Stap Klia From Danger Area!
HEM waka bilong man for studyim volcano for lukluk gud and disaed followim olketa pruv and then givim warning hao volcano hem klosap bosta. (Bihaen Maunt Fugen hem bosta, police need for keepim pipol awe from datfala danger area.) Long sem wei, olketa Bible student lukluk gud long saen bilong “taem bilong end bilong disfala system” and givim warning long pipol abaotem wanfala danger samting wea klosap for happen.—Matthew 24:
Long sem chapter bilong Bible wea givim warning abaotem bigfala trabol wea klosap happen long full world, iumi savve read abaotem olketa samting wea bae lead go long diswan: “Nation bae go againstim nation and kingdom againstim kingdom, and kaikai bae short and earthquake bae kamap long planti ples. . . . Planti giaman profet bae kamap and giamanim planti pipol; and from fasin for brekem law hem kamap moa big love bilong planti pipol bae kamap cold. . . . And olketa bae talemaot disfala gud nius bilong kingdom evriwea long earth for givim witness long evri nation; and then end bae kam.”—Matthew 24:7-14.
Iumi no need for barava savve gud long nius for luksavve long wei wea disfala profesi fulfill distaem. Start from 1914, diswan barava affectim iumi evriwan. Disfala century lukim tufala world war, bigfala namba long olketa kantri wea garem war, ethnic tension and faet midolwan olketa religion. Olketa man short long kaikai bikos long olketa war hia, and olketa natural disaster tu mekem pipol short long need bilong olketa. Staka dae from olketa earthquake. Olketa cult wea garem olketa nogud leader and olketa follower wea ova tumas kamap distaem. Wei wea “fasin for brekem law hem kamap moa big” hem mekem pipol for no showimaot love, and wei for fren gud witim neiba hem no wei bilong pipol distaem.
Preaching waka evriwea long world, narafala part bilong saen, hem barava fulfill. Lukim moa kava bilong disfala magasin and iu bae lukim toktok “Wea Talemaot Kingdom Bilong Jehovah” olsem part bilong title. Wastaoa magasin wea olketa pablisim long 132 languis and olketa printim winim 22 million copy, hem main tul for olketa wea talemaot “disfala gud nius bilong kingdom” evriwea long earth. Part long disfala gud nius hem datfala message hao Creator bilong universe, Jehovah God, hem startim finis wanfala Kingdom long heven wea bae distroem disfala wicked world and bringim wanfala paradaes long earth. Tru tumas, iumi savve lukim distaem datfala saen hao God klosap nao bae duim samting, wea showaot laef bilong pipol long disfala system stap long danger.—Markem 2 Timothy 3:1-5; 2 Peter 3:3, 4; Revelation 6:1-8.
Day Bilong Jehovah wea Mekem Man Fraet
Wanem nao bae happen long taem wea fit for Jehovah givimaot judgment bilong hem? Lisin long wei wea hemseleva storyim samting wea bae happen long datfala taem: “Mi bae givim olketa saen long heven and long earth, blood and fire and bigfala smoke. Sun seleva bae kamap dark, and moon bae kamap olsem blood, bifor bigfala day bilong Jehovah wea fit for mekem man fraet hem kam.”—Joel 2:30, 31.
Datfala day, wea mekem man moa fraet and bae barava spoelem samting winim eni bosta bilong volcano or earthquake, hem klosap. Profet Zephaniah hem sei: “Disfala bigfala day bilong Jehovah hem klosap. Hem klosap nao, and hem start for hariap tumas. . . . From fire bilong strong bilong hem full earth bae finis, from hem bae finisim evribit, tru nao long wei wea nogud tumas, olketa pipol bilong earth.” Nomata “silver bilong olketa and gold bilong olketa bae no fit for sevem olketa long day bilong bigfala kros bilong Jehovah,” wanfala wei stap for man sev long datfala day wea fit for mekem man fraet.—Zephaniah 1:14-18.
For showimaot hao, Zephaniah hem sei: “Bifor bigfala kros bilong Jehovah hem kam againstim iufala pipol, bifor day bilong kros bilong Jehovah hem kam againstim iufala, lukaotem Jehovah, iufala olketa kwaet wan long earth . . . Lukaotem raeteous fasin, lukaotem kwaet fasin. Maet iufala savve haed long day bilong kros bilong Jehovah.” (Zephaniah 2:2, 3) Iumi savve stap long sef ples taem iumi ‘lukaotem Jehovah, lukaotem raeteous fasin, and lukaotem kwaet fasin.’ Hu long distaem nao lukaotem Jehovah?
Maet iu joinim word “Jehovah” long Olketa Witness Bilong Jehovah from preaching waka bilong olketa and kasem tu disfala magasin from wanfala long olketa. Pipol savve long olketa olsem olketa gudfala pipol long community wea garem stretfala living. Olketa waka hard for werem “niufala fasin,” wea insaed diswan hem wei for mekem grow kwaet fasin. (Colossians 3:8-10) Olketa talemaot hao diswan hem kamaot from wei for kasem teaching from organization bilong Jehovah long earth, wea hem thru long olketa kongregeson bilong Olketa Witness Bilong Jehovah evriwea long earth. Yes, iu savve faendem sef ples witim “full sekson bilong olketa brata” midolwan long Olketa Witness Bilong Jehovah evriwea long earth.—1 Peter 5:9.
Faendem Sef Ples Distaem
For faendem sef ples thru long wei for lukaotem Jehovah, iumi need for kamap fren bilong hem. Wanem nao insaed diswan? Bible hem ansa: “Waswe, iufala no savve hao wei for fren witim world hem wei for enemy witim God? So, eniwan wea laek for kamap fren bilong world hem mekem hemseleva kamap enemy bilong God.” (James 4:4) For kamap fren bilong God, iumi mas aotem eni feeling for want for klos witim disfala wicked world distaem wea garem fasin for againstim God.
Bible hem kaonselem iumi: “No lovem world or olketa samting insaed long world. Sapos eniwan lovem world, love bilong Father no stap insaed long hem; bikos evriting long world—samting wea body kavetem and samting wea eye kavetem and wei for showimaot samting wea man garem—hem no kam from Father, bat hem kam from world. And tu, world hem redy for finis and evri samting wea hem wantem tu, bat man wea duim will bilong God bae stap olowe.” (1 John 2:15-17) Samting wea body kavetem nao muvim staka pipol distaem—ova tumas long wei for wantem sex, greedy for aftarem selen, and iusim paoa long rong wei. Bat for stap long saed bilong Jehovah, man mas winim olketa wei for kavet hia.—Colossians 3:5-8.
Maet iu readim disfala magasin samfala taem, and maet iu agree long wei wea hem minim olketa Bible profesi. Nomata olsem, maet iu hol bak for duim moa samting long wei for kaban witim olketa Olketa Witness Bilong Jehovah. Bat sapos iumi feisim wanfala disaster, waswe, hem inaf for just herem warning nomoa? Olsem iumi savve lukim from samting wea happen taem Maunt Fugen hem bosta, iumi need for duim samting followim warning. Remember, winim 15 niusman and pipol for tek piksa wea wantem tumas for report abaotem datfala volcano olketa lusim laef bilong olketa. Tru nao, wanfala man for tek piksa dae witim finger bilong hem long wanfala button bilong camera bilong hem. Wanfala man for studyim volcano—wea sei, “Sapos wanday mi mas dae, mi laekem hem for happen saed long wanfala volcano”—hem lusim laef bilong hem long barava wei wea hem laekem. Evriwan loyal long waka and goal bilong olketa. Nomata olsem, olketa lusim laef bilong olketa—samting wea kamaot from wei for no followim warning.
Staka distaem herem message abaotem disison bilong God for distroem disfala wicked system and long samfala wei luksavve hao disfala warning hem stret. ‘Gogo maet hem kam,’ olketa maet sei long olketa seleva, ‘bat no tuday.’ Olketa no laek tingim day bilong Jehovah go kasem wanfala taem long future from olketa les for lusim samting wea olketa seleva ting long hem olsem hem important distaem.
Baruch garem sem problem. From hem secretary bilong profet Jeremiah, witim fasin for no fraet Baruch warnim olketa Israelite abaotem wei wea Israel klosap for distroe evribit. Bat, wantaem hem kamap taed long waka bilong hem. From diswan, Jehovah stretem hem: “Bat iu, iu go ahed for lukaotem bigfala samting for iuseleva. No go ahed for lukaotem.” Nomata sapos hem riches, big nem, or wei for feel sef long material wei, Baruch mas no ‘lukaotem bigfala samting for hemseleva.’ Hem mas interest long wanfala samting, for duim will bilong God for helpem pipol saed witim Hem. From diswan, hem bae kasem ‘soul bilong hem olsem reward.’ (Jeremiah 45:1-5) Long sem wei, winim wei for ‘lukaotem bigfala samting for iumiseleva,’ iumi mas lukaotem Jehovah, wea savve lead go long wei for sevem laef bilong iumi.
Long Maunt Fugen, winim 12-fala police and volunteer fireman olketa waka taem barava hot samting bilong volcano kasem olketa. Olketa trae for helpem and protectim pipol wea stap long danger. Olketa olsem olketa man and woman wea garem gudfala goal wea waka hard for mekem world kamap moabeta. Nomata goal bilong olketa fit for kasem praise, “samting wea olketa wakem kruked kanduit kamap stret.” (Ecclesiastes 1:15) Disfala kruked world kanduit for kamap stret. Waswe, hem fitim for man mekem hemseleva “fren witim world” thru long wei for trae sevem world wea God disaed strong for distroem?
Bihaen Iu Ranawe, Stap Klia
For ranawe from wanfala world wea insaed danger hem wan samting, bat hem difren samting for go ahed for stap sef witim “full sekson bilong olketa brata.” (1 Peter 2:17) Iumi mas no forgetim olketa farmer wea, bihaen olketa lusim ples bilong olketa, olketa go bak for chekim gaden klosap long Maunt Fugen. Maet, olketa barava laek for kasem bak “normal” laef bilong olketa bifor. Bat iu luksavve hao disison bilong olketa for go bak hem no wise. Maet datwan hem no firstaem wea olketa akrosim spialaen bilong danger area. Olketa maet go insaed datfala danger area for lelebet taem nomoa and no eniting happen. Nextfala taem, maet olketa stap longtaem lelebet, and still no eniting happen. Maet gogo, olketa akrosim olowe datfala danger area, gogo olketa no fraet for stap long danger area.
Jesus Christ storyim wanfala sem samting wea bae happen long “taem bilong end bilong disfala system.” Hem sei: “Olsem olketa duim bifor long flood, olketa kaikai and drink, olketa man marit and givim olketa woman for marit, go kasem taem wea Noah hem go insaed long ark; and olketa nating lisin gogo flood hem kam and swipim olketa go, olsem tu long taem wea Son bilong man bae stap moa.”—Matthew 24:3, 38, 39.
Lukim hao Jesus tok abaotem kaikai, drink, and wei for marit. No eniting hia hem rong long eye bilong Jehovah. So wanem nao hem rong? Pipol long taem bilong Noah “nating lisin,” evriday living bilong olketa hem main samting long laef bilong olketa. Long taem bilong emergency, man kanduit garem “normal” laef. Bihaen iu ranawe from, or separatem iuseleva from disfala world wea gogo for finis, iu mas faet againstim eni feeling for want for go bak for tekem samting from hem. (1 Corinthians 7:31) Maet iu savve lusim sef spiritual area and then kam bak sef and no eniwan lukim iu. Bat, datwan bae mekem iu no fraet for go bak moa long world, and stap longtaem lelebet winim taem bifor. Gogo iu start for garem tingting olsem: “End bae no kam tuday.”
And tu, tingim thrifala taxi draeva wea lusim laef bilong olketa from olketa weitim olketa niusman and pipol for tek piksa taem hot lava kamdaon from volcano. Samfala distaem maet followim olketa narawan wea laek go bak long world. Nomata wanem, hem klia hao wei for letem narawan switim iu for go bak long danger area bae spoelem man nomoa.
Evriwan wea dae taem Maunt Fugen hem bosta olketa akrosim spialaen and go long danger area. Nomata olketa expectim datfala maunten for bosta wanday, no eniwan ting bae hem happen long datfala day. Thru long wei for lukluk long olketa saen bilong end bilong disfala system, staka expectim datfala day bilong Jehovah for happen wan taem bat no long wanfala taem wea klosap. Samfala tingse tu datfala day nating savve kamap “tuday.” Tru nao, hem danger samting for garem tingting olsem.
Aposol Paul givim warning: “Day bilong Jehovah bae kam olsem man for steal.” Iumi need for stap wekap, “weitim and tingting evritaem long taem wea day bilong Jehovah bae stap,” for duim “best bilong iufala mekem long end, Hem savve lukim iufala no garem mark or dirty, and long peace.” (2 Peter 3:10-14) Bihaen disfala wicked system hem finis evribit, wanfala paradaes earth anda long Kingdom Bilong God bae kamap. Iumi mas no letem mind bilong iumi switim iumi for go insaed datfala danger area, from day wea iumi akrosim datfala spialaen for go insaed world maet hem nao day bilong Jehovah.
Stap sef witim pipol bilong Jehovah and go ahed for stap witim olketa.
[Piksa long page 7]
Stap sef witim pipol bilong Jehovah and go ahed for stap witim olketa
[Piksa Credit Line long page 4]
Iwasa/Sipa Press