Luksavve Long Jesus wea David and Solomon Piksarem
“Samwan wea important winim Solomon nao hem stap.”—MATT. 12:42.
1, 2. Why nao pipol sapraes taem Samuel anointim David for kamap king?
LONG tingting bilong Samuel, David hem wanfala young shepherd boy nomoa and hem no fit for king. Nara samting tu, David born long Bethlehem wanfala taon wea no important tumas. Bible storyim taon hia hem “smol nomoa long plande thousand taon long Judah.” (Mic. 5:2) Long tingting bilong pipol, David no important nomoa bikos hem wanfala young man wea kam from wanfala smol taon nomoa. Nomata olsem, profet Samuel klosap bae anointim hem for kamap king long Israel.
2 Long tingting bilong Samuel, Jehovah bae no chusim David for king. David hem lastborn long eitfala pikinini boy bilong Jesse. David no stap long haos taem Samuel kam for anointim wanfala boy bilong Jesse for kamap king. Bat samting wea important nao, Jehovah chusim David.—1 Sam. 16:1-10.
3. (a) Taem Jehovah lukluk long man, wanem nao important long hem? (b) Wanem nao happen bihaen Samuel anointim David?
3 Jehovah lukim heart bilong David wea datwan hem samting Samuel no savve lukim. God savve long olketa wei bilong David and hem hapi long datwan. Wei wea God lukim samting hem difren from wei wea man lukim samting. Samting wea important long God nao hem wei bilong man. (Readim 1 Samuel 16:7.) Taem Samuel luksavve Jehovah no chusim eniwan long sevenfala boy bilong Jesse, hem talem olketa for kolem kam David wea lukaftarem sheepsheep. Bible sei: “So [Jesse] sendem toktok for [David] kam. . . . Then Jehovah sei: ‘Iu standap, go anointim hem, bikos hem nao mi chusim!’ So Samuel tekem horn bilong oil and anointim hem front long olketa brata bilong hem. And spirit bilong Jehovah start for waka long David start long datfala day.”—1 Sam. 16:12, 13.
David Piksarem Christ
4, 5. (a) Storyim samfala samting wea David and Jesus semsem long hem. (b) Long olketa wanem wei nao Jesus hem important winim David?
4 Wan thousand, wan handred year bihaen taem bilong David, Jesus tu born long Bethlehem olsem David. Staka pipol long Israel tingse Jesus tu no fit for kamap king. Maet olketa hope for garem difren king. Bat olsem David, Jehovah nao chusim Jesus. Jehovah lovem Jesus olsem hem lovem David tu.a (Luke 3:22) Taem God anointim Jesus, ‘spirit bilong Jehovah start for waka long hem tu.’
5 David and Jesus semsem long samfala nara samting tu. Ahithophel hem man for givim advaes long David bat bihaen hem againstim David. Judas Iscariot hem aposol bilong Jesus bat hem go againstim Jesus tu. (Ps. 41:9; John 13:18) David and Jesus barava tinghae long ples for worshipim Jehovah. (Ps. 27:4; 69:9; John 2:17) Jesus kam from laen bilong David tu. Taem Jesus no born yet, wanfala angel talem mami bilong Jesus olsem: “Jehovah God bae mekem hem king olsem dadi bilong hem, David.” (Luke 1:32; Matt. 1:1) Nomata olsem, Jesus hem important winim David bikos Jesus mekem evri profesi abaotem Messiah kamap tru. Jesus wea David piksarem nao hem Messiah King wea pipol weitim for longfala taem.—John 7:42.
Followim King wea Hem Shepherd
6. Long olketa wanem wei nao David hem wanfala gud shepherd?
6 Jesus tu hem wanfala shepherd. Wanem nao wanfala gud shepherd savve duim? Hem evritaem lukaftarem, feedim and no fraet for protectim sheepsheep bilong hem. (Ps. 23:2-4) Taem David hem young boy hem wanfala shepherd wea lukaftarem gud sheepsheep bilong dadi bilong hem. Hem no fraet nomata hem savve laef bilong hem stap long danger taem hem protectim sheepsheep from lion and bear.—1 Sam. 17:34, 35.
7. (a) Wanem nao redyim David for duim waka bilong king? (b) Wanem nao Jesus duim wea showimaot hem Gudfala Shepherd?
7 From David lukaftarem sheepsheep for samfala year finis, datwan redyim hem for duim bigfala waka for lukaftarem olketa Israelite.b (Ps. 78:70, 71) Samting wea Jesus duim showimaot hem gudfala shepherd tu. Jehovah strongim hem and leadim hem taem hem lukaftarem “smol sekson bilong olketa sheepsheep” and “olketa nara sheepsheep.” (Luke 12:32; John 10:16) So Jesus hem Gudfala Shepherd. Hem savve gud long sheepsheep bilong hem and hem savve tu long nem bilong evriwan. From hem lovem tumas sheepsheep bilong hem, Jesus hapi for duim staka samting for helpem olketa. (John 10:3, 11, 14, 15) Jesus nao hem Gudfala Shepherd, hem duim olketa samting wea David no fit for duim. Taem hem dae for olketa man, datwan mekem olketa fit for kasem laef olowe. No eni samting bae stopem Jesus taem hem lukaftarem “smol sekson bilong olketa sheepsheep” for laef long heven wea no savve dae moa and for “olketa nara sheepsheep” for laef olowe long niu world, wea no eni samting bae spoelem olketa moa.—Readim John 10:27-29.
Followim King wea Gohed for Win
8. Wanem nao mekem King David gohed for win?
8 Taem David hem king, hem faet strong for protectim land bilong pipol bilong God and “Jehovah gohed sevem David long evri ples wea hem go long hem.” Taem David hem king, hem markem olketa spialaen bilong Israel start long Egypt go kasem Euphrates River. (2 Sam. 8:1-14) David kamap strongfala king bikos Jehovah helpem hem. Bible hem sei: “Nius abaotem olketa bigfala samting wea David duim hem go kasem evri ples, and Jehovah mekem pipol long evri kantri for fraet long hem.”—1 Chron. 14:17.
9. Hao nao Jesus wea Jehovah chusim for kamap King hem win?
9 Jesus tu no man for fraet olsem King David. From Jehovah chusim hem for kamap King, Jesus mekem olketa demon kamaot from pipol, datwan showimaot hem garem bigfala paoa winim olketa demon. (Mark 5:2, 6-13; Luke 4:36) Satan wea main enemy bilong iumi tu bat hem no garem paoa winim Jesus. From Jehovah helpem Jesus, hem winim world wea Satan rulim.—John 14:30; 16:33; 1 John 5:19.
10, 11. Wanem nao Jesus duim from hem King for faet?
10 Long samting olsem 60 year bihaen Jesus dae and hem laef bak and go long heven, aposol John lukim vision abaotem Jesus long heven olsem King wea faet. Aposol John hem sei: “Lukim! wanfala white horse and man wea sidaon long hem garem wanfala bow and hem kasem wanfala crown, and hem go aot for win and for finisim faet bilong hem.” (Rev. 6:2) Jesus nao raedem white horse. Long 1914 hem “kasem wanfala crown” taem hem kamap King long Kingdom long heven. Bihaen datwan, hem “go aot for win.” Tru tumas, Jesus tu hem king wea win olsem David. No longtaem bihaen Jesus kamap King long Kingdom bilong God, hem winim Satan and torowem Satan and olketa demon bilong hem kam daon long earth. (Rev. 12:7-9) Hem bae gohed for win go kasem taem hem “finisim faet bilong hem.” Hem bae finisim rabis world bilong Satan.—Readim Revelation 19:11, 19-21.
11 Jesus tu hem kaenfala king olsem David. Hem bae protectim “big crowd” mekem olketa no dae long Armageddon. (Rev. 7:9, 14) Nara samting tu, taem Jesus witim 144,000 olketa rul, “olketa man wea gud and olketa man wea nogud bae laef bak moa.” (Acts 24:15) Pipol wea laef bak moa long earth savve laef olowe. Datwan hem nambawan samting! Iumi evriwan mas disaed strong for gohed “duim gud samting” mekem iumi stap taem gudfala pipol nomoa stap long earth wea Jesus rulim.—Ps. 37:27-29.
Jehovah Ansarem Solomon wea Prea for Bigfala Savve
12. Wanem nao Solomon askem long Jehovah?
12 Solomon wea hem pikinini bilong David, piksarem Jesus tu.c Taem Solomon hem king, long wanfala dream Jehovah talem hao hem bae givim eni samting wea Solomon askem. Solomon no askem Jehovah for givim hem staka material samting, bigfala paoa, and for laef longtaem. Hem no tingim hemseleva nomoa bat hem askem Jehovah olsem: “Givim mi wisdom and savve mekem mi leadim pipol hia, from hu nao fit for judgem staka pipol hia bilong iu?” (2 Chron. 1:7-10) Jehovah givim samting wea Solomon askem.—Readim 2 Chronicles 1:11, 12.
13. Long wanem wei nao Solomon garem bigfala savve winim eni nara man? Hu nao givim bigfala savve long Solomon?
13 Taem Solomon faithful long Jehovah, hem garem bigfala savve winim eni man long datfala taem. Solomon savve talem “thri thousand toktok wea wise.” (1 Ki. 4:30, 32, 34) Iumi savve readim staka toktok hia long Bible buk bilong Proverbs. Staka pipol tinghae long olketa toktok hia kam kasem distaem. Queen bilong Sheba gogo for samting olsem 2,400 kilometer for go lukim Solomon. Hem “askem olketa hard kwestin” for testim bigfala savve bilong Solomon. Samting wea Solomon talem and hao pipol bilong hem barava stap gud mekem Queen hia sapraes tumas. (1 Ki. 10:1-9) Bible storyim hu nao givim bigfala savve long Solomon taem hem sei: “Evri pipol bilong earth go lukim Solomon for herem bigfala savve bilong hem wea God putim long heart bilong hem.”—1 Ki. 10:24.
Followim King wea Garem Bigfala Savve
14. Long olketa wanem wei nao Jesus “important winim Solomon”?
14 Wanfala man nomoa garem bigfala savve winim Solomon. Hem nao Jesus Christ wea sei olsem abaotem hemseleva: “Samwan wea important winim Solomon nao hem stap.” (Matt. 12:42) Jesus nomoa savve talem ‘toktok wea savve mekem man laef olowe.’ (John 6:68) Tingim diswan. Sermon Long Maunten storyim samfala samting moa abaotem olketa proverb bilong Solomon. Solomon storyim samfala samting wea savve mekem man wea worshipim Jehovah for hapi. (Prov. 3:13; 8:32, 33; 14:21; 16:20) Jesus strongim hao man savve hapi sapos hem duim olketa samting wea join witim worship bilong Jehovah and taem hem lukim olketa promis bilong God kamap tru. Jesus hem sei: “Olketa wea luksavve olketa needim God bae hapi, bikos kingdom bilong God hem bilong olketa.” (Matt. 5:3) Taem pipol followim wanem Jesus teachim, diswan mekem olketa fren gud witim “man wea givim laef,” Jehovah. (Ps. 36:9; Prov. 22:11; Matt. 5:8) Christ nao showimaot “bigfala savve bilong God.” (1 Cor. 1:24, 30) From Jesus Christ nao Messiah King, hem garem “datfala spirit bilong bigfala savve.”—Isa. 11:2.
15. Hao nao iumi savve kasem gud samting from bigfala savve bilong God?
15 From Solomon piksarem Jesus, wanem nao olketa wea followim Jesus mas duim mekem olketa kasem bigfala savve wea kam from God? Long Bible nao iumi savve lane abaotem bigfala savve bilong Jehovah. Dastawe sapos iumi laek for kasem disfala savve, iumi mas waka hard for studyim gud Bible. Iumi mas studyim olketa toktok bilong Jesus and ting raonem wanem iumi readim. (Prov. 2:1-5) Nara samting tu, iumi mas gohed askem God for givim kam bigfala savve long iumi. Bible talem hao sapos iumi askem God for helpem iumi, hem bae duim datwan. (Jas. 1:5) Holy spirit bae helpem iumi for lanem olketa spesol savve long Bible wea savve helpem iumi taem iumi kasem hard taem and for disaedem samting long gudfala wei. (Luke 11:13) Bible sei Solomon hem “man for hipimap pipol” and hem “gohed for teachim savve long pipol.” (Eccl. 12:9, 10) Jesus tu hipimap pipol bilong hem. Hem nao Hed long Christian kongregeson. (John 10:16; Col. 1:18) Dastawe hem gud for iumi go evritaem long olketa meeting mekem God savve ‘gohed teachim iumi.’
16. Wanem samting nao Solomon and Jesus semsem long hem?
16 King Solomon duim staka samting. Hem startim and lukaftarem waka for buildim olketa bigfala haos bilong king, road, wata supply, olketa big taon for keepim olketa samting, for keepim olketa chariot for faet and olketa man for raedem horse. (1 Ki. 9:17-19) Evri pipol bilong hem kasem gud samting from olketa samting hia wea hem duim. Jesus tu hem man for build. Hem buildim kongregeson bilong hem long disfala “big ston,” wea minim long hemseleva. (Matt. 16:18) Jesus tu bae lukaftarem waka for build long niu world.—Isa. 65:21, 22.
Followim King Bilong Peace
17. (a) Wanem gudfala samting nao kamap taem Solomon rul? (b) Wanem nao Solomon no savve duim?
17 Disfala nem Solomon hem kam from Hebrew languis word wea minim “peace.” Long Jerusalem nao King Solomon rul. Jerusalem hem minim “Garem Tufala Kaen Peace.” Taem hem rul for 40 year, evriwan barava stap gud winim eni narataem. Bible tok olsem abaotem datfala taem: “Long full taem wea Solomon hem rul, Judah and Israel gohed for garem sef living, evriwan stap andanit long grape tree bilong hemseleva and andanit long fig tree bilong hemseleva, from Dan go kasem Beer-sheba.” (1 Ki. 4:25) Nomata Solomon garem bigfala savve, hem no savve stopem sik and dae from pipol bilong hem bikos olketa born sin. Bat Jesus, wea Solomon piksarem, bae mekem pipol bilong hem free from sin, sik and no dae moa.—Readim Romans 8:19-21.
18. Wanem nao olketa gudfala samting wea iumi kasem long kongregeson distaem?
18 Nomata distaem tu, iumi stap gud witim olketa brata and sista long kongregeson. Tru tumas, iumi stap gud long spiritual paradaes. Iumi stap gud witim God and olketa narawan. Isaiah story olsem abaotem olketa gudfala samting wea iumi kasem distaem. Hem sei: “Olketa bae hammerim naef for faet for kamap hou and spia bilong olketa for kamap naef for katem tree. Pipol long wanfala kantri bae no iusim naef for faetem pipol long narafala kantri, and olketa bae no lanem moa hao for faet.” (Isa. 2:3, 4) Taem iumi letem spirit bilong God leadim iumi, iumi duim samting wea savve mekem iumi stap gud insaed disfala nambawan spiritual paradaes.
19, 20. Why nao iumi savve hapi?
19 Iumi bae kasem staka gud samting moa long future. Long rul bilong Jesus, pipol wea obeyim God bae barava stap gud. Gogo olketa bae isisi “kamap free from wei for slave bilong sin” go kasem taem olketa bae perfect. (Rom. 8:21) Bihaen olketa winim lastfala test long end bilong wan thousand year rul bilong Jesus, “God bae givim earth long olketa wea hambol, and olketa bae hapi fogud bikos olketa stap gud.” (Ps. 37:11; Rev. 20:7-10) Tru tumas, rul bilong Christ Jesus bae winim nao taem wea Solomon hem rul, long olketa wei wea iumi no fit for tingim!
20 Taem Moses, David and Solomon leadim olketa Israelite, olketa Israelite garem staka samting for mekem olketa hapi. Long rul bilong Christ, iumi tu bae garem staka samting moa for hapi long hem. (1 Ki. 8:66) Iumi barava thankiu long Jehovah from hem givim kam spesol Son bilong hem, wea Moses, David and Solomon piksarem!
[Olketa Footnote]
a Maet nem David hem minim “Man wea Mi Lovem Tumas.” Tufala taem nao, Jehovah story kam from heven and hem sei long Jesus: “Diswan nao Son bilong mi wea mi lovem.”—Matt. 3:17; 17:5.
b David tu hem olsem pikinini sheepsheep wea trustim shepherd bilong hem. Hem trustim Jehovah, Nambawan Shepherd from hem savve Jehovah bae protectim and leadim hem. David hem sei: “Jehovah hem lukaftarem mi olsem mi sheepsheep bilong hem. Dastawe mi no short long eni samting.” (Ps. 23:1) John Baptaesa talem hao Jesus nao “Pikinini Sheepsheep bilong God.”—John 1:29.
c Nara nem bilong Solomon hem Jedidiah wea minim “Jah Lovem Hem.”—2 Sam. 12:24, 25.
Waswe, Iu Savve Minim Kam?
• Long olketa wanem wei nao Jesus important winim David?
• Long olketa wanem wei nao Jesus important winim Solomon?
• Why nao iu tinghae long Jesus, wea David and Solomon piksarem?
[Piksa long page 31]
Bigfala savve wea God givim long Solomon piksarem bigfala savve bilong Jesus
[Piksa long page 32]
Rul bilong Jesus bae winim nao taem wea Solomon and David rul, long olketa wei wea iumi no fit for tingim!