“Lukim Naesfala Wei Bilong Jehovah”

Olketa hard samting wea happen long laef bilong iumi savve barava spoelem iumi. Maet hem nomoa iumi savve tingim olowe, hem mekem iumi wiki, and hem affectim tingting bilong iumi abaotem laef. King David hem kasem staka hard taem. Wanem nao helpem hem? Long wanfala psalm David sei: “Mi askem Jehovah for barava helpem mi. Mi talem long hem evri samting wea mi wari abaotem. Taem mi feel wikdaon, mi askem help bilong hem. Then iu showim mi road for mi followim.” Tru nao, David hambol for prea long God for helpem hem.—Ps. 142:1-3.

Long narafala psalm, David sei: “Wanfala samting nao mi askem long Jehovah, hem nao samting wea mi barava laekem, for mi savve stap long haos bilong Jehovah long full laef bilong mi. Mi laek for lukim naesfala wei bilong Jehovah, and for gohed tinghae long temple bilong hem.” (Ps 27:4) David hem no wanfala Levite, bat tingim feeling bilong hem taem hem standap long temple, wea hem nao main ples bilong tru worship. David hapi tumas so hem laek for stap long there for full laef bilong hem mekem hem savve “lukim naesfala wei bilong Jehovah.”

Datfala toktok bilong David, “naesfala wei bilong Jehovah” showimaot David tinghae long arrangement bilong God for pipol bilong hem worshipim hem. Hem gud for iumi wanwan tingim diswan: “Waswe, mi tu garem wei for tinghae olsem David?”

“TINGHAE” LONG ARRANGEMENT BILONG GOD

Distaem, Jehovah no markem wanfala temple olsem main ples bilong tru worship, bat iumi garem nambawan spiritual temple bilong hem, wea hem nao arrangement for tru worship long taem bilong iumi.a Sapos iumi “tinghae” long disfala arrangement, iumi tu savve “lukim naesfala wei bilong Jehovah.”

Tingim altar wea olketa wakem long copper wea stap front long datfala tabernacle. Olketa iusim altar hia for olketa sakrifaes wea olketa bonem. (Ex. 38:1, 2; 40:6) Datfala altar piksarem wei wea God willing for acceptim laef bilong Jesus wea hem givim olsem sakrifaes. (Heb. 10:5-10) Hao nao datwan helpem iumi? Aposol Paul sei: “Taem iumi enemy bilong God, Son bilong hem dae for iumi, mekem iumi fren bak witim hem.” (Rome 5:10) Sapos iumi showimaot faith long sakrifaes bilong Jesus, God bae hapi long iumi and trustim iumi bikos iumi olketa fren bilong hem. Samting wea kamaot from diswan nao bae iumi “barava fren gud witim Jehovah.”—Ps. 25:14.

From Jehovah “forgivim olketa sin” bilong iumi, datwan ‘strongim iumi.’ (Acts 3:19) Samting wea kasem iumi hem olsem samting wea kasem wanfala prisoner wea kot judgem hem for mas dae. From hem sorre tumas long olketa samting wea hem duim, hem barava changem wei bilong hem. Taem wanfala judge wea kaen hem lukim diswan, hem aotem panis wea datfala kot talem for datfala prisoner and sei olketa bae no killim hem dae nao. Man hia bae hapi narawe! Jehovah hem olsem datfala judge taem hem hapi long olketa wea repent and hem aotem datfala panis for olketa dae.

TINGHAE LONG TRU WORSHIP

Taem David stap long haos bilong Jehovah hem lukim olketa difren samting wea join witim tru worship. Hem lukim staka Israelite hipap long there, olketa Levite readim big Law and explainim long pipol, olketa priest bonem incense, and hem lukim tu olketa nara waka wea olketa priest and Levite duim. (Ex. 30:34-38; Num. 3:5-8; Deut. 31:9-12) Evri samting hia piksarem wanem iumi duim long tru worship distaem.

Long distaem tu, “hem gud and naes tumas for olketa brata garem wan mind!” (Ps. 133:1) Iumi garem staka brata and sista evriwea long world. (1 Pet. 2:17) Long olketa meeting bilong iumi, olketa readim and explainim Bible. Jehovah iusim organization bilong hem for provaedem plande gudfala instruction. Iumi garem tu staka spiritual kaikai long olketa pablikeson bilong iumi wea iumi savve iusim for study seleva or duim famili worship. Wanfala member bilong Governing Body sei: “Insaed long full day, wei for ting raonem toktok bilong Jehovah long Bible and mining bilong hem, and for lukaotem savve bilong Jehovah and for minim datwan mekem mi hapi and kasem staka blessing.” Tru nao, sapos iumi duim olsem, bae iumi barava laekem wei for kasem savve.—Prov. 2:10.

Distaem, pipol bilong Jehovah prea long hem evriday. Hem ting long olketa prea hia olsem incense wea smel naes tumas. (Ps. 141:2) Iumi hapi for savve Jehovah God barava hapi taem iumi hambol for prea long hem!

Moses prea olsem: “Mifala laekem God bilong mifala Jehovah for showimaot gudfala wei bilong hem long mifala. Mifala laekem hem for blessim samting wea mifala duim.” (Ps. 90:17) Taem iumi strong for duim ministry bilong iumi, Jehovah blessim waka wea iumi duim. (Prov. 10:22) Maet iumi helpem samfala pipol for kam insaed long truth. Maet for staka year iumi gohed duim ministry nomata pipol no laek lisin, iumi sik or sorre, or pipol spoelem iumi. (1 Thess. 2:2) Nomata olsem, iumi “lukim naesfala wei bilong Jehovah” and iumi luksavve Dadi bilong iumi long heven hem hapi long hard waka bilong iumi.

David storyim hao Jehovah lukaftarem hem. Hem sei: “Iu protectim evri samting wea bae mi kasem. Laef bilong mi hem gud tumas.” (Ps. 16:5, 6) David hapi tumas for fren witim Jehovah and for garem privilege for worshipim hem. Maet iumi tu kasem olketa hard taem olsem David, bat iumi kasem staka blessing from Jehovah! Iumi laek for gohed tinghae long tru worship and evritaem tinghae long spiritual temple bilong Jehovah.