Wanem Nao Tingting Bilong Jehovah Abaotem Olketa Excuse?
ADAM tok olsem: “Woman wea iu givim for stap witim mi nao givim frut bilong datfala tree long mi, dastawe mi kaikaim.” Then Eve sei: “Snek ia nao laea long mi dastawe mi kaikaim.” Hem nao wanem firstfala dadi and mami bilong iumi talem long God. Datwan nao startim wei for talem excuse.—Gen. 3:12, 13.
Taem Jehovah judgem Adam and Eve from tufala no obey, datwan showimaot hem no hapi long excuse wea tufala talem. (Gen. 3:16-19) So waswe, datwan minim Jehovah no acceptim eni excuse wea man talem? Or waswe, hem acceptim samfala excuse? Sapos olsem, hao nao bae iumi luksavve long excuse wea stret and wea no stret? Firstaem bae iumi storyim wanem nao excuse hem minim.
Excuse hem reason wea man talem for explainim wanem hem duim, why hem no duim wanfala samting, or why hem bae no duim datwan. Excuse hem difren from wanem man talem for explainim mistek wea hem duim or for tok sorre mekem narawan forgivim hem. Bat olsem Adam and Eve duim, man savve talem excuse for haedem tru reason why hem duim samting. From staka pipol savve talem datkaen excuse, nara pipol no savve trustim olketa.
Taem iumi talem excuse for eni samting wea iumi duim or saed long worship bilong iumi for God, iumi mas no ‘laea long iumiseleva.’ (Jas. 1:22) Bae iumi storyim samfala example long Bible and principle wea bae helpem iumi “gohed for mek sure [iumi] savve long samting wea Lord hapi long hem.”—Eph. 5:10.
Wanem God Laekem Iumi for Duim
Bible talem stret olketa law wea pipol bilong Jehovah mas obeyim. Tingim diswan. Waka wea Christ talem for “go and teachim pipol long evri kantri for kamap disaepol” hem samting wea evri tru Christian distaem tu mas duim. (Matt. 28:19, 20) Tru tumas, hem barava important for duim datfala waka, dastawe aposol Paul sei: “Bae mi kasem barava nogud samting sapos mi no talemaot gud nius!”—1 Cor. 9:16.
Nomata olsem, samfala wea studyim Bible for longtaem finis fraet for talemaot gud nius abaotem Kingdom bilong God. (Matt. 24:14) Olketa narawan wea savve preach bifor no duim nao datfala waka. Wanem nao samfala reason wea olketa savve talem for no duim preaching waka? Long bifor, wanem nao Jehovah duim long olketa wea no laek for obeyim wanem hem talem?
Olketa Excuse wea God No Acceptim
“Hem hard tumas.” Long tingting bilong olketa wea savve shame, maet hem hard tumas for olketa duim preaching waka. Bat tingim samting wea iumi savve lanem from example bilong Jonah. Hem kasem assignment wea hem tingse hem hard for hem duim. Jehovah talem Jonah for warnim pipol long Nineveh abaotem bigfala trabol wea bae kasem olketa. Iumi savve minim why Jonah fraet for duim datfala assignment bikos Nineveh hem kapitol taon long Assyria, and hem wei bilong pipol long there for raf tumas. Maet Jonah ting olsem: ‘Hao nao bae mi stap witim pipol long there? Wanem nao bae olketa duim long mi?’ No longtaem nomoa, hem ranawe. Bat Jehovah no acceptim excuse wea Jonah talem. Hem talem Jonah moa for go preach long pipol long Nineveh. Jonah no fraet for duim datfala assignment and Jehovah blessim wanem hem duim.—Jonah 1:1-3; 3:3, 4, 10.
Sapos iu tingse waka for preachim gud nius hem hard tumas, no forgetim “God savve duim eni samting” for helpem iu. (Mark 10:27) Jehovah bae strongim iu sapos iu gohed askem hem for helpem iu and hem bae blessim iu sapos iu no fraet for duim ministry.—Luke 11:9-13.
“Mi no laek for duim.” Sapos iu no laek for duim ministry, wanem nao iu savve duim? Hem gud for tingim, Jehovah savve helpem iu for laek duim ministry. Paul sei: “Samting wea mekem God hapi nao hem for givim paoa long iufala mekem iufala savve laek duim samting and for iufala duim datwan.” (Phil. 2:13) So iu savve askem Jehovah for helpem iu for duim wanem hem laekem. Hem nao wanem King David duim. Hem askem Jehovah: “Mekem mi followim trufala toktok bilong iu.” (Ps. 25:4, 5) Iu tu savve prea long Jehovah for helpem iu duim wanem hem laekem.
Taem iumi taed or feel nogud, maet iumi need for forcem iumiseleva for go long meeting long Kingdom Hall or for duim ministry. Sapos samfala taem iumi olsem, waswe, datwan minim iumi no lovem Jehovah nao? Nomoa. Olketa faithful wakaman bilong God bifor tu trae hard for duim wanem God laekem. Paul sei hem ‘whipim body bilong hem’ mekem hem obeyim God. (1 Cor. 9:26, 27) So nomata sapos iumi mas forcem iumiseleva for duim ministry, iumi savve Jehovah bae blessim iumi. Why nao olsem? Hem bikos iumi lovem Jehovah dastawe iumi duim wanem hem laekem. Taem iumi duim olsem, iumi showimaot Satan hem laea taem hem sei pipol bilong God bae no faithful long Hem sapos olketa kasem test.—Job 2:4.
“Mi busy tumas.” Sapos iu no duim ministry bikos iu tingse iu busy tumas, hem barava important for ting raonem wanem nao shud first samting long laef bilong iu. Jesus sei: “Evritaem kingdom . . . mas first samting long laef bilong iufala.” (Matt. 6:33) Sapos iu laek followim datfala principle, maet iu need for mekem laef bilong iu simpol or markem taem wea iu iusim for hapitaem for duim ministry. Hem no rong for man duim hapitaem and olketa samting wea hemseleva laekem, bat olketa samting hia hem no gudfala excuse for no duim ministry. Evritaem Kingdom nao mas first samting long laef bilong man wea worshipim God.
“Mi no fit for duim.” Maet iu tingse iu no fit for duim waka for talemaot gud nius. Samfala faithful wakaman bilong Jehovah bifor tingse olketa tu no fit for duim assignment wea Jehovah givim long olketa. Tingim Moses. Taem Jehovah askem hem for duim wanfala waka, Moses sei: “Plis Jehovah, mi no savve toktok gud ia, nomata yesterday or bifor kam or taem iu story witim wakaman bilong iu. Mi toktok slow tumas and mi no savve talem gud olketa toktok ia.” Nomata Jehovah sei bae hem helpem Moses, Moses sei: “Plis Jehovah, iu sendem go nara man, bat no mi.” (Ex. 4:10-13) Wanem nao Jehovah duim?
Jehovah no givim datfala assignment long nara man, bat hem markem Aaron for helpem Moses for duim datfala waka. (Ex. 4:14-17) And long olketa year bihaen tu, Jehovah helpem Moses and givim wanem Moses needim mekem hem fit for duim gud olketa assignment wea hem kasem. Long distaem tu, Jehovah bae iusim olketa strongfala Christian brata and sista for helpem iu for duim ministry. Bat important samting nao, Bible sei Jehovah bae helpem iumi for duim waka wea hem talem iumi for duim.—2 Cor. 3:5; lukim box “Taem wea Mi Barava Hapi Tumas.”
“Narawan mekem mi feel nogud.” Samfala stop for duim ministry or no go long olketa kongregeson meeting bikos narawan mekem olketa feel nogud, and tingse Jehovah bae acceptim nomoa excuse bilong olketa. Hem tru, iumi savve feel nogud taem samwan duim nogud samting long iumi, bat waswe, hem gudfala excuse for no duim olketa samting for worshipim Jehovah? Maet Paul and Barnabas feel nogud from tufala no agree long wanfala samting and datwan mekem bigfala “raoa” kamap. (Acts 15:39) Bat waswe, datwan mekem tufala no laek duim ministry nao? Barava nomoa!
Long sem wei tu, taem brata or sista mekem iu feel nogud, hem gud for tingim enemy bilong iu hem no datfala brata or sista wea no perfect, bat hem Satan wea laek for spoelem iu. Bat Satan bae no win sapos iu “garem strongfala faith for againstim hem.” (1 Pet. 5:8, 9; Gal. 5:15) Sapos iu garem strongfala faith olsem, iu “bae no savve sorre.”—Rom. 9:33.
Waswe Sapos Iumi No Fit for Duim Staka Samting?
Olketa example hia showimaot klia Bible no storyim eni excuse for no duim wanem Jehovah talem, wea wanfala samting nao hem for preachim gud nius. Nomata olsem, maet iumi garem stretfala reason why iumi no savve duim staka samting long ministry. Olketa nara Christian responsibility wea iumi garem maet mekem iumi for no iusim staka taem long preaching waka. Samfala taem, maet iumi taed tumas or barava sik and datwan mekem iumi no savve duim staka samting for Jehovah. Nomata olsem, Jehovah savve wanem nao insaed long heart bilong iumi and luksavve long wanem iumi fit for duim and no fit for duim.—Ps. 103:14; 2 Cor. 8:12.
So iumi mas careful for no judgem iumiseleva or olketa narawan. Aposol Paul sei: “Hem no stret for iu judgem wakaman bilong narawan. Boss bilong hem nao garem raet for talem sapos samting wea hem duim hem stret or nomoa.” (Rom. 14:4) “Iumi evriwan bae ansa long God for samting wea iumi duim and talem.” So hem no stret for comparem iumiseleva witim narawan. (Rom. 14:12; Gal. 6:4, 5) Taem iumi prea long Jehovah and talem wanem nao excuse bilong iumi, iumi mas duim long wei wea bae mekem iumi garem ‘stretfala konsens.’—Heb. 13:18.
Wei for Worshipim Jehovah Mekem Iumi Hapi
Iumi evriwan savve hapi for worshipim Jehovah bikos olketa samting wea Jehovah laekem iumi for duim, hem no hard and iumi savve duim nomata wanem kaen living iumi garem. Why nao olsem?
Bible sei: “Duim evri samting wea iu fit for duim for olketa wea needim help.” (Prov. 3:27) Wanem nao disfala scripture talem abaotem olketa samting wea God laekem iu for duim? Jehovah no talem iu for comparem iuseleva witim wanem narawan duim, bat duim nomoa wanem iu “fit” for duim for worshipim Hem. Tru tumas, nomata iumi savve duim staka samting or lelebet nomoa, iumi evriwan savve worshipim Jehovah long full heart bilong iumi.—Luke 10:27; Col. 3:23.
[Piksa long page 14]
“Taem wea Mi Barava Hapi Tumas”
[Piksa long page 14]
Nomata iumi garem problem saed long health or feeling, iumi shud no tingse datwan bae stopem iumi for duim ministry. Tingim Ernest, wanfala brata long Canada.
Ernest no savve toktok gud and hem savve shame. Bihaen hem kasem accident wea spoelem baksaed bilong hem, datwan mekem hem for finis for waka long construction company. Nomata hem kripol, hem garem moa taem for duim ministry. Encouragement wea hem kasem long olketa kongregeson meeting mekem hem for laek auxiliary pioneer. Nomata olsem, hem tingse hem no fit for pioneer.
So hem apply for auxiliary pioneer for wanfala month for pruvim hem no fit for auxiliary pioneer. Ernest barava sapraes taem hem kasem hour bilong hem for datfala month. Bat hem ting olsem, ‘Mi savve next taem bae mi no fit duim datwan.’ For pruvim diswan, hem apply for auxiliary pioneer for nara month moa, and hem kasem goal bilong hem.
Ernest auxiliary pioneer for wanfala year bat hem sei, “Mi barava savve mi no fit for regular pioneer.” Nomata olsem, hem apply for regular pioneer for pruvim datwan. Hem barava sapraes taem hem duim regular pioneer for wanfala year and kasem hour bilong hem. Hem disaed for gohed regular pioneer and hapi tumas for duim datwan for tufala year go kasem taem hem dae from sik wea kasem hem. Bat bifor hem dae, staka taem hem talem olketa wea visitim hem, “Olketa year wea mi pioneer nao hem taem wea mi barava hapi tumas.”
[Piksa long page 13]
Iumi savve winim eni hard samting wea savve stopem iumi for no duim ministry
[Piksa long page 15]
Nomata wanem kaen living iumi garem, Jehovah hapi taem iumi iusim full soul for worshipim hem