Waswe, Iu Willing for Change?
1. From world hem change, wanem nao iumi mas changem?
1 Long 1 Corinth 7:31, Bible sei world distaem hem gohed for change. From world hem change, samfala taem iumi tu mas changem wei wea iumi preach, schedule bilong iumi, and wanem iumi storyim. Waswe, iu willing for change?
2. Why nao iumi mas willing for change mekem iumi muv witim organization bilong Jehovah?
2 Wei for Preach: Pipol bilong Jehovah willing for change. Long firstaem wea Jesus sendem olketa disaepol for preach, hem talem olketa for no tekem eni basket for putim kaikai long hem, or eni selen. (Matt. 10:9, 10) Bihaen, hem talem difren samting bikos hem savve pipol bae againstim olketa disaepol bilong hem, and bae olketa preach long olketa farawe ples. (Luke 22:36) Insaed wan handred year wea go pas, organization bilong Jehovah iusim olketa difren kaen wei for preach wea fitim olketa difren taem. Olketa iusim testimony card, radio program, and saond car. Distaem, long staka ples pipol no stap long haos, so iumi kasem encouragement for duim enitaem witnessing, and street waka. Iumi kasem encouragement tu for duim evening witnessing taem pipol wea waka go bak long haos. Taem chariot bilong Jehovah long heven hem muv, waswe, iu muv witim datwan?—Ezek. 1:20, 21.
3. Hao nao wei for change savve helpem iumi for duim gud ministry bilong iumi?
3 Story Bilong Iu: Wanem nao pipol long territory bilong iu wari abaotem? Waswe, olketa wari abaotem selen, famili, war? Hem gud for savve long olketa problem and samting wea happen long territory bilong iumi mekem iumi savve redyim story wea fitim. (1 Cor. 9:20-23) Taem haosholder talemaot tingting bilong hem, winim wei for sei thankiu for koment bilong hem and then gohed long story wea iu redyim finis, hem gud for change and storyim samting wea fitim wanem hem talem.
4. Why nao iumi mas willing for change?
4 Klosap nao datfala big trabol bae start and disfala world bae finis. “Lelebet taem nomoa hem stap.” (1 Cor. 7:29) Dastawe iumi mas willing for change mekem iumi savve iusim gud lelebet taem wea hem stap yet!