WASWE, IU TINGIM YET?

Waswe, iu readim olketa Wastaoa magasin wea iumi kasem no longtaem go nomoa and ting raonem samting wea iu readim? Trae for ansarem olketa kwestin hia:

Wanem taem nao Jesus “preach long olketa spirit long prison”? (1 Pet. 3:19)

Luk olsem bihaen Jesus hem laef bak, hem talem long olketa nogud angel panis wea olketa bae kasem.​—6/15, page 23.

Wanem taem nao Jesus judgem olketa sheepsheep and olketa goat? (Matt. 25:32)

Jesus bae kam for judgem pipol long taem bilong datfala big trabol, stretawe bihaen God distroem false religion.​—7/15, page 6.

Wanem taem nao pipol wea duim olketa nogud samting long tokpiksa bilong Jesus abaotem wheat and rabis grass bae feel sorre tumas and krae? (Matt. 13:36, 41, 42)

Olketa bae feel sorre tumas and krae long taem bilong datfala big trabol from olketa luksavve bae olketa dae.​—7/15, page 13.

Wanem taem nao toktok bilong Jesus abaotem wakaman wea faithful hem kamap tru? (Matt. 24:45-47)

Toktok bilong hem start for kamap tru, no long Pentecost 33 C.E., bat bihaen long 1914. Long 1919, Jesus markem wakaman wea faithful for lukaftarem “olketa nara wakaman.” Insaed “olketa nara wakaman” hia hem evri Christian wea kasem spiritual kaikai.—7/15, page 21-23.

Wanem taem nao Jesus markem wakaman wea faithful and wise for lukaftarem evri samting bilong hem?

Datwan bae happen long future, long datfala big trabol taem datfala wakaman wea faithful and wise go long heven and kasem reward for rul witim Christ.​—7/15, page 25.

Waswe, Bible no talem nem bilong samfala from olketa no important or olketa duim nogud samting?

Nomoa. Bible no talem nem bilong samfala wea duim barava nogud samting and no talem nem bilong samfala narawan wea faithful long God tu. (Ruth 4:1-3; Matt. 26:18) Tufala faithful angel nomoa Bible talem nem bilong tufala.​—9/1, page 10.

Wanem nao helpem 230 Witness wea march from Sachsenhausen prison for no givap?

Nomata olketa wik bikos olketa sik and hangre, olketa gohed encouragem each other for no givap.​—8/15, page 18.

Hao nao samting wea happen taem olketa Israelite akrosim Jordan River for go insaed long Promis Land encouragem iumi?

Nomata river hem hae, Jehovah stopem datfala river for no ran, mekem pipol bilong hem katkros go long narasaed. Masbi datwan strongim faith and trust bilong olketa long Jehovah, and hem strongim iumi tu.​—9/15, page 16.

Hao nao profesi long Micah 5:5 abaotem olketa man for lukaftarem sheepsheep and olketa man wea lead hem kamap tru distaem?

“Sevenfala man for lukaftarem sheepsheep and eitfala man wea lead” long Micah 5:5 piksarem olketa elder long kongregeson wea gohed for strongim pipol bilong God for taem wea wanfala enemy bae attakim olketa long future.​—11/15, page 20.