Waswe, Iu Tingse Iu Important Winim Jehovah?
“Iu nomoa Barava Haefala God long full earth.”—PS. 83:18.
1, 2. For iumi sev, why nao iumi mas duim nara samting winim wei for savve nomoa long nem bilong God?
MAET firstaem wea iu lukim nem bilong God, Jehovah, hem taem samwan showim iu Psalm 83:18. Maet iu sapraes taem iu readim datfala scripture wea sei: “Mekem pipol savve long iu, wea nem bilong iu nao Jehovah, iu nomoa Barava Haefala God long full earth.” From iu savve long nem hia, iu tu laek iusim datfala scripture for helpem narawan for savve long God bilong iumi, Jehovah.—Rom. 10:12, 13.
2 Nomata hem important for pipol savve long nem bilong God, Jehovah, olketa mas duim nara samting tu. Man wea raetem psalm mekhae long nara tru samting wea iumi need for savve long hem mekem iumi sev. Hem sei: “Iu nomoa Barava Haefala God long full earth.” Tru tumas, Jehovah nao barava important winim eniwan long universe. From hem nao wakem evri samting, hem garem raet for talem evriwan for stap anda long hem. (Rev. 4:11) So iumi mas tingim diswan, ‘Waswe, mi ting long miseleva important winim Jehovah?’ Hem important tumas for ting raonem ansa bilong iumi for datfala kwestin!
Kwestin wea Kamap Long Garden Bilong Eden
3, 4. Hao nao Satan trikim Eve, and wanem nao happen?
3 Samting wea happen long garden bilong Eden showimaot datfala kwestin hem barava important. Satan, datfala bighed angel, trikim firstfala woman, Eve. Hem mekem Eve for tingim hemseleva winim wei for obeyim wanem Jehovah talem for no kaikaim frut wea hem tambuim. (Gen. 2:17; 2 Cor. 11:3) From Eve kaikaim datfala frut, hem showimaot hem nating respectim rul bilong Jehovah. Eve tingse hemseleva nao important winim Jehovah. Bat hao nao Satan trikim Eve?
4 Satan iusim olketa kleva trik taem hem story witim Eve. (Readim Genesis 3:1-5.) First samting, Satan no iusim nem, Jehovah, bat hem iusim nomoa datfala title “God.” Bat man wea raetem buk bilong Genesis iusim datfala nem Jehovah long firstfala verse long Genesis chapter 3. Mek-tu samting, Satan no story abaotem “law” bilong God bat hem askem Eve wanem nao God “talem.” (Gen. 2:16) Long kleva wei, maet Satan trae for mekem Eve for no ting strong long datfala law. Mek-thri samting, nomata Satan story nomoa long Eve, hem iusim datfala toktok “iufala.” Maet Satan laek for mekem Eve tingse hemseleva nao barava important and for feel olsem hem savve toktok for hem and hasband bilong hem. Wanem nao happen? Luk olsem Eve disaed for toktok for hem and Adam, taem hem sei long snek: “Mifala savve kaikaim frut bilong olketa tree long garden.”
5. (a) Satan mekem Eve for tingim wanem samting nomoa? (b) Taem Eve kaikaim datfala frut, datwan showimaot wanem?
5 Satan laek for mekem Eve tingse wanem God talem hem no barava tru. Hem laek for mekem Eve tingse God no duim stret samting taem God talem tufala “for no kaikai from evri tree long garden.” Then Satan mekem Eve for tingim hemseleva and tingse hem savve mekem laef bilong hem kamap gud go moa and for hem kamap “olsem God.” Gogo hem mekem Eve for tingim nomoa datfala tree and frut bilong hem winim wei wea hem fren witim Jehovah wea provaedem evri samting for hem. (Readim Genesis 3:6.) Taem Eve kaikaim datfala frut, hem showimaot hem tingim hemseleva nao important winim Jehovah.
Kwestin wea Kamap Long Taem Bilong Job
6. Hao nao Satan kwestinim wei wea Job hem faithful, and wanem chance nao Job garem?
6 Staka handred year bihaen, Job wea faithful long God garem chance for showimaot hu nao important long hem. Taem Jehovah talem Satan hao Job hem faithful, Satan sei long Jehovah: “Sapos iu no givim eni gud samting long Job, hard tumas for hem worshipim iu!” (Readim Job 1:7-10.) Satan no kwestinim why Job hem faithful. Hem sei Job worshipim Jehovah no bikos hem lovem Jehovah bat from hem laek kasem gud samting nomoa. Job nomoa fit for pruvim wanem Satan talem hem no tru, and Jehovah givim chance long Job for pruvim datwan.
7, 8. Wanem nao olketa nogud samting wea kasem Job, and wei wea hem faithful showimaot wanem?
7 Jehovah letem Satan for mekem Job kasem olketa nogud samting. (Job 1:12-19) Wanem nao Job duim taem hem kasem olketa nogud samting? Bible sei “Job hem no sin or talem eni nogud samting abaotem God.” (Job 1:22) Nomata olsem, Satan no givap. Satan sei long Jehovah: “Man bae givim skin for changem skin, and hem bae givim evri samting wea hem garem for sevem laef bilong hem.”a (Job 2:4) Satan sei sapos Job safa, bae hem tingse Jehovah no important.
8 Job kasem wanfala nogud sik wea spoelem body bilong hem. Waef bilong hem talem hem tu for tok spoelem God and dae. No longtaem bihaen, thrifala fren bilong Job accusim hem long nogud samting. (Job 2:11-13; 8:2-6; 22:2, 3) Nomata Job safa, hem gohed faithful. (Readim Job 2:9, 10.) Datwan showimaot Jehovah nao barava important long Job. Samting wea Job duim showimaot man wea no perfect savve pruvim wanem Satan talem hem no tru.—Markem witim Proverbs 27:11.
Jesus Duim Stret Samting
9. (a) Hao nao Satan traem Jesus? (b) Wanem nao Jesus duim?
9 No longtaem bihaen Jesus baptaes, Satan traem hem. Hem laekem Jesus for tingim hemseleva winim wei for ting long Jehovah nao barava important. Satan traem Jesus thrifala taem. First samting, hem laekem Jesus for talem olketa ston for kamap bred. (Matt. 4:2, 3) From Jesus stap long wilderness for 40 day, hem barava hangre from hem no kaikai. So Satan talem Jesus for iusim paoa bilong hem for duim mirakol mekem hem no hangre. Wanem nao Jesus duim? Jesus duim samting wea difren from Eve. Stretawe hem tingim wanem Jehovah talem and hem againstim samting wea Satan laekem hem for duim.—Readim Matthew 4:4.
10. Why nao Satan talem Jesus for jamp go daon from wall bilong temple?
10 Satan laek mekem Jesus for duim samting wea showimaot hem tingim hemseleva nomoa. Hem mekem Jesus for standap long wall bilong temple and talem hem for jamp go daon. (Matt. 4:5, 6) Why nao Satan laekem Jesus for duim datwan? Hem sei sapos Jesus no bangam leg bilong hem long ston, datwan bae showimaot hem “son bilong God.” Satan laekem Jesus for tingim nomoa tingting bilong pipol abaotem hem and for evriwan lukim wanem hem duim. Satan savve sapos man praod and no laekem olketa narawan for ting daonem hem, maet hem duim kaen danger samting olsem. Satan twistim scripture, bat samting wea Jesus talem showimaot hem minim Word bilong Jehovah. (Readim Matthew 4:7.) From Jesus no duim wanem Satan talem, hem showimaot Jehovah nao barava important long hem.
11. Taem Satan laek for givim Jesus evri kantri long world, why nao Jesus no acceptim datwan?
11 Satan traem Jesus moa. Hem sei hem bae givim evri kantri long world long Jesus. (Matt. 4:8, 9) Jesus nating acceptim datwan. Hem luksavve sapos hem duim datwan, datwan bae showimaot hem les long wei wea Jehovah nomoa fit for rul. (Readim Matthew 4:10.) Evritaem wea Satan traem Jesus, Jesus iusim olketa scripture wea garem nem bilong God, Jehovah, for ansarem Satan.
12. (a) Why nao Jesus wari tumas, bat wanem nao hem duim? (b) Wanem nao iumi lanem from samting wea hem duim?
12 Taem Jesus klosap for dae, hem mas disaedem wanfala hard samting. Taem hem duim ministry, hem sei hem willing for dae for iumi. (Matt. 20:17-19, 28; Luke 12:50; John 16:28) Nomata olsem, Jesus luksavve pipol bae talem laea samting abaotem hem and tekem hem go long Hae Kot bilong olketa Jew and judgem hem for dae bikos olketa sei hem talem rabis samting. Datwan mekem hem for wari tumas. Hem prea olsem: “Dadi bilong mi, sapos hem fitim, plis no mekem mi drink long disfala kap.” Bat then hem sei: “Nomata olsem, no duim wanem mi laekem, bat duim nomoa wanem iu laekem.” (Matt. 26:39) Tru tumas, wei wea Jesus faithful go kasem taem hem dae pruvim Jehovah nao barava important long hem!
Ansa Bilong Iumi for Datfala Kwestin
13. Wanem nao iumi lanem from example bilong Eve, Job, and Jesus Christ?
13 Wanem nao iumi lanem? Iumi lanem from example bilong Eve, pipol wea praod and wea duim wanem olketa seleva laekem, showimaot olketa tingse olketa nao important winim Jehovah. Bat iumi lanem from example bilong Job, nomata iumi no perfect and no barava minim why iumi kasem olketa hard taem, iumi savve faithful long God and showimaot Jehovah nao important long iumi. (Jas. 5:11) And iumi lanem from example bilong Jesus hao iumi mas no shame and no warim tumas wanem pipol tingim abaotem iumi. (Heb. 12:2) Bat hao nao iumi savve followim wanem iumi lanem?
14, 15. Hao nao samting wea Jesus duim hem difren from wanem Eve duim, and wanem nao iumi savve duim for followim example bilong Jesus? (Storyim piksa long page 18.)
14 No letem olketa samting wea traem iu mekem iu forgetim Jehovah. Eve tingim nomoa samting wea hem lukim. Hem lukim datfala frut hem “gud for kaikaim and frut hia hem barava luk naes tumas long hem.” (Gen. 3:6) Samting wea Eve duim hem barava difren from wanem Jesus duim taem Satan traem hem! Long thrifala taem hia, Jesus tingim olketa nogud samting wea hem bae kasem sapos hem duim wanem Satan talem. Hem tingim evritaem Word bilong God and iusim nem bilong God, Jehovah.
15 Taem eni samting switim iumi for duim samting wea Jehovah no hapi long hem, wanem nao iumi tingim? Sapos iumi tingim evritaem datfala samting wea traem iumi, datfala feeling for laekem nogud samting bae kamap strong tumas. (Jas. 1:14, 15) Iumi mas kwiktaem aotem datfala feeling, nomata hem no isi. Maet samting wea iumi mas duim hem olsem iumi aotem wanfala part bilong body and torowem. (Matt. 5:29, 30) Olsem Jesus, iumi mas tingim olketa samting wea bae kamaot from wanem iumi disaedem and hao datwan bae affectim wei wea iumi fren witim Jehovah. Iumi mas evritaem tingim wanem Bible talem. Datwan nomoa bae showimaot Jehovah nao important long iumi.
16-18. (a) Wanem nao maet mekem iumi sorre tumas? (b) Wanem nao bae helpem iumi taem iumi kasem hard taem?
16 No kros long Jehovah for olketa nogud samting wea kasem iu. (Prov. 19:3) From world bilong Satan klosap for finis, staka disaster and nogud samting wea happen affectim plande brata and sista tu. Iumi no expectim God for duim mirakol distaem for protectim iumi. Nomata olsem, maet iumi tu olsem Job and feel sorre tumas taem samwan wea iumi lovem hem dae or iumi kasem hard taem.
17 Job no minim why Jehovah letem samfala samting for happen, and maet iumi tu no minim why olketa nogud samting hem happen. Maet iumi herem nius hao samfala faithful brata and sista dae long earthquake olsem long Haiti, or olketa dae long nara disaster. Or maet iumi savve long wanfala faithful brata or sista wea samwan killim hem nogud or hem dae long wanfala accident. Or maet iumiseleva kasem olketa hard taem wea mekem iumi wari tumas or iumi tingse samfala samting wea kasem iumi hem no stret. Maet datwan mekem iumi for tingting olsem: ‘Jehovah, why nao diswan kasem mi? Wanem rong samting nao mi duim?’ (Hab. 1:2, 3) Wanem nao bae helpem iumi long taem olsem?
18 Iumi mas no tingse samting wea happen hem bikos Jehovah no hapi long iumi. Jesus story abaotem diswan taem hem storyim tufala nogud samting wea happen long taem bilong hem. (Readim Luke 13:1-5.) Samting wea iumi no tingim savve ‘seknomoa kasem iumi evriwan.’ (Eccl. 9:11) Nomata wanem samting nao mekem iumi sorre, iumi savve kasem help from God bikos hem nao givim “comfort wea iumi needim.” Hem bae strongim iumi for gohed faithful.—2 Cor. 1:3-6.
19, 20. (a) Wanem nao helpem Jesus for no givap taem pipol duim nogud samting long hem? (b) Wanem nao savve helpem iumi for duim sem samting?
19 No letem wei for praod or for no laek shame mekem iu no tingim Jehovah. Jesus hambol dastawe hem “lusim evri samting wea hem garem and hem kamap olsem wanfala slave.” (Phil. 2:5-8) Pipol duim olketa nogud samting for mek shame long hem, bat hem no givap bikos hem trustim Jehovah. (1 Pet. 2:23, 24) Jesus duim nomoa wanem Jehovah laekem, and from datwan Jehovah givim hem position wea hae winim position bilong hem bifor. (Phil. 2:9) Jesus encouragem olketa disaepol for duim sem samting tu.—Matt. 23:11, 12; Luke 9:26.
20 Maet samfala samting wea testim faith bilong iumi mekem iumi for shame. Nomata olsem, iumi shud garem strongfala faith olsem aposol Paul. Hem sei: “Mi safa from mi duim disfala waka, bat mi nating shame nomoa. Mi savve long datwan wea mi biliv long hem, and mi sure hem savve protectim evri samting wea mi givim long hem go kasem datfala day.”—2 Tim. 1:12.
21. Nomata pipol long world tingim olketa seleva nomoa, wanem nao iu disaed strong for duim?
21 Bible sei long taem bilong iumi pipol bae “tingim olketa seleva nomoa.” (2 Tim. 3:2) Iumi no sapraes long diswan bikos staka pipol tingse olketa nao important winim Jehovah. Iumi no laek for garem nogud tingting olsem! Nomata eni samting traem iumi, nogud samting kasem iumi, or pipol laek mek shame long iumi, iumi evriwan mas disaed strong for showimaot Jehovah nao barava important long iumi!
[Footnote]
a Samfala savveman tingse datfala toktok “skin for changem skin” minim Job bae tingim hemseleva nomoa and letem olketa pikinini and animal nao for lusim skin bilong olketa, wea minim for olketa nao dae. Samfala narawan tingse datfala toktok minim man bae hapi nomoa for samfala skin aot winim wei for hem dae. Olsem example, maet man apim hand bilong hem for protectim hed taem narawan laek hitim hem. Datwan sevem laef bilong hem nomata hand bilong hem garekil and samfala skin hem aot. Nomata iumi no barava savve wanem nao datfala toktok minim, Satan tingse Job bae willing for lusim evri samting for sevem laef bilong hem.
Waswe, Iu Tingim Yet?
• Wanem nao iumi lanem from wei wea Satan trikim Eve?
• Wanem nao iumi lanem from samting wea Job duim taem olketa nogud samting kasem hem?
• Wanem nao main samting wea Jesus tingim?
[Piksa long page 17]
Eve no tingim Jehovah firstaem
[Piksa long page 18]
Jesus no duim wanem Satan laekem bat hem duim nomoa wanem Jehovah laekem
[Piksa long page 20]
Preaching waka long Haiti bihaen earthquake happen
God bae givim “comfort wea iumi needim” taem iumi kasem hard taem