Wanem Samting Nao Iu Savve Lanem From Olketa Pikinini?
SAPOS samwan tok olsem long iumi olketa bigman: “Iu olsem pikinini man,” iumi bae feel nogud tumas. Iumi lovem olketa smol pikinini bat olketa no garem savve and wisdom wea olketa bigman garem.—Job 12:12.
Nomata olsem, wantaem Jesus sei long olketa disaepol bilong hem: “Tru nao, Sapos iufala no change and kamap olsem olketa smol pikinini, iufala bae nating savve go insaed long kingdom bilong heven.” (Matthew 18:3) Wanem nao Jesus hem minim? Olketa wanem fasin nao olketa pikinini garem wea olketa bigman shud garem tu?
Garem Hambol Fasin Olsem Pikinini
Tingim samting wea mekem Jesus for talem datwan. Bihaen Jesus and olketa disaepol bilong hem wakabaot farawe kam for kasem Capernaum, hem askem olketa olsem: “Wanem nao iufala argue abaotem long road?” Olketa disaepol stap kwaet from olketa feel shame, bikos olketa argue abaotem hu long olketa nao hem nambawan. Gogo olketa no fraet and askem Jesus olsem: “Really, hu nao nambawan insaed long kingdom bilong heven?”—Mark 9:33, 34; Matthew 18:1.
Maet iumi sapraes hao nomata olketa disaepol stap witim Jesus for klosap thrifala year finis, olketa gohed argue abaotem hu nao important winim narawan. Bat olketa big kam insaed Jew religion wea mekhae tumas long olketa samting olsem. Luk olsem diswan, witim wei for no perfect nao hem mekem olketa disaepol for garem diskaen tingting.
Jesus hem sidaon, kolem kam olketa disaepol long hem, and hem sei: “Sapos eniwan laek for first long olketa narawan, hem mas kamap last long evriwan and hem mas servem evriwan.” (Mark 9:35) Maet olketa seke tumas for herem datwan. Samting wea Jesus talem hem difren from tingting wea olketa Jew garem abaotem samting wea mekem man important! Then Jesus kolem kam wanfala smol pikinini. Hem putim hand bilong hem raonem datfala pikinini and sei olsem for strongim point bilong hem: “Tru nao, Sapos iufala no change and kamap olsem olketa smol pikinini, iufala bae nating savve go insaed long kingdom bilong heven. Dastawe, eniwan wea bae kamap hambol olsem disfala smol pikinini, hem nao nambawan long kingdom bilong heven.”—Matthew 18:3, 4.
Datwan barava nambawan wei for teachim man for hambol! Tingim samting wea happen. Wanfala smol pikinini standap midol long grup bilong olketa bigman. Olketa lukluk strong long hem. Pikinini hia no laek for winim or spoelem narawan! Hem willing for obey and no trae for mekem narawan tingse hem important! Tru nao, pikinini hia hem gudfala example bilong hambol fasin wea followim God.
Point wea Jesus talem hem klia. Sapos iumi laek for stap anda long Kingdom bilong God, iumi evriwan mas garem hambol fasin olsem olketa pikinini. Midolwan olketa tru Christian distaem, wea olketa insaed famili bilong God, hem no fitim for olketa praod and laek for winim olketa narawan. (Galatians 5:26) Tru nao, olketa fasin hia nao muvim Satan for bighed againstim God long firstaem. Dastawe Jehovah barava heitim olketa fasin hia!—Proverbs 8:13.
Olketa tru Christian no trae for bossim nara pipol bat olketa laek for servem olketa. Nomata iumi duim waka wea iumi no really enjoyim or duim samting for man wea no garem position or hem man nating, samting wea muvim iumi for serve nao hem trufala hambol fasin. Kaen hambol wei for servem narawan olsem hem mekem iumi kasem barava gud samting. Jesus hem sei: “Man wea willing for acceptim wanfala young pikinini olsem long nem bilong mi, hem acceptim mi; and man wea hem acceptim mi, hem no acceptim miseleva nomoa, bat hem acceptim tu datwan wea sendem mi kam.” (Mark 9:37) Wei for garem hambol and kaenfala fasin olsem pikinini hem mekem iumi for wan mind witim Ruler bilong full universe and Son bilong hem. (John 17:20, 21; 1 Peter 5:5) Wei for give bae mekem iumi hapi. (Acts 20:35) And iumi feel gud from iumi share for mekem pipol bilong God garem wan mind and peace.—Ephesians 4:1-3.
Willing for Lane and Trustim Narawan
Jesus mekhae long nara samting moa wea olketa bigman savve lanem from olketa pikinini taem hem sei: “Eniwan wea no acceptim kingdom bilong God olsem wanfala smol pikinini bae kanduit go insaed long hem.” (Mark 10:15) Olketa pikinini hambol, and tu, olketa willing for lane. Wanfala mami storyim wei wea olketa pikinini savve kasem and minim staka information.
Dastawe, iumi mas acceptim and obeyim message abaotem Kingdom mekem iumi stap insaed Kingdom bilong God. (1 Thessalonians 2:13) Olsem olketa baby wea just born, iumi mas “mekem feeling for barava hangre for datfala klinfala milk wea hem nao toktok bilong God, kamap moa big, mekem [iumi] savve grow for kasem salvation thru long datwan.” (1 Peter 2:2) Waswe sapos hem hard for iu minim wanfala teaching from Bible? Wanfala woman wea waka bilong hem for lukaftarem olketa pikinini hem sei: “Hem wei bilong olketa pikinini for evritaem askem kwestin, ‘Why?’ go kasem taem olketa hapi long ansa wea olketa herem.” Bae hem gud for iumi followim example bilong olketa. So gohed for study. Story witim olketa Christian wea servem Jehovah for longfala taem finis. Askem Jehovah for givim iu wisdom. (James 1:5) Gogo, bae iu kasem gud samting from wei wea iu gohed for prea.—Matthew 7:7-11.
Bat maet samfala sei, ‘Bae hem isi nomoa for pipol giamanim olketa wea willing for lane.’ Bat bae hem hard for eniwan giamanim olketa sapos information olketa kasem hem stret wan. Olsem example, hem wei bilong olketa pikinini for askem parents for helpem olketa for savve wanem for duim. Wanfala dadi hem sei: “Wei wea parents protectim and provaedem samting olketa pikinini needim evriday showimaot hao olketa pikinini savve trustim parents bilong olketa.” Tru nao, iumi savve trustim Dadi bilong iumi wea stap long heven, Jehovah, for olketa sem reason. (James 1:17; 1 John 4:9, 10) Jehovah provaedem help wea iumi savve trustim insaed long Word bilong hem. Iumi kasem comfort and help from holy spirit and organization bilong hem. (Matthew 24:45-47; John 14:26) Taem iumi kasem help from olketa samting hia, datwan bae stopem eni samting for spoelem spiritual saed bilong iumi.—Psalm 91:1-16.
Wei for mekem trust bilong iumi long God kamap big olsem trust wea pikinini garem, hem mekem iumi for no wari long eni samting tu. Wanfala Bible savveman hem sei: “Taem iumi pikinini hem olsem iumi go long wanfala gogo wea iumi no garem selen for peim pasis, and iumi no savve long eni samting abaotem hao iumi bae kasem ples iumi go long hem. Nomata olsem, iumi nating daotem hao parents bilong iumi bae mek sure iumi kasem datfala ples and no eni samting bae spoelem iumi.” Waswe, iumi garem semkaen wei for trustim Jehovah tu long evri samting iumi duim long laef?—Isaiah 41:10.
Wei for trustim God evribit helpem iumi for stap klia long wei for duim olketa samting and garem olketa tingting wea savve spoelem wei wea iumi fren witim God. Iumi trustim toktok wea Jesus talem hao Dadi bilong iumi long heven savve long olketa samting iumi duim, and sapos iumi gohed duim olketa samting bilong Kingdom firstaem and raeteous fasin bilong God, Hem bae lukaftarem iumi. Datwan bae helpem iumi for againstim wei for aftarem material samting nomoa, wea bae mekem iumi no garem inaf taem for duim olketa spiritual responsibility bilong iumi.—Matthew 6:19-34.
“Saed Long Wei for Duim Olketa Nogud Samting, Kamap Olsem Wanfala Baby”
Nomata olketa smol pikinini no perfect taem olketa born, olketa garem klinfala heart and mind. Dastawe Bible encouragem olketa Christian olsem: “Saed long wei for duim olketa nogud samting, kamap olsem wanfala baby.”—1 Corinthians 14:20.
Monique wea faev year, hem hapi tumas taem hem sei olsem long mami bilong hem: “Niu fren bilong mi Sarah garem soft hair olsem mi tu!” Hem no talem eni samting abaotem hao Sarah garem difren kala skin and kam from difren ples. Wanfala mami hem sei: “Olketa smol pikinini no tingim wanem kala nao skin bilong man. Olketa no tingim ples wea man kam from, olketa acceptim nomoa evriwan.” Long wei olsem, olketa pikinini barava showimaot klia tingting bilong God bilong iumi wea no teksaed, and wea lovem pipol from evri kantri.—Acts 10:34, 35.
Olketa pikinini willing tumas tu for forgivim narawan. Wanfala dadi hem sei: “Taem Jack and Levi faet, mifala talem tufala for sei sorre long each other, and no longtaem bihaen, tufala hapi for plei moa. Olketa no feel nogud olowe, and olketa no talem moa mistek wea narawan duim bifor, or forcem man for sei sorre bifor olketa forgivim hem. Olketa fren bak moa and gohed for plei.” Datwan hem nambawan example for olketa bigman followim!—Colossians 3:13.
And tu, olketa smol pikinini barava acceptim hao God hem stap. (Hebrews 11:6) Wei wea olketa honest, and talem nomoa samting olketa tingim hem mekem olketa no fraet for preach long pipol. (2 Kings 5:2, 3) Nomata maet heart bilong man hem olsem ston, prea bilong pikinini wea simpol and wea kam from heart savve muvim man olsem. And taem olketa kasem test, olketa strong for duim stret samting. Olketa pikinini olketa nambawan present!—Psalm 127:3, 4.
Kasem Bak Olketa Naesfala Fasin
Maet iu garem tingting olsem, ‘Waswe, olketa bigman savve kasem bak olketa naesfala fasin wea olketa garem taem olketa smol pikinini?’ Ansa hem ia! Tru tumas, komand bilong Jesus for “kamap olsem olketa smol pikinini” showim hao man savve duim datwan.—Matthew 18:3.
Tingim diswan: Wanfala grup bilong olketa man waka for repairim wanfala old haos. Olketa aotem oldfala paint and paintim niu moa. Bihaen olketa waka hard for samfala month finis, datfala haos hem barava luk naes moa olsem firstaem. Long sem wei tu, sapos iumi gohed and no givap, iumi kasem help from Jehovah, and kasem tu love and sapot from Christian kongregeson, iumi savve kasem bak olketa naesfala fasin wea iumi garem taem iumi pikinini.—Ephesians 5:1.