Jehovah—Barava Nambawan Example Bilong Gudfala Fasin
“Praisem Jehovah bilong olketa army, from Jehovah hem gud!”—JEREMIAH 33:11.
1. Wanem nao muvim iumi for praisem God for gudfala fasin bilong hem?
Gudfala fasin bilong Jehovah God hem perfect. “Gudfala fasin bilong hem nambawan!” profet Zechariah hem talem. (Zechariah 9:17) Tru nao, gudfala fasin showaot long evri samting wea God duim for redyim earth for iumi enjoyim. (Genesis 1:31) Iumi bae nating minim evribit evri spesol law wea God iusim for creatim universe. (Ecclesiastes 3:11; 8:17) Bat smol savve bilong iumi abaotem universe hem muvim iumi for praisem God for gudfala fasin bilong hem.
2. Long tingting bilong iu, wanem nao gudfala fasin?
2 Wanem nao gudfala fasin? Hem fasin wea stret evribit, or hae fasin. Nomata olsem, hem moa samting winim wei for no duim nogud fasin. Gudfala fasin, wanfala part bilong frut bilong spirit, hem fasin wea helpem man. (Galatians 5:22, 23) Iumi showimaot gudfala fasin taem iumi duim gudfala samting long nara pipol. Long disfala system, samting wea samfala pipol ting hem gud hem samting wea nara pipol ting hem nogud. Bat, sapos iumi laek for enjoyim peace and hapi living, wanfala mark bilong gudfala fasin nomoa mas stap. Hu nao fit for putim disfala mark?
3. Wanem nao Genesis 2:16, 17 showimaot abaotem mark bilong gudfala fasin?
3 God nao putim mark bilong gudfala fasin. Long start long history bilong olketa man, Jehovah nao wan wea givim disfala komand long first man: “From evri tree bilong garden iu savve kaikai. Bat long datfala tree bilong savve long gud and nogud samting iu mas no kaikai from hem, from long day wea iu kaikai from hem iu mas dae.” (Genesis 2:16, 17) Tru nao, olketa man need for luk go long Creator for savve long gud and nogud samting.
Gudfala Fasin wea Iumi No Fit for Kasem
4. Wanem nao God duim finis for olketa man start from taem wea Adam sin?
4 Hope bilong olketa man for hapi olowe long perfect laef hem stap insaed danger taem Adam sin and no want for luksavve hao God nao garem raet for putim olketa mark bilong gudfala fasin. (Genesis 3:1-6) Nomata olsem, bifor olketa pikinini bilong Adam born witim wei for sin and dae, God talem profesi abaotem perfect Seed wea bae kam. Taem Jehovah story long “firstfala snek,” Satan datfala Devil, Jehovah sei: “Mi bae putim fasin for heit midolwan long iu and long woman and midolwan long seed bilong iu and seed bilong hem. Hem bae killim iu long hed and iu bae killim hem long leg.” (Revelation 12:9; Genesis 3:15) Hem purpose bilong Jehovah for baem bak olketa man wea sin. Jehovah showimaot gudfala fasin wea iumi no fit for kasem taem hem mekem arrangement for salvation for olketa wea showimaot faith long ransom sakrifaes bilong Son bilong hem.—Matthew 20:28; Romans 5:8, 12.
5. Nomata iumi born witim heart wea saedem nogud samting, why nao iumi savve showimaot gudfala fasin long samfala wei?
5 Tru, from sin bilong Adam, iumi born witim heart wea saedem nogud samting. (Genesis 8:21) Bat iumi hapi bikos Jehovah helpem iumi for showimaot gudfala fasin long samfala wei. Wei for go ahed lanem olketa samting from holy raeting bilong hem, hem ‘mekem iumi wise for salvation’ and ‘redyim iumi for duim evri gudfala waka’ and tu hem mekem iumi fit for duim samting wea gud long eye bilong hem. (2 Timothy 3:14-17) Bat, for kasem gudfala samting from Bible instruction and for showimaot gudfala fasin, iumi mas garem tingting bilong man wea raetem psalm, wea sing olsem: “Iu [Jehovah] gud long mi and go ahed for duim gud samting. Teachim mi olketa law bilong iu.”—Psalm 119:68.
Gudfala Fasin Bilong Jehovah Kasem Praise
6. Bihaen King David tekem ark bilong covenant long Jerusalem, olketa Levite singim wanfala song wea garem wanem toktok?
6 King David bilong Israel bifor luksavve long gudfala fasin bilong God and askem kaonsel bilong Hem. David hem sei: “Jehovah hem gud and stret. Dastawe hem teachim olketa sinner long wei bilong hem.” (Psalm 25:8) Insaed instruction from God wea olketa Israelite kasem hem tenfala important law—Tenfala Komandment—wea hem raetem long tufala ston and wea olketa keepim insaed wanfala holy box wea garem nem ark bilong covenant. Bihaen David tekem kam datfala Ark long Jerusalem, kapitol taon bilong Israel, olketa Levite singim wanfala song wea garem disfala toktok: “Talem thankiu long Jehovah, iufala pipol, bikos hem gud, from loving-kaeness bilong hem stap for olowe.” (1 Chronicles 16:34, 37-41) Hem masbi naes tumas for herem datfala toktok bilong olketa Levite wea singsing!
7. Wanem nao happen bihaen olketa tekem kam Ark insaed Most Holy and bihaen dedication prea bilong Solomon?
7 Sem toktok bilong praise hem kamaot strong long dedication bilong temple bilong Jehovah wea Solomon, son bilong David hem buildim. Bihaen olketa putim ark bilong covenant insaed Most Holy rum bilong niu temple hia, olketa Levite start for praisem Jehovah, “bikos hem gud, bikos loving-kaeness bilong hem stap for olowe.” Long datfala taem, long mirakol wei, temple hem fulap witim wanfala cloud, and diswan piksarem wei wea Jehovah stap long there. (2 Chronicles 5:13, 14) Bihaen dedication prea bilong Solomon, “fire kamdaon from heven and bonem datfala bone offering and olketa sakrifaes.” Taem olketa lukim diswan, ‘evri son bilong Israel . . . stretawe baodaon and feis bilong olketa tasim graon and olketa baodaon and talem thankiu long Jehovah, “bikos hem gud, bikos loving-kaeness bilong hem stap for olowe.” ’ (2 Chronicles 7:1-3) Bihaen festival wea go ahed for 14-fala day, olketa Israelite go bak long haos bilong olketa and olketa “hapi and feel gud insaed heart long evri gudfala samting wea Jehovah duim for David and for Solomon and for pipol bilong hem Israel.”—2 Chronicles 7:10.
8, 9. (a) Nomata olketa Israelite praisem Jehovah for gudfala samting wea hem duim, wanem nao olketa duim bihaen? (b) Jeremiah profesi abaotem wanem samting wea bae kasem Jerusalem, and hao nao datfala profesi hem fulfill?
8 Sorre tumas, olketa Israelite no go ahed for live followim singsing bilong praise wea olketa talem for God. Gogo, pipol bilong Judah ‘givim glory long Jehovah witim mouth bilong olketa nomoa.’ (Isaiah 29:13) Olketa no followim olketa mark bilong God saed long gudfala fasin, bat olketa start for duim samting wea nogud. And wanem nogud samting nao olketa duim? Olketa worshipim idol, duim dirty fasin, spoelem olketa wea poor, and duim olketa narafala nogud sin! From diswan, Jerusalem hem distroe and pipol bilong Judah go olsem prisoner long Babylon long 607 B.C.E.
9 So God disciplinem pipol bilong hem. Nomata olsem, thru long profet Jeremiah, hem talem profesi abaotem wei wea Jerusalem bae herem moa voice bilong pipol wea sei: “Praisem Jehovah bilong olketa army, from Jehovah hem gud; loving-kaeness bilong hem for olowe!” (Jeremiah 33:10, 11) And datwan barava happen. Bihaen 70 year wea datfala land hem stap emti, long 537 B.C.E., wanfala sekson bilong olketa Jew go bak long Jerusalem. (Jeremiah 25:11; Daniel 9:1, 2) Olketa buildim moa datfala altar long ples wea temple hem stap bifor long Maunt Moriah and start for offerim olketa sakrifaes long there. Olketa leim faondeson bilong temple bihaen mek-tu year wea olketa go bak. Datwan hem taem bilong bigfala hapi! Ezra hem sei: “Taem olketa wea build leim faondeson bilong temple bilong Jehovah, then olketa priest wea werem kaleko for waka, witim olketa trumpet, and olketa Levite son bilong Asaph, witim olketa cymbal standap for praisem Jehovah followim samting wea David king bilong Israel talem. And olketa start for duim samting long wei for praisem and givim thankiu long Jehovah, ‘from hem gud, from loving-kaeness bilong hem long Israel hem stap for olowe.’”—Ezra 3:1-11.
10. Wanem important toktok nao Psalm 118 start and finis witim?
10 Semkaen toktok bilong praise abaotem olketa gudfala samting wea Jehovah duim hem stap insaed samfala psalm. Wanfala nao hem Psalm 118, wea olketa Israelite famili singim for finisim Passover. Datfala psalm hem start and finis witim disfala toktok: “Givim thankiu long Jehovah, iufala pipol, from hem gud tumas; from loving-kaeness bilong hem hem for olowe.” (Psalms 118:1, 29) Maet diswan hem lastfala singsing bilong praise wea Jesus Christ singim witim olketa faithful aposol bilong hem long naet bifor hem dae long 33 C.E.—Matthew 26:30.
“Plis, Mekem Mi Lukim Glory Bilong Iu”
11, 12. Taem Moses lelebet lukim glory bilong God, wanem toktok nao hem herem?
11 Story abaotem wei wea gudfala fasin and loving-kaeness bilong Jehovah join tugeta hem kamap planti handred year bifor taem bilong Ezra. No longtaem bihaen olketa Israelite worshipim gold buluka long wilderness and olketa wea duim rong dae, Moses askem Jehovah olsem: “Plis, mekem mi lukim glory bilong iu.” From hem savve Moses bae dae sapos hem lukim feis bilong Hem, Jehovah sei: “Mi bae mekem evri gudfala fasin bilong mi go front long feis bilong iu.”—Exodus 33:13-20.
12 Gudfala fasin bilong Jehovah hem go front long feis bilong Moses long next day long Maunt Sinai. Long datfala taem Moses lelebet lukim glory bilong God and herem disfala toktok: “Jehovah, Jehovah, God wea showimaot mercy and kaenfala fasin, slow for kros and wea fulap witim loving-kaeness and truth, keepim loving-kaeness for olketa thousand, forgivim mistek and rong and sin, bat hem bae no letem man wea duim rong for missim panis, hem bae givim panis for rong bilong olketa dadi long olketa son and olketa granson, long mek-thri genereson and long mek-foa genereson.” (Exodus 34:6, 7) Olketa toktok hia showimaot hao gudfala fasin bilong Jehovah hem join witim loving-kaeness bilong hem and olketa nara part long fasin bilong hem. Wei for lukluk long olketa hia bae helpem iumi for showimaot gudfala fasin. Firstaem bae iumi lukluk long fasin wea kamap tufala taem long disfala nambawan toktok abaotem gudfala fasin bilong God.
“God . . . wea Fulap Witim Loving-kaeness”
13. Long toktok abaotem gudfala fasin bilong God, wanem fasin nao hem talem tufala taem, and why nao diswan hem fitim?
13 “Jehovah [hem] God . . . wea falap witim loving-kaeness . . . , keepim loving-kaeness for olketa thousand.” Hebrew word wea olketa transleitim “loving-kaeness” hem minim tu “loyal love.” Hem nao only fasin wea kamap tufala taem insaed toktok wea God talem long Moses. Hem barava fitim bikos main fasin bilong Jehovah hem love! (1 John 4:8) Disfala toktok bilong praise long Jehovah “from hem gud tumas; from loving-kaeness bilong hem hem for olowe,” hem mekhae long disfala fasin.
14. Hu nao barava enjoyim gudfala fasin and loving-kaeness bilong God?
14 Wanfala samting wea showimaot gudfala fasin bilong Jehovah nao hem wei wea hem “fulap witim loving-kaeness.” Diswan hem barava showaot long loving kea wea hem showimaot for olketa faithful servant bilong hem wea dedicate. (1 Peter 5:6, 7) Olsem olketa Witness bilong Jehovah savve talem, hem “keepim loving-kaeness” for olketa wea lovem and servem hem. (Exodus 20:6) Nation bilong Israel no kasem nao loving-kaeness or loyal love bilong Jehovah bikos olketa rejectim Son bilong hem. Bat gudfala fasin and loyal love bilong God for olketa faithful Christian bilong evri nation bae stap for olowe.—John 3:36.
Jehovah—Showimaot Mercy and Kaenfala Fasin
15. (a) Toktok wea Moses herem long Maunt Sinai hem start witim wanem toktok? (b) Wanem nao insaed mercy?
15 Toktok wea Moses herem long Maunt Sinai hem start witim disfala toktok: “Jehovah, Jehovah, God wea showimaot mercy and kaenfala fasin.” Hebrew word wea olketa transleitim “mercy” maet minim “bele” and hem barava join witim toktok “basket bilong pikinini.” So insaed mercy hem olketa feeling bilong love wea stap deep insaed man. Bat moa samting hem insaed mercy winim trufala wei for feel sorre. Hem shud muvim iumi for duim samting for helpem olketa wea safa. Olsem example, olketa loving Christian elder lukim need for showimaot mercy long olketa nara brata and sista, ‘showimaot mercy witim hapi’ long taem wea hem fitim.—Romans 12:8; James 2:13; Jude 22, 23.
16. Why nao iumi fit for sei Jehovah hem kaenfala?
16 Gudfala fasin bilong God hem showaot tu long kaenfala wei bilong hem. Man wea kaen hem “tingim feeling bilong narawan” and showimaot ‘kaenfala fasin wea muvim olketa wea kasem, especially olketa wea anda long hem, for tinghae long hem.’ Jehovah nao hem nambawan example bilong kaenfala fasin taem hem deal witim olketa faithful servant bilong hem. Olsem example, thru long olketa angel, long kaenfala wei God strongim olo profet Daniel and talem young girl Mary abaotem privilege wea hem garem for bornem Jesus. (Daniel 10:19; Luke 1:26-38) Olsem pipol bilong Jehovah, iumi tinghae tumas long kaenfala wei bilong hem taem hem deal witim iumi thru long olketa page bilong Bible. Iumi praisem hem for wei wea hem showimaot gudfala fasin and trae for kaen taem iumi deal witim nara pipol. Taem olketa wea garem spiritual mark stretem wanfala brata or sista “witim kwaet fasin,” olketa trae for isisi, and kaen.—Galatians 6:1.
God wea Slow for Kros
17. Why nao iumi hapi from Jehovah hem “slow for kros”?
17 “God wea . . . slow for kros.” Toktok hia hem strongim narafala saed bilong gudfala fasin bilong Jehovah. Jehovah hem patient witim olketa wik point bilong iumi and givim iumi taem for winim olketa bigfala wik point and muv ahed long spiritual wei. (Hebrews 5:12–6:3; James 5:14, 15) Patient fasin bilong God helpem tu olketa wea no kamap worshiper bilong hem yet. Olketa garem taem yet for lisin long message bilong Kingdom and repent. (Romans 2:4) Bat, nomata Jehovah hem patient, samfala taem gudfala fasin bilong hem muvim hem for showim kros bilong hem, olsem hem duim taem olketa Israelite worshipim gold buluka long Maunt Sinai. Klosap nao kros bilong God bae showaot long wei wea moa big taem hem finisim wicked system bilong Satan.—Ezekiel 38:19, 21-23.
18. Long saed bilong truth, long wanem wei nao Jehovah and olketa man wea lead olketa difren?
18 “Jehovah [hem] God wea . . . fulap witim truth.” Jehovah hem difren from olketa man wea lead, wea talem enikaen promis bat fail for duim! Bat, olketa wea worshipim Jehovah savve depend long evri samting wea stap insaed Word bilong hem. From God hem fulap witim truth, iumi savve evritaem trustim olketa promis bilong hem. From gudfala fasin bilong hem, Father bilong iumi long heven hem no fail for ansarem olketa prea bilong iumi for kasem spiritual truth taem hem givim kam staka truth.—Psalm 43:3; 65:2.
19. Wanem nambawan wei for showimaot gudfala fasin nao Jehovah showim for olketa sinner wea repent?
19 “Jehovah [hem] God wea . . . forgivim mistek and rong and sin.” From gudfala fasin bilong hem, Jehovah hem redy for forgivim olketa sinner wea repent. Iumi barava tinghae long wei wea loving Father bilong iumi long heven provaedem wei for forgivim iumi thru long sakrifaes bilong Jesus. (1 John 2:1, 2) Iumi barava hapi hao evriwan wea showimaot faith long ransom fit for garem gudfala wei for fren witim Jehovah, witim hope for laef olowe insaed niu world wea hem promisim. Olketa hia barava gudfala reason for praisem Jehovah for wei wea hem showimaot gudfala fasin long olketa man!—2 Peter 3:13.
20. Wanem pruv nao iumi garem hao God hem no acceptim wicked fasin?
20 “Bat [Jehovah] bae no letem man wea duim rong for missim panis.” Diswan hem narafala reason for praisem Jehovah for gudfala fasin bilong hem. Why nao olsem? Bikos wanfala important part bilong gudfala fasin hem for no ting smol long eni wicked fasin. And tu, “long taem wea Lord Jesus hem showaot from heven witim olketa strongfala angel bilong hem,” Jesus bae pei bak long “olketa wea no savve long God and olketa wea no obeyim gud nius.” Olketa bae “kasem panis for finis evribit.” (2 Thessalonians 1:6-9) Then olketa wea worshipim Jehovah wea stap laef bae enjoyim laef evribit and olketa wea no followim God wea “no lovem gudfala fasin” bae no spoelem olketa.—2 Timothy 3:1-3.
Followim Gudfala Fasin Bilong Jehovah
21. Why nao iumi shud showimaot gudfala fasin?
21 Iumi barava garem planti reason for praisem and sei thankiu long Jehovah for gudfala fasin bilong hem. Olsem olketa servant bilong hem waswe, fitim iumi for traem best for showimaot disfala fasin? Yes, bikos aposol Paul hem encouragem olketa Christian olsem: “Followim wei bilong God, olsem olketa pikinini wea hem lovem.” (Ephesians 5:1) Father bilong iumi long heven hem evritaem showimaot gudfala fasin, and iumi tu shud olsem.
22. Wanem nao iumi bae storyim long next article?
22 Sapos iumi dedicate long Jehovah witim full heart, bae iumi laekem tumas for followim gudfala fasin bilong hem. From iumi olketa pikinini bilong Adam wea sin, hem no isi for duim samting wea gud. Nomata olsem, long next article bae iumi lukim why iumi fit for showimaot gudfala fasin. Bae iumi lukluk long olketa difren wei wea iumi shud followim Jehovah—nambawan example bilong gudfala fasin.
Hao Nao Bae Iu Ansa?
• Wanem nao gudfala fasin?
• Wanem toktok from Bible nao mekhae long gudfala fasin bilong God?
• Wanem nao samfala samting wea showimaot gudfala fasin bilong Jehovah?
• Why nao iumi shud followim example bilong Jehovah for showimaot gudfala fasin?
[Piksa long page 12]
Jehovah disciplinem pipol bilong hem bifor bikos olketa no followim toktok bilong praise wea olketa talem
[Piksa long page 12]
Wanfala faithful sekson go bak long Jerusalem
[Piksa long page 13]
Moses herem nambawan toktok abaotem gudfala fasin bilong God
[Piksa long page 15]
Gudfala fasin bilong Jehovah hem showaot long samting wea hem talem insaed Bible