Hao Nao Iu Ting Long Dae?

DAE hem samting wea affectim iumi nomata iumi go ahed busy evriday, nomata iumi barava healthy or rich. Maet iumi dae next taem iumi akrosim road or leidaon long bed. Kaen trabol olsem olketa terrorist attak long September 11, 2001, long New York City and Washington, D.C., mekem iumi luksavve hao datfala “lastfala enemy,” dae, hem kasem pipol from evri difren kaen living and age grup, samfala taem planti thousand pipol wantaem insaed tu-thri minute nomoa.—1 Corinthians 15:26.

Nomata hem nogud samting, pipol interest tumas long dae. Pipol barava interest for peim niuspepa or lukim nius long television sapos hem report abaotem dae, especially sapos staka pipol dae insaed wanfala nogud samting wea happen. Nomata taem pipol dae insaed war, natural disaster, from criminal fasin, or bigfala sik, pipol interest tumas long olketa report olsem. Hem hard for minim wei wea pipol showimaot barava bigfala sorre and interest long dae bilong pipol wea garem bignem and wea pipol mekhae long olketa.

Evri samting hia hem tru. Pipol go ahed for interest tumas long dae—dae bilong nara pipol. Bat taem pipol feisim dae bilong olketa seleva, olketa les for tingim. Dae bilong iumiseleva hem samting wea planti long iumi no laek for tingim.

Waswe, Iu Konfius Abaotem Dae?

Iumi nating laek tingim dae bilong iumiseleva. Why nao olsem? Hem bikos God putim insaed long iumi evriwan feeling for want for laef olowe. Long Anchor Bible, Ecclesiastes 3:11 hem sei: “Hem putim tu taem olowe insaed long heart bilong olketa.” So, from olketa man kanduit missim dae, olketa no feelim peace insaed long olketa. For deal witim disfala feeling and for satisfaem feeling for want for go ahed laef, olketa man mekem ap enikaen biliv, olsem biliv wea sei soul kanduit dae and reincarnation.

Tru nao, olketa man evriwea fraetem dae. Dastawe, iumi shud no sapraes hao hem barava hard for olketa man deal witim dae. Wanfala samting wea dae showimaot klia hem hao wei for waka hard for aftarem riches and paoa hem iusles nomoa.

Stap Seleva Taem Man Dae?

Long olketa taem bifor, pipol letem man wea garem bigfala sik or garekil nogud for dae long haos bilong hemseleva. Hem nao samting pipol duim long taem bilong Bible, and long samfala ples distaem tu. (Genesis 49:1, 2, 33) Long ples wea hem olsem, famili hipap tugeta, and olketa pikinini join insaed wei wea evriwan story tugeta. Diswan helpem each famili member and wei wea each wan sharem sorre and responsibility long diswan hem provaedem comfort.

Disfala wei hem barava difren from olketa ples wea pipol tingse hem nogud samting or tambu for story abaotem dae, and olketa no letem olketa pikinini for join insaed from olketa tingse hem “hevi tumas saed long feeling” for olketa. Wei for dae distaem hem difren long samfala difren wei, and planti taem hem lonely samting. Nomata pipol laek for dae long haos, witim peace and loving kea bilong famili, planti dae long hospital, taem olketa stap seleva and safa long pain and eni kaen medical machine stap raonem olketa. Long narasaed, planti million pipol dae insaed wei for killim dae tribe, bigfala hangre, AIDS, war, or from barava poor living.

Wanfala Subject for Ting Raonem

Bible no againstim wei for ting raonem dae. Ecclesiastes 7:2 talem iumi: “Hem moabeta for go long haos bilong dae winim wei for go long haos bilong feast, bikos datwan nao end bilong evri man.” Taem samwan hem dae, datwan savve mekem iumi leavim olketa samting iumi duim or tingim evriday and ting raonem wei wea laef hem short tumas. Diswan savve helpem iumi for iusim laef bilong iumi long wei wea garem purpose winim wei for westem nomoa.

Wanem nao tingting bilong iu abaotem dae? Waswe, iu ting raonem finis olketa feeling, biliv, hope bilong iu, and wei wea iu fraetem end long laef bilong iu?

Olketa man no savve explainim and minim evribit laef and dae. Creator bilong iumi nomoa savve talem stret samting abaotem diswan. Hem nao “man wea givim laef,” and “olketa wei for kamaot from dae” stap witim hem. (Psalm 36:9; 68:20) Maet iu sapraes for savve hao wei for markem samfala main biliv wea pipol garem witim Bible savve givim comfort and encouragement. Hem bae showimaot hao dae no minim evri samting mas finis nao.

[Blurb long page 4]

For savve iumi maet dae hem helpem iumi for iusim laef long gudfala wei