Wei for Fraet Long Jehovah Mekem Iumi Hapi
“Fraet long Jehovah, iufala olketa bilong hem wea holy, from olketa wea fraet long hem no short long eni samting.”—PSALM 34:9.
1, 2. (a) Wanem nao tufala difren samting wea olketa bigman bilong religion teachim abaotem wei for fraet long God? (b) Bae iumi story raonem olketa wanem kwestin?
PLANDE taem, olketa bigman bilong olketa Christian religion iusim datfala false teaching abaotem wei for God panisim olketa sinner long hell for trae teachim pipol for fraetem God. Bat kaen teaching olsem hem againstim teaching bilong Bible abaotem Jehovah, hao hem God wea lovem olketa man and wea duim stret samting evritaem. (Genesis 3:19; Deuteronomy 32:4; Romans 6:23; 1 John 4:8) Olketa nara bigman bilong olketa Christian religion teachim difren samting. No enitaem olketa storyim hao man shud fraet for duim samting wea bae no mekem God hapi. Bat olketa teachim hao God acceptim klosap evriwan nomata sapos olketa brekem olketa law bilong hem or nomoa. Bible hem no teachim datwan tu.—Galatians 5:19-21.
2 Samting wea Bible encouragem iumi for duim nao, hem for fraet long God. (Revelation 14:7) Datfala Bible teaching mekem samfala kwestin kamap. Why nao God wea lovem iumi laekem iumi for fraet long hem? Wanem kaen wei for fraet nao datwan? Hao nao wei for fraet long God savve helpem iumi? Bae iumi ansarem olketa kwestin hia taem iumi gohed for storyim Psalm 34.
Why Iumi Shud Fraet Long God
3. (a) Hao nao tingting bilong iu abaotem datfala komand for fraet long God? (b) Why nao olketa wea fraet long Jehovah hapi?
3 From Jehovah hem Creator and Haefala Ruler bilong universe, hem barava fitim for iumi fraet long hem. (1 Peter 2:17) Bat diskaen wei for fraet hem no wei for barava fraetem wanfala god wea raf tumas. Taem iumi tingim position bilong Jehovah, disfala wei for fraet hem minim for showimaot bigfala respect long hem. And tu, hem minim wei for no laek duim samting wea God no hapi long hem. Wei for fraet long God hem mekem man hapi, no wikdaon or for barava fraet. Jehovah, wea hem “datfala hapi God,” laekem olketa man for hapi. (1 Timothy 1:11) Bat for iumi hapi, iumi mas duim olketa samting wea God laekem iumi for duim. For plande pipol, datwan minim olketa mas changem fasin bilong olketa and samting wea olketa duim. Evriwan wea mekem change olsem bae lukim hao toktok bilong David wea raetem psalm hem tru tumas. Hem sei: “Iufala teistim and lukim hao Jehovah hem gud; hapi nao man wea trust long Jehovah for protectim hem. Fraet long Jehovah, iufala olketa bilong hem wea holy, from olketa wea fraet long hem no short long eni samting.” (Psalm 34:8, 9) From olketa wea fraet long Jehovah barava fren gud witim Hem, olketa no short long olketa gud samting wea bae helpem olketa for olowe.
4. David and Jesus talem wanem promis abaotem wei wea Jehovah bae provaedem need bilong olketa man?
4 Tingim samfala reason why David showimaot respect long olketa man wea followim hem long wei for kolem olketa “holy.” Olketa part long holy nation bilong God. Olketa willing tu for followim David nomata laef bilong olketa stap long danger. Nomata olketa mas ranawe from King Saul, David hem trustim hao Jehovah bae gohed for provaedem need bilong olketa. David hem raet olsem: “Olketa young lion no garem plande samting and kamap hangre; bat olketa wea lukaotem Jehovah bae no short long eni gudfala samting.” (Psalm 34:10) Jesus tu promisim sem samting for olketa follower bilong hem.—Matthew 6:33.
5. (a) Wanem kaen pipol nao followim Jesus? (b) Wanem kaonsel nao Jesus givim saed long wei for fraet?
5 Plande Jew wea lisin long Jesus, olketa bigman ting daonem and no interest long olketa. Dastawe Jesus hem “feel sorre long olketa, from olketa garekil and stap olobaot olsem olketa sheepsheep wea no garem eni shepherd.” (Matthew 9:36) Waswe, bae olketa Jew hia no fraet for followim Jesus? For followim hem, olketa mas fraet long Jehovah, no long olketa man. Jesus hem sei: “No fraet long olketa wea savve killim dae body and bihaen olketa no savve duim eni samting moa. Bat mi bae showim iufala hu nao for fraet long hem: Fraet long datwan wea garem paoa for torowem man wea dae finis insaed long Gehenna. Tru nao, mi talem iufala, fraet long Diswan. Faevfala smol bird kostim tufala smol selen, iaman? Nomata olsem, God hem nating forgetim eniwan long olketa. Bat nomata olketa hair long hed bilong iufala hem kaontem finis. No fraet; iufala barava important winim plande bird.”—Luke 12:4-7.
6. (a) Wanem toktok bilong Jesus nao hem strongim olketa Christian? (b) Why nao Jesus hem best example wea showimaot fasin for fraet long God?
6 Taem olketa enemy trae for mekem olketa wea fraet long Jehovah stop for worshipim hem, maet olketa brata hia tingim disfala kaonsel bilong Jesus: “Evriwan wea talemaot hem bilong mi, Son bilong man tu bae talemaot long olketa angel bilong God hao man hia hem bilong hem. Bat eniwan wea talemaot long pipol hao hem no bilong mi, bae mi tu talemaot long olketa angel bilong God hao hem no bilong mi.” (Luke 12:8, 9) Olketa toktok hia hem strongim olketa Christian, especially olketa wea stap long olketa kantri wea gavman tambuim tru worship. Olketa hia gohed for praisem Jehovah long olketa Christian meeting and long ministry, bat olketa iusim gudfala tingting and careful taem olketa duim datwan. (Acts 5:29) Jesus hem best example wea showimaot fasin for “fraet long God.” (Hebrews 5:7) Profesi long Bible hem sei olsem abaotem hem: “Spirit bilong Jehovah mas stap long hem, datfala spirit . . . bilong wei for fraet long Jehovah; and wei for fraet long Jehovah bae mekem hem hapi.” (Isaiah 11:2, 3) So Jesus hem barava fit for teachim iumi olketa gud samting wea iumi savve kasem taem iumi fraet long God.
7. (a) Long wanem wei nao olketa Christian acceptim invitation wea olsem invitation wea David givim? (b) Hao nao parents savve followim gudfala example bilong David?
7 Evriwan wea followim example bilong Jesus and obeyim olketa teaching bilong hem showimaot olketa acceptim wanfala invitation wea olsem disfala invitation wea David givim long olketa wea followim hem: “Kam, iufala olketa son, lisin long mi; mi bae teachim iufala for fraet long Jehovah.” (Psalm 34:11) Hem fitim for David kolem olketa man wea sapotim hem “olketa son” bikos olketa respectim hem olsem leader bilong olketa. David hem helpem olketa follower bilong hem for fraet long God, mekem olketa savve garem wan mind and mekem God hapi long olketa. Datwan hem gudfala example for Christian parents followim! Jehovah givim olketa datfala responsibility for “gohed for trainim olketa [son and dota bilong olketa] long discipline and wei for stretem tingting wea kam from Jehovah.” (Ephesians 6:4) Parents helpem olketa pikinini for fraet long Jehovah and hapi taem olketa storyim olketa spiritual samting evriday witim olketa and conductim Bible study witim olketa evritaem.—Deuteronomy 6:6, 7.
Hao for Fraet Long God Long Laef Bilong Iumi
8, 9. (a) Why nao hem barava gud for fraet long God? (b) Hao nao iumi savve kontrolem tongue bilong iumi?
8 Olsem iumi storyim finis, wei for fraet long Jehovah hem no spoelem hapi bilong iumi. David hem ask olsem: “Hu nao man wea barava enjoyim laef, wea stap longtaem mekem hem savve lukim gud samting?” (Psalm 34:12) Tru nao, for iumi savve hapi and kasem gudfala samting, hem important for iumi fraet long Jehovah. Nomata olsem, hem isi for sei, “Mi fraet long God.” Bat hem moa hard for pruvim datwan thru long fasin bilong iumi. Dastawe David hem gohed for explainim olketa wei wea iumi savve showimaot iumi fraet long God.
9 “Kontrolem tongue bilong iu mekem iu no talem nogud samting, and kontrolem lips bilong iu mekem iu no giamanim samwan.” (Psalm 34:13) Holy spirit muvim aposol Peter for talem toktok bilong disfala verse long Psalm 34 bihaen hem kaonselem olketa Christian for garem sem love for each other wea man garem for brata bilong hem. (1 Peter 3:8-12) Iumi kontrolem tongue bilong iumi mekem iumi no talem nogud samting taem iumi stap klia long wei for gossip. Iumi bae evritaem trae for storyim samting wea savve encouragem olketa narawan. And tu, bae iumi trae hard for garem fasin for no fraet and talem tru samting.—Ephesians 4:25, 29, 31; James 5:16.
10. (a) Explainim hao nao iumi savve rejectim nogud samting. (b) Hao nao iumi savve duim gud samting?
10 “Rejectim wei for duim nogud samting, and duim gudfala samting; lukaotem peace, and aftarem datwan.” (Psalm 34:14) Iumi stap klia long olketa samting wea God barava againstim, olsem dirty fasin, pornography, fasin for steal, spiritism, raf fasin, fasin for drunk, and wei for iusim olketa nogud drug. And tu, iumi rejectim hapitaem wea mekhae long olketa barava nogud samting hia. (Ephesians 5:10-12) Iumi iusim taem bilong iumi for duim gud samting. Best samting iumi savve duim hem for share evritaem long waka for preach abaotem Kingdom and mekem pipol kamap disaepol, wea datwan helpem olketa narawan kasem salvation. (Matthew 24:14; 28:19, 20) Olketa nara gud samting iumi savve duim hem for prepare for and attendim olketa Christian meeting, givim olketa donation for Kingdom waka wea gohed raonem full world, help for klinim and lukaftarem Kingdom Hall, and for tingim and helpem olketa Christian wea garem need.
11. (a) Hao nao David showimaot hao hem tu duim samting wea hem encouragem narawan for duim saed long wei for mek peace? (b) Wanem nao iu savve duim for ‘aftarem peace’ insaed long kongregeson?
11 David showimaot gudfala example long wei for aftarem peace. Hem garem tufala chance for killim dae Saul. Bat long each taem, hem hol bak for duim datwan, and bihaen hem story long king long wei wea showimaot respect, from hem hope for tufala fren bak moa. (1 Samuel 24:8-11; 26:17-20) Wanem nao iumi savve duim sapos wanfala samting kamap wea luk olsem datwan bae spoelem peace insaed kongregeson? Iumi shud “lukaotem peace, and aftarem datwan.” So sapos iumi luksavve hao samwan long kongregeson feel nogud long iumi, iumi obeyim disfala kaonsel bilong Jesus: “Mek peace witim brata bilong iu firstaem.” Then iumi savve gohed for duim olketa nara samting saed long tru worship.—Matthew 5:23, 24; Ephesians 4:26.
Wei for Fraet Long God Mekem Man Kasem Staka Gud Samting
12, 13. (a) Wanem nao olketa gud samting wea olketa wea fraet long God kasem distaem? (b) Wanem nambawan reward nao olketa wea faithful long God klosap for kasem?
12 “Eye bilong Jehovah hem lukluk long olketa wea raeteous, and ear bilong hem lisin taem olketa singaot for help.” (Psalm 34:15) Wei wea God deal witim David pruvim datfala toktok hem tru. Iumi kasem bigfala hapi and peace distaem bikos iumi savve Jehovah hem gohed for protectim iumi. Iumi trustim hao hem bae evritaem givim iumi wanem iumi needim, nomata long taem iumi kasem bigfala hevi tu. Bible talem profesi hao Gog bilong Magog bae attakim evri tru worshiper. Iumi savve hao klosap nao iumi mas feisim datfala attak, and tu, bae iumi feisim datfala “day bilong Jehovah wea fit for mekem man fraet.” (Joel 2:11, 31; Ezekiel 38:14-18, 21-23) So nomata wanem samting iumi mas feisim long datfala taem, disfala toktok bilong David bae fulfill long iumi tu: “Olketa singaot, and Jehovah herem olketa, and hem sevem olketa from olketa bigfala trabol wea kasem olketa.”—Psalm 34:17.
13 Long datfala taem, bae iumi hapi tumas for lukim wei wea Jehovah hem mekhae long nambawan nem bilong hem! Bae iumi barava respectim hem winim enitaem bifor and olketa wea againstim hem bae distroe. “Feis bilong Jehovah hem againstim olketa wea duim nogud samting, for mekem no eniwan long earth bae storyim olketa moa.” (Psalm 34:16) Bae hem nambawan blessing for kasem salvation and go insaed datfala raeteous niu world bilong God!
Olketa Promis wea Helpem Iumi for No Givap
14. Wanem nao bae helpem iumi for no givap nomata iumi kasem olketa hard taem?
14 Go kasem datfala taem, fasin for no givap bae helpem iumi for gohed obeyim Jehovah insaed disfala world wea barava nogud and raf tumas. Wei for fraet long God hem helpem iumi garem fasin for obey. From iumi stap long taem wea barava nogud tumas, samfala servant bilong Jehovah kasem olketa barava hard taem wea mekem olketa feel barava wikdaon and no hapi. Nomata olsem, olketa savve barava feel sure hao sapos olketa depend long Jehovah, bae hem helpem olketa for no givap. Toktok bilong David barava comfortim iumi. Hem sei: “Jehovah hem stap klosap long olketa wea sorre tumas; and hem sevem olketa wea barava wikdaon.” (Psalm 34:18) Long next verse David talem nara samting wea savve encouragem iumi, taem hem sei: “Staka trabol kasem man wea raeteous, bat Jehovah sevem hem from evri trabol hia.” (Psalm 34:19) Nomata sapos iumi kasem staka hard taem, Jehovah garem paoa for sevem iumi from olketa samting hia.
15, 16. (a) Wanem nogud report nao David herem no longtaem bihaen hem raetem Psalm 34? (b) Wanem nao bae helpem iumi for no givap taem iumi kasem olketa hard taem?
15 No longtaem bihaen David raetem Psalm 34, hem herem nogud samting wea kasem olketa man long Nob taem Saul killim dae evriwan long there and klosap evri priest tu. Masbi David barava feel sorre taem hem tingim hao samting wea mekem Saul kros nao hem wei wea hem visitim Nob! (1 Samuel 22:13, 18-21) For sure, David prea long Jehovah for help, and hem kasem comfort taem hem tingim hope for “olketa wea raeteous” bae laef bak moa long future.—Acts 24:15.
16 Resurrection hope hem strongim iumi tu distaem. Iumi savve olketa enemy bilong iumi no savve spoelem iumi for olowe. (Matthew 10:28) David talemaot hao hem garem sem hope taem hem sei olsem: “Hem protectim olketa bon bilong datwan [wea raeteous]; no eni bon bilong hem brek.” (Psalm 34:20) Datfala scripture hem fulfill long Jesus. Nomata Jesus hem dae long barava nogud wei, no eni bon bilong hem “brek.” (John 19:36) Long wei olsem, Psalm 34:20 promisim hao nomata wanem kaen hard taem olketa anointed Christian and olketa “nara sheep” feisim, datwan bae no spoelem olketa for olowe. Long tokpiksa wei, bon bilong olketa bae nating brek.—John 10:16.
17. Wanem nogud samting nao klosap for kasem olketa wea heitim pipol bilong Jehovah?
17 Bat olketa wea wicked bae kasem difren samting. Klosap nao olketa bae kasem panis for nogud samting wea olketa duim. “Trabol bae killim dae man wea wicked; and olketa wea heitim olketa wea raeteous bae guilty and mas ansa for datwan.” (Psalm 34:21) Evriwan wea gohed for againstim pipol bilong God bae kasem barava nogud samting. Long taem wea Jesus showaot from heven, olketa wea wicked “bae kasem panis for dae for olowe.”—2 Thessalonians 1:9.
18. Long wanem wei nao God sevem finis datfala “big crowd,” and wanem nao olketa bae kasem long future?
18 Lastfala samting David talem insaed psalm bilong hem, hem encouragem iumi olsem: “Jehovah hem sevem soul bilong olketa servant bilong hem; no eniwan wea trust long hem for protection bae guilty.” (Psalm 34:22) Klosap long end bilong 40 year wea King David hem rul, hem sei olsem: ‘God sevem soul bilong mi from evri trabol.’ (1 Kings 1:29) Olsem David, klosap nao olketa wea fraet long Jehovah bae fit for ting go bak and feel hapi from wei wea Jehovah sevem olketa from eni wei for guilty wea kamaot from sin and from olketa hard taem wea olketa kasem. Plande long olketa anointed Christian kasem finis reward bilong olketa long heven. “Wanfala big crowd” from evri nation join witim olketa anointed brata bilong Jesus wea stap yet long earth for servem God, and from datwan olketa enjoyim wei for stap klin front long Jehovah. Diswan hem bikos olketa showimaot faith long wei wea blood bilong Jesus fit for sevem man. Long Thousand Year Rul bilong Christ, bae olketa kasem evri gud samting wea ransom sakrifaes provaedem and olketa bae kamap perfect.—Revelation 7:9, 14, 17; 21:3-5.
19. Olketa wea insaed datfala “big crowd” disaed strong for duim wanem samting?
19 Why nao datfala “big crowd” wea worshipim God bae kasem olketa gud samting hia? Hem bikos olketa disaed strong for gohed fraet long Jehovah and worshipim hem witim bigfala respect, love, and fasin for obey. Tru tumas, wei for fraet long Jehovah hem mekem iumi hapi distaem and hem helpem iumi for “hol strong long datfala really laef,” wea hem nao laef olowe long niu world bilong God.—1 Timothy 6:12, 18, 19; Revelation 15:3, 4.
Waswe, Iu Remember?
• Why nao iumi shud fraet long God, and wanem nao datwan hem minim?
• Wei for fraet long God shud affectim fasin bilong iumi long wanem wei?
• Wanem nao olketa gud samting iumi kasem taem iumi fraet long God?
• Olketa wanem promis nao helpem iumi for gohed and no givap?
[Piksa long page 27]
Olketa wea fraet long Jehovah iusim gudfala tingting and careful taem gavman tambuim waka bilong olketa
[Piksa long page 29]
Best samting wea iumi savve duim for olketa neiba bilong iumi hem for sharem datfala gud nius abaotem Kingdom witim olketa