Iufala Young Wan, Strongim Wei wea Iu Laek Worshipim Jehovah
“Taem iu young yet, tingim Nambawan God wea wakem iu.”—ECCL. 12:1.
1. Wanem nao olketa pikinini long Israel savve duim?
SAMTING olsem 3,500 year go finis, profet bilong Jehovah, Moses, talem olsem long olketa priest and olketa bigman bilong Israel: “Hipimap olketa pipol, olketa man and woman and olketa smol pikinini . . . , mekem olketa savve lisin and lane. Olketa mas fraet long God bilong iu Jehovah and mas followim evri toktok bilong disfala law.” (Deut. 31:12) Tingim hu nao mas hipap for worshipim God. Hem olketa man, woman, and olketa smol pikinini. Tru tumas, olketa young wan tu mas lisin, lane, and followim wanem Jehovah talem.
2. Wanem nao Jehovah duim wea showimaot hem tingim olketa young wan long first century?
2 Jehovah gohed tingim olketa young wan tu long first century. Long samfala leta wea aposol Paul sendem long olketa kongregeson, Jehovah iusim holy spirit for mekem Paul raetem wanem nao hem laekem olketa young wan for duim. (Readim Ephesians 6:1; Colossians 3:20.) Olketa young wan wea followim kaonsel hia barava tinghae long Dadi bilong olketa long heven and olketa kasem gud samting from hem.
3. Wanem nao olketa young wan duim distaem wea showimaot olketa laek for worshipim God?
3 Waswe, olketa young wan distaem savve hipap witim iumi for worshipim Jehovah? Ia! Evriwan wea worshipim God barava hapi taem olketa lukim staka young wan evriwea long world followim disfala kaonsel bilong Paul: “Iumi mas tingim narawan mekem iumi evriwan savve showimaot love and duim olketa gudfala samting. Iumi mas no lusim wei for hipap tugeta, olsem wei bilong samfala, bat strongim narawan, and duim long wei wea moa big taem iufala lukim datfala day hem kam klosap.” (Heb. 10:24, 25) Staka pikinini tu preachim gud nius abaotem Kingdom bilong God witim dadi and mami bilong olketa. (Matt. 24:14) And evri year staka thousand young wan baptaes bikos olketa lovem Jehovah and from olketa kamap disaepol bilong Christ olketa kasem gud samting.—Matt. 16:24; Mark 10:29, 30.
Chus for Worshipim Jehovah Distaem
4. Wanem taem nao olketa young wan savve start for worshipim God?
4 Ecclesiastes 12:1 sei: “Taem iu young yet, tingim Nambawan God wea wakem iu.” Iufala young wan mas kasem wanem age nao bifor iufala savve worshipim Jehovah? Bible no markem wanem age nao iufala mas kasem. So no hol bak for worshipim Jehovah bikos iu tingse iu young tumas yet for lisin long hem and worshipim hem. Nomata wanem age nao iu kasem, mifala encouragem iu for chus for worshipim Jehovah distaem.
5. Wanem nao olketa dadi and mami savve duim for helpem pikinini bilong olketa kamap strong long truth?
5 Maet staka long iufala kamap strong long truth from dadi and mami nao helpem iufala. Or maet dadi or mami nomoa helpem iu for duim datwan. Sapos olsem, iu olsem Timothy wea Bible storyim. Taem hem baby yet, mami bilong hem Eunice and grani bilong hem Lois, lanem hem for savve long olketa holy raeting. (2 Tim. 3:14, 15) Maet dadi and mami bilong iu lanem iu tu. Maet olketa studyim Bible witim iu, prea witim iu, tekem iu go long olketa meeting and assembly, and tekem iu long preaching tu. Tru tumas, olketa dadi and mami mas lanem iu for followim olketa wei bilong God. Hem important waka wea Jehovah talem for olketa mas duim. Waswe, iu tinghae long love wea olketa showim long iu and hao olketa tingim iu?—Prov. 23:22.
6. (a) Long Psalm 110:3, wanem kaen wei for worship nao Jehovah hapi long hem? (b) Wanem nao bae iumi storyim?
6 Bat taem iufala young wan start for big, Jehovah laekem iufala for “luksavve long samting wea hem laekem [iufala] for duim, wea hem gudfala and stret and wea hem hapi long hem,” olsem wanem Timothy duim. (Rom. 12:2) Sapos olsem, iu bae duim olketa samting long kongregeson and duim preaching waka bikos iuseleva nao laek for duim wanem God laekem and no from dadi and mami nao laekem iu for duim datwan. Jehovah bae hapi long iu sapos iu worshipim hem bikos iu laek for duim datwan. (Ps. 110:3) So wanem nao iu savve duim for strongim wei wea iu laek worshipim Jehovah and followim wanem hem talem? Bae iumi storyim thrifala important samting wea iu savve duim. Hem nao for study, prea, and for garem olketa gudfala wei.
Savve Gud Long Jehovah Olsem Fren
7. Wanem example nao Jesus showimaot abaotem wei for studyim olketa Scripture, and hu nao helpem hem for duim datwan?
7 Firstfala samting wea iu savve duim for strongim wei wea iu laek worshipim Jehovah hem for readim Bible evriday. Taem iu readim Bible evriday, datwan bae helpem iu luksavve iu needim God and for savve wanem nao Bible talem. (Matt. 5:3) Jesus nao showimaot example for iumi. Taem Jesus hem 12 year, mami and dadi bilong hem lukaotem hem, gogo olketa faendem hem long temple. “Hem sidaon witim olketa bigman long there and hem lisin long wanem olketa talem and hem gohed for askem kwestin long olketa.” (Luke 2:44-46) Taem Jesus hem pikinini yet, hem laek tumas for readim olketa Scripture and hem minim gud olketa Scripture tu. Hu nao helpem hem? Masbi mami bilong hem Mary, and dadi bilong hem Joseph wea adoptim hem, tufala nao lanem hem. From tufala worshipim God, tufala lanem Jesus abaotem God taem hem baby yet.—Matt. 1:18-20; Luke 2:41, 51.
8. (a) Olketa dadi and mami shud helpem pikinini for tinghae long Bible start long wanem taem? (b) Storyim experience wea showimaot why hem important for lanem pikinini taem hem baby yet.
8 Olketa dadi and mami wea worshipim God distaem tu luksavve hem important for lanem pikinini bilong olketa for barava laek savve long tru samting long Bible taem olketa baby yet. (Deut. 6:6-9) Hem nao samting wea wanfala sista wea nem bilong hem Rubi hem duim. No longtaem bihaen hem bornem firstfala boy bilong hem Joseph, evriday hem readim olketa story long hem long buk, Bible Story Buk Bilong Mi. Taem hem start for big, Rubi helpem hem for baeheartim olketa scripture. Waswe, Joseph kasem gud samting from datwan? No longtaem bihaen hem start for toktok, hem savve storyim staka Bible story long toktok bilong hemseleva. And taem hem 5 year, hem givim firstfala tok long Theocratic Ministry Skul.
9. Why nao hem important for readim Bible and ting raonem wanem iu readim?
9 For helpem iufala young wan kamap strong long truth, hem gud for mekem hem wei bilong iufala for readim Bible taem iufala teenager go kasem taem iufala big. (Ps. 71:17) Why nao diswan bae helpem iu for kamap strong long truth? Tingim wanem Jesus talem taem hem prea long Dadi bilong hem. Hem sei: “For olketa kasem laef olowe, olketa mas lane abaotem iu, wea iu nomoa trufala God.” (John 17:3) Tru tumas, taem iu gohed lane abaotem Jehovah, bae iu savve gud long hem olsem fren bilong iu and bae iu lovem hem tumas. (Heb. 11:27) So taem iu readim Bible, tingim hao datwan savve helpem iu lanem samfala samting moa abaotem Jehovah. Tingim olketa kwestin hia: ‘Wanem nao mi lanem abaotem Jehovah from samting wea mi readim? Long wanem wei nao scripture wea mi readim showimaot God lovem mi and tingim mi?’ Sapos iu ting raonem olketa kwestin olsem, datwan bae helpem iu for savve long tingting bilong Jehovah and wanem hem laekem iu for duim. (Readim Proverbs 2:1-5.) Olsem Timothy, bae iu “bilivim” wanem iu lanem long Bible, and bae iu worshipim Jehovah bikos iu laek tumas for duim datwan.—2 Tim. 3:14.
Prea Savve Strongim Love Bilong Iu for Jehovah
10, 11. Long wanem wei nao prea savve strongim wei wea iu laek worshipim God?
10 Mek-tu samting wea iu savve duim for strongim wei wea iu laek worshipim Jehovah long full heart bilong iu, hem for prea long hem. Psalm 65:2 sei: “God, iu nao iu herem prea bilong mifala. Pipol long evri ples bae kam long iu.” Nomata olketa Israelite spesol pipol bilong God, pipol from olketa nara nation wea kam long temple bilong Jehovah savve prea long hem tu. (1 Ki. 8:41, 42) God no favorim eniwan. Olketa wea followim law bilong Jehovah savve hem bae herem prea bilong olketa. (Prov. 15:8) Sapos God herem prea bilong “pipol long evri ples,” hem savve herem prea bilong iufala young wan tu.
11 Iu savve finis sapos iu laek fren gud witim samwan, iu mas story evritaem witim hem. Iu savve feel hapi taem iu storyim tingting bilong iu and olketa samting wea iu wari abaotem long gud fren bilong iu. Long sem wei tu, taem iu talemaot evri tingting bilong iu long God, iu story witim hem nao. (Phil. 4:6, 7) Story gud long Jehovah olsem iu story gud long dadi and mami bilong iu or long gud fren bilong iu. Tru tumas, wanem iu talem taem iu prea long Jehovah showimaot hao iu ting long hem. Iu bae luksavve taem iu fren gud witim Jehovah, iu bae story gud long hem.
12. (a) Why nao wei for story gud long God no minim for just talem olketa toktok nomoa? (b) Wanem nao bae helpem iu luksavve Jehovah hem klosap long iu?
12 Bat tingim, taem iu prea, wei for story gud long God no minim for iu just talem olketa toktok nomoa. Iu need for talemaot barava tingting bilong iu. So talem Jehovah hao iu lovem hem, respectim hem, and trustim hem. Taem iu luksavve Jehovah ansarem olketa prea bilong iu, iu bae luksavve tu “Jehovah hem klosap long evriwan wea prea long hem.” (Ps. 145:18) Tru tumas, Jehovah bae fren gud witim iu and hem bae strongim iu for againstim Satan. Hem bae helpem iu for disaedem stretfala samting for duim.—Readim James 4:7, 8.
13. (a) Hao nao wei for fren witim God hem strongim wanfala sista? (b) From iu fren witim God, hao nao diswan helpem iu for winim olketa hevi wea iu kasem?
13 Tingim hao wei for fren gud witim Jehovah hem strongim Cherie. Taem Cherie long secondary skul, hem tekem olketa prize bikos hem garem hae mark long exam and hem savve tumas for plei sports. Taem hem finis skul, hem savve tekem scholarship sapos hem laek for go long university. Cherie sei: “Diswan hem wanfala test for mi bikos olketa coach and olketa student talem mi for mi mas tekem datwan.” Bat Cherie luksavve sapos hem go long university, bae hem mas iusim staka taem bilong hem for study and duim training long sports, and hem bae garem lelebet taem nomoa for worshipim Jehovah. Wanem nao Cherie duim? Hem sei: “Bihaen mi prea long Jehovah, mi disaed for no tekem datfala scholarship bat mi start for regular pioneer.” Kam kasem distaem hem pioneer for 5 year finis. Hem sei: “Mi nating sorre long wanem mi disaedem. Mi savve Jehovah hapi long wanem mi disaedem and datwan mekem mi hapi tu. Sapos Kingdom hem first samting long laef bilong iu, God bae givim iu evri samting wea iu needim.”—Matt. 6:33.
Gudfala Wei Bilong Iu Showimaot Iu Garem ‘Klinfala Tingting’
14. Why nao gudfala wei bilong iu hem important long Jehovah?
14 Mek-thri samting wea iu savve duim for strongim wei wea iu laek worshipim Jehovah hem for garem olketa gudfala wei. Jehovah blessim olketa young wan wea garem gudfala wei. (Readim Psalm 24:3-5.) Taem Samuel hem young, hem no laek duim olketa nogud samting wea olketa son bilong Hae Priest Eli duim. Jehovah lukim gudfala wei bilong Samuel. Bible sei: “Samuel hem gohed for kamap big and Jehovah and olketa man barava hapi long hem.”—1 Sam. 2:26.
15. Why nao iu gohed garem olketa gudfala wei?
15 Long world distaem, staka pipol lovem olketa seleva, praod tumas, no herem toktok bilong dadi and mami, no savve sei thankiu, no faithful, raf tumas, and laekem tumas hapitaem winim wei for lovem God. Hem nao samfala wei bilong pipol distaem wea Paul storyim. (2 Tim. 3:1-5) Dastawe hem no isi for garem olketa gudfala wei long disfala world wea nogud. Nomata olsem, evritaem iu duim stret samting and no followim olketa nogud wei bilong pipol, iu showimaot iu sapotim wei wea Jehovah fit for rul. (Job 2:3, 4) Iu savve hapi tu from iu followim wanem Jehovah laekem taem hem sei: “Son bilong mi, duim samting wea wise, and mekem heart bilong mi hapi, mekem mi savve givim ansa long datwan wea tok daonem mi.” (Prov. 27:11) Nara samting tu, from iu savve Jehovah hapi long iu, datwan bae strongim wei wea iu laek worshipim hem.
16. Wanem nao wanfala sista duim wea mekem Jehovah hapi?
16 Tingim wanfala Christian sista wea nem bilong hem Carol. Taem hem teenager, hem barava followim olketa toktok long Bible and olketa narawan lukim gudfala wei bilong hem. Wanem nao happen? Samfala pikinini long class tok spoelem hem bikos hem followim conscience bilong hem and hem no join insaed olketa holiday celebration and ceremony wea mekhae long kantri. Taem olketa celebration hia kamap, samfala taem hem garem chance for storyim biliv bilong hem long olketa narawan. Staka year bihaen, Carol kasem leta from wanfala woman wea tufala skul long sem class. Woman hia raet olsem long Carol: “For longfala taem nao mi laek tumas for raet kam long iu for thankiu long iu. Mi lukim gudfala wei bilong iu and example wea iu showimaot, and hao iu nating fraet for no join insaed olketa holiday. Iu nao firstfala Jehovah’s Witness wea mi savve long hem.” Disfala woman no savve forgetim gudfala example bilong Carol and gogo datwan mekem disfala woman start for studyim Bible. Insaed long leta wea hem raetem long Carol, hem talem hao hem wanfala Jehovah’s Witness for winim 40 year finis! From iufala young wan distaem no fraet for followim olketa toktok long Bible, maet wei bilong iufala tu savve mekem man wea hambol for laek savve long Jehovah, olsem hem happen long Carol.
Olketa Young Wan Praisem Jehovah
17, 18. (a) Hao nao tingting bilong iu long olketa young wan long kongregeson bilong iu? (b) Wanem gud samting nao olketa young wan bae kasem long future?
17 Iumi evriwan long organization bilong Jehovah barava hapi for lukim staka thousand young wan worshipim Jehovah! Olketa young wan hia strongim wei wea olketa laek worshipim Jehovah long wei for readim Bible evriday, prea, and for garem olketa gudfala wei wea God laekem. Olketa young wan hia wea showimaot gudfala example mekem dadi and mami bilong olketa hapi and evriwan wea worshipim Jehovah.—Prov. 23:24, 25.
18 Long future, olketa young wan wea faithful bae laef tu long niu world wea God promisim. (Rev. 7:9, 14) Long niu world, olketa bae kasem olketa nambawan blessing from olketa tinghae long Jehovah, and bae olketa savve praisem hem for olowe.—Ps. 148:12, 13.
Waswe, Iu Savve Minim Kam?
• Wanem nao olketa young wan savve duim for worshipim Jehovah distaem?
• Why nao hem important for ting raonem wanem iu readim long Bible?
• Long wanem wei nao prea savve helpem iu for fren gud witim Jehovah?
• Wanem nao savve kamaot from gudfala wei bilong olketa Christian?
[Piksa long page 5]
Waswe, hem wei bilong iu for readim Bible evriday?