Gohed Strong Long Spiritual Wei Nomata Iu Olo
“Olketa wea grow insaed haos bilong Jehovah . . . bae olketa gohed strong nomata olketa olo.”—PSALM 92:13, 14.
1, 2. (a) Plande taem, hao nao Bible storyim wei for olo? (b) Wanem nao Bible promisim saed long olketa nogud samting wea man kasem from sin bilong Adam?
WANEM nao iu tingim taem iu herem datfala word olo? Waswe, iu tingim eye no lukluk gud, earpas, and leg nogud? Or olketa nara samting abaotem “olketa day bilong trabol” for olketa olo wea Ecclesiastes 12:1-7 hem story abaotem? Sapos olsem, hem important for tingim hao samting wea Ecclesiastes chapter 12 talem, hem abaotem wei for kamap olo wea kamaot from sin bilong Adam. Diswan hem difren from plan bilong Jehovah God taem hem creatim man.—Romans 5:12.
2 Wei for olo hem no wanfala nogud samting, bikos hem minim man laef longtaem, wea datwan moabeta winim wei for laef short taem nomoa. Tru nao, wei wea evri samting wea laef hem grow and kamap mature hem gudfala samting. Klosap nao wei for safa wea kasem olketa man for winim six thousand year bae finis evribit, and evriwan wea obey bae enjoyim gudfala laef wea God laekem olketa for kasem wea free from sorre and wei for olo. (Genesis 1:28; Revelation 21:4, 5) Long datfala taem, “no eniwan bae sei: ‘Mi sik.’ ” (Isaiah 33:24) Olketa olo bae kasem bak strong olsem “young man” and body bilong olketa bae ‘kamap gud moa winim taem olketa young.’ (Job 33:25) Bat long distaem, evriwan mas stragol from sin wea olketa kasem from Adam. Nomata olsem, Jehovah blessim olketa servant bilong hem long plande spesol wei taem olketa gogo for olo.
3. Long olketa wanem wei nao olketa Christian savve “gohed strong nomata olketa olo”?
3 Word bilong God promisim iumi hao “olketa wea grow insaed haos bilong Jehovah . . . bae gohed strong nomata olketa olo.” (Psalm 92:13, 14) Long tokpiksa wei, man wea raetem psalm hem talem hao olketa faithful servant bilong Jehovah savve muv ahed long spiritual wei and gohed strong, nomata sapos health bilong olketa start for nogud. Plande example long Bible and distaem tu pruvim diswan hem tru.
“Go Evritaem”
4. Long wanem wei nao profet Anna wea olo showimaot hem strong for worshipim God, and wanem gud samting nao hem kasem?
4 Tingim datfala woman profet, Anna, wea laef long first-century. Nomata hem 84 year, hem “go evritaem long temple for duim holy service naet and day witim wei for no kaikai and gohed strong for prea.” Reason why Anna no stap olowe long temple hem bikos Dadi bilong hem kam from “tribe bilong Asher,” wea minim hem no wanfala Levite. Tingim hao hem mas go long temple evriday for morning sakrifaes go kasem taem for evening sakrifaes! Bat Jehovah barava blessim Anna for wei wea hem strong for worshipim hem. Hem garem privilege for stap long temple taem Joseph and Mary tekem Jesus go long there taem hem baby yet, wea hem nao Law komandim olketa for duim. Taem Anna lukim Jesus, hem “start for sei thankiu long God and story abaotem datfala pikinini long evriwan wea weitim taem for Jerusalem hem sev.”—Luke 2:22-24, 36-38; Numbers 18:6, 7.
5, 6. Long olketa wanem wei nao plande olo distaem olsem Anna?
5 Plande olo distaem, olketa olsem Anna long wei for go evritaem long olketa meeting, strong for preachim datfala gud nius, and for askem Jehovah evritaem for helpem tru worship muv ahed. Wanfala brata wea 80 year finis, wea savve go evritaem long olketa Christian meeting witim waef bilong hem, hem sei: “Hem kamap wei bilong mifala for go long olketa meeting. Mifala no laek for stap long eni ples moa, bat only ples wea mifala laek for stap nao, hem ples wea pipol bilong God stap. Hem nao ples wea mifala feel hapi.” Datwan hem nambawan example for iumi evriwan!—Hebrews 10:24, 25.
6 Jean, wea hem wanfala Christian widow wea kasem 80 year hem sei: “Sapos eni samting kamap wea join witim tru worship, mi laek for insaed datwan sapos mi fit for duim.” Diswan nao samting wea Jean disaed strong for duim. Hem sei moa: “Hem tru, samfala taem mi sorre, bat mi no laekem wei wea mi feel sorre for mekem olketa wea stap witim mi for feel sorre tu.” Feis bilong hem barava hapi taem hem story abaotem olketa ples wea hem gogo long hem for olketa spiritual hipap. No longtaem go nomoa hem sei olsem long olketa wea go witim hem long wanfala ples: “Mi no interest for lukim eni samting wea olketa tourist go for lukim; mi laek go preaching nomoa!” Nomata hem no savve long languis long datfala ples bat hem savve story long wei wea mekem pipol interest long message from Bible. And tu, hem serve for staka year long wanfala kongregeson wea needim help, nomata hem mas lanem niufala languis, and for go long olketa meeting hem savve tekem hem wan hour for go and wan hour for kam bak.
Keepim Mind Hem Busy
7. Taem Moses hem olo, hao nao hem talemaot hem laek for mekem wei wea hem fren witim God kamap moa strong?
7 Bihaen man laef for longfala taem, hem savve garem bigfala savve abaotem laef. (Job 12:12) Bat for muv ahed long spiritual wei hem no depend long age bilong man. Dastawe, winim wei for depend long savve wea olketa kasem from olketa laef longtaem, olketa servant bilong God bae waka hard for “lanem moa samting” nomata olketa kamap olo. (Proverbs 9:9) Taem Jehovah appointim Moses, hem kasem 80 year finis. (Exodus 7:7) Long taem bilong Moses, for man laef kasem datfala age hem wanfala spesol samting, from hem raet olsem: “Laef bilong mifala savve kasem seventi year; and sapos body bilong man hem strong, hem savve kasem eiti year.” (Psalm 90:10) Nomata olsem, Moses no tingse hem no savve lanem eni niu samting from wei wea hem olo tumas. Bihaen staka year wea Moses servem God, and garem staka privilege, hem askem Jehovah olsem: “Plis mekem mi savve long olketa wei bilong iu, mekem mi savve long iu.” (Exodus 33:13) Moses hem evritaem laek for mekem wei wea hem fren witim Jehovah kamap moa strong.
8. Hao nao Daniel keepim mind bilong hem busy nomata hem 90 year, and wanem nao kamaot from diswan?
8 Profet Daniel, wea luk olsem hem kasem 90 year, hem man for barava ting raonem olketa holy raeting. Hem studyim “olketa buk,” wea samfala long olketa buk hia maet hem Leviticus, Isaiah, Jeremiah, Hosea, and Amos. Diswan muvim hem for lukaotem Jehovah long wei for prea strong long hem. (Daniel 9:1, 2) God ansarem prea bilong hem long wei for givim hem information abaotem kakam bilong Messiah and tru worship long future.—Daniel 9:20-27.
9, 10. Wanem nao samfala duim for keepim mind hem busy?
9 Olsem Moses and Daniel, iumi savve keepim mind bilong iumi busy, nomata iumi olo, long wei for tingim evritaem olketa spiritual samting. Hem nao samting wea staka pipol duim. Worth, wanfala Christian elder wea kasem 80 year finis, studyim and trae for minim gud evri spiritual kaikai wea kam from “datfala faithful and wise slave.” (Matthew 24:45) Hem sei: “Mi barava lovem truth long Bible, and mi hapi tumas for lukim hao laet bilong truth hem gohed for kamap moa braet.” (Proverbs 4:18) Fred tu, wea spendem winim 60 year long full-taem ministry, faendem hao wei for storyim olketa spiritual samting witim olketa brata and sista barava strongim hem long spiritual wei. Hem sei: “Mi mas mekem Bible hem samting wea mind bilong mi barava interest long hem. Sapos iu mekem Bible hem samting wea iu interest long hem and trae for savve hao olketa niu samting wea iu lanem hem join witim olketa nara information long Bible, bae iu lukim wei wea each information hem olsem olketa difren kala ston and sela long wanfala nekles wea luk naes tumas taem olketa join tugeta.”—2 Timothy 1:13.
10 Wei for olo no stopem man for lanem olketa niu samting and olketa samting wea hard. Pipol wea kasem 60, 70, and 80 year tu savve read and raet, or lanem olketa nara languis. Samfala Jehovah’s Witness duim diswan mekem olketa savve sharem gud nius witim pipol from olketa difren kantri. (Mark 13:10) Harry and waef bilong hem, tufala klosap kasem 70 year taem tufala disaed for preach long olketa wea tok long Portuguese languis. Harry hem sei: “For tok stret, taem man hem olo hem kamap moa hard for duim samting.” Bat wei wea tufala trae hard and no givap mekem tufala savve conductim olketa Bible study long Portuguese languis. For staka year finis, Harry savve givim olketa tok long convention long languis wea hem lanem.
11. Why nao hem gud for savve long olketa samting wea olketa olo wea faithful duim?
11 Hem tru, no evriwan garem gudfala health or living wea mekem olketa fit for duim olketa samting olsem. Bat hem gud for tingim samting wea samfala wea olo fit for duim. Wei for duim olsem hem no for mekem man tingse evriwan shud fit for duim sem samting, bat hem bikos long samting wea aposol Paul talem long olketa Hebrew Christian abaotem olketa faithful elder. Hem sei: “Taem iufala lukluk gud long fasin bilong olketa, followim faith bilong olketa.” (Hebrews 13:7) Taem iumi lukluk gud long example bilong olketa olo hia wea gohed strong, diswan savve encouragem iumi for followim strongfala faith wea muvim olketa for servem God. Harry, wea distaem hem kasem 87 year, explainim samting wea muvim hem taem hem sei: “Mi laek for iusim taem wea mi laef yet long wisefala wei, and for duim evri samting wea mi fit for duim for servem Jehovah.” Fred, wea iumi story abaotem hem finis, barava hapi taem hem duim assignment bilong hem long Bethel. Hem sei: “Iu need for luksavve long wanem iu savve duim for servem Jehovah, and gohed for duim datwan.”
Strong Nomata Living Hem Change
12, 13. Wanem nao Barzillai hem duim wea showimaot hem lovem God nomata living bilong hem change?
12 Hem no isi for pipol acceptim wei wea olketa kamap olo and body start for nogud. Nomata olsem, man savve showimaot wei for lovem God nomata hem olo. Man from Gilead, Barzillai, hem nambawan example long diswan. Taem hem kasem 80 year, hem barava kaen long David and army bilong hem, and hem givim David and army bilong hem kaikai and ples for stap taem Absalom againstim David. Taem David hem go bak long Jerusalem, Barzillai go witim disfala big sekson go kasem Jordan River. David talem Barzillai hao hem laekem hem for servem hem long haos bilong hem. Wanem nao Barzillai sei? “Tuday, mi kasem eiti year. . . . Waswe, servant bilong iu savve teistim samting wea mi kaikaim and samting wea mi drinkim, or waswe, mi savve herem voice bilong olketa man and woman wea singsing? . . . Long hia, hem servant bilong iu Chimham. Hem gud for hem go witim iu, lord bilong mi wea king; and iu markem hem for duim eni samting iu laekem hem for duim.”—2 Samuel 17:27-29; 19:31-40
13 Nomata living bilong Barzillai hem change, hem duim samting wea hem fit for duim for sapotim king wea Jehovah appointim. Nomata hem luksavve hao hem no savve herehere gud and hem no savve teistim gud olketa kaikai, hem no feel nogud long datwan. Bat from hem laekem for Chimham kasem olketa gud samting wea king laek for givim long hem, Barzillai showimaot hem no man for tingim hemseleva and hem wanfala gud man. Olsem Barzillai, plande olo distaem tu kaen long olketa narawan and no tingim olketa seleva nomoa. Olketa duim samting wea olketa fit for duim for sapotim tru worship, and olketa savve hao “God hem hapi tumas long olketa sakrifaes olsem.” Hem wanfala blessing for olketa wea loyal stap witim iumi!—Hebrews 13:16.
14. Hao nao wei wea David hem olo strongim olketa toktok wea stap long Psalm 37:23-25?
14 Nomata living bilong David hem change plande taem, hem gohed for feel sure hao Jehovah olowe tingim olketa faithful servant bilong hem. Samfala year bifor hem dae, David raetem Psalm 37. David hem tingting raonem olketa samting taem hem ringim harp bilong hem and singsing olsem: “Jehovah hem redyim finis wei for man hem wakabaot, and Hem hapi long wei bilong hem. Nomata maet hem foldaon, bae hem no foldaon evribit, from Jehovah holem hand bilong hem. Long bifor, mi wanfala young man, and distaem mi kamap olo nao, bat no enitaem mi lukim eniwan wea raeteous hem no garem eni samting, or pikinini bilong hem lukaotem bred.” (Psalm 37:23-25) Jehovah lukim hao hem important for datfala psalm mas talem age bilong David. Diswan hem barava strongim go moa olketa toktok hia wea kam from heart!
15. Hao nao aposol John showimaot gudfala example bilong man wea faithful nomata hem kamap olo and living bilong hem change?
15 Aposol John hem nara gudfala example bilong man wea faithful nomata hem kamap olo and laef bilong hem change. Bihaen 70 year wea John servem God, hem kamap prisoner long Patmos “from [hem] tok abaotem God and givim witness abaotem Jesus.” (Revelation 1:9) Bat waka bilong hem no finis. Tru nao, evri toktok wea John raetem long Bible hem raetem long tu-thri year bifor hem dae. Taem hem stap long Patmos, Jesus givim hem datfala vision bilong Revelation, and hem mek sure hem raetem evri samting wea hem lukim. (Revelation 1:1, 2) Luk olsem hem kamap free long taem wea Emperor Nerva bilong Rome hem rul. Bihaen datwan, long samting olsem 98 C.E., maet taem hem kasem 90 or 100 year, John hem raetem wanfala Gospel and thrifala leta insaed Bible wea garem nem bilong hem.
Gohed and No Givap
16. Hao nao olketa wea faendem hard for story bikos olketa olo, showimaot love bilong olketa for Jehovah?
16 Enikaen samting savve stopem man for duim samting taem hem olo. Olsem example, samfala stragol for story witim pipol bikos long wanfala sik wea mekem hem moa hard for duim datwan. Bat taem olketa ting go bak long love bilong God for olketa, and kaenfala fasin bilong hem wea man no fit for kasem, datwan barava mekem olketa hapi. Nomata olketa no savve story gud, bat insaed heart bilong olketa, olketa sei long Jehovah: “Mi barava lovem law bilong iu! Hem nao samting wea mi ting raonem for full day.” (Psalm 119:97) Jehovah hem savve long olketa wea “tingim nem bilong hem,” and hem tinghae long olketa, from olketa difren from plande man long world wea no interest long olketa wei bilong hem. (Malachi 3:16; Psalm 10:4) Hem barava comfortim iumi for savve hao olketa samting wea iumi ting raonem long heart bilong iumi mekem hem hapi!—1 Chronicles 28:9; Psalm 19:14.
17. Wanem nao olketa servant bilong Jehovah wea servem hem for longfala taem finis duim wea barava spesol?
17 Samting wea iumi mas no ting smol long hem nao, hem hao olketa hia servem Jehovah for plande year finis and no givap. Jesus hem sei: “Iufala bae sevem soul bilong iufala sapos iufala gohed strong and no givap.” (Luke 21:19) For kasem laef, man mas gohed strong and no givap. Iufala wea “duim finis will bilong God,” and pruvim wei wea iu faithful long samting wea iu duim long laef savve luk forward for “kasem samting wea hem promisim.”—Hebrews 10:36.
18. (a) Jehovah hapi taem hem lukim olketa olo duim wanem samting? (b) Wanem nao bae iumi storyim long next article?
18 Jehovah barava hapi long samting wea iu duim witim full heart, nomata hem smol samting or big samting. Nomata body bilong iumi gogo for nogud, long spiritual wei iumi kamap niu moa evriday. (2 Corinthians 4:16) For sure Jehovah hem tinghae long wanem iu duim for plande year finis, bat hem barava klia hao hem tinghae tu long wanem iu duim for hem distaem for nem bilong hem. (Hebrews 6:10) Long next article, bae iumi storyim hao wei for faithful savve helpem man for staka year.
Hao Nao Bae Iu Ansa?
• Wanem gudfala example nao Anna showimaot for olketa Christian olo distaem?
• Why nao wei for olo no savve stopem man for duim samfala samting?
• Hao nao olketa wea olo savve gohed for showimaot wei wea olketa lovem God?
• Hao nao Jehovah ting long olketa olo wea duim will bilong hem?
[Piksa long page 25]
Taem Daniel hem olo, hem studyim gud “olketa buk” for savve haomas year nao Judah bae stap olsem prisoner
[Piksa long page 26]
Plande olo showimaot nambawan example long wei for go long meeting evritaem, strong long preaching waka, and interest for lane