Kasem Heart wea Jehovah Acceptim

“Wakem insaed long mi wanfala klinfala heart, O  God, and putim insaed long mi wanfala niufala spirit, wanfala strong wan.”—PSALM 51:10.

1, 2. Why nao iumi shud interest long heart bilong iumi?

HEM wanfala tolfala man wea luk naes tumas. Taem profet Samuel lukim hem, hem tingse disfala firstborn son bilong Jesse nao God chusim for kamap king bihaen long Saul. Bat Jehovah sei: “No lukim lukluk bilong [datfala son] or hao big nao hem, from mi rejectim hem. . . . Man hem lukim samting wea eye nomoa lukim; bat Jehovah, hem lukim heart.” Jehovah chusim lastborn son bilong Jesse, David—“wanfala man wea heart bilong hem acceptim.”—1 Samuel 13:14; 16:7.

² God savve wanem nao insaed heart bilong man, olsem hem talem bihaen: “Mi, Jehovah, mi lukluk gud long heart, lukluk insaed long olketa kidney, for givim samting long man wanwan for fitim wei bilong hem, for fitim frut bilong samting wea hem duim.” (Jeremiah 17:10) Tru nao, “Jehovah hem man for lukluk gud insaed long olketa heart.” (Proverbs 17:3) Bat, wanem nao heart insaed long man wea Jehovah lukluk gud long hem? And wanem nao iumi savve duim for kasem heart wea hem acceptim?

“Secret Man Bilong Heart”

3, 4. Wanem nao mining bilong datfala word “heart” taem hem kamap insaed Bible? Givim samfala example.

³ Datfala word “heart” hem kamap samting olsem wan thousand taem insaed Bible. Planti taem hem story abaotem long tokpiksa wei. Olsem example, Jehovah sei olsem long profet Moses: “Story long olketa son bilong Israel, mekem olketa savve givim contribution for mi: From evri man wea heart bilong hem muvim hem, iufala mas tekem contribution bilong mi.” Then olketa wea givim contribution “kam, evriwan wea heart bilong hem muvim hem.” (Exodus 25:2; 35:21) Hem klia hao wanfala mining bilong tokpiksa heart hem samting wea muvim man—paoa wea insaed iumi wea muvim iumi for duim samting. Tokpiksa heart showimaot tu olketa feeling, samting iumi laekem and lovem. Heart savve fulap witim kros or witim fraet, hem savve feel sorre or barava hapi. (Psalm 27:3; 39:3; John 16:22; Romans 9:2) Hem savve praod or hambol, garem love or heit.—Proverbs 16:5; Matthew 11:29; 1 Peter 1:22.

⁴ Dastawe “heart” hem planti taem join witim samting wea muvim man and olketa feeling, bat “mind” hem olketa tingting and wei for minim samting. Hem nao mining bilong tufala word hia taem olketa kamap long semtaem insaed Bible. (Matthew 22:37; Philippians 4:7) Bat diswan no minim heart and mind no savve minim sem samting. Olsem example, Moses encouragem olketa Israelite: “Iufala mas keepim insaed heart bilong iufala [or, “mas tingim long mind bilong iufala,” footnote] hao Jehovah hem trufala God.” (Deuteronomy 4:39) Jesus sei olsem long olketa scribe wea mekem nogud plan againstim hem: “Why nao iufala tingim olketa wicked samting insaed long heart bilong iufala?” (Matthew 9:4) “Wei for minim samting,” “savve,” and “wei for ting raonem samting” savve join witim heart tu. (1 Kings 3:12; Proverbs 15:14; Mark 2:6) So, tokpiksa heart savve minim tu mind bilong iumi—tingting and wei wea iumi minim samting.

5. Wanem nao tokpiksa heart hem minim?

⁵ Wanfala buk hem sei tokpiksa heart hem minim “main part, tingting and feeling insaed man, wea man long insaed showimaot long evri difren samting wea hem duim, samting hem laekem, hu hem lovem, feeling, goal, tingting, idea, dream, wisdom, savve, biliv, and samting hem ting raonem, and rememberim.” Hem showimaot wanem nao iumi long insaed, datfala “secret man bilong heart.” (1 Peter 3:4) Datwan nao samting wea Jehovah lukluk gud long hem. Dastawe David savve prea: “Wakem insaed long mi wanfala klinfala heart, O God, and putim insaed long mi wanfala niufala spirit, wanfala strong wan.” (Psalm 51:10) Hao nao iumi savve kasem wanfala klinfala heart?

“Mekem Heart Bilong Iufala Followim” Word Bilong God

6. Wanem kaonsel nao Moses givim for Israel taem olketa camp long Flat Ples bilong Moab?

⁶ Taem hem givim kaonsel for olketa bilong Israel wea hipap long Flat Ples bilong Moab bifor olketa go insaed Promis Land, Moses sei: “Mekem heart bilong iufala followim evri toktok wea mi talem olsem warning long iufala tuday, mekem iufala savve komandim olketa son bilong iufala for mek sure for obeyim evri toktok bilong disfala law.” (Deuteronomy 32:46) Olketa Israelite mas “lisin gud.” (Knox) Only sapos olketa savve gud long olketa komand bilong God then bae olketa savve putim diswan insaed pikinini bilong olketa.—Deuteronomy 6:6-8.

7. Wanem nao insaed wei for ‘mekem heart bilong iumi followim’ Word bilong God?

⁷ Wanfala main samting for garem klin heart hem for kasem stretfala savve abaotem will and olketa purpose bilong God. Wanfala ples nomoa man savve kasem datfala savve, insaed Word bilong God. (2 Timothy 3:16, 17) Nomata olsem, for garem savve nomoa bae no helpem iumi for kasem heart wea Jehovah acceptim. For savve hia affectim fasin bilong iumi long insaed, iumi mas ‘mekem heart bilong iumi followim,’ or “followim insaed heart,” samting wea iumi lanem. (Deuteronomy 32:46, An American Translation) Hao nao for duim diswan? David wea raetem psalm minim olsem: “Mi ting bak long olketa day bilong bifor; mi ting raonem evri waka bilong iu; mi willing for tingting evritaem abaotem olketa waka bilong hand bilong iu.”—Psalm 143:5.

8. Wanem nao olketa kwestin wea iumi savve ting raonem taem iumi study?

⁸ Iumi shud ting raonem olketa waka bilong Jehovah witim thankiu tu. Taem iumi readim Bible or olketa Bible pablikeson, iumi need for ting raonem olketa kwestin olsem: ‘Wanem nao diswan teachim mi abaotem Jehovah? Wanem nao olketa fasin bilong Jehovah wea mi lukim long hia? Wanem nao disfala story teachim mi abaotem samting wea Jehovah laekem and no laekem? Wanem nao kamaot from wei for followim gogo wea Jehovah lovem and gogo wea hem heitim? Hao nao disfala information join witim samting wea mi savve finis?’

9. Hao important nao wei for study seleva and ting raonem samting?

⁹ Lisaa wea hem thirti-tu year talemaot hao hem start for tinghae long gud samting bilong wei for study and ting raonem samting: “Bihaen mi baptaes long 1994, mi go ahed insaed truth for samting olsem tufala year. Mi attendim evri Christian meeting, go aot long ministry for 30 go kasem 40 hour evri month, and mi kaban witim olketa nara Christian. Then mi start for isisi bakslaed. Mi barava go daon go kasem taem mi brekem law bilong God tu. Bat mi kasem bak gud tingting and disaed for klinim laef bilong mi. Mi hapi tumas from Jehovah luksavve wei wea mi repent and hem acceptim mi moa! Planti taem mi ting: ‘Why nao mi bakslaed?’ Ansa wea kamap evritaem point go long wei wea mi no duim gudfala study and ting raonem samting. Truth bilong Bible hem no kasem heart bilong mi. Start long distaem, wei for study seleva and ting raonem samting bae hem wanfala barava important part long laef bilong mi.” Taem savve bilong iumi abaotem Jehovah, Son, and Word bilong hem kamap moa big, hem important tumas for iumi markem taem for ting raonem evri samting hia!

10. Why nao hem important tumas for iumi markem taem for study seleva and ting raonem samting?

¹⁰ Insaed disfala world wea busy, hem wanfala challenge for faendem taem for study and ting raonem samting. Nomata olsem, olketa Christian distaem stap redy for go insaed long wanfala nambawan Promis Land—raeteous niu world bilong God. (2 Peter 3:13) Olketa big samting, olsem wei wea “Bigfala Babylon” bae distroe and attak wea “Gog bilong land bilong Magog” bae duim long pipol bilong Jehovah hem klosap for happen. (Revelation 17:1, 2, 5, 15-17; Ezekiel 38:1-4, 14-16; 39:2) Samting wea klosap for happen maet testim love bilong iumi for Jehovah. Hem important tumas for iumi distaem baem taem and mekem heart bilong iumi followim Word bilong God!—Ephesians 5:15, 16.

‘Redyim Heart Bilong Iu for Luk Long Word Bilong God’

11. Hao nao heart bilong iumi hem olsem graon?

¹¹ Tokpiksa heart hem olsem graon wea man savve plantim seed bilong truth insaed. (Matthew 13:18-23) Man mas houm graon for mek sure kaikai hem grow gud. Olsem tu, man mas redyim heart, mekem hem savve lisin long Word bilong God. Ezra datfala priest hem “redyim heart bilong hem for lukluk long law bilong Jehovah and for duim.” (Ezra 7:10) Hao nao iumi savve redyim heart bilong iumi?

12. Wanem nao bae help for redyim heart for study?

¹² Wanfala nambawan wei for redyim heart taem iumi luk insaed Word bilong God hem strongfala prea. Olketa Christian meeting bilong olketa tru worshiper start and finis witim prea. Hem barava fitim for iumi startim each taem wea iumi study seleva witim prea and then keepim datfala tingting taem iumi go ahed for study!

13. For kasem heart wea Jehovah acceptim, wanem nao iumi mas duim?

¹³ Tokpiksa heart mas willing for aotem eni idea wea hem garem bifor abaotem eni subject. Olketa bigman bilong religion long taem bilong Jesus no willing for duim diswan. (Matthew 13:15) Long narasaed, mami bilong Jesus, Mary, luksavve long planti samting “insaed long heart bilong hem” wea garem faondeson long olketa tru samting wea hem herem finis. (Luke 2:19, 51) Hem kamap wanfala faithful disaepol bilong Jesus. Lydia bilong Thyatira lisin long Paul, “and Jehovah openem heart bilong hem for mekem hem lisin.” Hem tu kamap wanfala wea biliv. (Acts 16:14, 15) Iumi mas no hol strong long tingting bilong iumi seleva or olketa teaching from bifor. Bat, iumi mas willing for “letem God hem kamap tru, nomata evri man kamap laea.”—Romans 3:4.

14. Hao nao iumi savve redyim heart bilong iumi for lisin long olketa Christian meeting?

¹⁴ For redyim heart for lisin long olketa Christian meeting hem barava important. Maet samting wea pullim mind hem mekem iumi no lisin long samting wea kamap long meeting. Toktok no savve affectim iumi sapos mind bilong iumi busy for tingim olketa samting wea happen tuday or warim samting wea iumi bae duim tumoro. Iumi need for disaed strong for lisin and lane sapos iumi laek for kasem gud samting from wanem olketa talem. Iumi savve kasem olketa barava gud samting sapos iumi disaed strong for minim olketa scripture wea olketa explainim!—Nehemiah 8:5-8, 12.

15. Hao nao hambol fasin helpem iumi for moa willing for lane?

¹⁵ Olsem wei for addim fertilizer savve mekem graon kamap moa gud, wei wea iumi mekem grow hambol fasin, wei for hangre for spiritual samting, trust, wei for fraet long God, and love for God savve mekem tokpiksa heart bilong iumi kamap moabeta. Hambol fasin hem mekem heart soft, hem mekem iumi moa willing for lane. Jehovah sei long King Josiah bilong Judah: “From heart bilong iu soft diswan mekem iu kamap hambol bikos long Jehovah taem iu herem samting wea mi talem . . . and start for krae front long mi, mi tu, herem datwan.” (2 Kings 22:19) Heart bilong Josiah hem hambol and willing for lisin. Hambol fasin mekem olketa disaepol bilong Jesus wea “no skul gud and man nating” for minim and followim olketa spiritual truth wea “olketa wea wise and kleva” fail for minim. (Acts 4:13; Luke 10:21) Letem iumi “kamap hambol front long God” taem iumi trae for kasem heart wea God acceptim.—Ezra 8:21.

16. Why nao iumi mas waka hard for mekem grow wei for hangre for spiritual kaikai?

¹⁶ Jesus hem sei: “Hapi nao olketa wea luksavve long spiritual need bilong olketa.” (Matthew 5:3) Nomata iumi garem need for spiritual samting, olketa hevi bilong disfala wicked world or fasin for les savve mekem iumi no tinghae long need bilong iumi. (Matthew 4:4) Iumi mas mekem grow wei for laekem spiritual kaikai. Nomata sapos long firstaem iumi no interest for duim Bible reading and study seleva, taem iumi no givap for duim bae iumi faendem hao savve bae ‘kamap samting wea soul bilong iumi barava laekem,’ and bae iumi luk forward long olketa taem for study.—Proverbs 2:10, 11.

17. (a) Why nao Jehovah fit for kasem full trust bilong iumi? (b) Hao nao iumi savve mekem grow trust long God?

¹⁷ “Trust long Jehovah witim full heart bilong iu and no depend long savve bilong iuseleva,” hem kaonsel from King Solomon. (Proverbs 3:5) Heart wea trust long Jehovah savve hao nomata wanem samting Hem askem or talem thru long Word bilong hem, mas stret evritaem. (Isaiah 48:17) Jehovah barava fit for kasem full trust bilong iumi. Hem fit for duim evri samting wea stap insaed purpose bilong hem. (Isaiah 40:26, 29) Tru nao, nem bilong hem minim “Hem Mekem Kamap,” wea buildimap trust long wei wea hem savve fulfillim samting wea hem promisim! Hem “raeteous long evri wei bilong hem and loyal long evri waka bilong hem.” (Psalm 145:17) Tru, for mekem grow trust long hem, iumi need for “teistim and lukim hao Jehovah hem gud” taem iumi followim samting wea iumi lanem from Bible long living bilong iumiseleva and taem iumi tingting long gud samting wea diswan givim.—Psalm 34:8.

18. Hao nao wei for fraet long God helpem iumi for willing for lisin long hem?

¹⁸ Taem hem point go long nara fasin wea mekem heart bilong iumi willing for followim kaonsel from God, Solomon sei: “Fraet long Jehovah and tanawe from nogud samting.” (Proverbs 3:7) Jehovah sei olsem abaotem Israel bifor: “Sapos olketa mekem grow insaed long heart wei for fraet long mi and for keepim evri komandment bilong mi evritaem, then olketa and olketa son bilong olketa savve kasem gudfala samting for olowe!” (Deuteronomy 5:29) Tru nao, olketa wea fraet long God obeyim hem. Jehovah hem fit for “showim strong bilong hem for olketa wea givim full heart long hem” and for panisim olketa wea disobeyim hem. (2 Chronicles 16:9) Letem wei for fraet for mekem God no hapi hem bossim evri akson, tingting, and feeling bilong iumi.

‘Lovem Jehovah Witim Full Heart Bilong Iu’

19. Wanem waka nao love garem for mekem heart bilong iumi followim direction from Jehovah?

¹⁹ Winim evri nara fasin, love barava mekem heart bilong iumi followim direction from Jehovah. Heart wea fulap witim love for God mekem man willing for lanem samting wea mekem God hapi and wanem hem no laekem. (1 John 5:3) Jesus sei: “Iu mas lovem Jehovah God bilong iu witim full heart and witim full soul and witim full mind bilong iu.” (Matthew 22:37) Letem iumi mekem love bilong iumi for God moa deep taem iumi garem fasin for tingting raonem gud fasin bilong hem, taem iumi evritaem story long hem olsem wanfala klos fren, and taem iumi story abaotem hem long nara pipol.

20. Hao nao iumi savve kasem heart wea Jehovah acceptim?

²⁰ For reviewim diswan: Wei for kasem heart wea Jehovah acceptim minim for letem Word bilong God affectim feeling bilong iumi insaed, secret man bilong heart. Gudfala wei for studyim Bible seleva and ting raonem samting witim thankiu, hem nao samting iumi mas duim. Best wei for duim diswan hem witim heart wea redy—heart wea no garem olketa difren idea, heart wea fulap witim olketa fasin wea mekem iumi willing for lane! Tru nao, witim help bilong Jehovah, man savve kasem gudfala heart. Bat, wanem nao iumi savve duim for protectim heart bilong iumi?

[Footnote]

Hao Nao Bae Iu Ansa?

• Wanem nao tokpiksa heart wea Jehovah lukluk gud long hem?

• Hao nao iumi savve ‘mekem heart bilong iumi followim’ Word bilong God?

• Hao nao iumi shud redyim heart bilong iumi for luk long Word bilong God?

• Bihaen iu lukluk long disfala information, wanem nao hem muvim iu for duim?

[Piksa long page 17]

David ting raonem olketa spiritual samting witim thankiu. Iu tu olsem?

[Olketa Piksa long page 18]

Redyim heart bilong iu bifor iu studyim Word bilong God