Jehovah Hem Fulap Witim Loyal Love
“Jehovah hem . . . nambawan long loving-kaeness.”—PSALM 145:8.
1. Hao big nao love bilong God?
“GOD hem love.” (1 John 4:8) Disfala toktok wea muvim heart pruvim hao faondeson bilong rul bilong Jehovah hem love. Tru nao, nomata pipol wea no obeyim hem kasem gud samting from sun and rain wea hem provaedem long loving wei! (Matthew 5:44, 45) Bikos God lovem disfala world bilong olketa man, nomata olketa enemy bilong hem savve repent, tan go long hem, and fit for kasem laef. (John 3:16) Nomata olsem, klosap nao Jehovah bae distroem wicked pipol wea les for change, mekem olketa man wea lovem hem savve laef olowe long wanfala raeteous niu world.—Psalm 37:9-11, 29; 2 Peter 3:13.
2. Wanem spesol saed bilong love nao Jehovah showimaot for pipol wea dedicate long hem?
2 Jehovah showim love for olketa tru worshiper bilong hem long wei wea spesol, wea for olowe. Olketa transleitim Hebrew word for diskaen love olsem “loving-kaeness,” or “loyal love.” King David bilong Israel bifor barava tinghae long loving-kaeness bilong God. From samting hemseleva kasem and wei wea hem ting raonem wei wea God deal witim pipol, David fit for sing witim full trust: “Jehovah hem . . . nambawan long loving-kaeness [or, “loyal love”].”—Psalm 145:8.
Mark Bilong Olketa Loyal Wan Bilong God
3, 4. (a) Hao nao Psalm 145 helpem iumi for luksavve long olketa loyal wan bilong Jehovah? (b) Hao nao olketa loyal wan bilong God “blessim” hem?
3 Abaotem Jehovah God, Hannah, mami bilong profet Samuel, hem sei: “Hem gardim leg bilong olketa loyal wan bilong hem.” (1 Samuel 2:9) Hu nao “olketa loyal wan” hia? King David talem ansa. Bihaen hem mekhae long olketa nambawan fasin bilong Jehovah, hem sei: “Olketa loyal wan bilong iu bae blessim iu.” (Psalm 145:10) Maet iu ask, hao nao olketa man savve blessim God. Main wei olketa duim nao hem for praisem hem or for mekhae long hem.
4 Mark bilong olketa loyal wan bilong Jehovah hem wei wea olketa iusim mouth bilong olketa for mekhae long hem. Long olketa taem for hipap and long olketa Christian meeting, wanem nao main topic olketa storyim? Tru nao, hem Kingdom bilong Jehovah! Olketa loyal servant bilong God garem sem feeling olsem David, wea sing: “Olketa bae tok abaotem glory bilong rul bilong iu [Jehovah], and olketa bae story abaotem bigfala strong bilong iu.”—Psalm 145:11.
5. Hao nao iumi savve Jehovah hem lisin taem olketa loyal wan bilong hem mekhae long hem?
5 Waswe, Jehovah lisin taem olketa loyal wan bilong hem praisem hem? Yes, hem lisin gud long wanem olketa talem. Long wanfala profesi saed long tru worship long taem bilong iumi, Malachi hem raet: “Long datfala taem olketa wea fraet long Jehovah toktok each wan witim fren bilong hem, and Jehovah go ahed for lukluk and lisin. And olketa raetem front long hem wanfala buk for rememberim olketa wea fraet long Jehovah and olketa wea tingim nem bilong hem.” (Malachi 3:16) Hem mekem Jehovah hapi tumas taem olketa loyal wan bilong hem mekhae long hem, and hem rememberim olketa.
6. Wanem waka nao helpem iumi for luksavve long olketa loyal wan bilong God?
6 Nara mark bilong olketa loyal servant bilong Jehovah hem wei wea olketa no fraet and duim samting firstaem for story witim pipol wea no worshipim trufala God. Tru nao, olketa loyal wan bilong God “mekem olketa son bilong man savve long olketa maeti samting wea hem duim and glory bilong rul bilong hem wea luk gud tumas.” (Psalm 145:12) Waswe, iu luk aotem and mekius long evri chance wea kamap for story long olketa stranger abaotem rul bilong Jehovah? No olsem olketa gavman bilong man, wea klosap for distroe, rul bilong Jehovah hem for olowe. (1 Timothy 1:17) Hem important for pipol lane abaotem rul bilong Jehovah wea bae stap olowe and chus for sapotim datwan. David hem sing: “Rul bilong iu hem bae stap go kasem taem olketa no markem, and iu bae rul ovarem evri genereson for olowe.”—Psalm 145:13.
7, 8. Wanem nao happen long 1914, and wanem pruv nao showaot God hem rul distaem thru long Kingdom bilong Son bilong hem?
7 Start kam long 1914, samfala moa reason kamap for story abaotem rul bilong Jehovah. Long datfala year, God startim Messiah Kingdom Bilong Hem long heven wea Jesus Christ, datfala Son bilong David, hem nao King. From diswan, promis bilong Jehovah hao rul bilong David bae stap for olowe hem fulfill.—2 Samuel 7:12, 13; Luke 1:32, 33.
8 Pruv hao Jehovah distaem rul thru long Kingdom bilong Son bilong hem, Jesus Christ, hem showaot long wei wea olketa samting wea happen distaem go ahed for fulfillim olketa saen bilong taem wea Jesus stap moa. Barava main part bilong datfala saen hem datfala waka wea Jesus sei evri loyal wan bilong God bae duim taem hem sei: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.” (Matthew 24:3-14) From olketa loyal wan bilong God strong for fulfillim datfala profesi, winim six million man, woman, and pikinini distaem share long disfala nambawan waka wea bae nating kamap moa. Klosap nao evriwan wea againstim Kingdom bilong Jehovah bae distroe.—Revelation 11:15, 18.
Kasem Gud Samting From Sovereign Rul Bilong Jehovah
9, 10. Hao nao Jehovah hem difren from olketa man wea rul?
9 Sapos iumi olketa Christian wea dedicate long God, iumi bae kasem staka gud samting from wei wea iumi fren witim Sovereign Lord Jehovah. (Psalm 71:5; 116:12) Olsem example, from iumi fraet long God and followim raeteous wei, iumi mekem hem hapi and iumi klos long hem long spiritual wei. (Acts 10:34, 35; James 4:8) Long narasaed, olketa man wea rul staka taem kaban nomoa witim olketa wea garem hae position, olsem olketa bigman long army, rich bisnisman, or olketa wea garem bignem saed long sports and hapitaem. Olsem niuspepa bilong Africa, Sowetan, hem storyim, wanfala bigman long gavman hem talem diswan abaotem olketa poor area long kantri bilong hem: “Mi minim taem staka long mifala les for go long kaen area olsem. Hem from mifala no laek tingim hao kaen living olsem really stap. Hem spoelem conscience bilong mifala and mifala shame from mifala draev raon long olketa expensive car.”
10 Hem tru, samfala man wea rul barava laekem pipol olketa rul ovarem for garem gud living. Bat nomata olketa best ruler kanduit savve gud long evri pipol bilong olketa. Tru nao, maet iumi ask: Waswe, eni ruler stap wea kea long evri pipol bilong hem, wea savve kwiktaem helpem pipol wanwan taem olketa insaed trabol? Yes, wanfala hem stap. David hem raet: “Jehovah hem sapotim evriwan wea foldaon, and hem raisimap evriwan wea bendaon.”—Psalm 145:14.
11. Olketa wanem test nao kasem olketa loyal wan bilong God, and wanem help nao olketa kasem?
11 Staka test and trabol kasem olketa loyal wan bilong Jehovah God bikos olketa no perfect and bikos olketa stap long world wea stap long paoa bilong Satan, datfala “wicked wan.” (1 John 5:19; Psalm 34:19) Olketa Christian kasem persecution. Samfala safa from sik wea no savve finis or from samwan olketa lovem hem dae. Samtaem, olketa mistek bilong olketa loyal wan kosim olketa for wikdaon. Bat, nomata wanem hard taem kasem olketa, Jehovah hem redy evritaem for comfortim olketa and givim spiritual strong long each wan long olketa. Datfala King Jesus Christ garem sem loving interest for olketa loyal wan wea stap anda long hem.—Psalm 72:12-14.
Kaikai Long Barava Taem wea Mekem Man Satisfae
12, 13. Hao nao Jehovah provaed for need bilong “evriting wea laef”?
12 From nambawan loving-kaeness bilong hem, Jehovah provaedem evri need bilong olketa servant bilong hem. Insaed diswan hem gudfala kaikai wea mekem olketa satisfae. King David hem raet: “Eye bilong evriwan lukluk kam long iu [Jehovah], and iu nao givim olketa kaikai long barava taem. Iu openem hand bilong iu and givim long evriting wea laef samting wea olketa wantem.” (Psalm 145:15, 16) Nomata long olketa taem bilong trabol, Jehovah savve mekem enikaen samting happen for mekem olketa loyal wan bilong hem kasem “bred for disfala day.”—Luke 11:3; 12:29, 30.
13 David talem tu hao “evri samting wea laef” bae satisfae. Insaed diswan hem olketa animal. Sapos earth no garem olketa tree and sea no garem olketa plant, olketa animal long wata, skae, and land bae no garem eni kaikai or oxygen for brith. (Psalm 104:14) Bat, Jehovah hem mek sure evri creature kasem need bilong olketa.
14, 15. Hu nao provaedem spiritual kaikai distaem?
14 No olsem olketa animal, olketa man garem spiritual need. (Matthew 5:3) Jehovah barava satisfaem evri spiritual need bilong olketa loyal wan bilong hem! Bifor hem dae, Jesus promis hao “faithful and wise slave” bae provaedem spiritual “kaikai long barava taem” for olketa follower bilong hem. (Matthew 24:45) Olketa bilong 144,000 anointed wan wea stap yet long earth nao part bilong datfala slave class distaem. Thru long olketa, Jehovah provaedem staka spiritual kaikai.
15 Olsem example, big haf long pipol bilong Jehovah distaem kasem niu and stretfala Bible transleison long languis bilong olketa. Datfala New World Translation of the Holy Scriptures hem nambawan blessing tru! And tu, olketa go ahed for pablisim staka million Bible study pablikeson long winim 300 languis. Evri spiritual kaikai hia barava blessing for olketa tru worshiper raonem world. Hu nao fit for kasem praise for evriting hia? Jehovah God. Thru long bigfala loving-kaeness bilong hem, hem mekem slave class fit for provaedem “kaikai long barava taem.” Thru long olketa samting hia, insaed spiritual paradaes distaem, God givim “evriting wea laef samting wea olketa wantem.” And olketa servant bilong Jehovah hapi long hope bilong olketa for klosap nao lukim earth kamap wanfala really paradaes!—Luke 23:42, 43.
16, 17. (a) Olketa wanem example nao stap bilong spiritual kaikai wea kam long stretfala taem? (b) Hao nao Psalm 145 storyim feeling bilong olketa loyal wan bilong God abaotem main important kwestin wea Satan mekem kamap?
16 Tingim nambawan example bilong spiritual kaikai wea kam long stretfala taem. Insaed 1939, World War II start long Europe. Long datfala sem year, November 1 Watchtower garem article witim title “Wei for No Teksaed.” Kliafala information insaed mekem Olketa Jehovah’s Witness raonem world lukim need for barava no teksaed long olketa nation wea insaed war. Diswan kosim gavman bilong evri kantri wea insaed datfala war wea go ahed for sixfala year for kros long olketa. Nomata olketa kasem tambu and persecution, olketa loyal wan bilong God go ahed for preachim gud nius bilong Kingdom. From 1939 go kasem 1946, olketa kasem bigfala blessing bilong 157 percent increase. And tu, gudfala record bilong faithful fasin bilong olketa insaed taem bilong war go ahed for helpem pipol for luksavve long tru religion.—Isaiah 2:2-4.
17 Spiritual kaikai wea Jehovah provaedem hem no just kam long stretfala taem bat tu hem barava mekem man satisfae. Taem olketa nation barava insaed World War II, pipol bilong Jehovah kasem encouragement for tinghevi long samting wea moa important winim salvation bilong olketa. Jehovah helpem olketa for minim wei wea datfala main important kwestin, wea full universe insaed, hem join witim wei wea Jehovah fit for rul olsem sovereign. Hem mekem iumi satisfae for savve hao loyal fasin bilong each Witness bilong Jehovah garem smol share for apim sovereign rul bilong Jehovah and pruvim Devil hem wanfala laea! (Proverbs 27:11) No olsem Satan, wea tok laea againstim Jehovah and rul bilong hem, olketa loyal wan bilong Jehovah go ahed for talemaot: “Jehovah hem raeteous long evri wei bilong hem.”—Psalm 145:17.
18. Wanem nao wanfala example bilong spiritual kaikai wea kam long stretfala taem and wea barava mekem man satisfae?
18 Nara example bilong kaikai long stretfala taem hem datfala buk Draw Close to Jehovah, wea satisfaem man long spiritual wei. Hem release long staka handred “Pipol wea Strong for Talemaot Kingdom” Distrik Convention wea kamap evriwea long world long 2002/03. Disfala buk, wea “faithful and wise slave” raetem and wea Olketa Jehovah’s Witness pablisim, mekhae long olketa nambawan fasin bilong Jehovah God, wea insaed diswan hem olketa fasin wea Psalm 145 storyim. Disfala nambawan buk bae barava duim important waka for helpem olketa loyal wan bilong God for kam moa klos long hem.
Taem for Kam Moa Klos Long Jehovah
19. Wanem important samting nao hem klosap, and hao nao iumi savve deal witim?
19 Wanfala main part bilong wei for stretem kwestin bilong sovereign rul bilong Jehovah hem klosap. Olsem Ezekiel chapter 38 talem, Satan klosap nao bae duim last samting long waka bilong hem olsem “Gog bilong land bilong Magog.” Insaed diswan hem wei for attakim pipol bilong Jehovah evriwea long world. Diswan bae wanfala attak wea Satan bae givim evri lalas strong bilong hem for brekem faithful fasin bilong olketa loyal wan bilong God. Winim enitaem bifor, pipol wea worshipim Jehovah bae need for barava kolem hem, nomata krae for help tu. Waswe, bae wei wea olketa fraet long God witim respect and love kamap iusles? Barava nomoa, from Psalm 145 hem sei: “Jehovah hem stap klosap long olketa wea kolem hem, long evriwan wea kolem hem witim trufala fasin. Hem bae duim samting wea olketa wea fraet long hem wantem, and hem bae herem singaot bilong olketa for help and hem bae sevem olketa. Jehovah hem protectim evriwan wea lovem hem, bat evri nogud man hem bae finisim evribit.”—Psalm 145:18-20.
20. Hao nao bae toktok long Psalm 145:18-20 fulfill long future?
20 Hem bae gud tumas for klosap long Jehovah and lukim paoa bilong hem for sevem pipol taem hem distroem wicked pipol! Long datfala important taem wea klosap tumas nao, Jehovah bae lisin nomoa long olketa wea “kolem hem witim trufala fasin.” Hem bae nating lisin long pipol wea hypocrite. Word bilong God showaot klia hao bae hem iusles for wicked pipol iusim nem bilong hem long datfala taem.—Proverbs 1:28, 29; Micah 3:4; Luke 13:24, 25.
21. Hao nao olketa loyal wan bilong Jehovah showimaot olketa hapi for iusim nem bilong God?
21 Winim enitaem bifor, distaem nao hem taem for pipol wea fraet long Jehovah for “kolem hem witim trufala fasin.” Olketa loyal wan bilong hem hapi for iusim nem bilong Hem taem olketa story, insaed prea bilong olketa, and taem olketa koment long olketa meeting. And olketa no fraet for talemaot nem bilong Jehovah long pablik ministry bilong olketa.—Romans 10:10, 13-15.
22. Why nao hem important for go ahed for rejectim tingting and olketa samting wea world laekem?
22 For go ahed kasem gud samting from klos wei wea iumi fren witim Jehovah God, hem important tu for go ahed for rejectim olketa samting wea bae spoelem iumi long spiritual wei, olsem fasin for lovem material samting, nogud hapitaem, wei for no forgive, or no laek luksavve long poor pipol. (1 John 2:15-17; 3:15-17) Sapos iumi no stretem, kaen wei olsem savve lead go long serious sin and gogo long wei for lusim favor bilong Jehovah. (1 John 2:1, 2; 3:6) Hem wei bilong wisdom for no forgetim hao Jehovah bae go ahed for showimaot loving-kaeness, or loyal love, long iumi only sapos iumi stap faithful long hem.—2 Samuel 22:26.
23. Wanem nambawan future nao stap front long evri loyal wan bilong God?
23 So letem iumi go ahed for keepim mind long nambawan future wea Jehovah redyim for olketa loyal wan bilong hem. Taem iumi duim olsem, iumi bae garem nambawan hope for stap midolwan olketa wea bae mekhae long, blessim, and praisem Jehovah “long full day” and “for olowe.” (Psalm 145:1, 2) So letem iumi ‘keepim iumiseleva insaed love bilong God witim tingting for laef olowe.’ (Jude 20, 21) Taem iumi go ahed for kasem gud samting from olketa nambawan fasin bilong Dadi bilong iumi long heven, insaed diswan hem datfala bigfala loving-kaeness hem showim long evriwan wea lovem hem, letem iumi evritaem garem sem feeling olsem David long lastfala toktok wea hem talem long Psalm 145: “Mouth bilong mi bae praisem Jehovah; and evri man mas blessim holy nem bilong hem for longfala taem, yes for olowe.”
Hao Nao Bae Iu Ansa?
• Hao nao Psalm 145 helpem iumi for luksavve long olketa loyal wan bilong God?
• Hao nao Jehovah “givim long evriting wea laef samting wea olketa wantem”?
• Why nao iumi need for kam moa klos long Jehovah?
[Piksa long page 16]
Olketa loyal wan bilong God hapi for storyim olketa strongfala samting hem duim
[Piksa long page 17]
Olketa servant bilong Jehovah no fraet for helpem olketa stranger for lane abaotem glory bilong rul bilong hem
[Olketa Piksa long page 18]
Jehovah provaedem kaikai for “evriting wea laef”
[Credit Line]
Animals: Parque de la Naturaleza de Cabárceno
[Piksa long page 19]
Jehovah strongim and leadim evri loyal wan bilong hem wea prea long hem for help