Go Ahed for Serve Tugeta Witim Wan Mind
“Mi bae givim long olketa pipol wanfala change go long wanfala klinfala languis, for mekem evriwan singaot long nem bilong Jehovah, for servem hem tugeta witim wan mind.”—ZEPHANIAH 3:9.
1. Wanem nao go ahed for happen wea fulfillim Zephaniah 3:9?
DISTAEM pipol tok long samting olsem 6,000 languis evriwea long earth. And tu, olketa tok long difren kaen languis wea kamaot from nara languis. Bat, nomata pipol tok long Arabic languis or Zulu languis, tufala languis wea barava difren from each other, God hem duim wanfala barava spesol samting. Hem openem wei for olketa man evriwea for lanem and tok long datfala only klinfala languis. Diswan hem happen for fulfillim wanfala promis wea hem talem thru long profet Zephaniah: “Mi [Jehovah God] bae givim long olketa pipol wanfala change go long wanfala klinfala languis [wea really minim, “wanfala klin mouth,” footnote], for mekem evriwan singaot long nem bilong Jehovah, for servem hem tugeta witim wan mind.”—Zephaniah 3:9.
2. Wanem nao datfala “klinfala languis,” and diswan hem openem wei for wanem samting kamap?
2 Datfala “klinfala languis” hem truth bilong God wea stap insaed Word bilong hem, Bible. Main wan nao hem truth abaotem Kingdom bilong God, wea bae mekem nem bilong Jehovah holy, vindicatem sovereign rul bilong hem, and givim olketa blessing long olketa man. (Matthew 6:9, 10) From hem only klinfala spiritual languis long earth, pipol bilong evri nation and kala skin tok long datfala klinfala languis. Hem mekem olketa fit for servem Jehovah “tugeta witim wan mind.” Diswan minim olketa servem hem witim wan mind, or “witim wan tingting.”—The New English Bible.
No Garem Fasin for Saed Witim Eniwan
3. Wanem nao mekem iumi fit for servem Jehovah witim wan mind?
3 From iumi Christian, iumi tinghae tumas long wei for garem wan mind midolwan iumi nomata iumi tok long planti languis. Nomata iumi preachim gud nius bilong Kingdom long planti languis bilong pipol, iumi servem God witim wan mind. (Psalm 133:1) Iumi fit for duim diswan bikos, nomata iumi stap eniwea long earth, iumi iusim wanfala klinfala languis for praisem Jehovah.
4. Why nao pipol bilong God mas no garem fasin for saed witim eniwan midolwan long olketa?
4 Pipol bilong God mas no garem fasin for saed witim eniwan. Aposol Peter talem diswan klia long 36 C.E. taem hem preach long haos bilong Cornelius, wanfala Gentile wea bigman bilong army: “Tru nao, mi luksavve hao God hem no saed witim eniwan, bat long evri nation man wea fraet long hem and duim raeteous fasin nao hem acceptim.” (Acts 10:34, 35) From datwan hem tru, no fitim olketa member insaed Christian kongregeson for garem fasin for saedem narawan, favorim eniwan, or garem kaen wei for olowe kaban witim tu-thri nomoa.
5. Why nao hem rong for encouragem wei for garem didifren grup insaed long kongregeson?
5 Bihaen hem visitim wanfala Kingdom Hall, wanfala college student sei: “Planti taem, insaed samfala church olketa member bilong wanfala kala skin or ethnic grup nomoa stap. . . . Olketa Jehovah’s Witness sidaon tugeta and no long didifren grup.” Nomata olsem, samfala member bilong kongregeson long Corinth bifor mekem wei for divaed for kamap. Taem olketa kosim wei for divaed, olketa againstim waka bilong holy spirit bilong God, bikos holy spirit hem apim wan mind and peace. (Galatians 5:22) Sapos iumi encouragem wei for garem didifren grup insaed kongregeson, iumi waka againstim holy spirit. So, iumi mas tingim evritaem toktok bilong aposol Paul for olketa long Corinth: “Mi encouragem iufala, olketa brata, thru long nem bilong Lord bilong iumi Jesus Christ, for iufala evriwan mas tok witim wan mind, and iufala mas no divaed olabaot, bat iufala mas barava garem wan mind witim sem wei for tingting.” (1 Corinthians 1:10) Paul mekhae tu long wei for garem wan mind insaed leta bilong hem for olketa long Ephesus.—Ephesians 4:1-6, 16.
6, 7. Wanem kaonsel nao James givim saed long wei for favorim man, and hao nao iumi savve followim disfala kaonsel?
6 From bifor kam fasin for no saed witim eniwan hem wanfala mark bilong olketa Christian. (Romans 2:11) From samfala long first-century kongregeson favorim samfala wea rich, disaepol James hem raet olsem: “Olketa brata bilong mi, waswe, iufala holem faith bilong Lord bilong iumi Jesus Christ, glory bilong iumi, witim fasin for favorim man? From, sapos wanfala man wea garem olketa gold ring long finger bilong hem and werem barava naesfala kaleko hem kam insaed long wanfala meeting bilong iufala, bat wanfala poor man wea werem dirty kaleko tu hem kam insaed, bat iufala favorim man wea werem barava naesfala kaleko and sei: ‘Iu sidaon long disfala chair wea stap long gudfala ples,’ and iufala sei long poor man: ‘Iu go ahed for standap,’ or: ‘Sidaon long datfala chair wea stap andanit long stul bilong mi for putim leg,’ tru nao, iufala garem fasin for favorim pipol and iufala kamap olketa judge wea mekem olketa nogud disison.”—James 2:1-4.
7 Sapos olketa rich man wea no biliv wea werem olketa gold ring and stael kaleko kam long wanfala Christian meeting and tu olketa poor wan wea no biliv wea werem dirty kaleko, olketa wea rich nao kasem spesol ples. Olketa mekem olketa for sidaon long “gudfala ples,” bat olketa talem poor wan for standap or sidaon long floor klosap long leg bilong samwan. Bat God no saedem eniwan taem hem givim Jesus olsem ransom sakrifaes for olketa wea rich and olketa wea poor tu. (Job 34:19; 2 Corinthians 5:14) So sapos iumi want for mekem Jehovah hapi and servem hem witim wan mind, iumi mas no ‘favorim narawan for kasem samting for seleva.’—Jude 4, 16.
Stap Klia Long Wei for Komplen
8. Wanem panis nao olketa Israelite kasem bikos olketa komplen?
8 For keepim wan mind and go ahed for God appruvim iumi, iumi mas followim disfala kaonsel bilong Paul: “Go ahed for duim evri samting witim fasin for no komplen.” (Philippians 2:14, 15) Olketa Israelite wea no garem faith wea kamap free from wei for slave long Egypt olketa komplen againstim Moses and Aaron, wea minim long Jehovah God tu. From evri samting hia, evri man wea 20 year and go ap, no go insaed long datfala Promis Land bat dae taem Israel wakabaot for 40 year insaed long wilderness. Only Joshua and Caleb wea faithful and olketa Levite nomoa go insaed. (Numbers 14:2, 3, 26-30; 1 Corinthians 10:10) Olketa kasem barava nogud samting from komplen bilong olketa!
9. Wanem panis nao Miriam kasem bikos hem komplen?
9 Diswan showimaot samting wea savve happen long wanfala full nation wea komplen. Waswe long olketa man wanwan? Sista bilong Moses, Miriam, and brata bilong hem Aaron, tufala komplen olsem: “Waswe, Jehovah hem toktok thru long Moses nomoa? Waswe, hem no toktok thru long iumi tu?” Datfala story go ahed for sei: “Jehovah hem herem olketa.” (Numbers 12:1, 2) Wanem nao kamaot from diswan? God hem mekem Miriam kasem shame, wea luk olsem hem nao lead long disfala wei for komplen. Long wanem wei? Taem hem mekem Miriam kasem leprosy and hem mas stap aotsaed long camp for sevenfala day go kasem taem hem kamap klin.—Numbers 12:9-15.
10, 11. Sapos man no bossim wei for komplen olowe, diswan savve kosim wanem? Givim example.
10 For komplen, hem no minim for komplen abaotem rong wea man duim nomoa. Pipol wea komplen olowe warim tumas feeling or position bilong olketa seleva, and laekem pipol for ting long olketa and no long God. Sapos olketa no bossim seleva, diswan savve kosim wei for divaed midolwan long olketa spiritual brata and spoelem hard waka bilong olketa for servem Jehovah witim wan mind. Diswan happen bikos pipol for komplen evritaem talemaot samting wea olketa feel nogud long hem, and hope nara pipol bae saed witim olketa.
11 Olsem example, samwan maet tok againstim wei wea wanfala elder hem duim olketa part bilong hem insaed kongregeson or lukaftarem waka bilong hem. Sapos iumi lisin long datwan wea komplen, maet iumi start for ting datwan hem tru. Bifor iumi herem datfala komplen, maet iumi hapi long waka wea datfala elder hem duim, bat distaem iumi feel nogud long hem. Gogo, no eni samting wea datfala elder hem duim bae stret long eye bilong iumi, and iumi tu maet start for komplen abaotem hem. Kaen fasin olsem hem no fitim insaed wanfala kongregeson bilong pipol bilong Jehovah.
12. Wei for komplen savve affectim wei wea iumi fren witim God long wanem wei?
12 Wei for komplen abaotem olketa man wea garem waka for lukaftarem sheep bilong God maet lead go long fasin for tok spoelem man. Wei for komplen olsem or barava tok laea againstim olketa savve spoelem wei wea iumi fren witim Jehovah. (Exodus 22:28) Olketa wea tok spoelem narawan and wea no repent bae no go insaed long Kingdom bilong God. (1 Corinthians 5:11; 6:10) Disaepol Jude hem raet abaotem pipol wea “no respectim olketa wea garem paoa and tok spoelem olketa wea kasem glory,” wea minim olketa man wea garem responsibility insaed long kongregeson. (Jude 8) God no appruvim olketa wea komplen hia, and iumi mas wise for barava stap klia long wei for followim example bilong olketa.
13. Why nao iumi savve sei samfala komplen hem fitim?
13 Bat, God hem no les long evri komplen. Hem willing for lisin long “krae bilong komplen” abaotem Sodom and Gomorrah and hem distroem olketa wicked taon hia. (Genesis 18:20, 21; 19:24, 25) Long Jerusalem, no longtaem bihaen Pentecost bilong 33 C.E., “olketa Jew wea tok long Greek languis start for komplen againstim olketa Jew wea tok long Hebrew languis, bikos olketa no tingim olketa widow bilong olketa long taem for givimaot kaikai evriday.” So, “twelvfala” aposol hia stretem datfala problem taem olketa markem “sevenfala man wea fit” for duim “disfala important waka” for givimaot kaikai. (Acts 6:1-6) Olketa elder distaem mas no ‘satem ear bilong olketa’ long olketa komplen wea fitim. (Proverbs 21:13) And olketa elder mas encouragem and buildimap olketa wea worship witim olketa and no tok againstim olketa.—1 Corinthians 8:1.
14. For stap klia long wei for komplen, wanem fasin nao iumi barava needim?
14 Iumi evriwan need for stap klia long wei for komplen, bikos spirit for komplen hem savve spoelem iumi long spiritual wei. Kaen fasin olsem bae spoelem wan mind bilong iumi. Winim diswan, iumi mas evritaem letem holy spirit mekem grow love insaed long iumi. (Galatians 5:22) Wei for obeyim ‘law bilong king for showimaot love’ bae helpem iumi for go ahed servem Jehovah witim wan mind.—James 2:8; 1 Corinthians 13:4-8; 1 Peter 4:8.
Luk Aot Long Wei for Tok Laea Againstim Man
15. Hao nao gossip and wei for tok laea againstim man hem difren?
15 From wei for komplen savve lead go for nogud gossip, iumi mas careful long samting wea iumi talem. Gossip hem iusles story abaotem pipol and bisnis bilong olketa. Bat, wei for tok laea againstim man hem laea story for spoelem nem bilong nara man. Kaen toktok olsem hem nogud fasin and hem no followim God. Dastawe God talem olketa Israelite: “Iu mas no go raon midolwan long pipol bilong iu for tok laea againstim man.”—Leviticus 19:16.
16. Wanem nao Paul sei abaotem samfala wea savve gossip, and hao nao kaonsel bilong hem shud affectim iumi?
16 From iusles story maet lead go for tok laea againstim man, Paul tok strong againstim samfala wea gossip. Bihaen hem storyim olketa widow woman wea fitim for kongregeson helpem olketa, hem storyim olketa widow woman wea lane “for no duim eniting, liu olabaot long olketa haos; tru nao, olketa no just stap nating nomoa, bat olketa gossip tu and poke-nose long bisnis bilong nara pipol, story abaotem samting wea olketa shud no storyim.” (1 Timothy 5:11-15) Sapos wanfala Christian woman luksavve wik point bilong hem nao for talem toktok wea maet lead go long wei for tok laea againstim narawan, hem shud followim kaonsel bilong Paul for “serious, no tok laea againstim narawan.” (1 Timothy 3:11) Tru tumas, olketa Christian man tu mas luk aot long wei for talem gossip wea savve spoelem man.—Proverbs 10:19.
Finis for Judge!
17, 18. (a) Wanem nao Jesus talem abaotem wei for judgem brata bilong iumi? (b) Hao nao iumi savve followim toktok bilong Jesus abaotem wei for judge?
17 Nomata sapos iumi no tok laea againstim eniwan, maet iumi need for waka hard for no judgem nara pipol. Jesus tok strong againstim kaen wei olsem taem hem sei: “Finis for judgem pipol nogud olketa judgem iufala; from judgment wea iufala judgem pipol, olketa bae judgem iufala tu; and long wei wea iufala deal witim pipol, olketa bae deal witim iufala tu. So, waswe, iu lukluk long smolfala grass long eye bilong brata bilong iu, bat no tingim bigfala timba long eye bilong iuseleva? Or hao nao iu savve sei long brata bilong iu, ‘Letem mi aotem smolfala grass from eye bilong iu’; bat, lukim! wanfala bigfala timba hem stap long eye bilong iu? Hypocrite! Firstaem aotem bigfala timba from eye bilong iu, and then iu bae lukim klia hao for aotem smolfala grass from eye bilong brata bilong iu.”—Matthew 7:1-5.
18 Iumi shud no tingse iumi fit for offer for aotem “smolfala grass” from eye bilong brata bilong iumi for helpem hem taem wanfala tokpiksa “timba” hem spoelem wei wea iumi savve judgem samting long gudfala wei. For tok stret, sapos iumi barava minim bigfala mercy bilong God, bae iumi no garem feeling for judgem olketa spiritual brata and sista bilong iumi. Iumi barava nating fit for minim olketa long sem wei wea Father bilong iumi long heven hem minim olketa. Dastawe Jesus warnim iumi ‘for finis for judgem pipol mekem iumi no kasem judgment’! Wei for lukluk gud long wei wea iumiseleva no perfect shud mekem iumi hol bak for judgem pipol long wei wea no raeteous front long God.
Wik bat Garem Honor
19. Hao nao iumi shud ting long olketa nara brata and sista?
19 Sapos iumi disaed strong for servem God tugeta long wan mind witim olketa brata, bae iumi no stap klia long wei for judge nomoa. Iumi bae lead long wei for showim honor long olketa. (Romans 12:10) Tru nao, bae iumi luk aotem wei for helpem olketa, no iumiseleva, and bae iumi hapi for duim eni samting for olketa. (John 13:12-17; 1 Corinthians 10:24) Hao nao iumi savve keepim gudfala spirit olsem? Taem iumi tingim hao evriwan wea biliv hem spesol long Jehovah and iumi needim each other, long sem wei wea each part long body bilong man hem depend long olketa nara part.—1 Corinthians 12:14-27.
20, 21. Wanem mining nao toktok bilong 2 Timothy 2:20, 21 garem for iumi?
20 Tru tumas, olketa Christian wea olsem wanfala clay dish wea isi for brek, kasem nambawan responsibility for duim disfala ministry. (2 Corinthians 4:7) For duim disfala holy waka long wei wea praisem Jehovah, iumi mas keepim gudfala nem front long hem and Son bilong hem. Iumi savve go ahed for olsem wanfala gudfala dish for God iusim only sapos iumi stap klin long fasin and long spiritual saed. Paul raet olsem saed long diswan: “Insaed long bigfala haos hem no garem dish bilong gold and silver nomoa bat tu bilong wood and graon, and samfala for duim gud samting bat samfala for duim nogud samting. Dastawe, sapos eniwan stap klia long mek-tu kaen hia, hem bae olsem dish for duim gudfala samting, holy, fit for man wea ownim for iusim, redy for duim evri gudfala waka.”—2 Timothy 2:20, 21.
21 Olketa wea no garem fasin wea fitim olketa mark bilong God olketa ‘dish for dirty waka.’ Bat, taem iumi aftarem wei wea followim God, bae iumi kamap ‘olketa dish for klinfala waka, holy, wea minim iumi stap separate, for service bilong Jehovah and redy for evri gudfala waka.’ So hem gud for askem iumiseleva: ‘Waswe, mi “wanfala gudfala dish”? Waswe, samting wea mi duim affectim olketa narawan wea biliv long gudfala wei? Waswe, mi wanfala member bilong kongregeson wea waka tugeta long wan mind witim olketa nara brata?’
Go Ahed for Serve Tugeta Witim Wan Mind
22. Christian kongregeson hem olsem wanem?
22 Christian kongregeson hem olsem famili arrangement. Taem evri member worshipim Jehovah, feeling bilong love, wei for givim help, and naesfala feeling kamap insaed long famili. Famili maet garem olketa difren member wea garem difren fasin, bat evriwan garem important part for duim. Hem semsem insaed long kongregeson. Nomata iumi evriwan difren—and no perfect—God hem pullim iumi long hemseleva thru long Christ. (John 6:44; 14:6) Jehovah and Jesus lovem iumi, and olsem famili wea wan mind, iumi barava need for showimaot love long each other.—1 John 4:7-11.
23. Wanem nao iumi shud rememberim and wanem nao iumi mas disaed strong for duim?
23 Christian kongregeson wea olsem famili hem ples wea fitim for iumi faendem olketa wea garem loyal fasin tu. Aposol Paul hem raet olsem: “Mi wantem long evri ples for olketa man go ahed long prea, liftimap olketa loyal hand, lusim fasin for kros and argue.” (1 Timothy 2:8) So, Paul joinim wei for loyal witim pablik prea “long evri ples” wea olketa Christian meet tugeta. Olketa loyal man nomoa shud stand for kongregeson long pablik prea. Hem tru, God expectim iumi evriwan for loyal long hem and long each other. (Ecclesiastes 12:13, 14) So, iumi mas disaed strong for waka tugeta long wan mind, olsem olketa member long body bilong man. Iumi want for serve witim wan mind tu olsem part long famili bilong Jehovah wea worshipim hem. Winim evri samting, iumi mas remember hao iumi needim each other and Jehovah bae appruvim and blessim iumi sapos iumi go ahed for servem hem witim wan mind.
Hao Nao Bae Iu Ansa?
• Wanem nao mekem pipol bilong Jehovah fit for servem hem witim wan mind?
• Why nao olketa Christian stap klia long wei for saed witim eniwan?
• Long tingting bilong iu, wanem nao hem rong saed long wei for komplen?
• Why nao iumi shud honorim olketa nara brata and sista?
[Piksa long page 15]
Peter luksavve “God hem no saed witim eniwan”
[Piksa long page 16]
Waswe, iu savve why nao God mekem Miriam kasem shame?
[Piksa long page 18]
Olketa loyal Christian hapi for servem Jehovah witim wan mind