Olketa Akan Proverb Showimaot Olketa Standard Saed Long Fasin

FROM MAN WEA RAET FOR WEKAP! LONG GHANA

WANEM nao wanfala proverb? Wanfala dictionary explainim proverb olsem “wanfala short toktok wea pipol talem planti taem, wea givim advaes or talem samting abaotem laef.” Yoruba pipol bilong Nigeria explainim proverb long wei wea moa interesting, olketa kolem hem “wanfala horse wea karem man kwiktaem for faendem olketa niu idea.”

Wei wea olketa proverb hem important, hem showaot long disfala proverb, wea Akan pipol bilong Ghana savve gud long hem: “Pipol iusim nomoa olketa proverb for story long man wea wise.” Point nao, wanfala wise man no need for kasem staka instruction for duim wanem hem stret. Wanfala gud proverb savve muvim tingting, helpem man for minim olketa samting, and savve directim man for duim wanem hem stret.

Long Ghana, planti taem olketa iusim olketa proverb long taem bilong marit, olketa funeral and long kastom music. Olketa proverb barava help tu long taem for stretem raoa. Man wea toktok for narawan planti taem garem savve long hao for iusim olketa proverb.

Long Akan community, for savve gud hao for iusim olketa proverb hem showimaot wisdom. Interesting samting nao, long Bible, King Solomon—man wea planti savve long hem bikos long wisdom and savve bilong hem, and tu wei wea hem savve keepim peace—savve long 3,000 proverb. Olketa Bible proverb kam from God and evritaem tru, hem no olsem olketa proverb wea kam from savve bilong man and samting hem experiencem. Nomata olketa proverb bilong man savve wise, iumi shud no ting long olketa olsem hem important winim olketa Bible proverb. Nomata olsem letem iumi lukim samfala Akan proverb.

Idea Abaotem God

Long Ghana, olketa proverb toktok planti taem showimaot olketa biliv long God, and diswan hem showaot long planti Akan proverb. Akan pipol bilivim hem no fitim for eni proverb givim idea hao no eni God stap. Olsem example, wanfala proverb sei: “No eniwan showim God long wanfala pikinini.” Nomata wanfala pikinini luksavve God hem stap. Olketa planti taem iusim disfala proverb for storyim wanem wanfala pikinini bae lanem nomata hem kasem lelebet instruction nomoa.

Nara Akan proverb sei: “Sapos iu ranawe from God, iu still stap anda long hem.” So, man giamanim hemseleva sapos hem trae for no tingim God. Longtaem bifor, Bible talem toktok wea semsem, wea sei eye bilong God “stap long evri ples, hem lukluk long olketa nogud wan and olketa gud wan.” (Proverbs 15:3) Iumi evriwan nao mas givim ansa long Olmaeti.

Toktok wea Showimaot Olketa Standard Saed Long Fasin

Olsem hem semsem witim olketa proverb bilong olketa nara kantri, olketa Akan proverb showimaot evritaem olketa standard bilong community saed long fasin. Tingim disfala example wea mekhae long paoa bilong toktok: “For tok rong hem worse winim wei for step rong.” Tongue wea iu no kontrolem savve barava spoelem man long bigfala wei and maet kosim man for dae.—Proverbs 18:21.

Bat, taem iu bossim, tongue savve mekem peace kamap, olsem disfala toktok hia talem, “From tongue hem stap, olketa teeth no savve raoa witim each other.” Point nao hem hao iumi savve stretem wanfala raoa wea kamap—maet midolwan wanfala hasband and waef—thru long wei wea tufala story tugeta long kaenfala wei. And nomata taem diswan no stretem raoa, wei wea nara man hem kam and iusim gudfala toktok for helpem tufala savve stopem raoa hia.

Wisdom wea Helpem Man

Wei wea hem important for luksavve and ting raonem samting firstaem hem showaot klia long planti proverb toktok wea mekhae long wisdom wea helpem man. Man wea kwiktaem duim samting and fail for ting raonem wanem nao bae kamaot from samting hem duim, savve followim advaes from disfala proverb toktok, “Iu firstaem faendem road for ranawe bifor iu pokem cobra snek.”

Parents wea lukim samfala nogud fasin long wanfala pikinini bae hem gud for olketa followim disfala proverb, “Sapos iu lukim wanfala tol grass wea savve pokem eye bilong iu, iu digim aot, iu no mekem hem sharp.” Tru nao, iu shud stretem eni nogud fasin—digim aot—bifor hem mekem bigfala trabol kamap.

Point Go Long Olketa Kastom

Samfala taem hem important for savve long kastom bilong wanfala kantri, for minim olketa proverb bilong hem. Olsem example, Akan pipol ting long wei for duim akson witim left hand front long olketa narawan, especially long olo pipol, barava nogud wei. Disfala rul mekhae long disfala proverb, “Iu no iusim left hand for pointim wei for go long vilij bilong iu.” Diswan hem minim, man shud tinghae long wanem hem garem, wea insaed diswan hem tribe and hom bilong hem.

Wanfala proverb saed long kastom wei for kaikai long wanfala Akan haos hem sei: “Pikinini wea lane for wasim hand bae kaikai witim olketa full-grown man.” Long taem for kaikai, evriwan long haos stap long grup followim age. Bat, wanfala pikinini wea garem gudfala fasin, especially for klin long body and wei for showimaot respect, hem maet savve kaikai witim dadi and olketa full-grown man long tebol bilong olketa. Disfala proverb mekhae long point hao for kasem respect hem depend long fasin winim age.

Waswe, iu tingting for marit? Sapos olsem ting raonem disfala Akan proverb, “Marit hem no palm wine for teistim.” Man for sellim palm wine, wanfala alcohol drink wea olketa wakem from palm tree, savve letem pipol teistim firstaem bifor olketa savve disaed haomas nao for peim or maet for no peim. Bat, marit hem no for traem firstaem for savve hem gud or nomoa. Disfala proverb mekhae long wei wea marit hem for olowe and hao olketa no acceptim kaen marit wea hem for traem firstaem nomoa.

Wei for Lukluk Gud Long Olketa Samting

Planti proverb toktok pruvim hao olketa Akan laen dadi studyim gud pipol and olketa animal. Olsem example, for lukluk long careful wei long wanfala mami kokorako witim olketa pikinini kokorako, mekem kamap disfala proverb, “Wanfala pikinini kokorako wea stap olowe witim mami kokorako bae kaikaim leg bilong grashopa.” Mining bilong hem? Sapos man stap seleva, hem bae no garem eni share long olketa gud samting.

Eniwan wea lukim wanfala dae frog bae minim gud disfala tru toktok, “Iu lukim full long bilong wanfala frog taem hem dae.” Planti taem olketa talem disfala proverb taem pipol no tinghae long samwan. Long taem olsem, man wea olketa no tinghae long hem kasem comfort from hem tingim hao maet taem wea hem no stap nao pipol maet start for barava luksavve long olketa gud fasin bilong hem.

Olketa “Shortfala” Proverb

Nomata olketa talem olketa Akan proverb from wanfala genereson for nara genereson thru long toktok, olketa recordim olketa proverb long samfala difren wei. Iu savve lukim idea bilong wanfala proverb long olketa karving, walking stik, olketa blok gold, kastom kaleko and tu long kaleko design bilong distaem. Olketa visitor long art gallery bilong Ghana maet lukim piksa bilong wanfala man wea klaem tree and nara man helpem hem. Datwan abaotem disfala proverb, “Sapos iu klaem wanfala healthy tree, samwan bae pushim iu go ap.” Main message hem klia—sapos iu aftarem olketa gudfala goal, iu bae kasem saport.

Olketa funeral nao givim chance for wanem wanfala man for raet kolem “kaleko languis.” Datfala taem bilong sorre mekem man for ting raonem laef. From diswan, olketa funeral kaleko design showimaot olketa message saed long olketa deep mining bilong laef. Olsem example, wanfala kaleko wea garem piksa bilong wanfala ladder remindim man long disfala proverb, “No wanfala man seleva nomoa bae klaemem ladder bilong dae.” a Diswan hem helpem evriwan for no tinghae tumas long olketa seleva and for no garem living wea showimaot olketa tingse olketa no savve dae.—Ecclesiastes 7:2.

Long Akan community, olketa man for toktok for olketa bigman saed long kastom barava savve tumas long hao for iusim olketa proverb, and olketa karem wanfala stik wea garem olketa design wea showimaot samfala principle wea olketa pipol barava tinghae long hem. Olsem example, piksa bilong wanfala bird wea kasholem hed bilong snek hem “shortfala” proverb for datfala toktok, “Sapos iu kasholem hed bilong wanfala snek, full body bilong hem olsem rope nomoa.” Wanem nao message? Strong for deal witim olketa problem—feisim.

Stretfala Wei for Iusim Olketa Proverb

Olsem long eni tokpiksa, wanem taem and hao for iusim wanfala proverb bae depend long wanem nao iu storyim and hu nao lisin. Man savve spoelem gudfala story bilong hem sapos hem no iusim olketa proverb long stretfala wei. And long samfala kastom, bikos wei for iusim olketa proverb hem important part bilong wei for story tugeta, sapos man no iusim long stretfala wei, diswan bae mekem pipol no tinghae long datfala speaker.

Long Ghana, olketa bigman long community nao garem responsibility for raetem and keepim olketa proverb. Dastawe, olketa proverb toktok planti taem savve start witim disfala toktok, “Olketa bigman bilong mifala sei . . . ” And sapos speaker tok witim olketa wea moa olo, hem showimaot respect taem hem talem disfala toktok, “Iufala bigman nao sei. . . ” bifor hem iusim wanfala proverb. From wei for showimaot respect, wanfala young speaker bae no laek for pipol sei hem teachim olketa olo toktok bilong wisdom long wanfala proverb.

Samfala Important Point

Man savve talem wanfala proverb bifor or bihaen hem talem wanfala point. From kleva wei wea man savve joinim wanfala proverb go insaed story bilong hem, maet olketa wea lisin needim fasin for luksavve mekem olketa savve hao hem iusim wanfala proverb. Olsem example, abaotem hambol man wea lovem peace, wanfala Akan maet sei: “Sapos hem depend long So-and-so seleva, bae no eni gun sut aot long disfala vilij.” Diswan mekem man for tingim disfala proverb, “Sapos snail and tortoise nomoa insaed diswan, bae no eni gun sut aot long bush.” Tufala animal hia garem gud fasin, kwaet wei and no laek faet. Pipol wea garem olketa fasin hia mek peace.

Bat, sapos iu laekem wanfala Akan for talem olketa proverb, maet hem talem wanfala nomoa, “Iu no savve dream sapos iu no sleep.” Diswan hem minim, man iusim olketa proverb only long taem wea hem fitim, olsem tu man no savve dream sapos hem wekap. Samting wea happen nao bae disaedem wanem kaen proverb for iusim and long wanem taem.

[Footnotes]