Go Ahed Strong Long Harvest Waka!
“Olketa wea plantim seed witim krae bae harvest witim hapi singaot.”—PSALM 126:5.
1. Why nao iumi mas “askem Masta bilong harvest for sendem aot olketa wakman long harvest” distaem?
BIHAEN mek-thri preaching gogo bilong Christ long Galilee, hem sei olsem long olketa disaepol bilong hem: “Harvest hem big, bat olketa wakman no staka.” (Matthew 9:37) Datwan hem semsem long Judea. (Luke 10:2) From datwan hem tru klosap 2,000 year go finis, waswe long distaem? Long 2000 service year, winim 6,000,000 Witness bilong Jehovah go ahed long tokpiksa harvest waka midolwan 6,000,000,000 pipol long world, wea planti “garekil and stap olabaot olsem olketa sheep wea no garem eni shepherd.” So encouragement bilong Jesus for “askem Masta bilong harvest for sendem aot olketa wakman long harvest” hem fitim planti handred year go finis and distaem tu.—Matthew 9:36, 38.
2. Wanem nao mekem pipol luksavve long iumi?
2 Jehovah God, Masta bilong harvest, hem ansarem prea for sendem aot moa wakman. And iumi kasem bigfala hapi for share insaed disfala harvest waka wea God leadim! Nomata iumi tu-thri nomoa sapos iumi markem iumi witim olketa nation, strong bilong iumi for preachim Kingdom and mek-disaepol hem mekem world luksavve long iumi. Long planti kantri olketa story abaotem iumi long nius planti taem. Long TV, sapos samwan herem noknok long door, planti taem hem savve sei Olketa Jehovah’s Witness nao kam. Tru nao, planti pipol barava luksavve long Christian waka bilong iumi olsem olketa tokpiksa wakman bilong harvest.
3. (a) Hao nao iumi savve pipol luksavve long waka for preachim Kingdom long first century? (b) Why nao iumi savve sei olketa angel saportim ministry bilong iumi?
3 Long first century, world hem luksavve tu long waka for preachim Kingdom and persecutim olketa wea talemaot gud nius. Dastawe, aposol Paul raet olsem: “Mi ting God hem putim iumi olketa aposol for showaot last olsem olketa man wea olketa judgem for dae, bikos iumi [olketa aposol] kamap wanfala samting for world, olketa angel, and olketa man, for lukluk long hem.” (1 Corinthians 4:9) Long sem wei tu, wei wea iumi go ahed strong for talemaot Kingdom nomata iumi kasem persecution hem mekem world lukluk long iumi, and hem important samting long olketa angel. Revelation 14:6 hem sei: “Mi [aposol John] lukim narafala angel flae long midol heven, and hem garem gud nius for olowe for talemaot olsem hapi nius for olketa wea stap long earth, and long evri nation and tribe and languis and pipol.” Tru nao, olketa angel saportim iumi insaed ministry—harvest waka bilong iumi!—Hebrews 1:13, 14.
“Pipol Bae Heitim Iufala”
4, 5. (a) Wanem warning nao Jesus givim long olketa disaepol bilong hem? (b) Why nao ‘pipol heitim’ olketa servant bilong God distaem?
4 Taem Jesus sendem aot olketa aposol olsem wakman bilong harvest, olketa followim instruction bilong hem for “careful olsem snek bat no garem blame olsem kurukuru.” Jesus sei moa: “Lukaot long olketa man; from olketa bae tekem iufala go long kot, and olketa bae whipim iufala insaed long olketa synagogue. Tru nao, olketa bae tekem iufala front long olketa governor and king for saed bilong mi, for wanfala witness long olketa and long olketa nation. . . . And pipol bae heitim iufala from nem bilong mi; bat man wea stand strong go kasem end nao bae sev.”—Matthew 10:16-22.
5 ‘Pipol heitim’ iumi distaem bikos “full world hem stap long paoa bilong wicked wan,” Satan datfala Devil, wea hem main enemy bilong God and pipol bilong Hem. (1 John 5:19) Olketa enemy bilong iumi lukim gudfala spiritual living bilong iumi bat no laek for sei datwan kam from Jehovah. Olketa wea againstim iumi lukim hapi feis bilong iumi wea smile taem iumi share insaed long harvest waka. Olketa sapraes long wan mind bilong iumi! Nomata olketa les, olketa maet talem diswan taem olketa go long narafala kantri and faendem hao Olketa Jehovah’s Witness long there duim barava sem waka olsem olketa long kantri bilong olketa. Iumi savve hao gogo olketa enemy bilong iumi tu mas luksavve long Jehovah olsem datwan wea bihaenem and saportim wan mind bilong iumi.—Ezekiel 38:10-12, 23.
6. Wanem promis nao iumi kasem taem iumi go ahed long harvest waka, bat wanem kwestin nao kamap?
6 Masta bilong harvest givim Son bilong hem, Jesus Christ, “evri paoa . . . long heven and long earth.” (Matthew 28:18) So Jehovah iusim Jesus for leadim harvest waka thru long olketa angel long heven and anointed “faithful and wise slave” wea stap hia long earth. (Matthew 24:45-47; Revelation 14:6, 7) Bat hao nao iumi savve deal witim olketa enemy wea againstim iumi and long semtaem keepim hapi taem iumi go ahed strong long harvest waka?
7. Wanem tingting nao iumi shud trae hard for keepim taem pipol againstim or persecutim iumi?
7 Taem iumi feisim hard taem or persecution, iumi mas lukaotem help bilong God mekem iumi keepim sem tingting olsem Paul. Hem raet olsem: “Taem pipol tok nogud long iumi, iumi blessim olketa; taem pipol persecutim iumi, iumi stand strong; taem pipol tokspoelem iumi, iumi ask strong.” (1 Corinthians 4:12, 13) Kaen tingting olsem, witim gudfala wei for duim pablik ministry, hem samfala taem changem tingting bilong olketa wea againstim iumi.
8. Wanem encouragement nao iu kasem from toktok bilong Jesus long Matthew 10:28?
8 Nomata olketa toktok for killim iumi dae bae no daonem strong bilong iumi olsem olketa wakman bilong harvest. Iumi no fraet for talemaot long evri pipol message bilong Kingdom long wei wea fitim olketa. And iumi kasem encouragement from disfala toktok bilong Jesus: “No fraet long olketa wea savve killim dae body bat no savve killim dae soul; bat fraet long datwan wea savve finisim soul and body long Gehenna.” (Matthew 10:28) Iumi savve Father bilong iumi long heven hem Man wea Givim laef. Hem givim reward long olketa wea keepim faithful fasin long hem and go ahed strong long harvest waka.
Wanfala Message wea Sevem Laef
9. Wanem nao samfala duim taem olketa herem toktok bilong Ezekiel, and hao nao semkaen samting hem happen distaem?
9 Taem profet Ezekiel no fraet for talemaot olketa message bilong Jehovah long “olketa bighed nation”—olketa kingdom bilong Israel and Judah—samfala man wanwan hapi for herem samting wea hem talem. Jehovah hem sei. (Ezekial 2:3) “Lukim! long olketa iu olsem wanfala singsing wea here naes tumas, olsem wanfala wea garem naesfala voice and pleim string instrument long gudfala wei.” (Ezekiel 33:32) Nomata olketa laekem toktok bilong Ezekiel, olketa fail for duim samting. Wanem nao happen distaem? Taem anointed remnant and olketa fren bilong olketa no fraet for talemaot olketa message bilong Jehovah, samfala laek for herem olketa blessing bilong Kingdom, bat olketa no tinghae long diswan, kamap disaepol, and joinim harvest waka.
10, 11. Long first part bilong mek-20 century, wanem nao olketa duim for talemaot message bilong iumi wea sevem laef, and wanem nao kamaot from diswan?
10 Long narasaed, planti acceptim harvest waka and share for talemaot olketa message bilong God. Olsem example, long samfala Christian convention from 1922 go kasem 1928, olketa talemaot klia olketa judgment message long wicked system bilong Satan. Olketa radio station talemaot olketa strongfala toktok wea kamaot long olketa convention hia. Bihaen datwan, pipol bilong God givimaot planti million copy bilong olketa hia.
11 Long olketa lastfala year bilong 1930, narakaen wei for duim witness waka hem start—information march. Long firstaem, pipol bilong Jehovah werem olketa board wea talemaot olketa pablik tok. Bihaen, olketa karem olketa saen wea garem toktok “Religion hem wanfala trap and laea samting” and “Servem God and Christ Datfala King.” Taem olketa march thru long olketa street, pipol lukluk long olketa. ‘Diswan hem strongim olketa and mekem planti pipol savve long Olketa Jehovah’s Witness,’ hem nao samting wea wanfala brata hem talem, wea evritaem share insaed waka hia long olketa busy road bilong London, long England.
12. Witim olketa judgment message bilong God, wanem moa iumi talemaot long ministry, and hu nao wan mind for preachim gud nius?
12 Taem iumi talemaot olketa judgment message bilong God, iumi storyim tu olketa gudfala nius bilong Kingdom message. Wei wea iumi no fraet for witness hem helpem iumi for lukaotem olketa wea fit. (Matthew 10:11) Planti lastfala member bilong anointed class acceptim kliafala singaot bilong harvest long olketa year bilong 1920 and 1930. Then, long wanfala convention long 1935, nambawan nius kamaot abaotem wanfala naesfala future for “wanfala big crowd” bilong “nara sheep” long wanfala paradaes earth. (Revelation 7:9; John 10:16) Sekson hia acceptim olketa judgment message bilong God and kasem wan mind witim olketa anointed wan for preachim gud nius wea sevem laef.
13, 14. (a) Wanem comfort nao iumi savve kasem from Psalm 126:5, 6? (b) Sapos iumi go ahed for plant and watarem, wanem nao bae happen?
13 Samting wea givim bigfala comfort long olketa wakman bilong harvest bilong God, and main wan nao olketa wea kasem persecution, hem toktok bilong Psalm 126:5, 6: “Olketa wea plantim seed witim krae bae harvest witim hapi singaot. Datwan wea evritaem go aot, nomata hem krae, wea karem basket wea fulap long seed, bae sure for kam bak witim hapi singaot, and karem harvest bilong hem.” Toktok bilong man wea raetem psalm abaotem wei for plant and harvest hem showimaot kea and blessing bilong Jehovah long smol sekson wea go bak from wei for olsem prisoner long Babylon bifor. Olketa hapi tumas taem olketa kamap free, bat maet olketa krae taem olketa plantim seed long datfala nogud graon wea no eniwan waka long hem taem olketa stap 70 year olsem prisoner. Nomata olsem, olketa wea no givap for plant and build kasem frut and satisfae from hard waka bilong olketa.
14 Maet iumi krae taem iumi kasem test or taem olketa brata bilong iumi safa for saed bilong raeteous fasin. (1 Peter 3:14) Long harvest waka bilong iumi, firstaem maet iumi kasem hard taem bikos luk olsem iumi no kasem eni gud samting from hard waka bilong iumi insaed ministry. Bat sapos iumi go ahed for plant and watarem, God bae mekem olketa samting grow, planti taem winim samting wea iumi tingim. (1 Corinthians 3:6) Diswan hem showaot klia tumas long samting wea kamaot from wei wea iumi givimaot olketa Bible and Bible buk.
15. Talem wanfala example long gudfala samting wea olketa Christian pablikeson duim insaed long harvest waka.
15 Tingim example bilong wanfala man wea nem bilong hem Jim. Taem mami bilong hem dae, hem faendem midolwan olketa samting bilong mami bilong hem wanfala buk Life—How Did It Get Here? By Evolution or by Creation?a Hem interest tumas taem hem readim. Taem hem story witim wanfala Witness wea meetim hem long street, Jim agree for olketa kam bak long hem and diswan lead go long wanfala Bible study. Jim muv ahed kwiktaem long spiritual wei, dedicatem hemseleva long Jehovah, and baptaes. Hem talem olketa nara member long famili bilong hem abaotem samting wea hem lanem. From diswan, sista and brata bilong hem kamap Jehovah’s Witness and bihaen, Jim kasem privilege for serve olsem wanfala full-taem volunteer long Bethel long London.
Kasem Persecution Bat Hapi
16. (a) Why nao waka bilong harvest hem win? (b) Wanem warning nao Jesus givim saed long gud nius, bat wanem tingting nao iumi garem taem iumi story long pipol?
16 Why nao disfala harvest waka hem win long big wei? Bikos olketa anointed Christian and fren bilong olketa followim instruction bilong Jesus: “Samting wea mi talem iufala long darkness, talemaot long laet; and samting wea mi talemhaed long iufala, preachim from antap long ruf bilong haos.” (Matthew 10:27) Nomata olsem, iumi savve bae iumi kasem hard samting, bikos Jesus givim disfala warning: “Brata bae givim go brata for pipol killim dae, and dadi bae givim go pikinini bilong hem, and olketa pikinini bae againstim dadi and mami and killim olketa dae.” Then Jesus sei moa: “No tingse mi kam for putim peace long world; mi kam for putim, no peace, bat wanfala sword.” (Matthew 10:21, 34) Jesus no min for divaedem olketa famili. Bat samfala taem gud nius nao duim datwan. Sem samting hem fitim olketa servant bilong God distaem. Taem iumi visitim olketa famili, iumi no min for divaedem olketa. Iumi laekem evriwan for acceptim gud nius. Dastawe iumi trae for story long evri member bilong famili long wei wea showimaot feeling wea mekem olketa “wea garem fasin fitim laef olowe” bae interest long story bilong iumi.—Acts 13:48.
17. Hao nao olketa wea saportim olmaeti rul bilong God stap separate, and wanem nao wanfala example bilong diswan?
17 Message bilong Kingdom hem mekem olketa wea saportim olmaeti rul bilong God for stap separate. Olsem example, tingim wei wea olketa brata bilong iumi barava difren taem olketa ‘peim bak samting bilong Caesar long Caesar bat samting bilong God long God,’ taem National Socialism gavman hem rul long Germany. (Luke 20:25) Long wei wea difren from olketa leader bilong religion and olketa wea sei olketa Christian insaed olketa church bilong Christendom, olketa servant bilong Jehovah stand strong and no want for againstim olketa principle bilong Bible. (Isaiah 2:4; Matthew 4:10; John 17:16) Christine King, woman wea raetem history buk, The Nazi State and the New Religions, hem sei olsem: “Againstim olketa Witness nomoa [Nazi] gavman hem no win, from nomata olketa killim dae planti thousand, waka hem go ahed and long May 1945, religion bilong Olketa Jehovah’s Witness laef yet, bat National Socialism gavman nomoa nao.”
18. Wanem fasin nao pipol bilong Jehovah showimaot nomata olketa kasem persecution?
18 Spesol samting nao hem fasin wea pipol bilong Jehovah showimaot taem olketa feisim persecution. Olketa gavman bilong world maet sapraes long faith bilong iumi, bat samting wea mekem olketa sapraes go moa hem wei wea iumi no showimaot nogud feeling againstim pipol. Olsem example, olketa Witness wea laef bihaen Holocaust planti taem talemaot hapi and wei for satisfae taem olketa tingim samting wea kasem olketa. Olketa savve Jehovah givim olketa ‘paoa winim wanem olketa garem.’ (2 Corinthians 4:7) Olketa anointed wan midolwan long iumi garem promis hao ‘olketa raetem finis nem bilong olketa long heven.’ (Luke 10:20) Wei wea olketa stand strong mekem olketa garem hope wea no lead go long sorre, and olketa faithful wakman bilong harvest wea garem hope for stap long earth garem semkaen trust tu.—Romans 5:4, 5.
Go Ahed Long Harvest Waka
19. Wanem nao olketa gudfala wei wea olketa bin iusim insaed long Christian ministry?
19 Iumi bae weit and lukluk for hao long moa Jehovah bae letem iumi duim tokpiksa harvest waka. Go kasem datfala taem, iumi shud tingim hao olketa wakman bilong harvest mas duim waka bilong olketa long stretfala wei. Olsem tu, iumi sure wei wea iumi faithful for iusim olketa gudfala wei wea olketa bin iusim for preach, bae hem win. Paul talem olketa nara Christian: “Mi barava askem iufala, kamap pipol wea followim mi.” (1 Corinthians 4:16) Taem Paul meetim olketa elder long Ephesus long Miletus, hem talem olketa moa hao hem no hol bak for teachim olketa “long pablik ples and from haos tu haos.” (Acts 20:20, 21) Timothy, wea go witim Paul, hem lanem olketa wei wea datfala aposol hem iusim dastawe hem savve showim long olketa Christian long Corinth. (1 Corinthians 4:17) God blessim olketa wei bilong Paul for teach, and hem bae blessim iumi tu taem iumi go ahed for preachim gud nius long pablik from haos tu haos, long olketa return visit, hom Bible study, and eni ples wea pipol stap.—Acts 17:17.
20. Hao nao Jesus showimaot bigfala spiritual harvest hem redy finis, and hao nao diswan hem tru long olketa year wea just go pas?
20 Bihaen hem witness long wanfala Samaritan woman klosap long Sychar long 30 C.E., Jesus story abaotem datfala spiritual harvest. Hem sei long olketa disaepol: “Liftimap eye bilong iufala and lukluk long olketa field, olketa redy finis for harvest. Distaem man wea duim harvest waka hem kasem wages and hem hipimap frut for laef olowe, mekem man wea plantim and man wea harvestim savve hapi tugeta.” (John 4:34-36) Maet Jesus lukim finis samting wea kamaot from wei wea hem story long datfala Samaritan woman, bikos planti nao putim faith long hem from samting wea datfala woman hem talem. (John 4:39) Long olketa year wea just go pas, samfala kantri aotem tambu long Olketa Jehovah’s Witness or registerim olketa saed long law, and diswan openem niu area for harvest. Samting wea kamaot nao bigfala spiritual harvest hem go ahed. Tru nao, long full world, olketa rich blessing kamap taem iumi hapi for join insaed long spiritual harvest.
21. Why nao iumi garem reason for go ahed strong olsem olketa hapi wakman bilong harvest?
21 Taem garden hem ripe and redy for harvest, olketa wakman mas duim samting witim feeling for hariap. Olketa mas no delay for waka. Distaem, iumi need for waka hard and witim feeling for hariap bikos iumi stap insaed “taem bilong end.” (Daniel 12:4) Yes, iumi feisim olketa test, bat harvest bilong olketa wea worshipim Jehovah wea big winim bifor hem stap yet. So distaem hem day bilong hapi. (Isaiah 9:3) Olsem olketa hapi wakman, iumi want for go ahed strong long harvest waka!
[Footnote]
a Olketa Jehovah’s Witness nao pablisim and givimaot.
Hao Nao Bae Iu Ansa?
• Hao nao Masta bilong harvest hem ansarem prea for moa wakman?
• Nomata ‘pipol heitim’ iumi, wanem fasin nao iumi go ahed for keepim?
• Why nao iumi hapi nomata iumi kasem persecution?
• Why nao iumi shud go ahed strong long harvest waka witim feeling for hariap?
[Olketa Piksa long page 16, 17]
Olketa angel saportim olketa wea duim spiritual harvest waka
[Piksa long page 18]
Olketa information march mekem Kingdom message kasem staka pipol
[Piksa long page 18]
Iumi plantim and watarem, bat God nao mekem hem grow