Wei for Aftarem Raeteous Fasin Bae Protectim Iumi

“So, gohed for aftarem . . . raeteous fasin bilong [God] firstaem.”—MATTHEW 6:33.

1, 2. Wanem nao samting wea wanfala young Christian disaedem, and why nao hem disaedem datwan?

WANFALA young Christian woman long Asia hem waka olsem secretary long wanfala office bilong gavman. Hem savve waka gud tumas, kam early for waka, and no westem taem. Waka wea hem duim hem for lelebet taem nomoa, and hem kasem taem for boss story raonem datfala waka. Boss bilong datfala department talem disfala young sista hao hem willing for letem hem duim disfala waka for olowe, and tu, givim hem position wea moa hae, sapos hem duim dirty fasin witim hem. Sista hia no hol bak for talem klia hao hem barava les for duim datwan, nomata datwan mekem hem mas lusim datfala waka.

² Waswe, datfala young Christian sista garem stretfala tingting? Ia, hem followim evribit disfala toktok bilong Jesus: “Gohed for aftarem . . . raeteous fasin bilong [God] firstaem.” (Matthew 6:33) Long tingting bilong disfala sista, wei for followim olketa raeteous principle hem moa important winim wei for kasem olketa material samting thru long dirty fasin.—1 Corinthians 6:18.

Why Hem Important for Garem Raeteous Fasin

3. Wanem nao raeteous fasin?

³ Disfala toktok “raeteous fasin” hem mekem iumi tingim wei for faithful and honest. Insaed Bible, datfala Greek and Hebrew word wea olketa transleitim olsem raeteous fasin hem savve minim “wei for duim stret samting.” Diswan no minim wei for man markem hemseleva followim olketa standard bilong hemseleva. (Luke 16:15) Bat, hem wei for duim samting wea standard bilong Jehovah sei hem stret. Diswan hem raeteous fasin bilong God.—Romans 1:17; 3:21.

4. Why nao hem important for wanfala Christian garem raeteous fasin?

⁴ Why nao raeteous fasin hem important? Hem bikos datfala “raeteous God,” Jehovah, hem acceptim pipol bilong hem taem olketa duim olketa raeteous samting. (Psalm 4:1; Proverbs 2:20-22; Habakkuk 1:13) Eniwan wea duim samting wea no raeteous hem hard for fren gud witim hem. (Proverbs 15:8) Dastawe aposol Paul sei olsem long Timothy: “Ranawe from olketa samting wea young pipol wantem, bat aftarem raeteous fasin” and olketa nara important fasin. (2 Timothy 2:22) And tu, dastawe taem Paul raetem datfala list bilong olketa samting wea part long datfala spiritual kaleko for faet, hem sei iumi mas “werem chest kava bilong raeteous fasin.”—Ephesians 6:14.

5. Hao nao man wea no perfect fit for aftarem raeteous fasin?

⁵ Hem tru, no eni man savve raeteous evribit. Evriwan kasem sin from Adam. Diswan minim evriwan sin and no raeteous start from taem wea olketa born. Bat, Jesus sei iumi mas aftarem raeteous fasin. Hao nao iumi fit for duim datwan? Iumi fit for duim diswan bikos Jesus givim perfect laef bilong hem olsem wanfala ransom for iumi, and sapos iumi showimaot faith long datfala sakrifaes, Jehovah hem willing for forgivim olketa sin bilong iumi. (Matthew 20:28; John 3:16; Romans 5:8, 9, 12, 18) So, taem iumi lanem olketa raeteous standard bilong Jehovah and barava trae hard for followim and prea for help for winim olketa wik point bilong iumi, disfala ransom hem mekem Jehovah fit for acceptim worship bilong iumi. (Psalm 1:6; Romans 7:19-25; Revelation 7:9, 14) Tru nao, diswan barava mekem iumi kasem comfort!

Raeteous Nomata Iumi Stap Insaed World wea No Raeteous

6. Why nao world hem wanfala danger ples for olketa Christian bifor?

⁶ Taem olketa disaepol bilong Jesus kasem assignment for witness for hem “go kasem evri farawe ples long earth,” olketa feisim wanfala hard samting. (Acts 1:8) Full territory wea olketa mas witness long hem, “stap anda long paoa bilong wicked wan,” Satan. (1 John 5:19) World hem fulap witim wicked fasin bilong Satan, and olketa Christian mas stap midolwan olketa samting hia wea isi for affectim olketa. (Ephesians 2:2) Disfala world hem wanfala danger ples for olketa. Only samting wea bae mekem olketa savve gohed strong and faithful hem wei for aftarem raeteous fasin bilong God firstaem. Plande long olketa Christian bifor gohed for faithful, bat samfala lusim datfala “road bilong raeteous fasin.”—Proverbs 12:28; 2 Timothy 4:10.

7. Olketa wanem responsibility nao mekem Christian mas strong for againstim olketa nogud samting long world?

⁷ Waswe, world hem kamap lelebet gud distaem for olketa Christian? Barava nomoa nao! Hem nogud winim taem bilong olketa first Christian bifor. And tu, Jesus torowem Satan kam daon long earth finis and hem gohed for heitim and faet againstim olketa anointed Christian wea olketa part bilong datfala ‘seed bilong woman, wea gohed for obeyim olketa komandment bilong God and wea duim waka for witness abaotem Jesus.’ (Revelation 12:12, 17) Satan attakim tu olketa wea sapotim datfala “seed.” Nomata olsem, olketa Christian kanduit for ranawe from disfala world. Nomata olketa no part bilong world, olketa mas gohed for stap insaed. (John 17:15, 16) And tu, olketa mas gohed for preach insaed disfala world mekem olketa savve faendem pipol wea garem gudfala heart and teachim olketa for kamap olketa disaepol bilong Christ. (Matthew 24:14; 28:19, 20) So, from olketa Christian hard for stap klia evribit from olketa nogud samting long disfala world, olketa mas strong for againstim. Bae iumi story raonem fofala long olketa nogud samting wea savve affectim olketa Christian.

Wei wea Dirty Fasin Hem Wanfala Trap

8. Why nao olketa Israelite start for worshipim olketa god bilong olketa long Moab?

⁸ Klosap long end bilong 40 year wea olketa Israelite wakabaot insaed wilderness, plande lusim road bilong raeteous fasin. Olketa lukim plande samting wea Jehovah duim for sevem olketa, and olketa klosap nao for go insaed long datfala Promis Land. Nomata olsem, olketa start for servem olketa god bilong olketa long Moab. Why nao olsem? Olketa letem “samting wea body wantem” for winim olketa. (1 John 2:16) Bible hem sei: “Olketa pipol start for duim sex witim olketa dota bilong Moab.”—Numbers 25:1.

9, 10. Wanem nao samfala samting distaem wea showimaot hao hem barava important for no forgetim hao olketa nogud samting wea body wantem savve spoelem man?

⁹ Datfala samting wea happen hem showimaot hao sapos man hem no keakea bae olketa nogud samting wea body wantem savve spoelem hem. Iumi shud lane from example bilong olketa, especially bikos klosap evri pipol distaem ting long dirty fasin olsem samting wea olraet nomoa. (1 Corinthians 10:6, 8) Wanfala report from United States hem sei: “Kasem 1970, law long evri state long America tambuim wei for stap tugeta bat no marit. Distaem, eniwan nomoa savve stap olsem. Winim haf long evri pipol wea firstaem bilong olketa for marit, olketa savve stap tugeta bifor olketa marit.” Kaen wei olsem for stap tugeta and olketa nogud fasin hem no kamap long wanfala kantri nomoa. Diskaen fasin hem kamap evriwea long world, and sorre tumas bikos samfala Christian wea followim disfala fasin bilong world olketa lusim tu gudfala nem wea olketa garem insaed Christian kongregeson.—1 Corinthians 5:11.

¹⁰ And nara samting moa, pipol distaem barava mekhae long dirty fasin. Olketa movie and television program mekem man tingse hem olraet nomoa for olketa young wan duim sex bifor olketa marit. Olketa laek showimaot tu hao hem olraet nomoa for man duim sex witim nara man. Plande television program no hol bak for showim pipol taem olketa duim sex. Long Internet tu hem isi for pipol lukim olketa piksa wea showim pipol taem olketa duim sex. Olsem example, wanfala man for raet long niuspepa storyim hao son bilong hem wea seven year hem kam bak from skul and storyim long hem hao wanfala skul fren bilong hem lukim olketa naked woman wea duim sex long Internet. Dadi hia hem seke tumas taem hem herem datwan, bat tingim, plande pikinini distaem maet lukluk long olketa piksa olsem bat no talem parents bilong olketa. And tu, plande parents no savve wanem kaen movie nao pikinini lukim or wanem video game nao pikinini bilong olketa pleim. Plande video game savve showim barava nogud dirty fasin, and tu, olketa samting wea join witim olketa demon, and raf fasin.

11. Hao nao wanfala famili savve protectim olketa seleva from disfala world wea fulap witim olketa dirty samting?

¹¹ Hao nao wanfala famili fit for againstim kaen samting olsem wea world kolem “hapitaem”? Olketa savve duim diswan thru long wei for aftarem raeteous fasin bilong God firstaem, and for no join witim eni samting saed long nogud fasin. (2 Corinthians 6:14; Ephesians 5:3) Parents wea evritaem chekim gud samting wea olketa pikinini bilong olketa duim and putim love for olketa raeteous law bilong Jehovah insaed heart bilong olketa pikinini, bae strongim famili for againstim olketa dirty piksa, olketa video game wea showim sex, movie wea mekhae long dirty fasin, and olketa nara nogud temptation.—Deuteronomy 6:4-9.a

Wei wea Hevi From Community Hem Wanfala Danger

12. Wanem problem nao kamap long taem bilong olketa aposol?

¹² Taem Paul hem stap long Lystra long Asia Minor, hem duim mirakol for healim wanfala man. Bible hem sei: “Datfala crowd wea lukim wanem Paul duim, olketa tok big and sei olsem long Lycaonian languis: ‘Olketa god kamap olsem olketa man and olketa kam daon long iumi!’ And olketa kolem Barnabas hem Zeus, and Paul olketa kolem Hermes, from hem nao man wea story long olketa.” (Acts 14:11, 12) Bihaen, olketa sem pipol hia laek for killim dae Paul and Barnabas. (Acts 14:19) Diswan showimaot klia hao tingting bilong pipol long community isi for affectim evriwan. Hem luk olsem samfala long datfala ples gohed for ting strong yet long samfala kastom biliv bihaen olketa kamap Christian. Long leta bilong hem for olketa Christian long Colossae, Paul hem talem warning abaotem wei for “worshipim olketa angel.”—Colossians 2:18.

13. Wanem nao samfala kastom wea olketa Christian mas stap klia long hem, and hao nao olketa savve kasem strong for duim datwan?

¹³ Distaem, olketa tru Christian tu need for stap klia long wei for followim kastom wea kamaot from olketa idea bilong false religion and wea againstim olketa Christian principle. Olsem example, samfala kantri followim samfala kastom long taem wea man hem born and taem man hem dae wea join witim wei for bilivim spirit bilong man hem gohed laef bihaen man dae. (Ecclesiastes 9:5, 10) Long samfala kantri olketa savve followim wanfala kastom for spoelem private part bilong olketa young gele thru long wei for katem.b No eni need stap for duim diswan, and hem kosim bigfala pain and spoelem olketa gele. Hem no fitim tu samting wea Bible talem saed long wei wea Christian parents mas showimaot love for pikinini bilong olketa. (Deuteronomy 6:6, 7; Ephesians 6:4) Hao nao olketa Christian savve strong for againstim hevi wea olketa kasem from community and no duim moa olketa samting olsem? Olketa savve duim diswan thru long wei for trustim Jehovah evribit. (Psalm 31:6) Disfala raeteous God bilong iumi bae strongim and lukaftarem olketa wea tok olsem insaed heart bilong olketa: “Iu nao sef ples and strong bilong mi, God bilong mi, wea mi trustim.”—Psalm 91:2; Proverbs 29:25.

No Forgetim Jehovah

14. Wanem warning nao Jehovah talem long olketa Israelite no longtaem bifor olketa go insaed Promis Land?

¹⁴ No longtaem bifor olketa Israelite go insaed Promis Land, Jehovah talem warning long olketa for no forgetim hem. Hem sei: “Keakea long iuseleva nogud iu forgetim God bilong iu Jehovah, wea bae mekem iu no followim olketa komandment bilong hem and olketa judicial disison and law wea mi talem for iufala tuday; from nogud iufala kaikai and satisfaem iuseleva, and iu buildim olketa naes haos and stap insaed, and olketa buluka bilong iu and sheep hem kamap staka, and iu kasem plande silver and gold, and evri samting iu garem hem kamap staka; and then heart bilong iufala hem kamap praod and iu forgetim God bilong iu Jehovah.”—Deuteronomy 8:11-14.

15. Hao nao iumi savve mek sure iumi no forgetim Jehovah?

¹⁵ Waswe, eni samting olsem savve kamap distaem tu? Ia, diswan savve kamap taem iumi no duim olketa samting wea moa important firstaem. Bat, sapos iumi aftarem raeteous fasin bilong God firstaem, bae klin worship nao hem main important samting insaed laef bilong iumi. Bae iumi duim samting wea Paul encouragem iumi for duim, hem nao for ‘baem bak taem wea iumi iusim for duim nara samting’ and barava tingim hao iumi mas no delay for duim ministry bilong iumi. (Colossians 4:5; 2 Timothy 4:2) Bat, sapos wei for relax or aftarem samting for mekem iumiseleva hapi hem moa important long iumi winim wei for attendim olketa meeting and share long field service, hem bae olsem iumi forgetim Jehovah from iumi mekem hem kamap mek-tu samting long laef bilong iumi. Paul hem sei insaed long olketa last day, olketa man bae “lovem hapitaem winim wei for lovem God.” (2 Timothy 3:4) Olketa tru Christian need for lukluk gud long olketa seleva evritaem for mek sure olketa kaen tingting olsem hem no pullim olketa.—2 Corinthians 13:5.

Keakea Long Tingting for Independent

16. Wanem tingting wea no stret nao Eve and olketa long taem bilong Paul showimaot?

¹⁶ Long Eden, Satan hem barava win for mekius long selfish feeling bilong Eve for laek independent. Eve laek for disaedem seleva wanem nao stret and no stret. (Genesis 3:1-6) Long taem bilong olketa aposol, samfala long kongregeson long Corinth garem tu diskaen independent tingting. Olketa tingse olketa garem savve winim Paul, dastawe Paul iusim disfala toktok, “stael aposol” taem hem story abaotem olketa.—2 Corinthians 11:3-5; 1 Timothy 6:3-5.

17. Hao nao iumi savve stap klia long wei for garem independent tingting?

¹⁷ Long world distaem, plande pipol “strong for followim tingting bilong olketa seleva, and barava praod tumas.” Diskaen wei for tingting hem affectim samfala Christian. Gogo, samfala barava againstim truth. (2 Timothy 3:4; Philippians 3:18) Saed long klin worship, hem important tumas for iumi depend long Jehovah for leadim iumi and for waka tugeta witim “faithful and wise slave,” and olketa elder long kongregeson. Datwan hem wanfala wei for aftarem raeteous fasin, and hem savve protectim iumi from wei for garem independent tingting. (Matthew 24:45-47; Psalm 25:9, 10; Isaiah 30:21) Datfala sekson bilong olketa anointed wan hem “olsem wanfala post and sapot bilong truth.” Jehovah hem givim diswan for protectim and leadim iumi. (1 Timothy 3:15) Wei for luksavve hao waka bilong olketa hem barava important bae helpem iumi for no duim eni samting from iumi ‘tinghae long iumiseleva’ bat bae iumi hambol and stap anda long raeteous will bilong Jehovah.—Philippians 2:2-4; Proverbs 3:4-6.

Followim Example Bilong Jesus

18. Iumi kasem encouragement for followim example bilong Jesus long olketa wanem wei?

¹⁸ Bible hem sei olsem abaotem Jesus: “Iu lovem raeteous fasin, and iu heitim wicked fasin.” (Psalm 45:7; Hebrews 1:9) Datwan hem nambawan example for iumi followim! (1 Corinthians 11:1) Jesus no just savve long olketa stretfala standard bilong Jehovah, bat hem lovem olketa tu. So taem Satan testim hem long wilderness, Jesus no hol bak for rejectim datwan and hem strong for no laek lusim “road bilong raeteous fasin.”—Proverbs 8:20; Matthew 4:3-11.

19, 20. Olketa wanem gud samting nao kamap taem man aftarem raeteous fasin?

¹⁹ Tru nao, olketa samting wea body wantem wea no raeteous hem savve strong tumas. (Romans 7:19, 20) Nomata olsem, sapos iumi barava tinghae long raeteous fasin, bae diswan strongim iumi for againstim olketa wicked fasin. (Psalm 119:165) Wei for barava lovem raeteous fasin bae protectim iumi taem iumi feisim temptation for duim rong samting. (Proverbs 4:4-6) No forgetim hao evritaem iumi letem olketa temptation for winim iumi, iumi mekem Satan win. Hem barava moabeta sapos iumi strong for againstim hem and mekem Jehovah nao win!—Proverbs 27:11; James 4:7, 8.

²⁰ From olketa aftarem raeteous fasin, olketa tru Christian “fulap witim raeteous frut, wea kam thru long Jesus Christ, and wea givim glory and praise long God.” (Philippians 1:10, 11) Olketa “werem olsem kaleko olketa niu fasin wea God wakem fitim will bilong Hem long trufala raeteous fasin and loyal fasin.” (Ephesians 4:24) Jehovah nao ownim olketa and full laef bilong olketa hem for servem hem, no for mekem olketa seleva hapi. (Romans 14:8; 1 Peter 4:2) Diswan nao samting wea leadim tingting and samting wea olketa duim. Tru nao, olketa mekem heart bilong Dadi bilong olketa long heven barava hapi!—Proverbs 23:24.

[Footnotes]

Waswe, Iu Savve Explainim Diswan?

• Why nao hem barava important for aftarem raeteous fasin?

• Hao nao olketa Christian wea no perfect fit for aftarem raeteous fasin?

• Wanem nao samfala samting long world wea olketa Christian mas stap klia long hem?

• Hao nao wei for aftarem raeteous fasin hem protectim iumi?

[Piksa long page 26]

Disfala world hem wanfala danger ples for olketa follower bilong Jesus bifor

[Piksa long page 27]

Olketa pikinini wea lane for lovem Jehovah bae strong for againstim dirty samting

[Piksa long page 28]

Samfala Israelite forgetim Jehovah bihaen olketa kamap rich insaed Promis Land

[Piksa long page 29]

Olsem Jesus, olketa Christian heitim fasin wea no raeteous