Tingim Olowe Olketa Gud Samting Abaotem Organization Bilong Jehovah
“Mifala bae barava satisfae long gudfala samting abaotem haos bilong iu.”—PSALM 65:4.
1, 2. (a) Hao nao bae olketa arrangement for temple affectim pipol bilong God? (b) Olketa wanem samting nao David provaedem for buildim temple?
DAVID long Israel bifor hem wanfala man wea olketa Hebrew Scripture talem plande samting abaotem hem. Hem wanfala shepherd, man wea savve pleim music instrument, profet and king, and hem barava trust long Jehovah God. Wei wea David barava fren gud witim Jehovah muvim hem for laek buildim wanfala haos for God. Kaen haos olsem, wea hem nao temple, bae kamap main ples for tru worship long Israel. David savve hao datfala temple and waka wea bae gohed long there bae mekem pipol bilong God garem bigfala hapi and olketa blessing. Dastawe David hem sing olsem: “Hapi nao man wea iu [Jehovah] chusim and wea iu kosim hem for kam, mekem hem savve stap insaed long olketa courtyard bilong iu. Mifala bae barava satisfae long gudfala samting abaotem haos bilong iu, datfala holy ples bilong temple bilong iu.”—Psalm 65:4.
2 Jehovah no letem David for leadim waka for buildim haos bilong hem. Datfala privilege hem for son bilong hem Solomon. Wei wea narawan kasem privilege wea hemseleva barava laekem tumas for garem, no mekem David komplen. Main important samting long David nao hem for samwan mas buildim datfala temple. Hem barava sapotim datfala project long wei for givim Solomon olketa plan for temple wea hem kasem from Jehovah. And tu, David organizem olketa sekson bilong plande thousand Levite wea bae serve, and hem givim staka gold and silver for datfala temple construction.—1 Chronicles 17:1, 4, 11, 12; 23:3-6; 28:11, 12; 29:1-5.
3. Wanem tingting nao olketa servant bilong God garem abaotem olketa arrangement for tru worship?
3 Olketa faithful Israelite sapotim olketa arrangement for tru worship long haos bilong God. Long sem wei tu, iumi olketa servant bilong Jehovah distaem sapotim olketa arrangement for worship insaed organization bilong Jehovah long earth. Long wei olsem, iumi showimaot iumi garem sem tingting olsem David. Iumi no garem fasin for komplen. Iumi tingim olowe olketa gudfala samting abaotem organization bilong God. Waswe, enitaem iu tingting raonem plande gudfala samting wea iumi garem wea iu savve barava tinghae and thankiu long olketa? Iumi storyim samfala.
Tinghae Long Olketa wea Lead
4, 5. (a) Hao nao “datfala faithful and wise slave” fulfillim assignment bilong hem? (b) Wanem nao tingting bilong samfala Witness abaotem spiritual kaikai wea olketa kasem?
4 Iumi garem olketa gudfala reason for tinghae long “datfala faithful wise slave” wea Jesus Christ appointim for lukaftarem olketa samting bilong hem long earth. Datfala slave sekson bilong olketa anointed Christian lead long waka for preachim gud nius, arrangem olketa meeting for worship, and pablisim Bible literature long winim 400 languis. Plande million pipol evriwea long earth barava tinghae long privilege for kasem disfala spiritual “kaikai long barava taem.” (Matthew 24:45-47) Tru nao, no eni reason for iumi komplen abaotem datwan.
5 For plande year, wanfala olo Witness bilong Jehovah wea nem bilong hem Elfi kasem comfort and help taem hem followim kaonsel from Bible insaed long olketa pablikeson bilong datfala slave sekson. Fasin for barava tinghae muvim Elfi for raet olsem: “Bae mi hao sapos mi no stap insaed organization bilong Jehovah?” Peter and Irmgard servem God for staka year tu. Irmgard talem hao hem barava tinghae long evri pablikeson wea “organization bilong Jehovah wea showimaot love and wea kea for pipol” hem provaedem. Olketa hia nao hem olketa pablikeson for pipol wea garem spesol need tu, olsem pipol wea blind or earpas.
6, 7. (a) Hao nao waka bilong olketa kongregeson evriwea long world organize? (b) Wanem nao samfala talem abaotem organization bilong Jehovah long earth?
6 Governing Body bilong Olketa Jehovah’s Witness hem stand for datfala ‘faithful slave.’ Hem wanfala smol grup bilong olketa man wea spirit anointim wea serve long world headquarters bilong Olketa Jehovah’s Witness long Brooklyn, New York. Governing Body markem olketa servant bilong Jehovah wea garem savve for serve long olketa branch office wea lukaftarem waka bilong 98,000 kongregeson evriwea long earth. Olketa man wea kasem olketa mark insaed Bible kasem appointment for serve olsem olketa elder and ministerial servant long olketa kongregeson hia. (1 Timothy 3:1-9, 12, 13) Olketa elder lead insaed kongregeson and shepherdim olketa sheep bilong God long loving wei. Tru nao, hem wanfala blessing for kamap wanfala long olketa sheep hia, and for experiencem love and wan mind wea stap midolwan “full sekson bilong olketa brata”!—1 Peter 2:17; 5:2, 3.
7 Winim wei for komplen, plande taem olketa man wanwan talemaot thankiu for loving spiritual help and direction wea olketa kasem from olketa elder. Olsem example, tingim Birgit, wanfala Christian waef wea winim 30 year. Taem hem teenager yet, hem garem olketa nogud kaban and klosap hem duim bigfala sin. Bat kliafala kaonsel from Bible wea olketa elder givim witim sapot bilong olketa narawan long kongregeson sevem hem from samting wea savve barava spoelem hem. Hao nao feeling bilong Birgit distaem? Hem sei: “Mi barava hapi and thankiu hao mi still stap insaed nambawan organization bilong Jehovah.” Andraes, wea hem 17 year hem sei: “Diswan hem really organization bilong Jehovah, wea hem best organization long world.” Tru nao, iumi shud barava thankiu long olketa gudfala samting abaotem organization bilong Jehovah hia long earth!
Olketa wea Lead No Perfect
8, 9. Wanem nao samfala long taem bilong David duim, and wanem nao David duim?
8 Hem tru, olketa wea kasem appointment for lead long tru worship no perfect. Evriwan long olketa savve duim olketa mistek, and samfala garem olketa wik point wea olketa gohed for trae kontrolem. Waswe, fitim for iumi feel nogud abaotem datwan? Nomoa. Nomata samfala wea garem bigfala responsibility long taem bilong Israel tu bat duim olketa bigfala rong. Olsem example, taem David hem wanfala young man yet, olketa askem hem for pleim music for mekem King Saul wea garem olketa hevi for feel hapi. Bihaen, Saul trae for killim dae David, and gogo, hem mas ranawe for sevem laef bilong hem.—1 Samuel 16:14-23; 18:10-12; 19:18; 20:32, 33; 22:1-5.
9 Olketa nara Israelite duim olketa barava nogud samting. Olsem example, army komanda bilong David, Joab, killim dae Abner, wea hem wanfala relative bilong Saul. Absalom garem plan for againstim dadi bilong hem, David, mekem hemseleva savve kamap king. And Ahithophel, wea hem man wea David barava trustim for givim advaes, hem joinim olketa wea againstim David. (2 Samuel 3:22-30; 15:1-17, 31; 16:15, 21) Nomata olsem, David no barava feel nogud and komplen, and hem no rejectim tru worship tu. David duim samting wea barava opposite from wei for komplen. Olketa hard taem muvim David for barava depend long Jehovah and keepim gudfala tingting wea hem garem taem hem ranawe bikos long Saul. Long datfala taem, David hem sing olsem: “Showimaot iu hapi long mi, O God, showimaot iu hapi long mi, bikos long iu nao soul bilong mi hem faendem sef ples; and long shadow bilong wing bilong iu mi stap sef go kasem taem olketa trabol hem finis.”—Psalm 57:1.
10, 11. Wanem nao wanfala Christian wea nem bilong hem Gertrud experiencem taem hem young, and wanem nao hem sei abaotem olketa wik point and mistek bilong olketa nara servant bilong God?
10 Iumi no garem eni reason for komplen abaotem barava nogud samting olsem insaed organization bilong God distaem. Jehovah, olketa angel bilong hem, and olketa spiritual shepherd barava no letem olketa wea wicked and wea duim barava nogud samting for stap insaed Christian kongregeson. Nomata olsem, iumi evriwan mas deal witim wei wea iumi no perfect, and wei wea olketa nara servant bilong God no perfect tu.
11 Gertrud hem worshipim Jehovah for staka year finis. Taem hem young woman yet, samwan talem hao hem no really wanfala wea talemaot Kingdom full taem. Wanem nao hem duim? Waswe, Gertrud hem komplen abaotem datwan? Nomoa. No longtaem bifor hem dae long 2003, wea long datfala taem hem 91 year, hem ting go bak long laef bilong hem and sei: “Olketa experience hia witim olketa nara samting wea mi experiencem bihaen, teachim mi hao nomata samfala duim mistek, Jehovah directim barava important waka bilong hem, and hem iusim olketa man wea no perfect for duim diswan.” Taem hem mas deal witim wei wea olketa nara servant bilong God no perfect, Gertrud hem prea long Jehovah from heart bilong hem.
12. (a) Wanem nogud example nao samfala long first century showimaot? (b) Wanem nao iumi shud tingim evritaem?
12 From nomata olketa Christian wea savve barava loyal no perfect tu, taem wanfala wea lead insaed kongregeson hem duim wanfala mistek, iumi mas gohed for “no garem fasin for komplen.” (Philippians 2:14) Bae hem wanfala sorre samting sapos iumi followim nogud example bilong tu-thri long Christian kongregeson long first century! Disaepol Jude talem hao olketa false teacher long datfala taem “no respectim olketa wea garem paoa and tok spoelem olketa wea kasem glory.” And tu, olketa hia “komplen abaotem evri samting long laef bilong olketa.” (Jude 8, 16) Iumi mas rejectim wei bilong olketa wea komplen and tingim evritaem olketa nambawan samting wea iumi kasem thru long ‘faithful slave.’ Bae hem gud for iumi tinghae long olketa gud samting abaotem organization bilong Jehovah and “gohed for duim evri samting and no komplen.”
“Disfala Toktok Hem Nogud Tumas”
13. Hao nao tingting bilong samfala taem olketa herem samfala teaching bilong Jesus Christ?
13 Samfala long first century komplen againstim olketa servant wea kasem appointment, olketa narawan komplen againstim olketa teaching bilong Jesus. Long John 6:48-69, Jesus hem sei: “Man wea kaikaim body bilong mi and drinkim blood bilong mi bae garem laef olowe.” Taem olketa herem toktok hia, “plande long olketa disaepol bilong hem . . . sei: ‘Disfala toktok hem nogud tumas; hu nao laek for lisin long kaen toktok olsem?’” Jesus hem savve hao “olketa disaepol bilong hem komplen abaotem diswan.” And tu, “from diswan plande long [olketa] go bak long olketa samting bilong bifor and no followim hem moa.” Bat no evri disaepol komplen. Tingim samting wea happen taem Jesus hem ask olsem long 12-fala aposol: “Waswe, iufala laek for go tu?” Aposol Peter hem sei: “Lord, hu nao bae mifala go long hem? Iu storyim olketa samting wea bae mekem man kasem laef olowe; and mifala bilivim and savve hao iu nao Holy Wan bilong God.”
14, 15. (a) Why nao samfala savve feel nogud long samfala samting saed long olketa Christian teaching? (b) Wanem nao iumi savve lanem from samting wea happen long wanfala man wea nem bilong hem Emanuel?
14 Long distaem, smol namba bilong pipol bilong God feel nogud abaotem samfala samting saed long Christian teaching and olketa komplen againstim organization bilong Jehovah long earth. Why nao diswan hem happen? Plande taem, kaen wei for komplen olsem hem bikos olketa no minim gud wei wea God duim olketa samting. Creator hem showimaot truth long pipol bilong hem long isisi wei. Dastawe, samfala taem, wei wea iumi minim Bible hem savve change lelebet for fitim really mining bilong samting. Klosap evriwan long olketa pipol bilong Jehovah barava hapi long olketa change olsem. Tu-thri nomoa savve “ova raeteous” and feel nogud tumas abaotem olketa change. (Ecclesiastes 7:16) Maet praod fasin nao problem, and samfala foldaon insaed trap bilong wei for garem independent tingting. Nomata wanem nao reason, kaen wei for komplen olsem hem danger tumas, bikos hem savve pullim iumi go bak long world and olketa wei bilong hem.
15 Olsem example, Emanuel hem wanfala Witness wea tok daonem samfala samting wea hem readim insaed olketa pablikeson bilong “faithful and wise slave.” (Matthew 24:45) Hem stop for readim olketa Christian buk bilong iumi, and gogo, hem talem olketa elder long kongregeson hao hem no laek for wanfala Jehovah’s Witness nao. Bat no longtaem bihaen, Emanuel start for luksavve hao olketa teaching bilong organization bilong Jehovah hem stret. Hem story long olketa Witness, talemaot mistek bilong hem, and hem kamap wanfala Jehovah’s Witness moa. From diswan, hem kasem bak hapi bilong hem.
16. Wanem nao savve helpem iumi for no garem daot abaotem samfala Christian teaching?
16 Waswe sapos wei for daotem samfala teaching wea pipol bilong Jehovah bilivim savve mekem iumi laek for komplen? Iu mas patient. Maet gogo, ‘faithful slave’ pablisim samting wea ansarem olketa kwestin bilong iumi and mekem iumi no garem eni daot nao. Hem wise for askem help from olketa Christian elder. (Jude 22, 23) Prea, study seleva, and wei for kaban witim olketa narawan wea garem spiritual tingting savve help tu for aotem olketa daot and savve mekem grow wei wea iumi tinghae long olketa truth insaed Bible wea iumi lanem thru long organization bilong Jehovah, and wea buildimap faith bilong iumi.
Gohed for Tingim Gud Saed
17, 18. Winim wei for komplen, wanem tingting nao iumi shud garem, and why nao olsem?
17 Hem tru, olketa man wea no perfect savve isi tumas for sin, and maet samfala barava feel olsem olketa mas talemaot komplen nomata datwan no garem eni faondeson. (Genesis 8:21; Romans 5:12) Bat sapos hem kamap wei bilong iumi for komplen evritaem, maet iumi savve spoelem wei wea iumi fren witim Jehovah God. Dastawe, iumi need for kontrolem eni feeling for laek komplen.
18 Winim wei for komplen abaotem olketa samting insaed kongregeson, bae hem gud for tingim gud saed bilong olketa samting and garem schedule wea keepim iumi busy, hapi, balance, helpem iumi for showimaot respect long olketa wea fit for kasem datwan, and healthy saed long faith. (1 Corinthians 15:58; Titus 2:1-5) Jehovah kontrolem evri samting insaed organization bilong hem, and Jesus savve long wanem hem gohed insaed each kongregeson, olsem hem savve long olketa kongregeson long first century. (Revelation 1:10, 11) Weit long patient wei for God and Christ, wea hem Hed bilong kongregeson, duim samting. Maet Jesus iusim olketa shepherd for stretem olketa samting wea need for change.—Psalm 43:5; Colossians 1:18; Titus 1:5.
19. Go kasem taem wea Kingdom hem barava kontrolem evri samting, wanem nomoa iumi shud tingim evritaem?
19 Klosap nao disfala wicked world bae finis, and Messiah Kingdom bae barava kontrolem evri samting long earth. Go kasem datfala taem, hem important for each wan long iumi gohed for tingim gud saed bilong samting! Diswan bae helpem iumi for luksavve long olketa gud point bilong olketa narawan wea servem Jehovah, winim wei for tingim nomoa olketa wik point bilong olketa. Wei for tingim olketa gud samting abaotem fasin bilong olketa bae mekem iumi hapi. Winim wei for letem fasin for komplen barava mekem iumi wikdaon long feeling, iumi bae feel strong long spiritual wei.
20. Wei for tingim gud saed bae mekem iumi savve enjoyim olketa wanem blessing?
20 Wei for tingim gud saed bae helpem iumi for no forgetim plande blessing wea iumi enjoyim from wei wea iumi kaban witim organization bilong Jehovah long earth. Diswan nao hem only organization long world wea loyal long Sovereign bilong universe. Hao nao iumi feel abaotem privilege wea iumi garem for worshipim only tru God, Jehovah? Iumi laek garem sem tingting olsem David, wea sei: “O Datwan wea herem prea, evri difren kaen pipol bae kam long iu. Hapi nao man wea iu chusim and wea iu kosim hem for kam, mekem hem savve stap insaed long olketa courtyard bilong iu. Mifala bae barava satisfae long gudfala samting abaotem haos bilong iu.”—Psalm 65:2, 4.
Waswe, Iu Remember?
• Why nao iumi shud tinghae and thankiu long olketa wea lead insaed kongregeson?
• Wanem nao shud tingting bilong iumi taem olketa wea lead insaed kongregeson duim olketa mistek?
• Hao nao iumi shud ting long samfala change wea kamap saed long wei for minim Bible?
• Wanem nao savve helpem Christian for no garem olketa daot?
[Picture on page 14]
David givim Solomon olketa plan for temple and hem barava sapotim tru worship
[Piksa long page 17]
Olketa Christian elder hapi for provaedem spiritual help