Laekem Tumas Samting wea Raeteous

“Iu laekem tumas samting wea raeteous.”​—HEB. 1:9.

1. Wanem nao bae helpem iumi for followim “stretfala wei”?

JEHOVAH iusim Bible and holy spirit for leadim pipol bilong hem long “stretfala wei.” (Ps. 23:3) Bat from iumi no perfect, samfala taem iumi duim samting wea no stret. Iumi mas waka hard for duim stretfala samting. Wanem nao bae helpem iumi for duim datwan? Olsem Jesus, iumi mas laekem tumas for duim stret samting.​—Readim Hebrews 1:9.

2. Wanem nao “stretfala wei” for iumi followim?

² Wanem nao “stretfala wei” for iumi followim? Hem nao standard bilong Jehovah wea raeteous. Long Hebrew and Greek languis, disfala word “raeteous” hem minim for barava followim stretfala wei. From Jehovah hem “raeteous,” olketa wea worshipim hem luksavve hem nomoa fit for disaedem stretfala wei for olketa followim.​—Jer. 50:7.

3. Wanem nao iumi savve duim for lane abaotem olketa samting wea God sei hem stret?

³ Taem iumi traem best for followim olketa raeteous standard bilong Jehovah datwan bae mekem hem hapi tumas. (Deut. 32:4) Firstaem iumi need for iusim Bible for lane abaotem Jehovah God. Taem iumi gohed lane abaotem hem, bae iumi fren gud witim hem and bae iumi laekem tumas samting wea God sei hem stret. (Jas. 4:8) Iumi mas followim wanem Bible talem tu taem iumi disaedem olketa important samting long laef.

Duim Samting wea God Sei Hem Stret

4. Wanem nao hem minim for duim samting wea God sei hem stret?

⁴ Readim Matthew 6:​33. Samting wea God sei hem stret hem minim for duim moa samting winim wei for preachim gud nius abaotem Kingdom. Wanem iumi duim evriday mas followim olketa standard bilong Jehovah mekem hem acceptim worship bilong iumi. Wanem nao iumi mas duim? Iumi mas “garem niufala wei wea fitim wanem God hem laekem and wea datwan hem barava raeteous and faithful.”​—Eph. 4:​24.

5. Wanem nao bae helpem iumi for no wikdaon?

⁵ Taem iumi trae hard for followim olketa raeteous standard bilong God, maet samfala taem iumi wikdaon from iumi garem olketa wik point. Wanem nao savve helpem iumi for no wikdaon and laekem tumas for duim stret samting? (Prov. 24:10) Iumi mas prea evritaem long Jehovah “witim full heart and strongfala faith.” (Heb. 10:19-​22) Nomata sapos iumi garem hope for go long heven or stap long earth, iumi showimaot faith long dae bilong Jesus Christ and waka wea hem duim olsem nambawan Hae Priest. (Rom. 5:8; Heb. 4:​14-​16) Aposol John sei: “Blood bilong . . . Jesus hem mekem iumi klin from evri sin bilong iumi.” (1 John 1:​6, 7) Bible sei: “Nomata olketa sin bilong iufala hem barava red, olketa bae kamap white olsem snow.” Jehovah duim nambawan samting taem hem givim Son bilong hem for dae for iumi!​—Isa. 1:​18.

Chekim Gud Evri Samting for Faet

6. Why nao hem important for chekim sapos iumi werem evri samting for faet?

⁶ Iumi mas evritaem werem ‘datfala samting for kavarem chest bilong iumi wea hem nao wei for raeteous.’ Hem wanfala long olketa important samting for faet wea God givim. (Eph. 6:​11, 14) Nomata iumi worshipim Jehovah for longtaem finis or just dedicate long hem, hem important for chekim evriday sapos iumi werem evri samting for faet. Why nao olsem? Bikos Jesus torowem Satan and olketa demon kam daon long earth. (Rev. 12:​7-​12) Satan kros tumas and hem savve lelebet taem nomoa stap for hem. Dastawe hem barava trae hard for spoelem pipol bilong God. Waswe, iu luksavve why hem important for werem ‘datfala samting for kavarem chest bilong iu wea hem nao wei for raeteous’?

7. Sapos iumi tinghae long ‘datfala samting for kavarem chest,’ wanem nao bae iumi duim?

⁷ Olketa soldia savve werem samting for kavarem chest for protectim heart bilong olketa. Iumi tu need for duim stret samting for protectim spiritual heart bilong iumi. From iumi no perfect, heart bilong iumi savve trikim iumi and mekem iumi for duim eni samting wea hem laekem. (Jer. 17:9) From heart bilong iumi savve laek for duim samting wea no stret, hem important for letem Jehovah lanem and disciplinem iumi. (Gen. 8:​21) Sapos iumi luksavve hem important for werem ‘datfala samting for kavarem chest,’ datwan bae helpem iumi for no chusim hapitaem wea God heitim, and for no garem tingting for laek duim nogud samting. Iumi bae no weistim staka taem for lukluk long television. Bat bae iumi trae hard for duim samting wea Jehovah hapi long hem. Nomata sapos samfala taem iumi tingim and duim nogud samting, iumi no givap. Jehovah bae helpem iumi for duim stret samting moa.​—Readim Proverbs 24:16.

8. Why nao iumi needim “datfala big shield wea hem nao faith”?

⁸ Nara part long olketa samting for faet hem “datfala big shield wea hem nao faith.” Diswan helpem iumi for “blokem olketa arrow bilong Satan wea laet long fire.” (Eph. 6:​16) Faith and love wea iumi garem for Jehovah bae helpem iumi for duim stret samting and kasem laef olowe. Taem iumi gohed for lovem Jehovah, datwan bae helpem iumi for tinghae long samting wea hem sei hem stret. Bat waswe long konsens bilong iumi? Hao nao konsens bilong iumi helpem iumi for laekem samting wea raeteous?

Garem Gudfala Konsens

9. Wanem gud samting nao iumi savve kasem from wei for garem gudfala konsens?

⁹ Taem iumi baptaes, iumi askem Jehovah for givim iumi “gudfala konsens.” (1 Pet. 3:​21) From iumi showimaot faith long dae bilong Jesus, blood bilong Jesus mekem iumi kasem forgiveness for olketa sin and for God acceptim iumi. Bat for gohed olsem iumi need for garem gudfala konsens. Sapos konsens bilong iumi pokem iumi, datwan showimaot hem waka gud and hem tingim yet olketa raeteous standard bilong Jehovah. (1 Tim. 4:2) Bat konsens savve helpem olketa wea laek for duim stret samting for duim nara samting.

10, 11. (a) Storyim experience wea showimaot why iumi mas followim konsens bilong iumi. (b) Why nao wei for laekem tumas samting wea raeteous mekem iumi hapi?

¹⁰ Taem iumi duim samting wea no stret, konsens bilong iumi savve judgem iumi. Tingim nogud samting wea wanfala young wan duim. Hem lukluk long olketa rabis piksa evritaem and start for smokem marijuana. Taem hem go long olketa meeting hem feel guilty and taem hem duim preaching waka, hem feel olsem hem laea for duim olketa samting hia. So hem no go nao long olketa meeting and hem stop for duim preaching waka. Hem sei: “Mi no tingim hao konsens bilong mi bae pokem mi long olketa samting wea mi duim.” Hem sei tu: “For fofala year mi duim krangge samting.” Then hem start for tingting for kam bak long truth. Hem prea and askem Jehovah for forgivim hem, nomata hem tingse Jehovah bae no herem prea bilong hem. Tenfala minute bihaen, mami bilong hem visitim hem and encouragem hem for go long olketa meeting. Hem go long Kingdom Hall and askem wanfala elder for study witim hem. Gogo hem baptaes and hem barava thankiu long wanem Jehovah duim for helpem hem.

¹¹ Tru tumas, iumi hapi taem iumi duim stret samting! Taem iumi gohed for lane and laekem tumas for duim stret samting, bae iumi hapi for duim wanem Jehovah laekem. And tingim, long future evriwan bae garem konsens wea tingim gud samting nomoa and olketa bae showimaot olketa perfect wei bilong God. So hem gud distaem for iumi barava lovem samting wea raeteous and mekem Jehovah hapi.​—Prov. 23:15, 16.

12, 13. Wanem nao iumi savve duim for garem gudfala konsens?

¹² Wanem nao iumi savve duim for garem gudfala konsens? Taem iumi studyim Bible and olketa buk bilong iumi, hem important for tingim “man wea raeteous hem ting raonem hao for ansa.” (Prov. 15:28) Tingim hao diswan savve helpem iumi taem iumi mas disaedem eni samting saed long waka for selen. Sapos iumi luksavve datfala waka bae mekem iumi for duim samting wea Bible stopem, staka long iumi bae kwiktaem followim wanem wakaman wea faithful and wise talem. Bat sapos iumi no sure datfala waka hem fitim olketa Christian, iumi shud ting raonem olketa Bible principle and prea abaotem olketa principle hia.a Diswan fitim olketa principle abaotem wei for no spoelem konsens bilong narawan. (1 Cor. 10:31-​33) Iumi shud tingim olketa principle abaotem wei wea iumi fren witim God. Sapos iumi fren gud witim Jehovah, bae iumi tingim diswan: ‘Sapos mi duim disfala waka, waswe, bae hem mekem Jehovah sorre?’​—Ps. 78:40, 41.

¹³ Taem iumi preparem Wastaoa Study or Kongregeson Bible Study, hem gud for ting raonem wanem iumi studyim. Waswe, iumi kwiktaem andalaenem ansa and go long next paragraf? Sapos hem nao wei bilong iumi for prepare, datwan bae no helpem iumi for garem gudfala konsens or laekem samting wea raeteous. Iumi need for study gud and ting raonem wanem iumi readim long Bible mekem iumi laek for duim stret samting. Iumi mas traem best bilong iumi for laekem samting wea raeteous!

Barava Laekem Samting wea Stret

14. Jehovah God and Jesus Christ laekem iumi for ting hao long worship bilong iumi?

¹⁴ Jehovah God and Jesus Christ laekem iumi for hapi taem iumi worshipim Jehovah. Wanem nao bae mekem iumi hapi? Hem nao wei for laekem tumas samting wea stret! Long Sermon long Maunten, Jesus sei: “Olketa wea barava laekem samting wea stret bae hapi, bikos olketa bae satisfae.” (Matt. 5:6) Wanem nao diswan minim for olketa wea laek duim stret samting?

15, 16. Wanem nao savve mekem man for satisfae?

¹⁵ World hem stap long paoa bilong Satan. (1 John 5:​19) Sapos iumi readim niuspepa long eni ples long world, bae iumi lukim staka report abaotem barava nogud samting wea pipol duim. Taem man wea raeteous lukim nara man duim nogud samting, datwan savve mekem hem feel nogud. (Eccl. 8:9) Iumi luksavve Jehovah nomoa savve mekem olketa wea barava laekem samting wea stret for satisfae. Klosap nao olketa nogud pipol bae finis and olketa wea laekem tumas samting wea raeteous bae no kasem nogud samting from olketa. (2 Pet. 2:​7, 8) Datwan bae gud tumas!

¹⁶ From iumi worshipim Jehovah and followim Jesus Christ, iumi luksavve olketa wea barava laekem samting wea stret “bae satisfae.” Olketa bae barava satisfae taem promis bilong God abaotem niu skae and niu earth kamap tru wea “evri samting bae raeteous.” (2 Pet. 3:​13) So nomata pipol safa and raf fasin hem kamap big distaem, iumi shud no sapraes or wikdaon. (Eccl. 5:8) Jehovah luksavve long evri nogud samting wea gohed and klosap nao bae hem sevem pipol wea laekem tumas stret samting.

Iu Bae Kasem Gud Samting

17. Wanem nao samfala gud samting wea iumi bae kasem taem iumi duim stret samting?

¹⁷ Psalm 146:8 storyim gud samting wea iumi bae kasem taem iumi duim stret samting. Hem sei: “Jehovah hem lovem olketa wea raeteous.” Tingim, Jehovah lovem iumi bikos iumi laekem tumas samting wea raeteous! Iumi trustim Jehovah bae provaedem wanem iumi needim sapos Kingdom hem first samting long laef bilong iumi. (Readim Psalm 37:25; Proverbs 10:3.) Gogo pipol wea laek for duim stret samting nomoa bae stap long full earth. (Prov. 13:22) Olketa wea duim stret samting and wea garem hope for stap long earth bae kasem laef olowe and stap long paradaes. Distaem tu, olketa wea followim olketa raeteous standard bilong God garem peace wea mekem olketa for stap gud witim famili and olketa long kongregeson.​—Phil. 4:​6, 7.

18. Wanem nao iumi mas gohed for duim taem iumi weitim day bilong Jehovah?

¹⁸ Taem iumi weitim bigfala day bilong Jehovah, iumi mas gohed for duim stret samting. (Zeph. 2:​2, 3) So gohed showimaot iu laekem tumas olketa raeteous standard bilong Jehovah God. Iumi mas evritaem werem ‘datfala samting for kavarem chest bilong iumi wea hem nao wei for raeteous’ for protectim spiritual heart bilong iumi. Iumi need for garem gudfala konsens wea bae mekem God hapi and iumi tu.​—Prov. 27:11.

19. Wanem nao iumi shud disaed strong for duim, and wanem nao bae iumi storyim long next study?

¹⁹ Jehovah hem “lukluk gud long evri samting long world, mekem hem savve givim paoa long olketa wea lovem hem long full heart.” (2 Chron. 16:9) Datwan barava strongim iumi for duim stret samting nomata staka nogud samting gohed and pipol raf fogud distaem! Hem tru, stretfala samting wea iumi duim maet mekem pipol wea no fren witim God for tok spoelem iumi. Bat iumi kasem gud samting taem iumi followim olketa raeteous standard bilong Jehovah. (Isa. 48:17; 1 Pet. 4:4) So disaed strong for laek duim stret samting evritaem. Diswan minim tu for heitim wei for no obey. Long next study, bae iumi storyim wanem nao datwan minim.

[Footnotes]

Wanem Nao Ansa Bilong Iu?

• Why nao wei for tinghae long dae bilong Jesus bae helpem iumi for laekem tumas samting wea raeteous?

• Why nao hem important for werem ‘datfala samting for kavarem chest wea hem nao wei for raeteous’?

• Wanem nao iumi savve duim for garem gudfala konsens?

[Piksa long page 26]

Gudfala konsens bae helpem iumi for disaedem stretfala samting saed long waka