Waswe, Iu Savve Changem Schedule Bilong Iu?
1. Why nao iumi shud changem schedule bilong iumi for preach?
1 Iumi olketa tru Christian acceptim datfala invitation for kamap “olketa man for fishing for kasem olketa man.” (Matt. 4:19) Olsem olketa man wea fishing for kasem fish, sapos iumi markem taem long schedule bilong iumi for preach taem pipol stap long haos, iumi bae kasem gud samting long waka bilong iumi for fishing for olketa man. Evening hem taem wea staka pipol savve stap long haos. Plande taem, pipol no busy and olketa hapi for story witim olketa visitor. Waswe, iu savve changem schedule bilong iu for preach long taem olsem?—1 Cor. 9:23.
2. Wanem nao samfala wei wea iumi savve followim for kasem staka pipol moa witim gud nius?
2 Evening Witnessing: For planim wei for preach long evening bifor hem dark bae mekem iumi savve preachim gud nius long staka pipol go moa. (Prov. 21:5) Maet olketa young wan fit for preach bihaen olketa finis skul. Maet olketa narawan savve duim olsem bihaen olketa finis waka. Samfala buk study grup savve arrange for preach for maet wan hour bifor buk study each week.
3. Wanem nao olketa wei wea iu savve preach long evening long territory bilong iu?
3 Iumi savve meetim olketa wea no savve stap long haos long morning taem iumi duim haos tu haos preaching long evening. Long plande ples, olketa savve duim street witnessing and olketa nara wei for witness long pablik tu long evening. And staka talem hao evening nao best taem for duim olketa return visit and startim olketa Bible study.
4. Why nao hem important for showimaot kaenfala fasin and fasin for luksavve taem iumi duim evening witnessing?
4 Needim Fasin for Luksavve: Iumi need for garem fasin for luksavve taem iumi duim evening witnessing. Hem gud for duim witnessing long taem long evening wea no dark yet, winim wei for visit long taem wea olketa haosholder redy for sleep. (Phil. 4:5) Taem iu noknok long door, standap long ples wea olketa savve lukim iu, and talem klia hu nao iu. Talem kwiktaem reason for visit bilong iu. Sapos iu kam long taem wea no fitim, olsem taem famili kaikai, talem olketa iu bae kam bak long narafala taem. Showimaot kaenfala fasin evritaem.—Matt. 7:12.
5. Wanem nao iumi savve duim for stap klia long olketa danger taem iumi preach?
5 Iumi need tu for luksavve long olketa danger. Sapos iu duim witnessing long taem wea hem gogo for dark, hem wise for tufala or wanfala grup for wakabaot tugeta. Go followim olketa road wea garem gudfala laet. Witness nomoa long olketa ples wea iu ting hem sef. No go long olketa ples wea no sef taem hem dark finis.—Prov. 22:3.
6. Wanem gud samting moa savve kamaot from wei for duim evening witnessing?
6 Wei for duim evening witnessing hem givim iumi chance for waka witim olketa auxiliary and regular pioneer. (Rom. 1:12) Waswe, iu savve changem schedule bilong iu for share insaed diswan?