Waswe, Iu Bae Keepim Faithful Fasin Bilong Iu?

HAOMAS sparrow nao dae yesterday? No eniwan savve, and maet no staka pipol warim tu—from staka bird tumas stap. Bat, Jehovah kea abaotem olketa. Taem hem story long olketa disaepol bilong hem, Jesus story abaotem olketa bird hia wea luk olsem olketa nating important. Hem sei: “No eniwan bae foldaon long graon and Dadi bilong iufala no savve long diswan.” Hem sei moa: “No fraet: iufala moa important winim planti sparrow.”—Matthew 10:29, 31.

Bihaen olketa disaepol minim moa klia hao important nao olketa long Jehovah. Wanfala long olketa, aposol John, hem raet: “Thru long diswan love bilong God hem showaot long iumi, bikos God sendem only-born Son bilong hem long world mekem iumi savve kasem laef thru long hem.” (1 John 4:9) Jehovah no givim ransom nomoa bat hem promis olsem tu long evri servant bilong hem: “Mi bae nating lusim iu and bae nating forgetim iu.”—Hebrews 13:5.

Hem klia tumas, love bilong Jehovah for pipol bilong hem no savve seksek. Bat, wanfala kwestin kamap, ‘Waswe, iumi barava hol strong long Jehovah mekem iumi no savve lusim hem enitaem?’

Satan Trae for Brekem Faithful Fasin Bilong Iumi

Taem Jehovah showim long Satan hao Job hem garem faithful fasin, Satan ansa olsem: “Waswe, bae Job worshipim iu sapos hem no kasem eniting from datwan?” (Job 1:9, Today’s English Version) Hem sei wei wea olketa man loyal long God hem depend nomoa long ‘gud samting wea olketa seleva savve kasem from datwan.’ Sapos diswan hem tru, faithful fasin bilong eni Christian savve wikdaon nomoa—sapos temptation man kasem hem strong.

Long saed bilong Job, Satan talem firstaem hao loyal fasin bilong Job for God bae finis sapos hem lusim evri samting wea hem lovem. (Job 1:10, 11) Taem disfala wei for tokspoelem man no kamap tru, Satan sei: “Wanfala man bae givim evri samting hem garem for hem stap laef.” (Job 2:4, TEV) Nomata samting Satan hem talem maet tru for samfala, Job hem no laek for lusim faithful fasin bilong hem. Datfala record bilong history pruvim hao Job keepim faithful fasin bilong hem. (Job 27:5; 42:10-17) Waswe, iu garem loyal fasin olsem? Or waswe, iu bae letem Satan brekem faithful fasin bilong iu? Ting abaotem iuseleva taem iumi lukluk long samfala trufala samting wea affectim evri Christian.

Aposol Paul biliv hao trufala Christian loyal fasin savve barava strong. Hem raet olsem: “Mi barava sure hao nomata dae or laef. . . or samting wea stap distaem or samting wea kamap bihaen. . . or eni nara creation no fit for separatem iumi from love bilong God wea stap insaed long Christ Jesus, Lord bilong iumi.” (Romans 8:38, 39) Iumi tu savve feel sure olsem sapos love bilong iumi for Jehovah hem strong. No eni samting savve brekem love olsem, nomata dae no savve winim tu.

Sapos iumi garem kaen wei for fren olsem witim God, bae iumi no enitaem garem kwestin olsem, ‘Waswe, bae mi go ahed for servem Jehovah long future?’ Wei for daot olsem maet showimaot hao loyal fasin bilong iumi long God depend nomoa long samting wea happen insaed laef bilong iumi. Trufala faithful fasin hem no depend long olketa samting wea happen raonem iumi. Hem depend long wanem kaen man nao iumi. (2 Corinthians 4:16-18) Sapos iumi lovem Jehovah witim full heart bilong iumi, iumi bae nating mekem hem feel nogud.—Matthew 22:37; 1 Corinthians 13:8.

Bat, iumi mas remember hao Satan evritaem lukaotem eni wei for brekem faithful fasin bilong iumi. Hem maet switim iumi for duim samting wea body laekem, wikdaon from hevi for kamap semsem olsem nara pipol, or letem samfala problem mekem iumi lusim truth. Disfala world wea stap farawe from God hem main partner bilong Satan insaed disfala attak, and wei wea iumi no perfect hem mekem hem moa isi for hem brekem faithful fasin bilong iumi. (Romans 7:19, 20; 1 John 2:16) Nomata olsem, iumi garem help insaed disfala faet, wanfala main wei hem for savve long olketa trik wea Satan plan for duim.—2 Corinthians 2:11.

Wanem nao olketa trik bilong Satan? Insaed leta for olketa long Ephesus, Paul storyim olketa olsem “evri trik.”a (Ephesians 6:11; footnote) Satan putim olketa kleva trik front long iumi mekem iumi bae brekem faithful fasin bilong iumi. Iumi thankiu tumas from iumi luksavve long olketa trik hia, from record bilong olketa trik bilong Devil stap insaed Word bilong God for iumi lukim. Olketa taem wea Satan trae hard for distroem faithful fasin bilong Jesus and Job hem olsem example long samfala wei wea hem iusim for trae for brekem Christian faithful fasin bilong iumi.

Faithful Fasin Bilong Jesus No Brek

Long start bilong ministry bilong Jesus, Satan bighed for trae for switim Son bilong God taem hem challengem Jesus for mekem ston for kamap bred. Hem barava kleva! Jesus no kaikai for 40 day, so hem mas barava hangre. (Luke 4:2, 3) Satan talem Jesus for satisfaem feeling bilong hem kwiktaem, long wei wea againstim will bilong Jehovah. Olsem tu distaem, olketa idea bilong world encouragem wei for satisfaem feeling kwiktaem, witim wei for no really ting abaotem samting wea bae kamaot from datwan. Olketa talem, ‘Iu fit for kasem distaem,’ or maet, ‘Duim go nomoa!’

Sapos Jesus satisfaem feeling bilong hem for hangre nomoa and no tingim samting wea bae kamaot from datwan, Satan hem win for mekem Jesus lusim faithful fasin bilong hem. Jesus lukluk long evri samting long spiritual wei, and hem strong for ansa olsem: “Moses raetem finis, ‘Man mas no laef long bred nomoa.’”—Luke 4:4; Matthew 4:4.

So Satan mas changem olketa teknik bilong hem. Hem iusim olketa Scripture long wei wea difren from hao Jesus iusim. Devil encouragem Jesus for jamp from antap wall bilong temple. Satan hem sei, ‘wanfala angel bae sevem iu.’ Jesus nating ting for askem mirakol from Dadi bilong hem for mekhae long hemseleva. Jesus sei olsem: “Iu mas no testim God bilong iu Jehovah.”—Matthew 4:5-7; Luke 4:9-12.

Last teknik wea Satan iusim hem wei for kamaot klia nomoa. Hem offerim long Jesus full world and glory bilong hem sapos hem duim wanfala samting for worshipim hem. Datwan hem klosap evriting wea Satan fit for offerim. Bat Jesus nating want for duim wanfala samting for worshipim main enemy bilong Dadi bilong hem! Jesus ansa olsem: “Iu mas worshipim Jehovah, God bilong iu, and iu mas duim holy service long hem nomoa.”—Matthew 4:8-11; Luke 4:5-8.

Bihaen hem fail for win long thrifala taem hia, Satan ‘go awe from Jesus and weitim narafala taem moa.’ (Luke 4:13) Diswan showimaot hao Satan evritaem lukaotem chance for testim faithful fasin bilong Jesus. Wanfala narataem hem kamap tufala year bihaen, taem Jesus start for helpem olketa disaepol for garem stretfala tingting abaotem dae bilong hem wea klosap for happen. Aposol Peter hem sei: “Sorre long iuseleva, Lord; bae disfala samting no kasem iu.”—Matthew 16:21, 22.

Waswe, disfala advaes wea min for givim comfort bat wea no stret, maet hem here gud long Jesus from wanfala disaepol bilong hem nao talem? Jesus semtaem luksavve hao olketa toktok hia followim tingting bilong Satan, no bilong Jehovah. Christ strong for ansa olsem: “Go bihaen long mi, Satan! Iu trae for mekem mi stambol, bikos iu tingting, no olsem God, bat olsem olketa man.”—Matthew 16:23.

Bikos Jesus lovem Jehovah evritaem, Satan kanduit for brekem faithful fasin bilong hem. No eniting wea Devil offerim, no eni test, nomata hao big, savve mekem loyal fasin bilong Jesus for Dadi bilong hem long heven for kamap wik. Waswe, bae iumi tu strong for keepim faithful fasin taem iumi kasem olketa hard taem? Example bilong Job bae helpem iumi for minim gud samfala challenge wea maet iumi feisim.

Garem Loyal Fasin Taem Feisim Trabol

Olsem samting wea happen long Job, olketa trabol savve kasem iumi long enitaem. Job man wea garem hapi marit and garem tenfala pikinini and hem garem gudfala spiritual living. (Job 1:5) Bat Job nating savve hao faithful fasin bilong hem for God hem kamap wanfala raoa long kot long heven, and Satan hem disaed for brekem faithful fasin bilong hem long eni wei wea hem fit for duim.

Kwiktaem nomoa, Job lusim evri material riches bilong hem. (Job 1:14-17) Nomata olsem, faithful fasin bilong Job no wikdaon, from hem nating putim trust bilong hem long selen. Taem hem ting bak long taem hem rich, Job sei olsem: “Sapos mi trustim gold, . . . sapos mi hapi bikos mi garem staka samting, . . . datwan tu bae hem barava no fitim. . . , bikos mi denyim [trufala] God antap.”—Job 31:24, 25, 28.

Nomata distaem, man savve lusim evri samting wea hem ownim kwiktaem nomoa. Bisnis bilong wanfala man wea hem Jehovah’s Witness hem klosap brekdaon from samwan hem trikim hem and tekem staka selen bilong hem. Hem honest for sei olsem: “Mi klosap kasem heart attak. For tok stret, mi ting sapos mi no garem wei for fren witim God bae mi olsem nao. Nomata olsem, disfala experience mekem mi luksavve hao long datfala taem olketa spiritual samting no first samting long laef bilong mi. Interest for kasem selen hem winim evri nara samting.” Distaem disfala Witness katem daon waka saed long bisnis, and hem evritaem duim auxiliary pioneer service wea minim hem duim 50 hour or winim evri month insaed Christian ministry. Bat, samfala nara problem savve moa worse winim wei for lusim selen.

Job no garem taem for ting raonem yet nius abaotem hao evri riches bilong hem lus taem hem kasem nius hao tenfala pikinini bilong hem dae. Nomata olsem hem go ahed for sei: “Letem nem bilong Jehovah go ahed for kasem praise.” (Job 1:18-21) Waswe, bae iumi go ahed for keepim faithful fasin nomata sapos iumi seknomoa lusim samfala famili member? Francisco, wanfala Christian overseer long Spain, lusim tufala pikinini bilong hem taem wanfala bas hem accident. Hem kasem comfort taem hem kam klos long Jehovah and hem duim moa waka insaed long Christian ministry.

Nomata bihaen nogud wei wea hem lusim olketa pikinini bilong hem, trabol bilong Job hem no finis yet. Satan mekem hem kasem wanfala nogud sik wea pain tumas. Long datfala taem, Job kasem rongfala advaes from waef bilong hem. “Cursim God and dae!” hem sei long hem. Job nating lisin long advaes bilong hem, and hem nating “sin witim mouth bilong hem.” (Job 2:9, 10) Faithful fasin bilong hem no depend long saport bilong famili bilong hem, bat from wei wea hemseleva fren witim Jehovah.

Flora, wea hasband and firstborn son bilong hem lusim Christian wei winim tenfala year finis, hem minim feeling wea Job maet kasem. “Taem iu seknomoa lusim saport bilong famili bilong iu hem savve barava spoelem iu,” hem sei. “Bat mi savve hao mi bae no savve faendem eni hapi aotsaed long organization bilong Jehovah. So mi stand strong and putim Jehovah olsem first samting taem mi trae hard for go ahed for olsem gud waef and mami. Mi prea evritaem, and Jehovah strongim mi. Mi hapi from, nomata hasband bilong mi hem strong for againstim mi, mi lane for depend evribit long Jehovah.”

Long next trik bilong hem, Satan iusim thrifala fren bilong Job for brekem faithful fasin bilong hem. (Job 2:11-13) Hem mas barava feel nogud taem olketa tok againstim hem. Sapos hem bilivim toktok bilong olketa, hem bae lusim trust bilong hem long Jehovah God. Kaonsel bilong olketa wea no givim encouragement fit for mekem hem wikdaon and brekem faithful fasin bilong hem and sapos datwan happen plan bilong Satan hem win nao.

Bat long wei wea difren, Job hem sei: “Go kasem taem mi dae mi bae no tekemawe faithful fasin from miseleva!” (Job 27:5) Hem no sei, ‘Mi bae no letem iufala man tekemawe faithful fasin bilong mi!’ Job savve hao faithful fasin bilong hem depend long hemseleva and long love bilong hem for Jehovah.

Wanfala Old Trik for Kasem Olketa Niu Wan

Satan go ahed for mekius long olketa rong kaonsel bilong olketa fren and narawan wea biliv. Wei for feel wikdaon from olketa insaed kongregeson hem moa isi for mekem trust bilong iumi kamap wik winim wei for kasem persecution from aotsaed. Wanfala Christian elder wea bifor hem soldia wea faet insaed war hem talem hao pain hem kasem long faet hem difren from pain wea hem kasem from toktok and samting wea samfala Christian duim wea no showimaot fasin for kea. Hem sei olsem abaotem diswan: “Hem hard samting wea winim evri nara samting wea mi bin experiencem.”

Long narasaed, iumi maet feel nogud tumas long wei wea olketa brata bilong iumi no perfect gogo hem mekem iumi for no story long samfala and maet missim olketa Christian meeting tu. For mekem iumiseleva feel gud maet feel olsem hem nao moa important. Bat bae hem sorre samting sapos iumi no tingting gud and letem barava spesol samting wea iumi garem—wei wea iumi fren witim Jehovah—for kamap wik from toktok or samting wea olketa nara pipol duim. Sapos iumi letem datwan happen hem minim iumi foldaon long wanfala oldfala trik bilong Satan.

Hem tru, iumi fit for expectim Christian kongregeson for garem haefala standard. Bat, sapos iumi expectim tumas samting from olketa brata and sista wea no perfect, for sure iumi bae feel nogud. Long wei wea difren, Jehovah no expectim tumas samting from olketa servant bilong hem. Sapos iumi followim example bilong hem, iumi bae willing for acceptim wei wea olketa no perfect. (Ephesians 4:2, 32) Aposol Paul givim disfala kaonsel: “Sapos iu kros, no letem hem leadim iu for sin; no holem kros go kasem sun go daon, no givim eni chance for Devil.”—Ephesians 4:26, 27, The New English Bible.

Olsem Bible showimaot klia, Satan savve iusim planti kaen kleva trik for faendemaot—sapos hem fit for duim—wei for brekem faithful fasin bilong wanfala Christian. Samfala long olketa trik bilong hem maet luk gud long iumi olketa man wea no perfect, olketa narawan maet kosim pain. From samting iumi storyim finis, iu savve lukim why nao hem important tumas for mas redy gud. Mekem love bilong iu for God strong insaed heart bilong iu, disaed for pruvim hao Devil hem wanfala man for laea and mekem heart bilong Jehovah hem hapi. (Proverbs 27:11; John 8:44) Remember, iumi mas no lusim trufala Christian faithful fasin, nomata wanem kaen test iumi bae feisim.

[Footnote]