu. Dastawe brain bilong iumi hem barava difren from brain bilong olketa animal. Jehovah wakem brain bilong iumi long wei wea iumi savve gohed for lane abaotem hem and olketa samting wea hem wakem.
15. Wanem hope nao Adam and Eve garem?
15 Taem God wakem Adam and Eve, hem givim earth for tufala enjoyim and lane abaotem olketa samting wea hem wakem. (Gen. 1:28) Jehovah givim staka kaikai for tufala and tufala stap long paradaes. Tufala garem chance for laef olowe and for kamap dadi and mami bilong staka billion pikinini wea perfect. Bat tufala duim samting wea mekem tufala lusim datfala chance.
Luksavve Long Waka Bilong Holy Spirit
16. Nomata Adam and Eve no obeyim God, wanem hope nao iumi garem?
16 Adam and Eve shud tinghae long God and obeyim hem bat tufala bighed and tingim tufala seleva. From datwan evriwan no perfect and kasem nogud samting. Bat Bible storyim God bae finisim evri nogud samting wea kamaot from wanem Adam and Eve duim. Bible talem tu Jehovah bae mekem plan bilong hem for disfala earth kamap tru. Earth bae kamap paradaes, and pipol wea stap insaed bae hapi, healthy, and laef olowe. (Gen. 3:15) Iumi needim holy spirit for helpem iumi garem strong faith long datfala hope.
17. Olketa wanem idea nao iumi mas againstim?
17 Iumi shud askem Jehovah for givim kam holy spirit. (Luke 11:13) Datwan bae helpem iumi for biliv strong hao God iusim holy spirit for wakem evri samting. Staka pipol distaem followim teaching abaotem evolution wea kam from olketa idea wea no garem eni pruv or nating bilivim God stap. Iumi shud no letem olketa idea olsem for mekem iumi fraet or konfius. Iumi mas redi for againstim olketa samting hia and hevi wea iumi kasem from olketa wea bilivim laea teaching olsem.—Readim Colossians 2:8.
18. Taem iumi tingim hao universe and olketa man start, why nao hem no stret for sei God no wakem evri samting?
18 Wei for lukluk and ting raonem olketa samting wea God wakem savve strongim faith bilong iumi long God and wanem Bible talem. Staka wea tingting abaotem hao universe and olketa man start no laek for bilivim God iusim holy spirit for wakem evri samting. Olketa biliv nomoa long samting wea science pruvim. Bat sapos iumi garem kaen tingting olsem, hem minim iumi acceptim nomoa wanem science talem. Hem bae showimaot tu iumi no laek for luksavve long pruv wea showimaot olketa samting wea God wakem wea “staka tumas” olketa no olobaot. (Job 9:10; Ps. 104:25) Iumi olketa Christian barava bilivim Jehovah iusim holy spirit for wakem evri samting.
Holy Spirit Strongim Faith Bilong Iumi
19. Wanem nao pruvim God hem stap and hem iusim holy spirit for duim wanem hem laekem?
19 Iumi no need for savve long evri samting wea God wakem for garem faith, lovem, and respectim hem. Tingim wei wea iumi fren witim narawan. For savve long tu-thri samting abaotem datfala man no minim iumi fren gud witim hem, bat iumi need for savve gud long hem. Hem semsem tu witim wei for garem faith long God. Taem iumi gohed lane abaotem hem, datwan bae strongim faith bilong iumi. Tru tumas, wei wea God ansarem olketa prea bilong iumi and iumi kasem gud samting from iumi followim olketa Bible principle, barava pruvim God hem stap. Iumi fren gud witim Jehovah bikos iumi luksavve hem leadim iumi, protectim iumi, blessing waka wea iumi duim for hem, and givim wanem iumi needim. Evri samting hia pruvim God hem stap and hem iusim holy spirit for duim wanem hem laekem.
20. (a) Why nao God wakem universe and olketa man? (b) Wanem gud samting nao bae iumi kasem sapos iumi gohed for letem holy spirit leadim iumi?
20 Bible hem nambawan example wea showimaot Jehovah iusim holy spirit bilong hem, bikos “holy spirit nao leadim olketa man for talemaot toktok wea kam from God.” (2 Pet. 1:21) Wei for studyim gud Bible savve strongim faith bilong iumi hao God nao wakem evri samting. (Rev. 4:11) Evri samting wea Jehovah wakem showimaot hem lovem iumi. (1 John 4:8) Dastawe iumi mas traem best for helpem narawan for lane abaotem Dadi and Fren bilong iumi long heven wea lovem iumi. Sapos iumi letem holy spirit for leadim iumi, iumi bae garem chance for lane abaotem God for olowe. (Gal. 5:16, 25) Gohed for lane abaotem Jehovah and olketa nambawan samting wea hem wakem and garem disfala love wea hem showimaot taem hem iusim holy spirit for wakem universe, earth, and olketa man.
Waswe, Iu Savve Minim Kam?
• Taem iumi lukluk long earth and universe, wanem nao iumi lanem abaotem wei wea God iusim holy spirit?
• From God wakem iumi for garem olketa wei olsem hem, iumi garem chance for duim wanem?
• Why nao iumi need for lukluk long olketa pruv wea showimaot God wakem evri samting?
• Wanem nao iumi savve duim mekem iumi fren gud witim Jehovah?
[Piksa long page 7]
Wanem nao iumi lanem abaotem wei wea universe hem no olobaot?
[Credit Line]
Stars: Anglo-Australian Observatory/David Malin Images
[Piksa long page 8]
Long wanem wei nao evri samting hia garem DNA?
[Piksa long page 10]
Waswe, iu redi for explainim wanem iu bilivim?