Kamap Hapi Wakman Bilong Harvest!
“Harvest hem big, bat olketa wakman no staka. Dastawe, askem Masta bilong harvest for sendem aot olketa wakman long harvest bilong hem.”—MATTHEW 9:37, 38.
1. Wanem nao helpem iumi for go ahed duim will bilong God?
TAEM iumi tingim day wea iumi baptaes olsem wanfala servant bilong Jehovah, maet tu-thri year go finis or planti year, maet hem feel olsem hem happen yesterday nomoa. Wei for praisem Jehovah nao kamap main samting long laef wea iumi dedicatem long Jehovah. Taem iumi baem taem for helpem nara pipol for herem and acceptim Kingdom message, hapi service long Jehovah hem main samting wea iumi tingim. (Ephesians 5:15, 16) Kam kasem distaem, iumi faendem hao taem hem go pas kwiktaem tumas sapos iumi busy, “garem planti samting for duim insaed long waka bilong Lord.” (1 Corinthians 15:58) Nomata iumi kasem olketa problem, hapi bilong iumi for duim will bilong Jehovah bae muvim iumi for go ahed.—Nehemiah 8:10.
2. Wanem nao thrifala reason wea part long hapi wea iumi kasem long tokpiksa harvest waka?
2 Olsem olketa Christian, iumi insaed tokpiksa harvest waka. Jesus Christ story abaotem waka for hipimap pipol for laef olowe olsem wanfala harvest. (John 4:35-38) Bikos iumi insaed diskaen harvest waka, bae iumi kasem encouragement sapos iumi lukluk long hapi bilong olketa first Christian wakman bilong harvest. Bae iumi lukluk long thrifala reason wea part long hapi wea iumi kasem long harvest waka distaem. Olketa hia nao (1) message bilong hope, (2) win for faendem pipol, and (3) wei for mek peace olsem wakman bilong harvest.
Sendem Go Olketa Wakman Bilong Harvest
3. Wanem nao olketa firstfala follower bilong Jesus kasem hapi long hem?
3 Laef bilong olketa first wakman bilong harvest—main wan nao 11-fala faithful aposol bilong Jesus—hem barava change long wanfala day long 33 C.E. taem olketa go ap long maunten bilong Galilee for meetim Christ wea resurrect finis! (Matthew 28:16) “Winim faev handred brata” maet stap there long datfala taem. (1 Corinthians 15:6) Komand wea Jesus givim hem stap olowe long tingting bilong olketa. Hem talem olketa: “Go and mek-disaepol long pipol bilong evri nation, baptaesim olketa long nem bilong Father and bilong Son and bilong holy spirit, teachim olketa for duim evri samting wea mi komandim long iufala.” (Matthew 28:19, 20) Nomata olketa kasem hardfala persecution, olketa kasem bigfala hapi long harvest waka taem olketa lukim kongregeson bilong olketa follower bilong Christ kamap long planti ples. Gogo, ‘olketa preachim finis gud nius evriwea anda long heven.’—Colossians 1:23; Acts 1:8; 16:5.
4. Christ sendem aot olketa disaepol for preach from wanem need nao stap?
4 Long wanfala taem bifor long ministry bilong hem long Galilee, Jesus kolem 12-fala aposol and sendem go olketa for talemaot: “Kingdom bilong heven hem kam klosap.” (Matthew 10:1-7) Hemseleva tu “gogo long olketa taon and vilij [long Galilee], and hem teach long olketa synagogue bilong olketa and preachim gud nius bilong kingdom and hem healim evrikaen sik.” Jesus feel sorre for pipol “from olketa garekil and stap olabaot olsem olketa sheep wea no garem eni shepherd.” (Matthew 9:35, 36) From diswan barava muvim hem, hem talem olketa disaepol bilong hem: “Tru nao, harvest hem big, bat olketa wakman no staka. Dastawe, askem Masta bilong harvest [Jehovah God] for sendem aot olketa wakman long harvest bilong hem.” (Matthew 9:37, 38) Tingting bilong Jesus abaotem need for moa wakman hem semsem long Judea taem six month nomoa stap for hem duim ministry long earth. (Luke 10:2) Long tufala taem hia, hem sendem go olketa follower bilong hem olsem olketa wakman bilong harvest.—Matthew 10:5; Luke 10:3.
Iumi Garem Message Bilong Hope
5. Wanem kaen message nao iumi talemaot?
5 Olsem olketa servant bilong Jehovah distaem, iumi hapi for ansarem datfala singaot for moa wakman bilong harvest. Wanfala samting wea barava givim iumi bigfala hapi hem hao iumi garem wanfala message bilong hope for olketa wea wikdaon and feel sorre. Olsem olketa disaepol bilong Jesus long first century, iumi garem nambawan privilege for talemaot gud nius—wanfala trufala message bilong hope—for olketa wea “garekil and stap olabaot olsem olketa sheep wea no garem eni shepherd”!
6. Wanem waka nao olketa aposol duim long first century?
6 Kasem midol long first century, aposol Paul hem busy for preachim gud nius. And harvest waka bilong hem barava win, bikos taem hem raet for olketa Christian long Corinth long samting olsem 55 C.E., hem sei: “Mi talem iufala, olketa brata, datfala gud nius wea mi talemaot long iufala, wea iufala kasem tu, wea iufala stand for hem tu.” (1 Corinthians 15:1) Olketa aposol and first Christian barava waka hard olsem oketa wakman bilong harvest. Nomata Bible no talemaot haomas aposol nao stap laef midolwan long olketa bigfala samting wea happen wea lead go for Jerusalem distroe long 70 C.E., iumi savve aposol John hem go ahed yet for preach 25 year bihaen.—Revelation 1:9.
7, 8. Wanem message bilong hope nao olketa servant bilong Jehovah talemaot witim bigfala feeling for hariap winim enitaem bifor?
7 Bihaen datwan, planti handred year kamap wea olketa bigman bilong Christendom rul, datfala apostate “man for brekem law.” (2 Thessalonians 2:3) Bat, kasem end bilong mek-19 century, pipol wea trae for garem living wea followim firstfala Christian Wei start moa for talemaot message bilong hope abaotem Kingdom. Tru nao, start long firstfala issue bilong disfala magasin (July 1879), title bilong hem garem toktok “Talemaot Taem wea Christ Bae Stap Moa,” “Talemaot Kingdom Bilong Christ,” or “Talemaot Kingdom Bilong Jehovah.”
8 Kingdom bilong God long heven hem kamap taem Jesus Christ start for rul long 1914, and distaem iumi talemaot datfala message bilong hope witim bigfala feeling for hariap winim enitaem bifor. Why nao olsem? Bikos wanfala blessing bilong Kingdom rul nao hem end bilong disfala wicked system wea klosap tumas for happen. (Daniel 2:44) Waswe, eni message hem moabeta winim diswan? And wanem hapi wea moa big nao iumi savve garem wea winim wei for share for talemaot datfala Kingdom bifor datfala “big trabol” hem start?—Matthew 24:21; Mark 13:10.
Win for Faendem Pipol
9. Wanem instruction nao Jesus givim long olketa disaepol bilong hem, and waswe, pipol lisin long Kingdom message?
9 Nara reason wea mekem iumi hapi olsem wakman bilong harvest hem wei wea iumi win for faendem olketa wea kamap disaepol and joinim iumi long harvest waka. Long 31-32 C.E., Jesus givim disfala instruction long olketa disaepol bilong hem: “Nomata wanem taon or vilij iufala go insaed, lukaotem eniwan wea fit.” (Matthew 10:11) Wei wea pipol wanwan lisin or no lisin long message bilong Kingdom hem showaot no evriwan fit. Nomata olsem, olketa disaepol bilong Jesus strong for preachim gud nius long eni ples wea pipol stap.
10. Hao nao Paul lukaotem olketa wea fit?
10 Bihaen Jesus dae and resurrect, waka for lukaotem olketa wea fit hem go ahed strong. Paul story witim olketa Jew insaed synagogue and witim pipol wea stap long market long Athens. Taem hem givim witness long Areopagus long Athens, “samfala man joinim olketa seleva long hem and kamap pipol wea biliv, midolwan long olketa hem Dionysius, judge long kot bilong Areopagus, and wanfala woman wea nem bilong hem Damaris, and samfala moa.” Long eni ples Paul go, hem showimaot gud example for preach “long pablik ples and from haos tu haos.”—Acts 17:17, 34; 20:20.
11. Wanem nao olketa wei wea olketa iusim for duim ministry planti year go finis?
11 Long olketa lastfala year bilong mek-19 century, olketa anointed Christian no fraet for lukaotem olketa wea fit. Insaed wanfala article “Kasem Anointing for Preach,” Zion’s Watch Tower bilong July/August 1881 hem sei: “Wei for preachim gud nius . . . hem go ‘kasem olketa wea hambol’—olketa wea willing and fit for herem, mekem wanfala sekson savve kamaot from olketa for joinim body bilong Christ, olketa wea bae rul witim hem.” Olketa wakman bilong harvest bilong God planti taem meetim pipol taem olketa lusim olketa church service and givim olketa tract wea garem message from Scripture wea olketa raetem for pullim interest bilong pipol wea fit. Bihaen olketa lukluk moa long diskaen wei for witness, Watch Tower bilong May 15, 1903, encouragem olketa wakman bilong harvest for givimaot olketa tract “from haos tu haos, long olketa Sunday morning.”
12. Hao nao iumi mekem wei wea iumi duim preaching waka kamap moabeta? Givim example.
12 Insaed olketa year wea just go pas, iumi mekem ministry kamap big taem iumi story witim pipol long olketa difren ples and no long haos nomoa. Disfala wei hem win long olketa kantri wea living and wei for aftarem hapitaem hem mekem pipol no stap long haos taem iumi go preach. Taem wanfala Witness long England and partner bilong hem lukim olketa visitor go evritaem long bas bihaen olketa stap full day long saedsea, tufala go insaed olketa bas hia and givim olketa copy bilong Wastaoa and Wekap! long olketa passenger. Insaed wanfala month, tufala givimaot 229 copy. Tufala sei: “Mifala nating fraet for witness long saedsea, bisnis territory, or eni ples bikos mifala savve Jehovah stap witim mifala evritaem.” Olketa startim samfala magasin kol, startim wanfala Bible study, and tufala evriwan share insaed long auxiliary pioneer service.
13. Wanem change nao iumi mas duim long ministry bilong iumi long samfala ples?
13 Taem wei for lukaotem olketa wea fit hem go ahed, iumi maet need for lukluk moa long samfala part long ministry bilong iumi. Nomata planti Witness evritaem duim preaching waka from haos tu haos long Sunday morning, long samfala area olketa faendaot wei for go early long haos bilong pipol hem no mas gud bikos olketa sleep yet. Taem olketa changem schedule bilong olketa, planti Witness distaem go long narataem long datfala day, maet bihaen olketa Christian meeting. And disfala wei for lukaotem pipol hem garem frut. Last year, namba bilong pipol wea talemaot Kingdom evriwea long world hem grow 2.3 percent. Diswan givim honor long Masta bilong harvest and givim hapi long heart bilong iumi.
Keepim Peace Insaed Long Harvest Waka
14. Iumi talemaot message bilong iumi long wanem wei, and why nao olsem?
14 Narafala reason for hapi bilong iumi hem peace wea iumi showimaot long harvest waka. Jesus hem sei: “Taem iufala go insaed long wanfala haos, sei hello long olketa long haos; and sapos datfala haos hem fit, letem peace wea iufala talem kasem datfala haos.” (Matthew 10:12, 13) For sei hello long Hebrew and Greek languis long Bible, tufala evriwan givim idea bilong ‘Mi hope iu stap gud.’ Diskaen wei hem example for iumi taem iumi meetim pipol wea iumi preachim gud nius long olketa. Hope bilong iumi hem for olketa acceptim Kingdom message. For olketa wea acceptim, olketa garem hope for fren bak witim God taem olketa repent from sin bilong olketa, tan raon, and duim will bilong hem. Then, wei for garem peace witim God hem lead for laef olowe.—John 17:3; Acts 3:19; 13:38, 48; 2 Corinthians 5:18-20.
15. Hao nao iumi savve keepim peace taem pipol no interest long preaching waka bilong iumi?
15 Hao nao iumi savve keepim peace bilong iumi taem man no willing for lisin? Jesus sei: “Sapos [datfala haos] hem no fit, letem peace wea iufala talem kam bak moa long iufala.” (Matthew 10:13) Story bilong Luke abaotem wei for sendem aot 70 disaepol hem garem disfala toktok bilong Jesus: “Sapos wanfala fren bilong peace hem stap long there, peace bilong iufala bae stap witim hem. Bat sapos nomoa, hem bae kam bak long iufala.” (Luke 10:6) Taem iumi storyim gud nius long pipol, iumi duim olsem witim naesfala fasin and wei wea showimaot peace. Sapos wanfala haosholder hem no interest, hem komplen, or talem nogud toktok, diswan hem mekem message bilong peace wea iumi talemaot for ‘kam bak long iumi.’ Bat no eni samting hia tekaotem peace bilong iumi, wanfala frut bilong holy spirit bilong Jehovah.—Galatians 5:22, 23.
Gudfala Goal for Olketa Wakman Bilong Harvest
16, 17. (a) Wanem nao goal bilong iumi taem iumi duim olketa return visit? (b) Hao nao iumi savve helpem olketa wea garem Bible kwestin?
16 Olsem olketa wakman bilong harvest, iumi hapi for share for hipimap pipol for laef olowe. And bigfala hapi nao iumi kasem taem wanfala man wea iumi preach long hem acceptim, laek for lanem moa samting, and kamap wanfala “fren bilong peace”! Maet hem garem planti Bible kwestin and iumi faendem hem hard for ansarem evriwan long wanfala visit. From iumi kanduit stap for longtaem tumas long first visit, wanem nao iumi savve duim? Iumi savve garem wanfala goal olsem samting wea olketa talem 60 year go finis.
17 “Evri witness bilong Jehovah shud redy for studyim Bible witim narawan long gudfala wei.” Datfala toktok hem stap insaed long mek-thri buklet bilong wanfala set bilong olketa buklet wea garem title Model Study wea olketa pablisim from 1937 go kasem 1941. Hem sei: “Evri [Kingdom] pablisa shud strong for helpem long evri wei pipol bilong gudwill wea interest long Kingdom message. Mas go bak [return visit] long olketa hia, ansarem olketa difren kwestin . . . , and then startim gudfala study . . . kwiktaem.” Tru nao, goal bilong iumi long return visit hem for startim Bible study and for duim evritaem.a Wei for fren and kea for olketa wea interest bae muvim iumi for prepare and duim study long gudfala wei.
18. Hao nao iumi savve helpem olketa niu wan for kamap olketa disaepol bilong Jesus Christ?
18 Witim help bilong buk Savvy Wea Lead Go long Laef Olawe and olketa brochure olsem Wanem Nao God Mas Kasem From Iumi?, iumi savve conductim gudfala hom Bible study and share for helpem olketa niu wan wea interest for kamap disaepol. Taem iumi trae for followim Nambawan Teacher, Jesus Christ, olketa Bible student hia bae lane tu from wei bilong iumi wea showimaot peace, hapi, trufala feeling, and respect wea iumi garem for olketa mark and instruction bilong Jehovah. Taem iumi helpem olketa niu wan kasem ansa long olketa kwestin bilong olketa, iumi want tu for teachim olketa hao for ansarem pipol wea askem kwestin long olketa. (2 Timothy 2:1, 2; 1 Peter 2:21) Olsem olketa wakman bilong tokpiksa harvest , iumi hapi from samting olsem 4,766,631 hom Bible study nao go ahed evriwea long world long service year wea just go pas. Iumi barava hapi sapos iumiseleva stap midolwan olketa wakman bilong harvest wea share long waka for duim hom Bible study.
Go Ahed for Hapi Long Harvest
19. Why nao olketa gud reason stap for hapi long harvest taem Jesus duim ministry and bihaen datfala taem?
19 Olketa gud reason stap for hapi long harvest taem Jesus duim ministry and bihaen datfala taem. Planti nao acceptim gud nius. Bigfala hapi kamap long Pentecost 33 C.E., taem 3,000 acceptim instruction from Peter, kasem holy spirit bilong Jehovah, and kamap part long nation bilong God, spiritual Israel. Tru nao, namba bilong olketa go ahed for grow, and hapi bilong olketa kamap barava big taem “Jehovah hem go ahed for addim long olketa evriday olketa wea bae sev.”—Acts 2:37-41, 46, 47; Galatians 6:16; 1 Peter 2:9.
20. Wanem nao givim iumi bigfala hapi long harvest waka bilong iumi?
20 Long datfala taem, profesi bilong Isaiah hem kamap tru: “Iu [Jehovah] mekem datfala nation kamap staka; for datwan iu mekem hapi kamap big. Olketa hapi front long iu olsem hapi long taem bilong harvest, olsem olketa wea hapi long taem wea olketa divaedem samting wea olketa winim.” (Isaiah 9:3) Nomata distaem iumi lukim namba bilong datfala ‘big nation’ bilong olketa anointed wan hem full, hapi bilong iumi kamap big taem iumi lukim namba bilong olketa nara wakman bilong harvest hem grow evri year.—Psalm 4:7; Zechariah 8:23; John 10:16.
21. Wanem nao iumi bae storyim long next article?
21 Iumi garem olketa gudfala reason for go ahed for hapi long harvest waka. Message bilong hope, wei for faendem olketa wea fit, and wei bilong iumi for mek peace—evri samting hia reason for givim iumi hapi olsem olketa wakman bilong harvest. Nomata olsem, olketa samting hia mekem planti pipol barava les. Aposol John hem experiencem datwan. Olketa putim hem insaed prison long island bilong Patmos from hem “tok abaotem God and givim witness long Jesus.” (Revelation 1:9) So, hao nao iumi savve keepim hapi bilong iumi taem pipol persecutim and againstim iumi? Wanem nao bae helpem iumi for deal witim stronghed tingting bilong planti pipol wea iumi preach long olketa? Nextfala article bae givim help from Bible for ansarem olketa kwestin hia.
[Footnote]
a Firstaem olketa organizem study long olketa ples wea grup bilong pipol wea interest savve hipap. Bat, no longtaem bihaen, olketa duim study witim man wanwan and olketa famili tu.—Lukim Jehovah’s Witnesses—Proclaimers of God’s Kingdom, page 574, wea Olketa Jehovah’s Witness pablisim.
Hao Nao Bae Iu Ansa?
• Wanem nao tokpiksa harvest waka?
• Wanem kaen message nao iumi talemaot?
• Why nao iumi win taem iumi lukaotem olketa disaepol?
• Hao nao iumi keepim peace long harvest waka?
• Why nao iumi go ahed for hapi long harvest?
[Olketa Piksa long page 12, 13]
Wei for preach long mek-1 and mek-20 century
[Olketa Piksa long page 13]
Olsem Paul, olketa wakman bilong harvest distaem trae for kasem pipol evriwea
[Piksa long page 13]
Talemaot gud nius witim naesfala fasin