Spesol Present wea Iumi Kasem—Hao Nao Iu Ting Long Hem?
“Kam, iufala wea Dadi bilong mi blessim, kasem kingdom wea hem preparem for iufala taem world hem start.”—MATTHEW 25:34.
1. Wanem kaen samting nao pipol kasem olsem present?
EVRI man kasem samting thru long famili bilong hem. For samfala maet hem material samting wea mekem olketa garem isi living. For narawan hem poor living. From genereson bifor experiencem or herem nogud samting, samfala pasim go present olsem feeling for barava heitim narafala tribe, long genereson wea kam bihaen. Bat, iumi evriwan semsem long wanfala samting. Iumi evriwan kasem from first man, Adam, wanfala present bilong sin. Datfala present hem isisi lead go long dae.—Ecclesiastes 9:2, 10; Romans 5:12.
2, 3. Wanem present nao Jehovah provaedem firstaem for olketa pikinini bilong Adam and Eve, and why nao olketa no kasem datwan?
2 Long firstaem, Jehovah, olsem wanfala loving Dadi long heven, hem givim long olketa man wanfala barava difren present—perfect laef olowe insaed Paradaes. First dadi and mami bilong iumi, Adam and Eve, kasem start wea perfect and no garem sin. Jehovah God givim planet Earth long olketa man olsem wanfala present. (Psalm 115:16) Hem givim garden bilong Eden olsem smol piksa bilong hao full earth savve kamap and givim long first dadi and mami bilong iumi wanfala nambawan assignment wea olsem challenge. Datwan hem for bornem pikinini, lukaftarem earth and evri plant and animal, and mekem Paradaes big go kasem full earth. (Genesis 1:28; 2:8, 9, 15) Pikinini bilong olketa bae share insaed long diswan. Datwan hem nambawan present for givim long olketa!
3 Bat, for olketa bae enjoyim evri samting hia, Adam and Eve and pikinini bilong tufala mas fren gud witim God. Tufala garem kaon for lovem and obeyim Jehovah, bat Adam and Eve fail for tinghae long samting wea God givim long tufala and disobeyim komandment bilong hem. Tufala lusim Paradaes hom and nambawan future wea God putim front long tufala. So, tufala no savve pasim go olketa gud samting hia long pikinini bilong tufala.—Genesis 2:16, 17; 3:1-24.
4. Hao nao iumi savve kasem present wea Adam lusim?
4 Jehovah showimaot mercy taem hem provaedem wanfala samting mekem olketa pikinini bilong Adam and Eve savve garem chance for kasem present wea Adam lusim. Long wanem wei? Long taem wea God markem, Son bilong hem, Jesus Christ, givim perfect laef bilong hem olsem man for olketa pikinini bilong Adam. Thru long diswan Christ baem evriwan long olketa. Nomata olsem, olketa no stretawe kasem datfala present. Olketa needim wei wea God acceptim olketa, wea olketa savve kasem sapos olketa showimaot faith long sakrifaes bilong Jesus wea kavarem sin and showimaot datfala faith long wei for obey. (John 3:16, 36; 1 Timothy 2:5, 6; Hebrews 2:9; 5:9) Waswe, living bilong iu showimaot iu tinghae long datwan?
Pasim Go Wanfala Present Thru Long Abraham
5. Hao nao Abraham showimaot hem tinghae long wei wea hem fren witim Jehovah?
5 Taem Jehovah duim samting followim purpose bilong hem for earth, hem deal witim Abraham long spesol wei. Hem talem datfala faithful man for lusim kantri bilong hem and muv go long wanfala kantri wea God nao bae showim long hem. Abraham willing for obey. Bihaen Abraham kasem long there, Jehovah sei olketa pikinini bilong Abraham, no Abraham seleva, bae kasem datfala land olsem wanfala present. (Genesis 12:1, 2, 7) Wanem nao Abraham duim? Hem willing for servem Jehovah long eni ples and long eni wei wea God talem hem mekem olketa pikinini bilong hem savve kasem datfala present. Abraham servem Jehovah long land wea no bilong hem for 100 year, go kasem taem hem dae. (Genesis 12:4; 25:8-10) Waswe sapos iu nao hem, bae iu duim olsem tu? Jehovah sei Abraham hem “fren” bilong hem.—Isaiah 41:8.
6. (a) Wanem nao Abraham showimaot taem hem willing for sakrifaesim son bilong hem? (b) Wanem spesol present nao Abraham savve pasim go long olketa pikinini bilong hem?
6 Abraham weit for planti year for garem wanfala son, Isaac, wea hem lovem tumas. Taem datfala boy grow and kamap full-grown man, Jehovah givim instruction long Abraham for tekem hem and offerim hem olsem wanfala sakrifaes. Abraham no savve hem bae duim samting wea showimaot wanem God seleva bae duim for givim Son bilong hem olsem wanfala ransom; nomata olsem, hem obey and redy for go ahed offerim Isaac olsem wanfala sakrifaes taem angel bilong Jehovah stopem hem. (Genesis 22:9-14) Jehovah talem finis hao olketa promis bilong hem long Abraham bae fulfill thru long Isaac. So, Abraham barava garem faith hao, sapos need hem stap, God savve mekem Isaac laef bak from dae, nomata diswan no happen bifor. (Genesis 17:15-18; Hebrews 11:17-19) From Abraham no holem bak son bilong hem, Jehovah sei: “Thru long seed bilong iu evri nation bilong earth bae barava blessim olketa seleva.” (Genesis 22:15-18) Diswan point go hao datfala Seed wea Genesis 3:15 storyim, Messiah wea bae sevem man, bae kam thru long laen bilong Abraham. Datwan hem spesol present for pasim go!
7. Hao nao Abraham, Isaac, and Jacob showimaot olketa tinghae long present bilong olketa?
7 Abraham no savve long mining bilong samting wea Jehovah duim; and tu son bilong hem Isaac or granson bilong hem Jacob, wea kamap “tufala wea bae kasem sem promis olsem hem.” Bat evriwan long olketa garem trust long Jehovah. Olketa no joinim eni kingdom bilong olketa taon long datfala ples bikos olketa lukluk for samting wea moabeta—“taon wea garem trufala faondeson, wea man wea buildim and wakem datfala taon hem God.” (Hebrews 11:8-10, 13-16) Nomata olsem, no evriwan wea kam from Abraham tinghae long wei wea datfala present hem barava spesol wea kam thru long Abraham.
Samfala wea Lukdaonem Datfala Present
8. Hao nao Esau showimaot hem nating tinghae long wei wea present bilong hem spesol tumas?
8 Esau, firstborn son bilong Isaac, hem fail for barava tinghae long present wea hem fit for kasem olsem firstborn. Hem no tinghae long olketa holy samting. So wanday taem Esau hem hangre, hem sellim datfala present bilong hem olsem firstborn go long brata bilong hem, Jacob. For wanem? For wanfala plate bilong bred and supsup! (Genesis 25:29-34; Hebrews 12:14-17) Datfala nation wea olketa promis bilong God long Abraham bae fulfill hem kam thru long Jacob, wea God changem nem bilong hem go long Israel. Datfala present hem openem wanem kaen chance long olketa?
9. Bikos long spiritual present bilong olketa, wanem wei for sev nao olketa pikinini bilong Jacob, or Israel, kasem?
9 Long wanfala taem bilong hangre, Jacob and famili bilong hem muv go long Egypt. Long there olketa kamap staka tumas, bat olketa kamap slave tu. Nomata olsem, Jehovah no forgetim covenant bilong hem witim Abraham. Long taem wea God markem, hem sevem olketa son bilong Israel from wei for olsem slave and talem olketa bae hem tekem olketa go insaed long “wanfala land wea fulap witim milk and honey,” datfala land wea hem promisim long Abraham.—Exodus 3:7, 8; Genesis 15:18-21.
10. Long Maunt Sinai, wanem spesol samting nao happen wea join witim present bilong olketa son bilong Israel?
10 Taem olketa son bilong Israel gogo for Promis Land, Jehovah hipimap olketa tugeta long Maunt Sinai. Long there hem sei olsem long olketa: “Sapos iufala obeyim evribit voice bilong mi and keepim covenant bilong mi, then iufala bae kamap spesol samting bilong mi from midolwan long evri narafala pipol, bikos full earth hem bilong mi. And iufala seleva bae kamap for mi wanfala kingdom bilong olketa priest and wanfala holy nation.” (Exodus 19:5, 6) Bihaen olketa pipol willing and wan mind for agree for duim diswan, Jehovah givim Law bilong hem long olketa—samting wea hem no duim long eni nara pipol.—Psalm 147:19, 20.
11. Wanem nao samfala spesol samting wea insaed long datfala spiritual present bilong olketa son bilong Israel?
11 Datfala niu nation garem nambawan spiritual present! Olketa worshipim only tru God. Olketa sev from Egypt and olketa lukim bigfala paoa wea showaot taem olketa kasem Law long Maunt Sinai. Datfala present kamap moa spesol taem olketa herem “olketa holy toktok bilong God” thru long olketa profet. (Romans 3:1, 2) Jehovah markem olketa for kamap witness bilong hem. (Isaiah 43:10-12) Messiah Seed bae kamap insaed long datfala nation. Law hem point go long hem, bae helpem pipol luksavve long hem, and shud helpem olketa for luksavve long wei wea olketa needim hem. (Galatians 3:19, 24) And tu, olketa bae kasem chance for serve witim datfala Messiah Seed olsem wanfala kingdom bilong olketa priest and wanfala holy nation.—Romans 9:4, 5.
12. Nomata olketa go insaed long Promis Land, wanem nao olketa Israelite fail for kasem? Why nao olsem?
12 Jehovah leadim olketa Israelite go insaed long Promis Land olsem hem promisim. Bat olsem aposol Paul hem explainim bihaen, from olketa short long faith, datfala land no kamap wanfala really “ples bilong rest.” Olsem wanfala sekson, olketa no go insaed long “rest bilong God” bikos olketa fail for luksavve and waka tugeta witim purpose bilong datfala day bilong God for rest, wea start bihaen hem creatim Adam and Eve.—Hebrews 4:3-10.
13. From olketa fail for tinghae long spiritual present bilong olketa, wanem nao Israel olsem wanfala nation lusim?
13 Datfala nation bilong Israel fit for givim full namba bilong olketa wea bae share witim Messiah insaed Kingdom bilong hem long heven olsem wanfala kingdom bilong olketa priest and wanfala holy nation. Bat olketa no tinghae long spesol present bilong olketa. Wanfala smol sekson nomoa from datfala Israelite nation acceptim Messiah taem hem kam. From diswan, smol namba nomoa insaed long datfala kingdom bilong olketa priest. God aotem datfala Kingdom from Israelite nation and “givim long wanfala nation wea garem olketa frut bilong hem.” (Matthew 21:43) Wanem nation nao datwan?
Wanfala Present Long Heven
14, 15. (a) Bihaen dae bilong Jesus, hao nao olketa nation start for blessim olketa seleva thru long “seed” bilong Abraham? (b) Wanem nao olketa member long “Israel bilong God” kasem olsem wanfala present?
14 Datfala Kingdom hem go long “Israel bilong God,” spiritual Israel, wea 144,000 follower bilong Jesus Christ wea spirit anointim nao datfala nation. (Galatians 6:16; Revelation 5:9, 10; 14:1-3) Samfala from nation bilong olketa Jew insaed long 144,000 hia, bat planti kam from olketa Gentile nation. Long datfala wei promis bilong Jehovah long Abraham, hao thru long “seed” bilong hem evri nation bae kasem blessing, hem start for fulfill. (Acts 3:25, 26; Galatians 3:8, 9) Long datfala taem wea hem start for fulfill, holy spirit anointim pipol bilong olketa nation and Jehovah God adoptim olketa olsem spiritual son, olketa brata bilong Jesus Christ. So, olketa tu kamap mek-tu part bilong datfala “seed.”—Galatians 3:28, 29.
15 Bifor dae bilong hem, Jesus talem olketa Jew wea fit for kamap member bilong datfala niu nation abaotem niu covenant, wea hem bae mekem olsem legal witim blood bilong hem. Long faondeson bilong faith long datfala legal sakrifaes, olketa wea insaed long datfala covenant bae kamap “perfect olowe.” (Hebrews 10:14-18) Olketa savve kamap “raeteous” and sin bilong olketa kasem forgiveness. (1 Corinthians 6:11) So, long datfala wei olketa olsem Adam bifor hem sin. Nomata olsem, olketa hia bae no stap insaed wanfala paradaes long earth. Jesus sei hem bae go for redyim wanfala ples for olketa long heven. (John 14:2, 3) Olketa let go long hope bilong olketa for earth mekem olketa garem wanfala ‘present wea stap finis for olketa long heven.’ (1 Peter 1:4) Wanem nao olketa duim long there? Jesus minim olsem: “Mi mekem wanfala covenant witim iufala . . . for wanfala kingdom.”—Luke 22:29.
16. Wanem nambawan assignment bilong service nao stap front long olketa anointed Christian?
16 From heven, olketa wea bae rul witim Christ bae duim samfala waka and insaed diswan olketa help for aotem eni lelebet bighed fasin againstim olmaeti rul bilong Jehovah. (Revelation 2:26, 27) Olsem mek-tu part long datfala spiritual seed bilong Abraham, olketa bae share for givim blessing bilong perfect laef for pipol bilong evri nation. (Romans 8:17-21) Olketa garem barava spesol present!—Ephesians 1:16-18.
17. Wanem part long present bilong olketa nao olketa anointed Christian enjoyim taem olketa stap yet long earth?
17 Bat present bilong olketa anointed follower bilong Jesus hem no for future nomoa. Long wei wea nara man no savve duim, Jesus helpem olketa for savve long Jehovah, only tru God. (Matthew 11:27; John 17:3, 26) Thru long toktok and example, hem teachim olketa long mining bilong wei for ‘trust long Jehovah’ and wanem nao insaed long wei for obeyim Jehovah. (Hebrews 2:13; 5:7-9) Jesus givim olketa savve abaotem truth bilong purpose bilong God and promisim hao holy spirit bae leadim olketa for barava minim gud. (John 14:24-26) Hem strongim long mind and heart bilong olketa hao Kingdom bilong God hem important tumas. (Matthew 6:10, 33) Jesus givim olketa assignment for witness and mek disaepol long pipol long Jerusalem, Judea, Samaria, and evri farawe ples long earth.—Matthew 24:14; 28:19, 20; Acts 1:8.
Spesol Present for Wanfala Big Crowd
18. Long wanem wei nao promis bilong Jehovah for evri nation bae blessim olketa seleva thru long “seed” bilong Abraham hem fulfill distaem?
18 Luk olsem olketa chusim finis full namba bilong spiritual Israel, datfala “smol flock” bilong olketa wea bae rul long Kingdom. (Luke 12:32) For planti year nao, Jehovah lukluk gud long wei for hipimap wanfala big crowd bilong olketa narawan from evri nation. So, promis bilong Jehovah long Abraham hao thru long “seed” bilong hem evri nation bae blessim olketa seleva hem fulfill long bigfala wei. Olketa hia wea hem blessim hapi for duim holy service long Jehovah and luksavve hao salvation bilong olketa hem depend long wei for garem faith long Lamb bilong God, Jesus Christ. (Revelation 7:9, 10) Waswe, iu acceptim kaenfala invitation bilong Jehovah for kamap part long datfala hapi sekson?
19. Olketa bilong nation wea kasem blessing luk forward long wanem present?
19 Wanem spesol present nao Jehovah offerim long olketa wea no bilong datfala smol flock? Hem no present long heven. Hem present wea Adam fit for pasim go long olketa pikinini bilong hem—hope for garem perfect laef olowe insaed wanfala paradaes wea bae isisi kavarem full earth. Hem bae wanfala world wea “dae bae nomoa, sorre and krae and pain bae nomoa tu.” (Revelation 21:4) So, long iu nao Word bilong God hem sei: “Trust long Jehovah and duim gud samting; stap long earth, and duim samting witim faithful fasin. And tu kasem nambawan hapi long Jehovah, and hem bae givim samting wea heart bilong iu wantem. And lelebet taem nomoa, and wicked wan bae finis . . . Bat olketa wea garem kwaet fasin bae kasem earth, and olketa bae hapi tumas long bigfala peace. Olketa raeteous wan seleva bae kasem earth, and olketa bae stap olowe long hem.”—Psalm 37:3, 4, 10, 11, 29.
20. Hao nao “nara sheep” kasem staka samting bilong datfala spiritual present bilong olketa anointed Christian?
20 “Nara sheep” bilong Jesus garem present long earth anda long rul bilong Kingdom long heven. (John 10:16a) Nomata olketa bae no stap long heven, olketa kasem tu staka samting bilong datfala spiritual present wea olketa anointed wan enjoyim. Thru long sekson bilong anointed “faithful and wise slave” nao olketa bilong nara sheep garem savve abaotem olketa nambawan promis wea stap insaed Word bilong God. (Matthew 24:45-47; 25:34) Tugeta, olketa anointed wan and nara sheep savve and worshipim only tru God, Jehovah. (John 17:20, 21) Tugeta, olketa sei thankiu long God for sakrifaes bilong Jesus wea kavarem sin. Olketa serve tugeta olsem wanfala sekson anda long wanfala Shepherd, Jesus Christ. (John 10:16b) Evriwan part long wanfala loving famili evriwea long world. Olketa sharem tugeta datfala privilege for olsem Witness bilong Jehovah and bilong Kingdom bilong hem. Tru nao, sapos iu wanfala servant bilong Jehovah wea dedicate and baptaes finis, evri samting hia part long spiritual present bilong iu.
21, 22. Hao nao iumi evriwan savve showimaot iumi lukaftarem gud spiritual present bilong iumi?
21 Hao spesol nao disfala spiritual present long iu? Waswe, wei wea iu tinghae long hem hem big inaf for mekem wei for duim will bilong God olsem first samting long laef bilong iu? Olsem samting wea pruvim datwan, waswe, iu followim kaonsel long Word and organization bilong hem for evritaem attendim evri meeting bilong Christian kongregeson? (Hebrews 10:24, 25) Waswe, iu tinghae tumas long datfala present dastawe iu go ahed for servem God nomata long hard taem? Waswe, wei wea iu tinghae long hem barava strongim iu for againstim eni wei wea pullim iu for followim gogo wea maet mekem iu lusim datwan?
22 Letem iumi evriwan lukaftarem gud datfala spiritual present wea God givim long iumi. Taem iumi luk go strong long Paradaes, letem iumi share evribit long olketa spiritual privilege wea Jehovah givim long iumi distaem. Taem iumi buildim laef bilong iumi raonem wei wea iumi fren witim Jehovah, iumi givim strongfala pruv long hao spesol nao datfala present wea God givim long iumi. Letem iumi stap midolwan long olketa wea sei: “Mi bae praisem iu, O God and King bilong mi, and mi bae blessim nem bilong iu for olowe.”—Psalm 145:1.
Hao Nao Bae Iu Minim?
• Sapos Adam loyal long God, wanem present nao hem fit for pasim kam long iumi?
• Hao nao olketa wea kam from Abraham ting long present wea olketa fit for garem?
• Wanem nao insaed long present bilong olketa anointed follower bilong Christ?
• Wanem nao present bilong datfala big crowd, and hao nao olketa savve showimaot olketa barava tinghae long hem?
[Piksa long page 20]
Olketa pikinini bilong Abraham kasem promis bilong wanfala spesol present
[Piksa long page 23]
Waswe, iu tinghae long spiritual present bilong iu?