Waswe, Iu Garem Heart wea Laek Savve Long Jehovah?

1, 2. Why nao maet samfala interest for lane abaotem olketa fig?

WASWE, iu kaikaim fig enitaem? Long bifor, olketa Israelite laekem tumas for kaikaim fig. (Nah. 3:12; Luke 13:6-9) Distaem, long staka kantri raonem world, olketa plantim fig. Fig hem healthy kaikai wea savve helpem heart bilong iumi tu.

² Long Bible, taem Jehovah comparem pipol witim fig, hem story abaotem samting wea stap long heart bilong olketa. Jehovah hem story abaotem tokpiksa heart, hem no storyim hao fig savve helpem health bilong iumi. Samting wea hem talem savve helpem iumi and olketa wea iumi lovem tu. Taem iumi storyim samting wea hem talem, tingim wanem iumi olketa Christian savve lanem from datwan.

3. Wanem nao olketa fig long Jeremiah chapter 24 hem piksarem?

³ Long 617 B.C.E., pipol bilong Judah duim olketa samting wea Jehovah no laekem. Long wanfala vision from God, Jeremiah lukim samting wea bae happen long Judah. Hem lukim tufala basket fig, wea piksarem tufala sekson. Olketa fig insaed long wanfala basket “barava gud” and olketa fig long nara basket “barava nogud.” (Readim Jeremiah 24:1-3.) Olketa fig wea nogud piksarem King Zedekiah and olketa narawan wea King Nebuchadnezzar and army bilong hem bae attakim olketa. Bat samfala olsem olketa gudfala fig, wea hem nao Ezekiel, Daniel and thrifala fren bilong hem, and olketa narawan wea prisoner long Babylon. Samfala long olketa Jew hia bae go bak long Jerusalem and buildim moa temple bilong hem.—Jer. 24:8-10; 25:11, 12; 29:10.

4. Why nao samting wea God talem abaotem olketa gud pipol long Judah hem encouragem iumi?

⁴ Jehovah sei olsem abaotem olketa gudfala pipol hia: “Bae mi givim heart long olketa wea bae mekem olketa savve mi nao Jehovah, and olketa bae kamap pipol bilong mi.” (Jer. 24:7) Datwan encouragem iumi bikos hem showimaot Jehovah laekem iumi for garem heart wea laek for savve long hem, and wea laek for worship witim pipol bilong hem. Wanem nao helpem iumi for olsem? Iumi studyim Bible and followim wanem iumi lanem. Then iumi repent and finis for duim olketa nogud samting. Gogo, iumi dedicate long God and baptaes long nem bilong Dadi, Son, and holy spirit. (Matt. 28:19, 20; Acts 3:19) Waswe, iu duim olketa samting hia finis? Or waswe, iu evritaem attendim olketa meeting bilong Olketa Jehovah’s Witness distaem and start for duim olketa samting hia?

5. Buk bilong Jeremiah hem story abaotem hu?

⁵ Nomata sapos iumi duim evri samting hia finis, iumi mas traem best for garem stretfala tingting and duim stretfala samting. Why nao olsem? Bae iumi kasem ansa bilong disfala kwestin taem iumi storyim samting wea Jeremiah raetem abaotem heart. Samfala samting wea Jeremiah raetem hem abaotem olketa nation wea stap raonem Judah. Bat big haf long datfala buk storyim taem wea faevfala king bilong Judah rul. (Jer. 1:15, 16) Message bilong Jeremiah hem for pipol wea dedicate finis long Jehovah. Long taem bilong Moses, olketa agree for kamap pipol bilong Jehovah. (Ex. 19:3-8) Long taem bilong Jeremiah tu, olketa pipol sei: “Mifala kam long iu Jehovah, bikos iu nao God bilong mifala.” (Jer. 3:22) Bat waswe, olketa garem gudfala heart?

OLKETA NEEDIM OPERATION LONG TOKPIKSA HEART

6. Why nao iumi shud laek savve long wanem God talem abaotem heart?

⁶ Olketa doctor savve iusim machine for lukluk insaed body bilong iumi and lukim sapos heart bilong iumi hem healthy. Bat Jehovah savve lukim tokpiksa heart bilong iumi tu, wea minim hem lukim wanem kaen man nao iumi. Hem sei: “Heart bilong man hem laea long hem and hem laekem tumas for duim rabis samting. Hu nao hem savve gud long heart bilong man? Mi nao Jehovah, and mi lukluk gud long heart. . . . Mi bae givim samting long man fitim wei bilong hem and wanem hem duim.” (Jer. 17:9, 10) God savve lukim samting wea iumi laekem, tingting bilong iumi, feeling bilong iumi, wei bilong iumi, and olketa goal bilong iumi. God bae lukluk gud long heart bilong iu. Bat iu tu savve traem best for lukluk gud long samting wea stap insaed heart bilong iuseleva.

7. Wanem nao Jeremiah talem abaotem heart bilong plande Jew long taem bilong hem?

⁷ Iumi shud lukluk gud long tokpiksa heart bilong iumi. Wanem nao tingting bilong Jehovah abaotem tokpiksa heart bilong olketa Jew long taem bilong Jeremiah? Lukim samting wea Jeremiah talem. Hem sei: “Heart bilong pipol bilong Israel hem no circumcise.” Hem no storyim really wei for circumcise wea Law bilong Moses sei olketa Jew mas duim. Hao nao iumi savve long datwan? Nomata olketa Jew man circumcise long really wei finis, Jehovah sei olketa “no circumcise yet,” wea diswan minim ‘heart bilong olketa no circumcise.’ (Jer. 9:25, 26) Wanem nao datfala toktok hem minim?

8, 9. Long taem bilong Jeremiah, heart bilong staka Jew hem waswe, and wanem nao olketa mas duim?

⁸ God talem olketa Jew wanem olketa need for duim. Diswan helpem iumi for savve long mining bilong disfala toktok, ‘heart wea no circumcise.’ Hem talem olketa for aotem olketa nogud samting from heart bilong olketa. Why nao olsem? Hem sei: “Mekem mi no kros . . . bikos long olketa nogud samting wea iufala duim.” Olketa no obeyim Jehovah bikos heart bilong olketa hem nogud. (Readim Mark 7:20-23.) Olketa bighed and no willing for change. Long tingting bilong Jehovah, heart bilong olketa, wea minim tu reason why olketa duim samting and tingting bilong olketa, hem nogud. (Readim Jeremiah 5:23, 24; 7:24-26.) God talem olketa wanem olketa mas duim for changem diswan. Hem sei: “Iufala mas circumcise for Jehovah, and aotem samting wea no klin from heart bilong iufala.”—Jer. 4:4; 18:11, 12.

⁹ Hem olsem olketa Jew long taem bilong Jeremiah needim operation long heart. Olketa Israelite long taem bilong Moses tu garem sem problem. (Deut. 10:16; 30:6) Wanem nao olketa Jew mas duim for “aotem samting wea no klin” from heart bilong olketa? Olketa mas aotem eni tingting or feeling wea mekem olketa for no obeyim God.—Acts 7:51.

HAO NAO BAE IUMI GAREM HEART WEA LAEK SAVVE LONG HEM?

10. Hao nao David chekim tokpiksa heart bilong hem, and hao nao iumi savve followim example bilong hem?

¹⁰ Iumi shud thankiu long God from hem helpem iumi for minim wanem nao insaed tokpiksa heart bilong iumi. From iumi worshipim Jehovah finis, waswe, iumi need for lukluk gud long heart bilong iumi? Staka long kongregeson faithful for worshipim Jehovah and garem klinfala wei. Olketa no kamap “fig wea nogud.” Bat iumi mas no forget, nomata David hem raeteous hem sei long Jehovah: “Plis God, lukluk gud long mi and savve long heart bilong mi. Plis iu lukluk gud long mi and savve long olketa samting wea mi wari abaotem, and lukim sapos mi garem eni nogud wei.”—Ps. 17:3; 139:23, 24.

11, 12. (a) Why nao iumi shud lukluk gud long heart bilong iumiseleva? (b) Wanem nao Jehovah bae no duim?

¹¹ Jehovah laekem iumi evriwan for savve long hem, wea minim for duim wanem hem laekem and for gohed olsem. Jeremiah sei Jehovah hem lukluk gud long olketa wea raeteous and Hem lukim tu “tingting and heart” bilong olketa. (Jer. 20:12) From Jehovah hem lukluk gud long heart bilong pipol wea raeteous, hem fitim for iumi evriwan chekim gud wanem nao insaed long heart bilong iumi. (Readim Psalm 11:5.) Taem iumi duim datwan, maet iumi luksavve iumi garem samfala rong tingting, feeling, or goal wea start for spoelem heart bilong iumi. Maet iumi no kwiktaem for obeyim Jehovah. Maet iumi needim wanfala tokpiksa heart operation for aotem olketa nogud samting from heart bilong iumi. Wanem nao samfala example bilong rong tingting or feeling wea maet stap long heart bilong iumi? Hao nao iumi savve changem datwan?—Jer. 4:4.

¹² Jehovah bae no forcem iumi for change. Hem sei bae hem givim long olketa “gudfala fig” wanfala heart wea laek savve long hem. Bat hem bae no forcem olketa for changem heart bilong olketa. Olketa mas laek for savve long God, and iumi mas olsem tu.

13, 14. Hao nao samting wea stap insaed heart bilong man savve spoelem hem?

¹³ Jesus sei samting wea stap long heart bilong man nao savve mekem hem for garem “rabis tingting,” killim man dae, duim adultery, or duim olketa nara nogud samting. (Matt. 15:19) Olsem example, sapos heart bilong man laekem nogud samting, maet hem duim adultery or durong. Sapos hem no repent, bae God no hapi long hem nao. Bat nomata sapos hem no duim bigfala sin, maet hem letem feeling for laek duim nogud samting kamap strong insaed long heart bilong hem. (Readim Matthew 5:27, 28.) Hem important for mek sure iumi no garem feeling for laekem nogud samting insaed long heart bilong iumi. Waswe, iu tingim olowe samwan wea hem no marit partner bilong iu, long wei wea no stret long tingting bilong Jehovah? Waswe, iu need for changem samting wea stap insaed heart bilong iu?

¹⁴ Or maet wanfala Christian hem kros long nara brata gogo hem start for heitim hem insaed long heart bilong hem. (Lev. 19:17) Hem mas waka hard for aotem olketa nogud feeling hia.—Matt. 5:21, 22.

15, 16. (a) Wanem nao savve mekem Christian garem ‘heart wea no circumcise’? (b) Long tingting bilong iu, why nao Jehovah no laekem iumi for garem ‘heart wea no circumcise’?

¹⁵ Staka Christian no letem heart bilong olketa for garem kaen feeling olsem. Bat Jesus story tu abaotem “rabis tingting.” Olsem example, maet iumi tingse wei for saedem famili bilong iumi hem important winim eni nara samting. Hem tru, olketa Christian lovem relative bilong olketa. Olketa no olsem pipol long world distaem wea “no garem love insaed long famili.” (2 Tim. 3:1, 3) Bat hem isi for iumi ova tumas long diswan. Staka pipol tingse olketa relative important winim nara pipol. Sapos eni famili member feel nogud long wanfala samting, olketa feel nogud tu. Olketa brata bilong Dinah kros fogud bikos wanfala man spoelem hem so olketa go and killim dae staka man. (Gen. 34:13, 25-30) And olketa nogud feeling long heart bilong Absalom nao mekem hem killim dae Amnon. (2 Sam. 13:1-30) Tru nao, “rabis tingting” hem barava danger samting.

¹⁶ Samfala pipol savve barava kros taem wanfala brata or sista duim nogud samting long famili member bilong olketa, or taem olketa tingse olketa duim datwan. So maet olketa les for spendem taem witim datfala brata or sista, and maet olketa no invaetem hem kam long haos bilong olketa tu. (Heb. 13:1, 2) Bat Christian wea lovem olketa brata and sista bilong hem bae no olsem. Jehovah savve samting wea stap insaed heart bilong iumi. Sapos hem lukim olketa nogud feeling hia insaed heart bilong iumi, bae hem sei ‘heart bilong iumi hem no circumcise.’ (Jer. 9:25, 26) Bat Jehovah sei: “Aotem samting wea no klin from heart bilong iufala.”—Jer. 4:4.

WILLING FOR CHANGE AND GOHED GAREM HEART WEA LAEK SAVVE LONG GOD

17. Why nao bae hem moa isi for changem samfala samting long heart bilong iumi sapos iumi fraet long Jehovah?

¹⁷ Taem iu lukluk gud long tokpiksa heart bilong iu, maet iu luksavve iu no kwiktaem for obeyim Jehovah. Maet long samfala wei, ‘heart bilong iu no circumcise.’ Maet iu fraetem olketa man, or iu laekem bignem or staka selen. Maet samfala taem iu bighed or laek independent. Samfala bifor olsem tu. (Jer. 7:24; 11:8) Jeremiah sei olketa Jew wea no faithful long taem bilong hem garem heart wea “bighed and no willing for change.” Olketa no “fraet long Jehovah” nomata hem lovem olketa and givim evri samting wea olketa needim. (Jer. 5:23, 24) Sapos iumi fraet long Jehovah, wea minim iumi respectim hem, bae iumi aotem nogud samting from heart bilong iumi. Datwan bae mekem hem moa isi for iumi changem samfala samting long heart bilong iumi and duim wanem Jehovah askem.

18. Wanem promis nao Jehovah talem abaotem olketa wea insaed long datfala niu agreement?

¹⁸ Taem iumi gohed traem best, Jehovah bae givim iumi heart wea laek savve long hem. Hem nao samting wea hem promisim long olketa anointed Christian wea insaed long datfala niu agreement. Hem sei: “Mi bae putim law bilong mi insaed long olketa, and bae mi raetem insaed heart bilong olketa. And mi bae kamap God bilong olketa, and olketa bae kamap pipol bilong mi.” Hem sei moa: “Olketa bae no teachim moa fren bilong olketa and brata bilong olketa and sei, ‘Iufala mas savve long Jehovah!’ bikos evriwan long olketa bae savve long mi nomata olketa man nating or olketa bigman. Bae mi forgivim olketa long nogud samting wea olketa duim and bae mi no tingim moa sin bilong olketa.”—Jer. 31:31-34.a

19. Wanem nao iumi savve luk forward long hem?

¹⁹ Iumi luk forward long olketa samting wea God promisim. Iumi evriwan shud laek savve long Jehovah and worshipim hem witim pipol bilong hem. Iumi fit for savve long Jehovah for olowe sapos iumi kasem forgiveness for olketa sin bilong iumi bikos long sakrifaes bilong Christ. From God savve forgivim iumi, iumi tu shud willing for forgivim olketa narawan, nomata taem hem no isi for duim datwan. Iumi shud traem best for aotem eni feeling for kros long narawan or heitim hem. Diswan bae helpem iumi for showimaot iumi laek worshipim Jehovah, and iumi gohed fren gud witim hem. Bae iumi olsem olketa wea Jehovah sei long olketa: “Bae iufala lukaotem mi and faendem mi, bikos iufala bae lukaotem mi long full heart bilong iufala. And bae mi letem iufala for faendem mi.”—Jer. 29:13, 14.