Kwestin From Reader

Long Matthew 19:10-12, Jesus story abaotem olketa wea chus for no marit and hem sei “God mekem olketa fit for duim olsem.” Waswe, God helpem olketa long mirakol wei for stap singol?

Tingim why Jesus talem datfala toktok long Matthew 19:10-12 abaotem wei for stap singol. Olketa Pharisee askem kwestin abaotem wei for divorce, so Jesus storyim tingting bilong Jehovah abaotem marit. Jesus sei Law bilong Moses letem hasband for raetem wanfala pepa for divorce and sendem waef bilong hem go bak sapos “hem lukim wanfala nogud samting wea hem duim,” bat taem God wakem firstfala man and woman hem no olsem. (Deut. 24:1, 2) Then hem sei: “Eniwan wea lusim waef bilong hem and maritim narawan bae spoelem waef bilong hem bikos datwan hem adultery. Bat sapos waef hem durong, hem savve lusim hem.”—Matt. 19:3-9.

Bihaen olketa disaepol herem datwan, olketa sei: “Ei! Sapos marit hem olsem, bae hem gud nomoa for no marit.” Jesus sei long olketa: “No evri man followim toktok hia. Olketa wea followim nomoa, hem olketa wea God mekem olketa fit for duim olsem. Samfala man no savve marit bikos olketa born kam olsem nao, and samfala man olketa no savve marit bikos olketa man nao mekem olketa for olsem. Bat samfala moa olketa disaed for no marit mekem olketa savve duim moa samting for Kingdom bilong God. Sapos man hapi for stap singol olsem, hem gud nomoa.”—Matt. 19:10-12.

Samfala man no savve marit bikos olketa born olsem nao, and samfala no savve marit bikos olketa kasem accident or samwan spoelem body bilong olketa. Samfala narawan fit for marit bat olketa “disaed for no marit mekem olketa savve duim moa samting for Kingdom bilong God,” olsem Jesus duim. God no duim eni mirakol for mekem olketa laek stap singol and olketa no born witim feeling for laek stap singol tu. Olketa chus for stap singol and hapi nomoa for duim datwan.

Aposol Paul tu story abaotem olketa wea chus for no marit. Hem sei evri Christian, nomata olketa marit or singol, savve duim wanem God laekem, bat samwan wea hem “hapi nomoa for stap singol bikos hem disaedem datwan finis long heart bilong hem,” bae “kasem staka gud samting.” Why nao olsem? Bikos olketa wea marit mas iusim taem and strong bilong olketa for lukaftarem marit partner bilong olketa. Bat olketa Christian wea singol savve iusim full taem bilong olketa long waka bilong Lord. Olketa luksavve for stap singol hem gud samting.—1 Cor. 7:7, 32-38.

So taem Bible sei “God mekem olketa [wea singol] fit for duim olsem,” datwan no minim God helpem olketa long mirakol wei for stap singol. Man seleva nao chus for stap singol and hem hapi for duim datwan mekem hem savve busy long Kingdom waka. Staka distaem duim olsem and olketa narawan shud sapotim olketa.