Iumi Mas Traem Best for Hambol

1, 2. Wanem nao Jesus teachim olketa aposol, and why nao olsem?

WANDAY long 32 C.E., taem Jesus and olketa aposol long Galilee, olketa aposol start for raoa abaotem hu long olketa nao important. Luke raet abaotem diswan long buk bilong hem. Hem sei: “Olketa raoa abaotem hu long olketa nao hem important. Jesus savve long tingting bilong olketa, so hem tekem kam wanfala smol pikinini. Hem mekem hem standap saed long hem and sei: ‘Man wea duim gudfala samting long disfala smol pikinini, and wea duim datwan long nem bilong mi, hem duim gudfala samting long mi tu. And man wea duim gudfala samting long mi, hem duim gudfala samting tu long man wea sendem mi kam. Eni man long iufala wea hambol, hem nao man wea important.’” (Luke 9:46-48) Jesus hem patient for helpem olketa aposol for luksavve olketa mas hambol.

² Waswe, long datfala taem olketa Jew tingse hem gud samting for man hem hambol? Nomoa. Staka no garem datkaen tingting. Wanfala buk hem sei hem wei bilong olketa Jew bifor for laek savve hu long olketa nao important and hu nao no important, and olketa evritaem wari nogud olketa no showimaot respect long narawan wea hem fit for kasem. (Theological Dictionary of the New Testament) Jesus laekem olketa disaepol bilong hem for no olsem olketa Jew long datfala taem.

3. (a) Man wea hambol hem hao, and why nao maet hem no isi for iumi hambol samfala taem? (b) Long disfala study bae iumi ansarem olketa wanem kwestin?

³ Man wea hambol hem no tinghae tumas long hemseleva and hem ting long narawan olsem hem important winim hem. Jesus sei olketa aposol shud olsem olketa pikinini wea hambol and no tinghae tumas long olketa seleva. Olketa tru Christian distaem tu mas lane from wanem Jesus teachim long olketa aposol. Maet samfala taem hem no isi for iumi hambol. Hem wei bilong iumi olketa man wea born sin for praod and laek garem bignem. And tu, tingting bilong pipol long world savve mekem iumi selfish, or laek winim or bossim narawan. Wanem nao savve helpem iumi for hambol? Wanem nao Jesus minim taem hem sei man wea hambol, “hem nao man wea important”? Hao nao iumi savve showimaot iumi hambol?

“OLKETA BLESSING, WISDOM, AND SAVVE BILONG GOD BARAVA BIG TUMAS!”

4, 5. Wanem nao savve helpem iumi for hambol? Storyim example.

⁴ Wanfala samting wea savve helpem iumi for hambol hem for luksavve Jehovah hem barava winim iumi. Bible sei no eniwan bae fit for savve long evri samting wea Jehovah savve long hem. (Isa. 40:28) Aposol Paul hem sei olsem abaotem Jehovah: “Olketa blessing, wisdom, and savve bilong God barava big tumas! Hem hard for iumi barava minim olketa judgment bilong God and olketa wei bilong hem!” (Rom. 11:33) Insaed 2,000 year wea go pas bihaen Paul raetem datwan, olketa man lanem staka samting. Nomata olsem, bae iumi no finis for lane abaotem Jehovah, olketa samting wea hem duim, and tingting bilong hem.

⁵ Samting wea helpem Leoa for hambol hem taem hem luksavve hem bae no lanem evri samting abaotem creation bilong God. Taem Leo hem young, hem interest tumas long science. Hem laekem tumas for lane abaotem olketa samting long universe, so hem studyim datwan long university. Gogo hem luksavve science seleva no savve helpem olketa man for minim evri samting abaotem universe. So hem stop for studyim datwan and hem start for studyim law. Gogo Leo hem kamap lawyer and bihaen hem kamap judge. Bihaen, hem and waef bilong hem studyim Bible witim Olketa Jehovah’s Witness and tufala baptaes. Nomata Leo garem bigfala savve, wanem nao helpem hem for hambol? Hem sei: “Mi luksavve nomata iumi lanem staka samting abaotem Jehovah and universe, staka samting stap yet for iumi lanem.”

6, 7. (a) Hao nao Jehovah showimaot nambawan example long wei for hambol? (b) From God hem hambol, hao nao datwan mekem David and iumi “important”?

⁶ Nara samting wea savve helpem iumi for hambol hem for luksavve Jehovah hem hambol. Bible sei iumi “waka tugeta witim God.” (1 Cor. 3:9) Datwan hem nambawan privilege! Jehovah, wea hem Barava Haefala God hem laekem iumi for waka tugeta witim hem. Hem givim iumi privilege for iusim Word bilong hem, Bible, for preachim gud nius. Nomata Jehovah nao mekem seed for grow, hem givim privilege long iumi for plantim and watarem olketa seed hia. (1 Cor. 3:6, 7) Diswan showimaot God hem barava hambol. Example bilong Jehovah shud encouragem iumi evriwan for hambol tu!

⁷ David barava tinghae long wei wea God hem hambol. Hem sei long Jehovah: “Iu sevem mi witim shield bilong iu, and from iu hambol datwan nao mekem mi important.” (2 Sam. 22:36) David luksavve reason why hem kamap important man long Israel hem bikos Jehovah hem hambol. From Jehovah hem hambol datwan mekem hem tingim and helpem David. (Ps. 113:5-7) Long sem wei, evri samting wea iumi garem olsem gudfala wei bilong iumi, savve, or eni privilege wea iumi kasem, Jehovah nao givim long iumi bikos hem hambol. (1 Cor. 4:7) Taem Jesus sei man wea hambol hem “important,” hem minim wei wea Jehovah savve iusim datfala man for duim plande gud samting. (Luke 9:48) Bae iumi storyim samfala gud samting hia.

‘MAN WEA HAMBOL, HEM NAO IMPORTANT’

8. Why nao olketa insaed organization bilong God mas hambol?

⁸ Olketa wea hambol sapotim olketa arrangement insaed kongregeson, and olketa hapi insaed long organization bilong God. Olsem example, Petra hem wanfala young woman wea growap insaed Witness famili. Bat hem lusim kongregeson bikos hem laek followim tingting bilong hemseleva. Samfala year bihaen, hem start for attendim olketa meeting moa. Distaem hem hapi for stap insaed organization bilong Jehovah and for sapotim olketa arrangement bilong kongregeson. Why nao tingting bilong hem difren distaem? Petra sei: “Mi luksavve for mi hapi insaed organization bilong God hem important for mi mas hambol and no tinghae tumas long miseleva.”

9. Man wea hambol bae ting hao long Bible and olketa pablikeson bilong iumi, and wanem gud samting nao bae hem kasem?

⁹ Man wea hambol bae tinghae long evri gud samting wea Jehovah givim long pipol bilong hem, wea wanfala nao hem spiritual kaikai. So man wea hambol bae studyim gud Bible and evritaem readim olketa Wastaoa and Awake! magasin. Staka Christian readim evri niu magasin or buk bifor olketa putim long library bilong olketa. Iumi savve showimaot iumi hambol and tinghae taem iumi readim and studyim olketa pablikeson bilong iumi. Sapos iumi duim olsem, datwan bae strongim wei wea iumi fren witim Jehovah, and bae hem savve iusim iumi for duim moa samting long waka bilong hem.—Heb. 5:13, 14.

10. Hao nao iumi savve showimaot iumi hambol insaed long kongregeson?

¹⁰ Man wea hambol hem “important” long nara wei tu. Jehovah iusim holy spirit bilong hem for markem olketa elder long olketa kongregeson. Olketa elder organizem olketa meeting and preaching waka, and lukaftarem kongregeson. Taem iumi hambol for followim wanem olketa elder talem, iumi helpem full kongregeson for hapi, garem peace, and wan mind. (Readim Hebrew 13:7, 17.) And sapos iu elder or ministerial servant, waswe, iu showimaot iu hambol long wei for tinghae long privilege wea Jehovah givim long iu?

11, 12. Wanem kaen man nao Jehovah savve iusim insaed organization, and why nao olsem?

¹¹ Man wea hambol hem “important” insaed organization bilong Jehovah bikos datwan minim God savve iusim hem for duim plande gud samting. Jesus talem olketa disaepol bilong hem for hambol bikos samfala long olketa followim wei bilong pipol long datfala taem for praod. Luke 9:46 sei: “Olketa raoa abaotem hu long olketa nao hem important.” Maet iumi tu start for tingse iumi important winim olketa nara brata and sista or nara pipol. Iumi mas no olsem pipol long world wea plande long olketa praod and selfish. Sapos iumi hambol and Kingdom nao hem first samting long laef bilong iumi, datwan bae encouragem olketa brata and sista bilong iumi.

¹² Iumi laek followim kaonsel bilong Jesus for hambol long evri samting wea iumi duim long laef bilong iumi. Bae iumi storyim thrifala wei wea iumi savve followim datfala kaonsel bilong Jesus.

TRAEM BEST FOR HAMBOL

13, 14. Wanem nao hasband and waef savve duim wea showimaot tufala hambol, and hao nao datwan savve affectim marit bilong tufala?

¹³ Insaed long marit. Staka pipol distaem tingim nomoa raet bilong olketa seleva and no tingim raet bilong narawan. Bat man wea hambol hem garem semkaen tingting wea Paul encouragem olketa Christian long Rome for garem. Hem sei: “Iumi mas traem best for stap gud witim nara pipol and duim olketa samting wea savve strongim narawan.” (Rom. 14:19) Man wea hambol hem traem best for stap gud witim evriwan, and especially witim marit partner bilong hem.

¹⁴ Olsem example, maet hapitaem wea hasband laekem hem difren from hapitaem wea waef bilong hem laekem. Maet hasband laek for stap long haos and lukluk sports long TV, bat waef laek for go picnic or visitim olketa fren. Bae hem moa isi for waef respectim hasband sapos hasband no tingim nomoa wanem hemseleva laekem, bat hem hambol and tingim tu wanem waef bilong hem laekem. And hasband bae lovem and tinghae long waef sapos waef no forcem tufala for duim nomoa wanem hemseleva laekem, bat hem tingim tu wanem hasband bilong hem laekem. Taem tufala evriwan hambol, datwan strongim marit bilong tufala.—Readim Philippi 2:1-4.

15, 16. Long Psalm 131, David encouragem olketa Israelite for duim wanem samting, and hao nao iumi savve duim sem samting insaed long kongregeson?

¹⁵ Insaed long kongregeson. Staka pipol long world laek for stretawe kasem wanem olketa laekem. Olketa no patient and les for weit for eni samting. Taem iumi hambol, datwan helpem iumi for weit long Jehovah. (Readim Psalm 131:1-3.) Sapos iumi hambol and weit long Jehovah, bae hem blessim iumi. Bae iumi feel sef, iumi satisfae and hapi. Dastawe David encouragem olketa Israelite for weit long God bilong olketa!

¹⁶ Iu savve feel hapi and satisfae olsem David taem iu hambol and weit long Jehovah. (Ps. 42:5) Olsem example, maet iu laek for elder mekem iu savve duim moa samting for helpem kongregeson. (1 Tim. 3:1-7) Sapos olsem, iu shud traem best for kasem olketa mark wea stap long Bible for olketa elder, wea holy spirit helpem man for garem. Bat waswe sapos iu no kamap elder kwiktaem olsem olketa narawan? Man wea hambol bae patient and weit for kasem eni privilege long kongregeson. Hem bae hapi for gohed duim eni samting wea hem fit for duim long kongregeson and long waka bilong Jehovah.

17, 18. (a) Why nao hem gud for forgivim narawan and askem narawan for forgivim iumi? (b) Wanem advaes nao Proverbs 6:1-5 hem talem?

¹⁷ Long olketa narawan. Staka pipol faendem hem hard samting for sei sorre long narawan. Bat pipol bilong God traem best for hambol and talemaot mistek bilong olketa and askem narawan for forgivim olketa. Olketa willing for forgivim mistek bilong narawan tu. Wei for praod savve mekem staka problem kamap, bat taem man willing for forgive, datwan mekem kongregeson garem peace.

¹⁸ Samfala taem iumi need for sei sorre, and datwan showimaot iumi hambol. Olsem example, maet iumi wanfala agreement witim narawan, bat from samfala samting happen, iumi no fit for duim wanem iumi promisim. Long taem olsem, iumi shud luksavve long eni rong samting wea iumi duim wea kosim datfala problem and talemaot datwan, nomata maet narawan tu garem blame for samting wea happen—Readim Proverbs 6:1-5.

19. Why nao iumi shud tinghae long wei wea Bible encouragem iumi for hambol?

¹⁹ Iumi tinghae long wei wea Bible encouragem iumi for hambol. Samfala taem hem no isi for iumi hambol. Bat sapos iumi ting raonem hao Jehovah barava winim iumi and wei wea Jehovah hem hambol, bae iumi laek for olsem tu. Sapos iumi hambol Jehovah savve iusim iumi for duim plande gudfala samting. So iumi evriwan laek traem best for hambol.