Hu Nao Bae Sevem Olketa wea Singaot for Help?
“Plis God, givim savve long king for judgem pipol long stretfala wei olsem iu . . . From king bae sevem man wea poor wea singaot for help.”—PS. 72:1, 12.
1. Wanem nao iumi lanem from God sorre and kaen tumas long David?
LUK olsem King David bilong Israel raetem Psalm 72 wea savve encouragem iumi tumas! Samfala year bifor hem raetem datwan, hem sorre tumas from hem duim adultery witim Bath-sheba. Long datfala taem, David barava askem God: “From iu sorre and kaen tumas, plis aotem olketa sin bilong mi. . . . Evritaem mi tingim sin wea mi duim. . . . Mi born sin and mami bilong mi kasem bigfala pain taem hem bornem mi.” (Ps. 51:1-5) Jehovah hem sorre and kaen tumas long iumi from iumi born sin.
2. Psalm 72 helpem iumi long wanem wei?
2 Jehovah minim nogud samting wea kasem iumi. Bat King wea God anointim “bae sevem man wea poor wea singaot for help, and man wea safa and eniwan wea no garem samwan for helpem olketa. Hem bae feel sorre long olketa man nating and man wea poor, and hem bae sevem olketa.” (Ps. 72:12, 13) Wanem nao bae hem duim? David raetem Psalm 72 abaotem son bilong hem Solomon wea kamap king bihaen. Disfala psalm showimaot gud samting wea Jesus Christ, Son bilong God, bae duim long future for helpem olketa man.
Rul Bilong King Solomon Piksarem Rul Bilong Christ
3. Wanem nao Solomon askem long God? Wanem nao God givim long hem?
3 Taem David olo, hem talem priest Zadok and profet Nathan for mekem Solomon kamap king. David talem Solomon wanem hem mas duim and Solomon duim datwan. (1 Ki. 1:32-35; 2:1-3) Gogo Solomon lukim Jehovah long dream and Jehovah sei: “Askem mi wanem iu laekem, then bae mi givim long iu.” Solomon askem wanfala samting nomoa. Hem sei: “Iu mas givim long wakaman bilong iu heart wea obey mekem mi judgem pipol bilong iu, and for luksavve long samting wea gud and samting wea nogud.” From Solomon hambol taem hem askem datwan, God givim wanem hem askem and staka samting moa.—1 Ki. 3:5, 9-13.
4. Wanem nao Queen bilong Sheba talem abaotem rul bilong Solomon?
4 From Jehovah blessim Solomon taem hem king, olketa wea stap anda long hem kasem peace and gudfala living winim eni nara gavman. (1 Ki. 4:25) Queen bilong Sheba kam for lukim Solomon taem hem king. Hem talem Solomon: “Samting wea mi herem long hom bilong mi hem tru . . . Olketa no talem mi full story. Wisdom and gudfala living bilong iu barava winim wanem mi herem.” (1 Ki. 10:1, 6, 7) Nomata olsem, Jesus garem wisdom wea winim Solomon. Jesus sei: “Samwan wea important winim Solomon nao hem stap.”—Matt. 12:42.
Help From King wea Winim Solomon
5. Wanem nao Psalm 72 showimaot? Taem Jesus stap long earth, olketa samting wea hem duim showimaot wanem?
5 Bae iumi lukluk long Psalm 72 and lane abaotem olketa blessing wea iumi bae kasem taem Jesus Christ, wea hem King wea winim Solomon, hem rul. (Readim Psalm 72:1-4.) Disfala psalm showimaot tingting bilong Jehovah abaotem Son bilong hem Jesus Christ wea “rul olsem . . Prince bilong Peace.” (Isa. 9:6, 7) King wea winim Solomon bae duim wanem God laekem and bae ‘helpem olketa wea safa and sevem olketa son bilong man wea poor.’ Gavman bilong hem raeteous and bae mekem peace kamap. Taem Jesus stap long earth, olketa samting wea hem duim showimaot wanem hem bae duim taem hem rul for 1,000 year.—Rev. 20:4.
6. Wanem nao olketa samting wea Jesus duim wea bae happen taem Kingdom rulim iumi?
6 Tingim samfala samting wea Jesus Christ duim long earth wea hem bae duim long future wea Psalm 72 storyim. Iumi tinghae long wei wea hem sorre tumas long pipol wea safa. (Matt. 9:35, 36; 15:29-31) Wantaem, man wea garem leprosy kam long Jesus and askem hem: “Sapos iu willing, iu savve mekem mi gud bak moa.” Jesus sei: “Mi barava laek for duim datwan. Iu gud bak nao.” Then nomoa hem gud nao! (Mark 1:40-42) Jesus meetim tu wanfala widow woman wea garem wanfala pikinini nomoa wea hem dae. Jesus “barava sorre” and hem sei, “Getap nao!” and boy hia laef nao and getap!—Luke 7:11-15.
7, 8. Wanem kaen mirakol nao Jesus duim?
7 Jesus kasem paoa from Jehovah for duim olketa mirakol. Diswan showaot taem Jesus meetim woman wea “garem sik wea blood hem ran olowe for twelvfala year finis.” Nomata “hem go lukim staka doctor and spendem evri selen bilong hem,” sik bilong hem worse go moa. Woman hia kam midolwan olketa pipol and tasim Jesus. Datwan againstim Law wea sei ‘woman wea blood bilong hem ran’ no savve tasim eniwan. (Lev. 15:19, 25) Jesus luksavve paoa go aot from hem so hem askem hu nao tasim hem. Woman hia “fraet and seksek fogud. . . . Hem baodaon long hem and talem evri samting long hem.” Taem Jesus luksavve Jehovah finisim sik bilong woman hia, hem tok kaen long hem and sei: “Dota bilong mi, faith bilong iu mekem iu gud bak. Iu go and no wari moa, bikos sik hia hem finis nao.”—Mark 5:25-27, 30, 33, 34.
8 From Jesus kasem paoa from God for finisim sik, pipol wea lukim datwan barava sapraes. Bifor hem givim Sermon long Maunten, staka pipol barava tinghae long wanem Jesus duim taem hem healim olketa. (Luke 6:17-19) Taem John Baptaesa sendem tufala disaepol long Jesus for askem hem sapos hem nao Messiah, tufala lukim hem “healim staka pipol wea garem difren kaen sik, raosem olketa demon, and hem mekem staka pipol wea blind for lukluk moa.” Then Jesus sei: “Iufala go bak and storyim long John olketa samting wea iufala lukim and herem. Olketa wea blind savve lukluk nao, olketa wea kripol savve wakabaot, olketa wea garem leprosy olketa gud bak, and olketa wea earpas savve herehere moa. Olketa wea dae finis olketa laef bak, and olketa wea poor herem datfala gud nius.” (Luke 7:19-22) Samting wea hem talem mas barava encouragem John!
9. Olketa mirakol wea Jesus duim showimaot wanem?
9 Gud samting wea pipol kasem from mirakol wea Jesus duim hem for lelebet taem nomoa. Pipol wea hem healim or mekem olketa laef bak, gogo olketa dae. Bat olketa mirakol wea Jesus duim long earth showimaot olketa blessing wea bae kamap for olowe taem hem rul olsem Messiah.
Full Earth Bae Kamap Paradaes!
10, 11. (a) Waswe, olketa blessing long Paradaes bae finis enitaem? Gud samting wea Jesus duim bae olsem wanem? (b) Hu nao bae stap witim Christ long Paradaes, and wanem nao hem mas duim for laef olowe?
10 Laef long Paradaes bae hao? (Readim Psalm 72:5-9.) Olsem sun and moon stap olowe, olketa wea worshipim trufala God bae hapi and stap olowe long Paradaes! Gud samting wea King Jesus Christ duim bae “olsem rain wea foldaon long grass wea olketa just katem and olsem bigfala rain wea tuwetem graon.”
11 Taem iu tingim disfala psalm, waswe, iu laek stap olowe long paradaes long earth? Wanfala criminal wea hange saed long Jesus mas barava hapi taem Jesus talem hem: “Iu bae stap witim mi long Paradaes.” (Luke 23:43) Taem Jesus rul for 1,000 year, man hia bae laef bak. Sapos hem stap anda long rul bilong Christ, hem bae perfect, hapi, and stap olowe long earth.
12. Taem Christ rul for 1,000 year, pipol wea no raeteous wea laef bak bae garem wanem chance?
12 Taem Jesus Christ rul olsem King, “man wea raeteous bae kamap staka.” (Ps. 72:7) Christ bae kaen tumas and showimaot love long evriwan, olsem taem hem stap long earth. Long niu world, “pipol wea no raeteous” wea laef bak bae garem chance for obeyim Jehovah and gohed laef. (Acts 24:15) Bat olketa wea nating laek for obeyim God bae dae mekem olketa no spoelem peace wea evriwan garem long niu world.
13. Kingdom bae rul go kasem wea, and why nao peace bae gohed olowe?
13 Christ bae rulim full earth. Psalm hem sei: “Hem bae garem pipol wea obeyim hem start long wansaed long sea go kasem narasaed long sea and start long River [Euphrates] go kasem evri ples long earth. Pipol wea stap long wilderness bae baodaon long hem, and olketa enemy bilong hem bae go bak long graon.” (Ps. 72:8, 9) Tru tumas, Jesus Christ bae rulim full earth. (Zech. 9:9, 10) Olketa wea tinghae long rul bilong hem and gud samting wea olketa kasem, olketa bae “baodaon” for showimaot olketa willing for obeyim hem. Bat man wea gohed for sin bae finis “nomata hem kasem wan handred year.” (Isa. 65:20) Olketa “bae go bak long graon.”
Jesus Tingim Iumi
14, 15. Wanem nao mekem iumi savve Jesus tingim iumi and “bae sevem man wea poor wea singaot for help”?
14 From iumi born sin, iumi barava needim help. Bat iumi garem hope. (Readim Psalm 72:12-14.) Jesus wea winim Solomon hem tingim iumi, bikos hem savve iumi no perfect. Jesus safa from hem laek duim samting wea stret, and God letem hem for kasem hard taem. From Jesus wari fogud, “swet bilong hem wea foldaon long graon hem olsem blood”! (Luke 22:44) Taem hem hange long post, hem singaot: “God bilong mi, God bilong mi, why nao iu lusim mi?” (Matt. 27:45, 46) Nomata evri nogud samting kasem Jesus and Satan tu trae hard for mekem hem no obeyim Jehovah, Jesus faithful long Jehovah God.
15 Taem iumi safa, Jesus luksavve long datwan. Hem “bae sevem man wea poor wea singaot for help, and man wea safa and eniwan wea no garem samwan for helpem olketa.” From Jesus showimaot love olsem Dadi bilong hem, Jesus bae “herem olketa wea poor” and bae “healim olketa wea sorre tumas.” Hem bae “bandagem garekil bilong olketa.” (Ps. 69:33; 147:3) Jesus “luksavve long olketa wik point bilong iumi,” bikos “olketa samting wea testim iumi hem testim hem tu.” (Heb. 4:15) Hem gud tumas for savve Jesus Christ hem King distaem long heven and laekem tumas for finis wei for safa!
16. Why nao Solomon savve tingim pipol bilong hem?
16 From Solomon garem wisdom and wei for luksavve, hem “feel sorre long olketa man nating.” Staka nogud samting happen long laef bilong hem tu. Brata bilong hem Amnon rapem sista bilong hem Tamar, and nara brata bilong hem Absalom talem olketa narawan for killim dae Amnon. (2 Sam. 13:1, 14, 28, 29) Absalom plan for aotem David for no king, bat plan bilong hem no waka and Joab killim hem dae. (2 Sam. 15:10, 14; 18:9, 14) Gogo Adonijah, brata bilong Solomon, laekem hemseleva nao for king. Sapos hem kamap king, hem mas killim dae Solomon firstaem. (1 Ki. 1:5) Prea wea Solomon talem taem olketa dedicatem temple bilong Jehovah showimaot hem tingim pipol wea safa. King prea olsem for pipol bilong hem: “Each wan savve long trabol and pain bilong hemseleva . . . Iu [Jehovah] mas forgivim olketa and givim long each wan samting wea fitim wanem olketa duim.”—2 Chron. 6:29, 30.
17, 18. Wanem pain nao samfala kasem, and wanem nao helpem olketa for gohed strong and no givap?
17 Olketa samting wea happen long laef bilong man mekem ‘each wan savve long pain bilong hemseleva.’ Mary,a wanfala Jehovah Witness wea winim 30 year, hem sei: “Mi shud hapi tumas, bat staka taem mi shame and feel nogud long wanem mi duim bifor. Mi sorre tumas and mi krae olowe bikos hem olsem samting hia happen yesterday nomoa. Hem mekem mi feel iusles and guilty.”
18 Staka wea worshipim God feel olsem tu, bat wanem nao savve helpem olketa for gohed strong and no givap? Mary sei: “Olketa trufala fren and olketa brata and sista mekem mi hapi. Mi tingim tu olketa promis bilong Jehovah wea bae kamap tru long future, and mi savve mi bae no krae moa bat bae singaot from mi hapi.” (Ps. 126:5) Iumi mas trustim Son wea God givim kam for rulim iumi. Bible sei: “Hem bae feel sorre long olketa man nating and man wea poor, and hem bae sevem olketa. Hem bae sevem olketa from hard taem and from pipol wea raf, and hem barava tingim laef bilong olketa.” (Ps. 72:13, 14) Datwan barava strongim iumi!
Staka Samting Bae Iumi Kasem Long Niu World
19, 20. (a) Olsem Psalm 72 showimaot, Kingdom bae stretem wanem problem? (b) Hu nao fit for kasem praise for evri nambawan samting hia? Wanem nao tingting bilong iu abaotem evri samting wea Kingdom bae duim?
19 Tingim olketa nambawan samting wea iumi bae kasem taem Jesus rulim iumi long niu world. Bible sei: “Staka kaikai bae stap long earth. Antap long olketa maunten hem bae fulap witim kaikai.” (Ps. 72:16) Staka taem kaikai no savve grow antap long maunten, so datfala toktok showimaot long future, bae staka kaikai stap long earth. “Staka kaikai nao grow long Lebanon” taem Solomon hem king, so long future tu earth bae garem plande kaikai. Tingim diswan! Long paradaes, no eniwan bae short long kaikai and no eniwan bae hangre! Evriwan bae enjoyim “wanfala feast wea garem olketa nambawan kaikai.”—Isa. 25:6-8; 35:1, 2.
20 Hu nao iumi fit for praisem for evri nambawan samting hia? Hem fitim for iumi praisem Jehovah God, wea hem nao rulim universe and King wea stap for olowe. Iumi evriwan bae hapi for singim lastfala toktok bilong disfala nambawan psalm: “Pipol bae no forgetim nem bilong hem [King Jesus Christ]. Olsem sun hem stap for olowe, nem bilong hem bae gohed for stap. Hem bae blessim olketa man, and pipol long evri kantri bae talemaot hem hapi. Blessim Jehovah God, God bilong Israel, wea hem nomoa duim olketa nambawan waka. And blessim nambawan nem bilong hem for olowe, and glory bilong hem bae kasem evri ples long earth. Amen and Amen.”—Ps. 72:17-19.
[Footnote]
a Mifala changem nem.
Wanem Nao Ansa Bilong Iu?
• Psalm 72 piksarem wanem?
• Hu nao King wea winim Solomon, and hem bae rul go kasem wea?
• Wanem blessing nao Psalm 72 storyim wea iu barava laekem?
[Piksa long page 29]
Gudfala living wea pipol garem taem Solomon rul piksarem wanem?
[Piksa long page 32]
Hem barava fitim for iumi waka hard mekem iumi stap long Paradaes taem Jesus hem rul